If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

ፓስጋ ቦንችያ ጋላሳፐ ኡሱፑን ጋላሳ ካሰቲደ፥ የሱስ እ ሀይቁዋፐ ደንዳ አልኣዛር ደእያ ቢታንያ ግያ ካታማ ቤዳ። ሄ ሳኣን ኡንቱንቱ አዉ ካዉዋ ካድኖ፤ አልኣዛር አናና ኡቲደ እትፐ ምያዋንቱ ግዶን ኡት ደእሽን፥ ማርታ ካዉዋ ግሻ ምዛዱ። ማይራማ ዳሮ ሻሉዋን ዛልኤትያ እት ጻራሙስያ ግድያ ናርዶሳ ጌተትያ ጌሻ ሽቱዋ አሃደ፥ የሱሳ ገድያ ኦካደ ባረ ብናናን አ ገድያ ቁጫዱ፤ ጎልያ ኡባይ ሽቱዋ ሳዉዋን ቶሽኩ ጌ።
ሽን የሱሳ ካልያዋንቱፐ እቱ፥ የሱሳ አ እማናዌ፥ ይሁዳ አስቆሮቱ፥ “ሀ ሽቱ ሄዙ ጼቱ ዲናርያን ዛልኤትና፥ አያዉ ሄዌ ህዬሳዉ እመተኔ?” ያጌዳ። እ ካይሱዋ ግዴዳ ድራዉ፥ ሄዋ ጌዳፐ አትን፥ ህዬሳዉ ቃረቲደ ግቤና፤ እ ሚሻ ቃርጪትያ ኦይቂያዋ ግድያ ድራዉ፥ ኡባ ዎደ አፐ ባረዉ አኬዳ።
የሱስ፥ “ሀ ሽቱዋ ታን ሞገትያ ጋላሳይ ጋካናዉ እዛ አያዉ ምንጃኔ? እዞ አግተ። ህዬሳቱ ኡባ ዎደ ህንተናና ደአና፤ ሽን ታን ኡባ ዎደ ህንተናና ደእከ” ያጌዳ።
አይሁዳቱዋፐ ዳሮ አሳይ የሱስ ቢታንያን ደእያዋ ስሲደ፥ ያ ቤዳ፤ ኡንቱንቱ የሱሳ በአና ግሻ ጻላላዉ ግደናን፥ እ ሀይቁዋፐ ደንዳ አልኣዛራካ በአናዉ ቤድኖ። ሄዋ ድራዉ፥ ቄሳቱዋ ካፓቱ አልኣዛራካ ቃይ ዎናዉ ማቀቴድኖ። አያዉ ጎፐ፥ አልኣዛራ ጋሱዋን ዳሮ አይሁዳቱ ባረና ካለያዋንታ አጊደ፥ የሱሳ አማኒኖ።


ዎንተ ጋላስ ፓስጋ ቦንችያሳ ዬዳ ዳሮ አሳይ የሱስ የሩሳላመ ብያዋ ስሴዳ። ያቲደ ዛምባ ሀይ ኦይቂደ፥ አ ሞካናዉ ከሴድኖ። ባረንቱ ኮሻ ቁ ኦደ፥
“ጾሳይ ጋላተቶ!
ጾሳ ሱንን ይያ እስራኤልያ ካቲ አንጀቴዳዋ!”
ያጌድኖ።
ጾሳ ማጻፋይ፥
“ጽዮነ ካታማዉ፥ ያዮፓ!
በአ፥ ነ ካቲ ሀረ ማራ ቦላ ኡቲደ ዬ”
ግያዋዳን፥ የሱስ ሀረ ማራ ደሚደ፥ አ ቶጌዳ።
የሱሳ ካልያዋንቱ ሄዋ ካሰ አኬክበይክኖ፤ ሽን የሱስ ቦንቼቴዳዋፐ ጉይያን፥ ጾሳ ማጻፋይ ሄዋ ኡባ ጌዳዋነ ቃይ ኡንቱንቱካ ሄዋ ኡባ የሱሳዉ ኦዳዋ ሀሳዬድኖ።
አልኣዛር ሞገቴዳ ጎንጎሉዋፐ የሱስ አ ጼሲደ፥ ሀይቁዋፐ ደንዳ ዎደ፥ የሱሳና ደእያ ዳሮ አሳይ የሱሳዉ ማርካቴዳ። ዳሮ አሳይ አ ሞካናዉ ከሴዳዌ፥ እ ሄ ዎልቃማ ማላልያዋ ኦዳ ድራሳ። ሄዋ ድራዉ፥ ፓርሳዋቱ እቱ እቱዋ፥ “ህንተንቱ አይነ ኦናዉ ዳንዳየናዋ በኢቴ! በእተ፥ ጋደ ኡባይ አ ጌዱዋ ካሌዳ” ያጌድኖ።
ፓስጋ ቦንችያ ጋላስ ጎይናናዉ የሩሳላመ ቤዳዋንቱ ግዶን እት እት ግሪከ አሳቱ ደኢኖ። ኡንቱንቱ ጋሊላ ጋድያን ቤተሳይዳ ጌተትያ ካታማፐ ዬዳ ፕልጶሳኮ ቢደ፥ “ጎዳዉ፥ ኑን የሱሳ በአናዉ ኮዬቶ” ያጊደ ዎሴድኖ። ፕልጶስ ቢደ፥ እንድራሳዉ ኦድና ላአቱካ ቢደ፥ የሱሳዉ ኦዴድኖ።
የሱስ ኡንቱንቶ ሀዋዳን ያጌዳ፤ “ታን፥ አሳ ናአይ፥ ቦንቼትያ ሳቲ ጋኬዳ። ታን ህንተንቶ ቱሙዋ ኦዳይ፤ እት ዛርጋ አይፋታ ቢታን ዎአደ ዎቃና ዮፐ፥ ባረካ አታዉ። ሽን ሄ ዛርጋ አይፋታ ዎቆፐ፥ ዳሮ አይፍያ አይፋዉ። ባረ ሸምፑዋ ሲቅያ ኦንነ ባይዜ፤ ቃይ ባረ ሸምፑዋ ሀ ሳኣን እጽያ ኦንነ መና ደኦ አሼ። ኦንነ ታዉ ኦፐ፥ ታና ካላናዉ በሴ፤ ቃይ ታን ደእያ ሳኣን ታዉ ኦያዌካ ደአናዋ። ታዉ ኦያ ኦናነ፥ ታ አቡካ አ ቦንቻናዋ።
“ሀእ ታ ሸምፑ ዳሮ ኡንኤቴዳ፤ ያትና ዋጎ? ታን፥ ‘ታ አቦ፥ ታና ሀ ሳታትፐ አሻርክ’ ያጎ? ቱይት፥ ታን ሀ ሳትያን ዬዳዌ ሀዋ ድራሳ። ታ አቦ፥ ነ ሱን ቦንቻ” ያጌዳ።
ሄ ዎደ ሳሉዋፐ፥ “ታን ታ ሱን ቦንቻድ፤ ቃይካ ጉጃደ ቦንቻና” ያግያ ቃላይ ዬዳ።
ሄ ሳኣን ኤቄዳ ጮራ አሳይ ሄ ቃላ ስሲደ፥ “ሄዌ ጉጉን” ያጌዳ።
ሀራንቱ ቃይ፥ “ኪታንቻይ አዉ ሃሳዬዳ” ያጌድኖ።
የሱስ ዛሪደ ኡንቱንታ፥ “ሀ ቃላይ ህንተንቱ ድራዉ ዬዳዋፐ አትን፥ ታ ድራሳ ግደና። ሀ ሳአይ ፕርደትያ ዎዲ ሀአ፤ ሀ ሳኣ ሞድያዌ ሀእ ካረ ኦለታናዋ። ቃይ ታን ማስቃልያ ቦላ ካቀትያ ዎደ፥ አሳ ኡባ ታኮ ጎቻና” ያጌዳ። እ ሄዋ ጌዳዌ አይ ማላ ሀይቁዋ እ ሀይቃነንቶነ ኡንቱንታ ኤርሳናሳ።
ዳሮ አሳይ ዛሪደ የሱሳ፥ “ኑ ህጊ ክርስቶስ መናዉ ደእያዋ ኦዴ። ያትና፥ ኔን ዋጋደ፥ ‘አሳ ናአይ ማስቃልያ ቦላ ካቀታና’ ጋይ? ሄ አሳ ናአይ ኦኔ?” ያጌድኖ።
የሱስ፥ “ፖኡ ህንተናና ጉ ዎድያ ጋምአናዋ። ህንተንቶ መና ማላ፥ ፖኡ ደእሽን፥ ፖኡዋን ሀመትተ። ማን ሀመትያ ኡራይ ሀቃ ብንቶነ ኤረና። ፖኡዋ አሳ ግዳና ማላ፥ ህንተንቶ ፖኡ ደእሽን፥ ፖኡዋ አማንተ” ያጌዳ። የሱስ ሄዋ ሃሳዬዳዋፐ ጉይያን፥ ቢደ ኡንቱንቱፐ ጌመቴዳ።

እ ሄዋ ኬና ዎልቃማ ማላታ ኡንቱንቱ ስንን ኦፐካ፥ ናብያ እሳያሰ፥
“ጎዳዉ፥ ኑ ማርካተ ኦን አማኔዴ?
ጎዳይ ባረ ዎልቃ ኦና በሴዴ?”
ጌዳዌ ቱማ ግዳና ማላ፥ ኡንቱንቱ አ አማንበይክኖ።
እሳያሰ ቃይካ፥
“ኡንቱንቱ አይፊ ጼለና ማላ፥
ኡንቱንቱ ዎዛናይካ አኬከና ማላ፥
ኡንቱንቱ ጾሳኮ ስምና፥ እ ኡንቱንታ ፓና ማላ፥
ጾሳይ ኡንቱንቱ አይፍያ ቆቅሴዳ።
ኡንቱንቱ ዎዛና ዳምሴዳ”
ጌዳ ድራዉ፥ ኡንቱንቱ አማናናዉ ዳንዳይበይክኖ።
እሳያሰ የሱሳ ቦንቹዋ በኤዳ ድራዉነ ቃይ አባ ሃሳዬዳ ድራዉ፥ ሄዋ ጌዳ።
ሄዋ ግድናካ፥ ሀራይ አቶ አይሁዳቱ ካፓቱዋፐካ ጮራቱ የሱሳ አማኔድኖ። ሽን ፓርሳዋቱ ባረና አይሁዳቱ ዎሳ ጎልያፐ ከሲኖ ጊደ ያዬዳ ድራዉ፥ አማኔዳ ጊደ ማርካትበይክኖ። አያዉ ጎፐ፥ ኡንቱንቱ ጾሳ ሳባፐ አደ፥ አሳ ሳባ ሲቄድኖ።
የሱስ ባረ ቃላ ቁ ኦደ ያጌዳ፤ “ታና አማንያ ኦንነ ታና ኪቴዳዋካ አማንያዋፐ አትን፥ ታ ጻላላ አማነና። ታና በእያ ኦንነ ታና ኪቴዳዋካ በኤ። ታና አማንያ ኡባይ ማን ደኤና ማላ፥ ታን ፖኡዋ ግዳደ ሳኣ ያድ። ታ ቃላ ስሲደ አዛዘተና ኡራ ኦናነ ታን ፕርድከ፤ አያዉ ጎፐ፥ ታን አላምያ አሻናዉ ዬዳዋፐ አትን፥ ፕርዳናዉ ያበይከ። ታና እጽያ ኦናነ ቃይ ታ ቃላ አከና ኦናነ ፕርድያዌ ደኤ። ታን ኦዴዳ ቃላይ ዉርሰ ጋላስ ሄ ኡራ ፕርዳና። አያዉ ጎፐ፥ ታን ሀዋ ታፐ ሃሳያበይከ፤ ሽን ታና ኪቴዳ ታ አቡ ታን ጋናዋነ ሃሳያናዋ ታና አዛዜዳ። ቃይ አ አዛዙ መና ደኡዋ አህያዋ ታን ኤራይ፤ ሄዋ ድራዉ፥ ታን ኦድያዌ ታ አቡ ታና ኦዳ ጊደ ኦዴዳዋ” ያጌዳ።

Poslušaj ዮሃንሳ ምሽራቹዋ 12