APUNG ANYIM 4
4
Kain naiuso Abel
1Küta Adam apa tsammongnyiu Ev ko em, loto nyiuhai nou pem tsükengkü iulakü, apaüh methso tsak chetkiu küta ngiom, “Ngo Apaou ahachu tsangkü melothso tsak eplo-iu.” Nungtiphe apaüh methso nou Kain ta niankiu. 2Loüh nyiuhai nou melothso tsak, Abel chetkiu. Abel nung onnemok jimtsün tsak iula, lüko Kain nung eiu ah iulakü noiküla. 3Atao intso noiküta Kainüh goh ai eiusantsün pai eiu Apaou dongai chaithio kankü shin, 4naiuso Abelüh lüko onnemokthso ayateng chetsantsün ainou naiuso nungso haoson ainou a-onmeitso nou chaithio kankü shin. Nungaih Apaou nou Abel naiuso apa chaithio ko monglingkü noiküla. 5Lüko Apaüh Kain naiuso apa chaithio meikü tsülusan. Nungtiphe Kain thatü mongmat sungkü apa kha maosangkü khemkü nap. 6Nungaih Apaou nou Kain tü ngiom, “Ni tiauta mongmat sungji? Naiuso tiauta akha khemkü napji? 7Ni meikü chhi tünto ni akha awonkü noi-ela; lüko ni meikü tsüchhiphe, angei nou akoukhan dongko jimkü noin. Apa ni tü chinekkü noin, küta ni nung shioloau noin.”
8Nungaih Kainüh apa nio Abel tü ngiom, “Sam eiu ai keiko.” Tilai ngüne eiu ai keikü noiküla, Kain apa nio tü mongmatkü apa loatkü wan. 9Nungaih Apaou nou Kain tü, “Anio Abel tiai noin?” ta sangh.
Apaüh “Ngo tsünge. Jünio paotsangao nou ngo süne?” ta apaüh thalan.
10Nungaih Apaou nou ngiom, “Ni ti chhin? Anio sheüh goh ainou ngü tü phaosanau wetsün sangh tsaküh wetsün khekkü weji. 11Ni loto goh da tsüchhi shiao athesan khemai taiuwaniu, tiautenai ni anio loattsün ko apa she goh nou da khiamluttaniu. 12Tilai ni goh nai chhi-e, loto goh nou ni hau eiusantsün oukong tsü- kiushi-e. Goumchi ko ni akhukeitsün naiuso atsakeitsün khaiunia tsak noi-e.”
13Kainüh thalakü Apaou tü ngiom, “Jü thaiutha angja kiutsün nungto ngo jeiloau noutü phopkü noin. 14Ni ngo nung goumchi ainou naiuso ni hatsün ainou komanji, ngo akhako nou tsangjeian-e, naiuso goumchi nouko akhukeitsün naiuso atsakeitsün tsak iula-e, naiuso sauhaiüh ngo eppe ngüsoüh ngo loattan-e.” 15Lüko Apaou nou apa tü ngiom, “Ajantsoüh Kain loatnai apatü chinyatjam phopkü thamshi- e.” Nungtiphe ajantsoüh apa epkü loattane nou ta Apaou nou Kain tü aleng ii tsak ii kiu. 16Loto Kain Apaou khako nou khuwan, küta Eden ajepek ai noitsün “Atsakeitsün” goumchi ta jontsün nai kih.
Kain Thsaosithsoso
17Naiuso Kain meshen tsammongnyiu ko emkü apa pem tsükengkü iula naiuso Enok chetkiu. Kainüh noknio tsak shanküta apaüh nung noknio nian nou meshen thso Enok nianphi niankiu. 18Naiuso Enok tü Irad chetlut, Irad nung Mehujael po, Mehujael nung Methusael po, naiuso Methusael nung Lamek po noiküla. 19Lameküh tsammongnyiu nime jon: aya nou nian Ada, naiuso aphi nou nian Zila noiküla. 20Naiuso Adaüh Jabal chetkiu-apa nejenkhio lahkü kihtsünso naiuso thainian piakü nyimkü kihtsünso po noiküla. 21Apa nio Jubal, –apa sondan metsünso chikü po noiküla. 22Naiuso Zilaüh Tubalkain chetkiu–apa kiapthso son naiuso amao son nou alepluttsün dun langtsün; naiuso Tubalkain nio menyiuthso Nama noiküla.
23Lameküh apa tsammongnyiune tü ngiom,
“Ada si Zilane, ngü tü anglu;
Asam Lamek tsammongnyiuso, ngo ti ngioji anglu:
Ngo khaiunia tsak ngü tü tawaitsün shioko loattiu,
24Kain loattsün thaiuthako aa chinyat nou thamshi-e tünaito,
Ajantsoüh ngo loatnai, aochinyatkü chinyat aa nou loshi-e.”
Sed naiuso Enos
25Naiuso Adam loüh apa tsammongnyiu ko em, küta nyiuhai nou pem tsükengkü iulakü melothso tsak chetkiu, apa nian Sed ta niankiu, nyiuhai nou ngiom, “Goa nou Abel liko ngü hau loüh melothso tsak chetkiukü ouk kiu-iu, tiautenai Kainüh apa loattan.” 26Sed tü loüh melothso tsak chetlut, naiuso apaüh methso nou Enos ta niankiu. Nungtao nouko yakü khaiuniahoi nou Apaou asio amkham taoko nianjonao yachu.
Currently Selected:
APUNG ANYIM 4: KHIABSI
Označeno
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.