Ioane 4
4
Iesu Samaria Papiega Fou Kenini'ani
1-2Ke Iesu kai aga'o baptismo aepenia kai, ega imoi mo baptismo papiau kepenii'i. Ega mo ganinagai Faliseo au'i auga Iesu papiau isa ega imoi epamia'i ke baptismo epenii'i auga fouga kelogo auga Iesu elogo. Ke isa ega koa ekapaisa auga Ioane ekapa auga eka'egaina. 3Ke Lopia Iesu ega'ina fouga elogo aisama, Iudea ago epua'afuga emue Kalilea ago elao pugu.
4Ke ega felao auga isa Samaria ago mo fepea oma felao, gome ega'ina keagaga auga ofola'o. 5Ega puo elao Samaria agogai taoni aka Sika keoma auga alogai ekoko. Ega'ina taonina auga ufainagai Iakobo ago e'ele gauga Iosepa epeniia auga afuga eegai. 6Ke ega'ina afugai fei ipuga Iakobo eapiia kainai kepafaala Iakobo ega ipu keoma auga eka. Ke Iesu ega imoi fou kemai ipu ega'ina niegai aisama, kina maaga atiafa koa i'opoga. Ke Iesu epea eafipugu puo ega'ina ipuga eegai eagukipo elaagai.
7Ke Samaria papiega aga'o emai fei gala'a eoma aisama, Iesu isa epainia einaka, “Fei afa mopeniau mainu,” eoma. 8Gome Iesu ega imoi au'i fo'ama i'afa taoni kelao.
9Ke Samaria papiega Iesu epainia einaka, “Oi Iudea aumu ke lau auga Samaria papieu kai kapa puo lau logoiniau fei mapenio moinu looma?” eoma. Samaria papiega ega eifa oma, gome Samaria papiau'i liti o kaputi kepapinauga auga Iudea papiau'i afakepapinauga.
10Kai Iesu einaka, “Oi Deo kapa'ina epipeni, ke kaisau oi fei egoinio auga mologo koa aisama, oi isa fogoina, ke isa oi agu pagai feina fepenio,” eoma.
11Ega aisama papie Iesu epainia einaka, “Au akaiki'a aumu, oi fei isakoaua kapa aga'o eemuai laa'i ke ipu isafa eake alogaina. Ega puo kapai agu pagai feina ega'ina aloafia? 12Lai ufumai apamai Iakobo i'ina ipuga eapiia epeniimai. Isa i'ina ipuga feina einu ke gauga isafa keinu. Ke gauga au'i e'i sipi polomakau fou isafa i'ina feina keinu. Kai oi auga Iakobo loka'egaina ma puo iina loifa oma?” eoma.
13Iesu einaka, “Papiau ma'oai i'ina feina keinu au'i aiso'i agekupu pugu. 14Kai kaisau lau fei isa lapenia auga ageinu auga aiso afaekupukupu pugu. Kai fei ega'ina isa lapenia auga isa alogai afaefuga age'uki agelao ageka aoniamo, ke agu pagai maunina ageafia,” eoma.
15Ke papie isa epainia einaka, “Au akaiki'a aumu, fei ega'ina mopeniau, ega koa aisou afaekupu pugu, ke fei ila'a iina afalamaimai pugu,” eoma.
16Ke Iesu papie epainia einaka, “Molao akafamu moifaga kai fomue fomai pugu,” eoma.
17Ke papie einaka, “Lau akafau aga'o laa'i,” eoma.
Ega aisama Iesu papie epainia einaka, “Oi akafamu aga'o laa'i looma auga ko'a loifania. 18Gome iifa ko'a auga, oi au ima loakafani'i, ke au pau aunimi oague auga oi akafamu laa'i. Oi kapa'ina pau mo loifania auga iifa ko'a,” eoma.
19Ke papie einaka, “Au akaiki'a aumu, lau lalogo oi profeta aumu. 20Lai ufumai apamai i'ina ikugai Deo keau afagaina kai, oi Iudea aumi oifa, i'a Deo faau afagaina afuga auga Ierusalemeai ooma,” eoma.
21Ke Iesu isa epainia einaka, “Papie lau mopako'aniau, gome kina aga'o emai, ke ega'ina kinagai oi i'ina ikugai, o Ierusalemeai Ama'a Deo afoloau afagaina. 22Oi Samaria papiaumi kaisau oau afagaina auga alologo kai oau afagaina. Kai lai Iudea papiaumai auga kaisau aau afagaina auga alogo, gome papiau Kania'i Isagamauga auga Iudea papiau'i faaga'iai emai. 23Ega mo ganinagai kina aga'o agemai, ke ega'ina kina auga emai efua puo papiau alo'i ko'agai Deo keau afagaina au'i Deo ega Spiritu ega isapuai, ke Deo ega iifa ko'agai mo Deo akeau afagaina. Gome Ama'a Deo papiau isa ega keau afagai oma au'i ekapuni'i. 24Ke Deo auga Spiritu kainai, Isa keau afagaina papiau'i au'i Deo ega Spiritu ega isapuai Isa fekeau afagaina, ke Deo ega iifa ko'a'i mo kai'iai fekepea Deo fekeau afagaina,” eoma.
25Ke papie eifa einaka, “Lau lalogo Mesaia agemai. (Mesaia auga keifaga Kristo keoma.) Ke isa agemai aisama, lai maamaisai kapa ma'oai ageifafou afe'aini'i,” eoma.
26Ke Iesu isa epainia einaka, “Lau oi maamuai lanini'ani au, lau isa,” eoma.
27Ke Iesu papie maagai ega'ina eifania afegai mo, isa ega imoi kemue kemai, ke isa papie fou kenini'ani keisa aisama kekauai alogaina. Ke kai aga'o aepa'ani aeinaka, “Kapa'ina anina loani, o kapa puo ega'ina papiega aunimi onini'ani?” aeoma.
28-29Ke Iesu ega imoi kemai aisama, papie ega oga fei eakoaua auga egae epua'afuga ekaega kai, emue elao taoniai papiau epaini'i einaka, “Omai, au aga'o lau kapa ma'oai lakapai'i au'i eifani'i auga amoisa. Isa Mesaia afemia isafa?” eoma. 30Ega aisama isa taoniai kepealai Iesu eega kelao.
31Ke papiau Iesu eega kemaimai kai, Iesu ega imoi isa kegoi kapulania keinaka, “Rabai, kapa aga'o moania,” keoma.
32Kai Iesu isa epaini'i einaka, “Lau oi fo'ama oko alologo auga eeuai ekae alaania,” eoma.
33Ega aisama Iesu ega imoi au'i ifo'i mo epo'iai keifa keinaka, “Aufalao aga'o fo'ama emaiseina eaniia ma?” keoma.
34Kai Iesu isa kapa'ina keifania auga elogo puo eifa einaka, “Lau e'u fo'ama auga lau eulaisau auga kapa'ina anina eani auga fakapa ke ega pinauga fapafua. 35Oi iina aloifa oma, ‘Gafa pani mo akelao afegai kai, fo'ama isafina kina agekaina alooma ma?’ Amoisa, lau oi lapainimi, maami amopakiakaea fani afuga amoisa. Gome fo'ama ani'i keogei'i efua i'afe'i kina ekainia. 36Ke fo'ama isafina auga afa isoge emia fo'ama eafia, agu pagai maunina afugai eoge'i. Ega koa au fo'ama efauga auga ke au fo'ama eafia auga, auni'i kai'ialao alo'i fegama. 37Ega kainai i'ina iifa ko'a ipauma, ‘Au aga'o auga fo'ama efauga, ke aga'o auga fo'ama eafia.’ 38Lau oi laulaimi olao kapa'ina oi afipugu'i alopa'au'i au'i oafii'i omaiseini'i. Papiau i'oi'i isa'i ega'ina afipuguga kepa'aua kai, oi auga isa e'i afipuguai fo'ama anina eoge auga olao oafiia omaiseina,” eoma.
Samaria Papiau'i Ma'o Iesu Kepako'ania
39Ke Samaria papiau'i ma'o ega'ina taoninai keagu au'i Iesu kepako'ania, gome papie Iesu fouga, iina eifafou oma a'o kelogonia. “Isa lau kapa ma'oai lakapai'i au'i maauai eifani'i,” eoma. 40Ega puo Samaria papiau'i kemai Iesu eegai aisama, kegoinia egae fou kegaagu keoma. Ke Iesu egae kina auni'i eagu. 41Ke isa ega nini'ani kainai, papiau ma'o mo isafa isa kepako'ania.
42Ke ega'ina papiau'i papie kepainia keinaka, “Lai oi loifa puo Iesu alapako'ania, gome pau lai ifomai isa aina alogonia, ke alogo isa Mesaia, i'ina agofa'a papiau'i kania'i Isagamauga auga paisa,” keoma.
Iesu Au Akaiki'a Aga'o Gauga Maguaega Epafelo
43Ke kina gua afegai, Iesu ega'ina afuga epua'afuga elao Kalilea ago. 44Ke Iesu ifo eifa, profeta aga'o ifo ega paguai auga papiau isa afakeifa koko, ke au akaiki'a afakepamia eoma. 45Kai isa elao Kalilea agogai ekoko aisama, Kalilea papiau'i Iesu keifa koko, gome isa isafa Pasover miamia kinagai egae Ierusalemeai keagu Iesu kapa'ina mo ekapai'i auga keisa'i.
46Ega puo Iesu emai Kalilea agogai Kana taoninai fei fino epamia auga taoninai ekoko pugu. Ke au akaiki'a aga'o Roma kamanina papagai epinauga auga gauga eisafa Kapenaum taoninai eka auga egae eagu. 47I'ina auga Iesu Iudea agogai emai Kalilea agogai ekoko auga fouga elogo aisama, elao Iesu eegai egoinia gaake galao gauga gapafelo eoma. Gome isa gauga afa'agamo agemae eoma.
48Ega aisama Iesu isa epainia einaka, “Oi mirakulo gou'i afakemia afoloisa'i koa aisama, lau afolopapako'aniau,” eoma.
49Kai au akaiki'a ega'ina einaka, “Au akaiki'a aumu, lau gau aemae koa kai, mai alao mopafelo,” eoma.
50Ke Iesu isa epainia einaka, “Molao, oi gaumu ageagu,” eoma.
Ke au ega'ina Iesu kapa'ina isa maagai eifania auga iifaga epako'ania, ke ekailai elao. 51Ke isa keagai epeapea kai, ega pinauga au'i kemai isa gauga aemae auga fouga maagai keifania keinaka, “Oi gaumu aemae, eaguega,” keoma. 52Ke isa gauga kina maaga kapagai efelo auga pa'anina epa'ani aisama, ega pinauga au'i keinaka, “Faai kinai 1 o'clock auama isafaga isa epua'afuga,” keoma.
53Ega koa emia aisama, au ega'ina elogo Iesu kina maaga ega'inagai isa epainia, “Oi gaumu ageagu,” eoma. Ega puo isa ifo ke ega e'ai kai mo kai mo keagu au'i fofougai Iesu kepako'ania.
54Iesu Iudea agogai emai Kalileai aisama i'ina mirakulo ekapaisa. Ke i'ina mirakulo auga Kalilea agogai Iesu ega mirakulo ikapa gua epamia auga.
Currently Selected:
Ioane 4: mekNT
Označeno
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.