Popular Bible Verses from Ijɔ̍ɔn 10

Deli

Uwī ma̍ ē wā ge̍ē wūwī, kɛ̄ɛ ē ngmo̍ okū, kɛ̄ɛ ē de ɔjā chāajɛ. Ami ma̍, n wā hɛ̄ɛbɛ nīi e̍ ge̍ē lɛ ɔhɔ̄leyī; ɔhɔ̄leyī nīi gɔ̄grāa ma̍.

“Ami - ɔ̄chɛ ɔnɛ̄ɛhɛhi odeyīrɛ anyīyɛrɔ̄ nɛ. Ɔ̄chɛ ɔnɛ̄ɛhɛhi odeyīrɛ anyīyɛrɔ̄ ē chikpo̍ ge̍ē pīyaku̍ lɛhu̍ yī anyīyɛrɔ̄ yī nū.

Āchɛ nīi - anyīyɛrɔ̄ yī u ma̍ ē pɔ̍ɔkɔ yī u. N je̍ wā hwɔhi hwɔhi. E̍ ē ku u la u̍tu myɛ̄grāa-myɛ̄grāa.

N ē de ɔhɔ̄leyī i̍mɔ̄mɛni̍ ē de wa̍. E̍ i̍ ge̍ē ko̍ōku̍ ge̍ē gbo̍ ni̍. Ɔ̄chɔ̄chɛ i̍ chī ge̍ē de wa̍ nāa ē hī um abɔ̄ mɛ ni̍.

Ami - oko̍prīinu a̍nɛ. Ɔ̄chɛmɔ̄chɛ nīi ge̍ ga la ami, ɔlɔjā ge̍ē lɛ ɔhɛ̍ta̍. Ɔchɛ̄ ga lipu̍ ba̍la ɔngmɛ̍ɛchɛ ga yɛchɛ ge̍ē lā ke̍e̍ de ɔlɔjā nīi o̍ ē ga ke̍e̍ gāa ojōre̍ oro̍ōre̍.

Ami ma̍ - ɔ̄chɛ ɔnɛ̄ɛhɛhi odeyīrɛ anyīyɛrɔ̄ nɛ. Lɔkɔ nīi n je̍ anyīyɛrɔ̄ yī u ma̍, i̍ngi̍ngɔ̍ɔ nīi aa̍ titi je̍ u a̍nɛ.

Ɔjā nīi A̍dā yī u de de u ma̍ ga ɔjāha̍-ɔjāha̍ wa̍a̍ ɔgɔ̄ga. Ɔ̄chɔ̄chɛ i̍ chī ge̍ē de wa̍ nāa ē hī A̍dā yī u abɔ̄ mɛ ni̍. Ami ba̍la Ɔwɔ A̍dā - āchɛ ūkpo̍he nɛ!”

O̍ lɛ lɔkɔ nīi Ɔwɔ A̍dā yī u je̍ u, nīi ami titi je̍ ɔ̄ ma̍. Ami ma̍, n chɛ̄ ɔpīyaku̍ lɛhu̍ yī anyīyɛrɔ̄ yī u.

I̍ ɔ̄chɔ̄chɛ ge̍ē de ɔhɔ̄leyī yī u ē nāa ē hī u a̍ni̍. Ami ɔlɔjā chikpo̍ ge̍ē de ɔhɔ̄leyī yī u ē de a̍nɛ. N lwɔhu̍ ge̍ē de ɔhɔ̄leyī yī u ē de; n chī lwɔhu̍ ge̍ē chōo̍chē de ē nāa ē mɛ̍. Ɔjā nīi A̍dā yī u koko̍o de u ka amɔ̍lɔ ge̍ ya̍ ma̍ hɔ̄ ma̍ a̍nɛ.”

Wu̍chē yī ɔla̍ā, Iji̍sɔ̄ɔsi gba̍a ka hīka, “Lēchi̍-lēchi̍, n ā koko̍o de ala̍! Ami re̍ka oko̍prīinu de anyīyɛrɔ̄ ɛla̍ā a̍nɛ.

Ɔ̄chɛ nīi e̍ nāa anu̍ ɔnɔ̄nāa nīi i̍ ɔ̄chɛ odeyīrɛ anyīyɛrɔ̄ kpakpa ni̍ ma̍ i̍ ē chɛ̄ ɔpīyaku̍ i̍ngɔ̍ɔ ni̍. I̍ anu̍ lɛ anyīyɛrɔ̄ a̍ni̍ ma̍, o̍ ge̍ ma̍ odomu̍u nīi yeēwā ge̍ē ku̍ yɛwū, o̍ ē de gwɛ̍ɛnya. Bū la ɛbɛ ɔla̍ā, odomu̍u ɔla̍ā kpo̍ anyīyɛrɔ̄ ɛla̍ā ku̍, ya̍ nīi ehēhī to̍ojiya.

Iji̍sɔ̄ɔsi gba̍a ka hīka, “Lēchi̍-lēchi̍, n ā koko̍o de ala̍! Ɔ̄chɛ nīi i̍ ge̍ chɛ̄ ga ɔka yī yɛwu bū la oko̍prīinu yī nū ni̍, nīi o̍ ge̍ tīichō ga la ɛbɛha̍ chɛ̄ gāa, ɔlɔjā - obu̍ūwī ba̍la okrōkpō ɔlamu-ɔlamu nɛ.