Mataiyo 3
3
Yowane Babatiso yona lauguguya balabalaena
(Maleko 1:1-12; Luka 4:1-13; Yowane 1:19-28)
1Bolimai hisa se lau mulidi ne unai Yowane Babatiso Yudeya balabalanaena ye hetubu ye lauguguya ye wane, 2“Kwa nuwabui! Galewa basileiyana#3:2 Galewa basileiyana meta Yaubada yona kabatanuwaga o Yaubada yona basileiya. Mataiyo Dius yodi hedehedede yo yodi laulau ye lauwatani ede Yaubada hesana nige ye katakataikaliliyei, na galewa mo ye hepaisowa. ye hanahanauma!” 3Yowane meta iya tamowaina ede Aisaiya peloweta ye hededehemasalahaꞌusei wa ye wane,
“Tamowai hesau balabala unai ye yogayoga ye wane,
‘Guiyau yona keda kwa kabinonohai,
yo yona kabalau kwa hedudulai!’ ” (Aisaiya 40:3)
4Yowane kana kaleko meta kamela wiyana unai se ginauli, na kana dagilolo meta suisui hesau dahina,#3:4 Yowane kana kaleko meta gonogonowana doha peloweta Ilaisa kana kaleko (Wasawasa bukadi helabuina 1:8). na kana kai ede mwadimwadi yo kamwakamwa. 5Yelusalema, Yudeya yo Yolidani tehana maudoina tamowaidiyao se laoma iya kalinawai 6na yodi yababa se hededehemasalahadi, ede Yowane ye hebabatisoidi Yolidani sagasagana unai.
7Kabo Paliseya yo Sadusiya tamowaidiyao gwaudi se laoma Yowane unai babatiso hesabana. Ye kitadi ede ye dilaidi ye wane, “Komiu mwata natunao! Kaiteya ye hededelaowa bena kabo Yaubada yona hekamkamna kwa yabubugabaei? 8Bena nuwabui kaniyona kwa miyahemasalahadi! 9Na tabu kwa nuwatui meta kabo kwa bom kwa hemauliꞌuyoigomiu na kwa wane, ‘Kai Abelahama kana isimulitao!’#3:9 Kai Abelahama kana isimulitao: Paliseya yo Sadusiya tamowaidiyao wa se bom se kitaꞌuyoidi meta siya Yaubada kana bodao. Ya hededelaowa, Yaubada gonowana weku ta udiyedi Abelahama kana isimulitao ye ginaulidi. 10Kilam se tolenonohaiyako. Na ena kaiwa hesau nige ye kaniyonamwanamwa, meta kabo se koigabaei yo se gabalaei kaiwa kalakalasina luwanaena.
11Kaiteyadi se nuwabui kabo waila unai ya hebabatisoidi. Na tamowai hesau ede sola kabo ye laoma. Iya yona gigibwali meta ye saekalili na kabo yau. Yau nige ya namwakalili taba iya kana sendolo ya baheidi.#3:11 Kana sendolo ye baheidi: Teina ta meta heyayai tauhaina kana paisowa hesau, meta tamowai se saguidi kadi sendolo bikibikidi ne mainadi se yailidi na sendolo ne se haigabaedi. Iya kabo Yaluwa Tabuna yo kaiwa kalakalasina udiyedi ye hebabatisoigomiu. 12Yona kabahesuhesuluisini kaikaiwana iya nimanaena, na kabo witi ye hesuluisinidi yo ye hinelidi. Na kabo kaniyodi ye toledi sanalaena, na mosomosodiyao ye tolehesuwaladi kabo ye gabudi kaiwa kalakalasina nige yona kababoso unai.”
Yesu yona babatiso
(Maleko 1:9-11; Luka 3:21-22; Yowane 1:32-34)
13Kabo Yesu Galili unai ye laoma Yolidani sagasagana unai, bena Yowane unai babatiso ye hai.
14Na Yowane ye kaipate bena Yesu ye hededehekaiyawasi ye wane, “Idohagi to kowa ku laoma yau kaliguyena? Ye namwa mo taba kowa ku hebabatisoigau!” 15Na Yesu ye hededebui ye wane, “Nige, teina mahana ta unai meta kowa bena ku hebabatisoigau. Taba Yaubada yona nuwatu mo ta lauwatani.” Ede Yowane ye talam na Yesu ye hebabatisoi.
16Ye hebabatisoi ye gehe kabo Yesu waila ne unai ye gayo ye saesae, na mahanana ne unai galewa ye tasoke, na Yesu Yaubada Yaluwana#3:16 Yaubada Yaluwana meta Yaluwa Tabuna. ye kita ye dobima doha bunebune na ye talu iya unai. 17Na kalina hesau galewa ne unai ye wane, “Teina yau natugu. Iya ya gadosisiyei, yo ya gwauyalakalili iya unai.”
Currently Selected:
Mataiyo 3: sbeP
Označeno
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.