Pa twakasé kòʼw pou lapéti sé méchan-an.
Pa anvi sa sé mové moun-an ni.
Talè yo kay dispawèt menm kon lè zèb ka sèk.
Yo kay mò menm kon pyé bwa ki ka fennen.

Mété tout konfyans ou an Bondyé Senyè-a èk fè sa ki bon.
Viv an tè-a mwen ba ou-a an lapé.
Pwan tout pléziʼw an Bondyé Senyè-a,
èk i kay baʼw dézi tjèʼw.

Mété laviʼw an lanmen Bondyé Senyè-a.
Mété konfyans ou an li èk i kay édéʼw.
I kay fè moun wè ou ka viv dwèt
menm kon klèté sòlèy lévé.
I kay fè moun wè ou ni wézon
menm kon klèté sòlèy midi.

Sé pouʼw ni pasyans èk èspéyé pouʼw wè Bondyé Senyè-a twavay.
Pa twakasé kòʼw lè ou wè sé mové moun-an ka pwòspéwé,
lè ou wè tout sé vyé plan-an yo ni-an ka maché byen.

Sé pa pouʼw twakasé kòʼw ében faché.
Sa kay fèʼw fè movèzté.
Sé moun-an ki mété konfyans yo an Bondyé Senyè-a kay éwityé tè-a Bondyé té pwonmèt yo-a,
mé Bondyé kay kouwi dèyè sé méchan-an sòti an tè-a.

Sé méchan-an kay dispawèt touswit.
Ou kay las gadé pou yo, mé ou pa kay menm jwenn yo.
Mé moun ki ka abésé kò yo kay éwityé tè-a Bondyé té pwonmèt yo-a.
Yo kay pwan plézi an kantité lapé-a yo kay ni-an.

Méchan-an ka fè konplo kont nonm-lan ki dwèt-la.
I ka gadéʼy, i ka anvi manjéʼy.
Mé Bondyé Senyè-a ka wi sé méchan nonm-lan,
paski i kay koupé asou lavi yo.

Sé méchan-an ka hédi fèman yo èk yo ka pliyé bannza yo
pou sa tjwé sé maléwé-a èk sé moun-an ki bizwen-an,
pou fini èk sé moun-an ki ka fè sa ki dwèt-la.
Mé sé an tjè yo menm fèman yo kay antwé,
èk bannza yo kay kasé.

Ti tak-la nonm-lan ki dwèt-la ni-an
vo plis pasé sé wichès-la tout sé méchan-an ni-an,
paski Bondyé Senyè-a kay kasé pouvwa sé méchan-an,
mé i kay sipòté sé moun-an ki dwèt-la.

Bondyé Senyè-a ka otjipé sé moun-an ki san fòt-la,
èk tè-a kay sa yo pou tout tan.
Yo pa kay hont lè bagay vini mové.
Yo kay ni plis pasé yo sa manjé lè lafen tonbé an péyi-a.
Mé sé méchan-an kay mò.
Lèlmi Bondyé Senyè-a kay dispawèt menm kon sé bèl flè-a ki an savann-an.
Yo kay dispawèt menm kon lafimen.

Sé méchan-an ka pwété èk yo pa ka wimèt viwé,
mé nonm-lan ki dwèt-la ni bon tjè, i toujou ka bay.
Sé moun-an Bondyé Senyè-a benni-an kay éwityé tè-a Bondyé té pwonmèt yo-a,
mé i kay kouwi dèyè sé sa i modi-a.

Bondyé Senyè-a ka moutwé an nonm ki chimen pouʼy pwan
èk i ka pwotèkté sé moun-an ki ka plèʼy-la.
Si yo mantjé an so, yo pa kay tonbé,
paski Bondyé Senyè-a ka ba yo lanmen.

Mwen té jenn, èk atjwèlman mwen ja gwan,
mé mwen pa janmen wè Bondyé tounen doʼy asou nonm-lan ki dwèt-la,
ni mwen pa janmen wè ich li ka mandé lachawité.
Nonm sala donnan, i ka pwété lézòt moun,
èk ich li sé an bennédiksyon.

Tounen kont movèzté èk fè sa ki bon,
èk désandanʼw kay toujou viv an tè-a Bondyé té pwonmèt-la.
Paski Bondyé Senyè-a enmen sa ki dwèt
èk i pa ka tounen doʼy asou sé moun li-an.
I ka pwotèkté yo tout tan,
mé i kay kouwi dèyè ich sé méchan-an sòti an tè-a.
Sé moun-an ki dwèt-la kay éwityé tè-a Bondyé té pwonmèt yo-a,
èk yo kay viv adanʼy pou tout tan.

An nonm ki dwèt ni lasajès.
Sé bon pawòl tousèl ki ka sòti an bouch li.
I ka tjenbé lwa Bondyé an tjèʼy,
èk pyéʼy pa ka janmen kité bon chimen-an.

Nonm méchan-an ka véyé nonm-lan ki dwèt-la
èk i ka chaché mannyè pou tjwéʼy.
Mé Bondyé Senyè-a pa kay ladjéʼy an lanmen lèlmiʼy,
ni i pa kay kité yo kondannéʼy lè i lodyans.

Èspéyé èk konfyans asou Bondyé Senyè-a èk obéyi konmandmanʼy.
I kay onnowéʼw, i kay baʼw tè-a,
èk ou kay wè lè i kouwi dèyè sé méchan-an.

Mwen té konnèt an nonm méchan
ki té ka pwan lavantay asou lòt moun.
I té menm kon an gwo pyé bwadnò ki an péyi Lèbannonn.
Mé apwé sa lè mwen pasé, i pa té la.
Mwen gadé pou li, mé mwen pa wèʼy pyès koté.

Gadé nonm-lan ki bon èk dwèt-la, gadé mannyè i ka viv.
An nonm ki ni lapé an tjèʼy ka ni an pil désandan.
Mé moun-an ki ka kasé lwa Bondyé-a kay dispawèt nèt,
èk pyèsonn pa kay wè désandanʼy.

Bondyé Senyè-a ka sové nonm-lan ki dwèt-la
èk i ka pwotèktéʼy lè twaka vini anlèʼy.
Bondyé Senyè-a ka édéʼy èk i ka délivwéʼy.
I ka tiwéʼy anba lanmen sé méchan-an èk i ka sovéʼy,
paski sé an li i ka vini chaché pwotèksyon.

Poslušaj Samz 37