Лука 20
20
ЯТӀОКӀЭНЭРЭШЪХЬ
Джурт тхьэматэхэр Исус итетыгъо къезытыгъэмкӀэ къызэреупчӀыгъэхэр
(Маттэ 21:23-27; Марк 11:27-33)
1Мафэ горэм Тхьэм иунэшхо чӀэтэу, Исус цӀыфхэм Тхьэм игущыӀэхэр аригъашӀэзэ, къэбарышӀур аригъэӀущтыгъ. Джащыгъум дин пэщэшхохэмрэ Тэурат егъэджэкӀо пащэхэмрэ нахьыжъхэр ягъусэхэу къыбгъодахьэхи, къеупчӀыгъэх:
2– КъытаӀу, мы Ӏофхэр пшӀэнхэу фитыныгъэр тыда къыздипхыгъэр, е ахэр пшӀэнхэу тетыгъор хэта о къыозытыгъэр?
3– Сэри шъо Ӏоф горэкӀэ сышъоупчӀыщт, – ариӀожьыгъ Исус. – ПэгъокӀ къысэшъут. 4Иуан цӀыфхэр ыумэхъынхэу хэта къэзгъэкӀуагъэр, цӀыфхэр ара, хьауми Тхьэр ара?
5– «Тхьэр ары Иуан къэзгъэкӀуагъэр» тӀомэ, «Адэ, сыда Иуан къыӀуагъэхэр шъушӀошъ зыкӀэмыхъугъэр?» къыӀожьыщт, – аӀозэ, ахэр зэупчӀыжьыгъэх. 6– Ау «ЦӀыфхэр ары къэзгъэкӀуагъэхэр» тӀомэ, цӀыф пстэури мыжъохэмкӀэ къытаохэзэ, таукӀыщт, сыда пӀомэ, Иуан зэрэпегъымбарыгъэр ашӀошъ мэхъу. 7Арыти, – Иуан къэзгъэкӀуагъэр тшӀэрэп, – къаӀуагъ.
8– Ащыгъум сэри шъосӀощтэп, мы Ӏофхэр сшӀэнхэу фитыныгъэр къыздисхыгъэр, – ариӀожьыгъ Исус ахэмэ.
СэнэшъхьэшӀэ бзаджэхэм яхьылӀэгъэ гъэсэпэтхыдэр
(Маттэ 21:33-46; Марк 12:1-12)
9ЕтӀанэ Исус цӀыфхэм мы гъэсэпэтхыдэр афиӀуатэу ыублагъ: – ЛӀы горэм сэнэшъхьэ хатэ ыгъэтӀысхьи, сэнэшъхьэшӀ горэхэм аӀэкӀилъхьагъ. Ащ нэужым хымэ хэгъэгу горэм бэрэ къэтынэу кӀуагъэ. 10Сэнэшъхьэ пычыжьыгъор къызэсым, исэнэшъхьэ Ӏахь къыратыжьынэу сэнэшъхьэшӀхэм адэжь унэӀут горэ ыгъэкӀуагъ. Ау сэнэшъхьэшӀхэр унэӀутым къеохи, ӀэнэкӀэу къатӀупщыжьыгъ. 11Хатэр зием етӀани унэӀут горэ ыгъэкӀуагъ, ау ащи къеохи, лые къырахи, ӀэнэкӀэу къатӀупщыжьыгъ. 12ЕтӀани ящэнэрэ унэӀут горэ ыгъэкӀуагъ. Ари къауӀи, къыдафыжьыгъ.
13Джащыгъум сэнэшъхьэ хатэр зием къыӀуагъ: «Сыда сшӀэщтыр? Сэ шӀу слъэгъурэ скъо кӀасэр згъэкӀон. Ащ лъытэныгъэ къыфашӀынкӀи мэхъу». 14Ау сэнэшъхьэшӀхэм хатэр зием ыкъо залъэгъум, зэупчӀыжьхи, зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъугъэукӀи, сэнэшъхьэ хатэр тэ къытфэнэжьыщт». 15Аущтэу сэнэшъхьэ хатэм къыдадзыжьи, къаукӀыгъ. – Сэнэшъхьэ хатэр зием сыда ахэмэ аришӀэщтыр? 16Ар къэкӀонышъ, сэнэшъхьэшӀхэр ыгъэкӀодынхэшъ, сэнэшъхьэ хатэр нэмыкӀхэм аӀэкӀилъхьащт, – къыпигъэхъожьыгъ Исус. – Тхьэм ерэмыд! – къаӀуагъ, цӀыфхэм ар зызэхахым.
17Ау Исус ахэмэ яплъи, къыӀуагъ: – Ащыгъум мы гущыӀэхэу Тхьэм игущыӀэ тхыгъэхэм арытхэм#20:17 Тхьэм игущыӀэ тхыгъэхэм арытхэр – яплъ Орэд ЛъапӀэхэм 117:22. сыда къарыкӀырэр: «Унэ зышӀыхэрэм зэрамыпэсэу чӀадзыжьыгъэ мыжъор унэр зыӀыгъырэ лъэпсэ дэдэ хъугъэ»?
18– А мыжъом тефэрэр къызэпкъыриутыщт, ау зытефэрэр мыжъом ыщытӀэщт.
19Тэурат егъэджэкӀо пащэхэмрэ дин пэщэшхохэмрэ Исус мы гъэсэпэтхыдэр ежьхэм яхьылӀагъэу къызэриӀотагъэр къагурыӀуагъэти, а сыхьат дэдэм Исус къаубытынэу пылъыгъэх, ау цӀыфхэм ащыщынэщтыгъэх.
Хьакъулахь ахъщэм ехьылӀагъ
(Маттэ 22:15-22; Марк 12:13-17)
20Арыти, Тэурат егъэджэкӀо пащэхэмрэ дин пэщэшхохэмрэ Исус еплъакӀощтыгъэх, къуалъхьэкӀи ащэфыгъэхэу, шъыпкъагъэ зиӀашъо зытезгъаорэ цӀыф куп фагъэкӀуагъ. Исус хэкум ипщэу тетыгъор зиӀэм ӀэкӀагъэхьаным пае, гущыӀэ горэм тыраубытэнэу гугъэщтыгъэх. 21Ахэр Исус къеупчӀыгъэх: – Дин гъэсакӀу, о шъыпкъэр къызэрэпӀорэри, цӀыфхэм шъыпкъэр зэрябгъашӀэрэри тэшӀэ. ЦӀыфхэм ятеплъэ уемыплъэу, цӀыф пстэури уизэфэд, шъыпкъагъэм тетэуи Тхьэм игъогу цӀыфхэм яогъашӀэ. 22Кайсарым#20:22 Кайсар – а лъэхъаным, Исус къызэхъу нэужым я 14-37 илъэсхэм къакӀоцӀ, Тиберые зыцӀэр рим Кайсарыгъ. хьакъулахь ахъщэр етты хъущта, мыхъущта?
23Ау Исус ахэмэ ятхьагъэпцӀыгъэ гу лъитагъэти, ариӀуагъ: – Сыд пае сыхэжъугъэукъонэу шъупылъа? 24Зы динар#20:24 динар – ар лэжьакӀом имэфапкӀэщтыгъ. сэжъугъэлъэгъу. Хэта зисурэт мыщ итыри, хэта зыцӀэ мыщ тетхагъэри? – Кайсарыр ары, – къаӀуагъ ахэмэ.
25– Ащыгъум Кайсарым иер Кайсарым ешъутыжь, Тхьэм иери Тхьэм ешъутыжь, – ариӀуагъ Исус.
26Аущтэу цӀыфхэм апашъхьэ гущыӀэ горэм щытыраубытэн алъэкӀыгъэп, пэгъокӀэу Исус аритыгъэри агъэшӀагъозэ, заушъэфыгъ.
Саддукейхэр лӀагъэхэм къэтэджыжьыкӀэ афэхъущтым ехьылӀагъэу Исус къызэреупчӀыгъэхэр
(Маттэ 22:23-33; Марк 12:18-27)
27ЛӀагъэхэр къызэрэтэджыжьыщтхэр зышӀошъ мыхъухэрэ саддукейхэмэ#20:27 саддукейхэр – дин пащэхэм ащыщхэу, диныр зылэжьхэу лӀагъэхэр къызэрэтэджыжьыщтхэр зышӀошъ мыхъухэрэ тхьэмэтэ купыгъ. Ахэмэ тхылъ лъапӀэхэу алъытагъэхэр Тэурат хабзэм ит тхылъитфыр ары ныӀэп. ащыщхэу заулэ Исус къыбгъодахьи, къеупчӀыгъ:
28– Дин гъэсакӀу, пегъымбар Мусэ моущтэу къытфитхыгъ#20:28 Пегъымбар Мусэ моущтэу къытфитхыгъ – еплъ Пегъымбар Мусэ ятфэнэрэ тхылъэу ытхыгъэм 25:5-6.: «ЛӀы горэм ыш лӀэу, лъфыгъэ имыӀэу шъуз къыкӀэнмэ, ыш унагъо фишӀэным пае, а лӀым шъузабэр къыщэжьын фае». 29Зэкъошибл щыӀагъ. Ахэмэ ащыщэу апэрэм шъуз къыщагъ, ау лъфыгъэ имыӀэу дунаим ехыжьыгъ. 30ЯтӀонэрэми а шъузыр къыщэжьыгъ. Ащи лъфыгъэ имыӀэу дунаим ехыжьыгъ. 31Ящэнэрэми а шъузыр къыщэжьыгъ. Ащ фэдэуи яблэнэрэм нэс лъфыгъэ ямыӀэу зэкӀэри дунаим ехыжьыгъэх. 32Зэпстэуми ауж дэдэу шъузыри дунаим ехыжьыгъ. 33Джы лӀагъэхэр къызытэджыжьхэкӀэ, хэта зишъузыщтыр ар? Сыда пӀомэ, нэбгыриблыми шъузэу яӀагъэшъ ары.
34– Джырэ цӀыфхэм къащэ, дэкӀох, – ариӀожьыгъ Исус ахэмэ.
35– Ау лӀагъэхэм къахэтэджыкӀыжьынхэшъ, адрэ дунаим щыпсэунхэу зифэшъуашэхэм шъуз къащэжьыщтэп, лӀыми дэкӀожьыщтхэп. 36Ахэр мэлэӀичхэм афэдэх, лӀэн алъэкӀыжьыщтэп, лӀагъэхэм къахэтэджыкӀыжьыгъэхэшъ, Тхьэм ибыных. 37Ау лӀагъэхэр къызэрэтэджыжьыщтхэр пегъымбар Мусэми нафэу къыгъэлъэгъуагъ. Сыда пӀомэ, пэнэ куандэм икъэбар#20:37 пэнэ куандэм икъэбар – еплъ Пегъымбар Мусэ ятӀонэрэ тхылъэу ытхыгъэм 3:2-6. Тэурат хабзэм зэрыт чӀыпӀэм ит пегъымбар Мусэ Тхьэу Зиусхьаным «Ибрахьими, Исхьакъи, Якъуби я ТхьэкӀэ» зэреджэрэр. 38Ащ къикӀырэр Тхьэр псэухэмрэ лӀагъэхэу зыфаӀохэрэмрэ зэря Тхьэр ары; сыда пӀомэ, ежьыркӀэ пстэури псэух.
39Исус ар къызеӀом, Тэурат егъэджэкӀо пащэхэм ащыщхэу заулэмэ къаӀуагъ: – Дин гъэсакӀу, дэгъоу къэпӀуагъ.
40ЕтӀанэ ащ нэмыкӀыкӀэ Исус къеупчӀыжьынэу хэти тегушхуагъэп.
Христос хэта зыкъор?
(Маттэ 22:41-46; Марк 12:35-37)
41Ащ дэжьым Исус ахэмэ ариӀуагъ: – Христос#20:41 Христос – еплъ 2:26. Даутэ ыкъоу сыдэущтэу аӀора? 42,43Сыда пӀомэ, ежь Даутэ мыщ фэдэу къызэриӀуагъэр Орэд ЛъапӀэхэм арытба#20:42-43 Орэд ЛъапӀэхэм арытба – яплъ Орэд ЛъапӀэхэм 109:1.:
«Тхьэу Зиусхьаным сэ си Зиусхьан къыриӀуагъ: О уипыйхэр лъэгукӀэтын къыпфэсшӀыфэхэ, сэ сиджабгъукӀэ къызгос»?
44– Ежь Даутэ Христос «Си ЗиусхьанкӀэ» еджэ, – къыпигъэхъожьыгъ Исус. – Арэу зыхъукӀэ, сыдэущтэу Христос Даутэ ы къо хъура?
Исус Тэурат егъэджэкӀо пащэхэм ямысагъэ къызэрэхигъэщыгъэр
(Маттэ 23:1-36; Марк 12:38-40; Лука 11:37-54)
45ЦӀыф пстэури Исус къедэӀухэ зэхъум, игъогу рыкӀохэрэм ариӀуагъ:
46– Тэурат егъэджэкӀо пащэхэм шъуафэсакъ. Ахэмэ шъошэ кӀыхьэхэр ащыгъхэу къакӀухьаныр якӀас. ЗэӀукӀэхэми ежьхэм аӀэхэм цӀыфхэр ащырагъэбэунхэр шӀу алъэгъу. Синэгогухэм цӀыфхэр защызэӀукӀэхэкӀи, гухэхъо Ӏанэхэм тхьэмэтэ тӀысыпӀэхэр щаубытынхэри шӀу алъэгъу. 47Шъузабэхэм яунэхэри атырахых. ЦӀыфхэм агъэшӀэгъоным пае, ятхьэлъэӀухэр агъэкӀыхьэх. Тхьэм ахэр инэу ыгъэпщынэщтых.
Currently Selected:
Лука 20: AdgNT14
Označeno
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм