KEYUM KERO 2
2
1Dekepe taleng kuppo simlang amosim delokke sokke takamem píyinto. 2Delokke longe kínídnana longe delo, Shédíbí bíkke ibomnam agér takamem iyinto. Depeila bí longe kínídnana longe delo bíkke agér inam takamlok apééto. 3Delo Shédíke ruulenla, pílen sunam agér tabunglok bí apééla ikolok, dem longe kínídnana longe dem Shédíbí utepooroem ruulíkla deemoto.
Adam Lang Ib Bínyi
4Taleng kuppo simla among sim pílen delokke dooyinge sikepe idung: Taleng kuppo emla among sim píyinla iro longe delo, 5Ruutum Shédíke among so pedong omomape ila among so esing-ééng atíe kamape delokke nesi-neyang atí-siríe garsamape ila among sim arík ibompena tani atí kamape idoem; 6asi aapamko among ara belok saala among tabusim asipe balyin gooto. 7Delo Ruutum Shédíbí amolokke demullok taniem pílen geyéla bíkke nyobung arung delok turgenam nganamem ngalíkto.
Delo tanide turna amikope ikai. 8Depe irodem Ruutum Shédíbí sanggodanlo duuna Edenlo etorko torgoopala, bíkke pítonam amidem delo meto. 9Delokke Ruutum Shédíbí among delok deddína dope-tíípenam emlang atí-atípe ina kampona esing-ééng kídíem garsamoto. Delok teyonglo torgong raadang delo ainemlang atímanem kénpan sumona esing elang turmonake esingete kato.
10Delo Edenlok korongko biilenla torgoonam dem asi bito, delokke depe irodem de biipan sulangkula korong appikope ikaku. 11Kerangke korong delokke amíne Pishon: de uun kako Kabila amongem enggo bomdung. 12Among delokke uune aidung delokke teyolo nampona paaramnam Bellium elíng elang asirna Oniks elínge kato. 13Korong annyinana delokke amíne Gihon. Si korong si Kush amongem enggo bomdung. 14Korong angumnana delokke amíne Tigris. De Assiria among lokke sanggo danlok tokdung, delokke korong appinana delokke amíne Euphrates.
15Delo Ruutum Shédíbí, kampope ibín-sabínla kaabomdope Eden lokke etor torgongko aradelo amidem langaala meto. 16Delo Ruutum Shédíbí amidem sipe poto, “No etor torgong arasokke esing ayé takamem dolado, 17idola ainemlang atímanem kénpan sumona esing delokke ayém domapeka, kapeila ingkona longelo no deme doyédí; delo longe delo no arorupe siyé.”
18Delo Ruutum Shédíbí poto, “Amisi atelpe yésunam si aimang. Bík legape angongpe, bím igulnako, ngo píyéku.” 19Depe emla Ruutum Shédíbí among delokke kédéng lok atí-atípe ina simon-sili emlang kebung pettangem pílento. Depe irodem bí ami kerang delo amín míndope lengkan bila aaboto. Delo turna ato-siro kídíem kape kísa amide gogtodí, dekepe buluke amín kídíde ikai. 20Dekepe amide simon-sili kídíem, kebung-pettang kídíem delokke monkír-tangkír kídíem amín mínyinlíkto. Idola ami delokke legape bíkkíng gyabbosuna, igullana atí kamato. 21Dekepe ikolok Ruutum Shédíbí ami dem yagorupe immimola imngakmoto. Ami delokke ibdungem, bí ami delokke ínmo along akonem laala, laarong delo adínlok iyanlík pala laalento. 22Ami delokke ínmo laalennam deloge, Ruutum Shédíbí mimeko pílenla, ami kerang delo mimedem bomato.
23Delo amide poto,
“Supak simin ngokke along kídíke alonge;
delokke adín lokke adíne. Bím mime emyé,
kapeila bím milolok laalenname.”
24Depe ikolok milokong tanie ane-abuem mepak sugeyéla bík mimelo leko bosula bínyi adín atelkope ibosudung. 25Milo delang mimede mílípe yéto, idola bínyi annying mato.
Currently Selected:
KEYUM KERO 2: adiBSI
Označeno
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.