If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

አብራሃመ ማምረ ዎላቱዋ ዎጋቱዋ ጋርሳን ባረ ዱንካንያ ፐንግያን ሴታ ጋላስ ኡት ደእሽን፥ መና ጎዳይ አዉ ቆንጬዳ። አብራሃመ ቁ ጊደ ጼሊደ ሄዙ አሳቱ አ ማታን ኤቄዳዋንታ በኤዳ፤ ኡንቱንቱና ጋከታናዉ ባረ ዱንካንያ ፐንግያፐ ደንድ ዎጼዳ፤ ጋኪደ፥ ገድያን ሆኪደ፥ ኡንቱንቱ ስንን ጎይኔዳ። ስሚደ እ፥ “አቤት ታ ጎዳው፥ ታን ነ ስንን ናሸቴዳዋ ግዶፐ፥ ታና ነ ቆማ አጋደ አፓ። ሀያና ጉ ሃይ ዮ፤ ህንተንቱ ገዲ ሜጨትና፥ ሀ ም ኩዋን ሸምፕ አክተ። ህንተንቱ ሀእ ታኮ ህንተንቱ ቆማኮ ዬዳ ድራዉ፥ ካምእ ጊደ ህንተንቱ ብያሳኣ ባና ማላ፥ ታን ህንተንቶ ምያዋ አሀይ” ያጌዳ።
ኡንቱንቱ፥ “ዳሮ ሎአ፤ ኔን ግያዋዳን ኦ” ያጌድኖ።
አብራሃመ ዱንካንያ ግዶ ሳርኮ ኤሌል ቢደ፥ “ኤሌላደ ሊቆ ልያፐ ሄዙ ከረ ግድያዋ አካ ሙናቃደ ኡክ ኡካ” ያጌዳ። ቃይ፥ አብራሃመ ባረ መህያኮ ዎጽ ቢደ፥ ሎኦ ቦልትቦልታ ቦልትቦልታ ማራ ዶሪደ፥ እት ቆማዉ እምና፥ እ ኤሌል ሹኪደ ጊግሴዳ። ያትና አብራሃመ መኤዳ ማነ ጊግሴዳ ማራ አሹዋ እማቱዋ ስን አዳ፤ ኡንቱንቱ ሚሽን፥ እ ሄ ም ጋርሳን ኡንቱንቱ ማታን ኤቄዳ።
ኡንቱንቱ አ፥ “ነ ማቻታ ሳራ ሀቃኔ?” ያጊደ ኦቼድኖ።
እዛ፥ “ህን ዱንካንያ ግዱዋን ደአዉ” ያጌዳ።
መና ጎዳይ አ፥ “ታን ላይ ሀኖደ ቱሙ ኔኮ ስማና፤ ሄ ዎደ ነ ማቻታ ሳራ አቱማ ናኣ የላና” ያጌዳ።
ሳራ ሄ ዎደ አፐ ጉየ ባጋና ደእያ ዱንካንያ ፐንግያን ደእያና ሄዋ ስሳዱ። አብራሃመነ ሳራ ባረንቱ ላይ ሎይ ሱጊደ ጭሜድኖ። ሳርዉ ፒላይ ይያዋ አጌዳ። ሄዋ ድራዉ ሳራ ባረ ዎዛናን፥ “ታን ሀእ ጭማ ዉራ ክቾዋፐ ጉይያንነ ታ ጎዳይ ጭሞዋፐ ጉየ፥ ሀእ ታዉ አቱማ አሳና ጋከትያዌ ዋን ሀናኔ?” ያጋደ ሚጫዱ።
መና ጎዳይ አብራሃመ ሄ ዎደ፥ “ ‘ታን ጭማ ክቾዋፐ ጉየ፥ ቱሙ ናኣ የላንታየ?’ ጋደ፥ ሳራ አያዉ ሚጫደ? መና ጎዳዉ ዳንዳየተናባይ ቱሙ ደኢ? ላይ ሀኖደ ታን ኔኮ ስማና፤ ሄ ዎደ ሳራ አቱማ ናኣ የላና” ያጌዳ።
ሳራ ሎይ ያዬዳ ድራዉ፥ “ታን ሚጫበይከ” ያጋደ ላካዱ።
ሽን እ፥ “ኤ፥ ኔን ቱሙ ሚጫዳ” ያጌዳ።

ሄዋፐ ጉየ አሳቱ ደንዲደ ብ፥ ሶዶማ ካታማ ዱገ ዛር ጼሌድኖ፤ አብራሃመነ ኡንቱንታ ሞይዚደ ኡንቱንቱና ቤዳ። መና ጎዳይ ሄ ዎደ፥ “ታን ታ ኦናዉ ሀንያባ አብራሃመፐ ቆስከ። አብራሃመ ቱሙፐ ግታነ ዎልቃማ ካዉተ ግዳና፤ ሀ ሳኣ ካዉተቱ ኡባይ አ ባጋና አንጀታና። አያዉ ጎፐ፥ ጽሎተነ ፕርዳ ኦደ፥ መና ጎዳ ኦግያ ናጋናዳን ባረ ናናነ ባረፐ ጉየ፥ ባረ ሶ አሳ እ ዞራና ማላ፥ ታን አ ዶራድ፤ ሄዌነ መና ጎዳይ አብራሃመዉ እማና ጌዳዋ ኡባ ፖላናሳ” ያጌዳ።
መና ጎዳይ አብራሃመ፥ “ሶዶማፐነ ጋሞራፐ ዋስያ ዋሱ ሎይ ዳሬዳ ድራዉነ ኡንቱንቱ ናጋራይ ሎይ ዴጼዳ ድራዉ፥ ኡንቱንቱ ኦዳባይ ታኮ ጋኬዳ ዋሱዋ ኬሻ ኢተንቶነ በአናዉ አነ ታን ዱገ ዎይ፤ ሄዋ ማላ ኢታ ግዳና ይንቶነ ኤራና” ያጌዳ።
ሄዋፐ ጉየ፥ ላኡ አሳቱ ሶዶማኮ ስሚደ ቤድኖ፤ ሽን አብራሃመ መና ጎዳ ስንን ዎስ ደኤ። ሄ ዎደ አብራሃመ መና ጎዳኮ ሺቂደ ያጌዳ፤ “ቱሙ ኔን ጽሎቱዋ ኢታቱዋና ይሳይ? ሄ ዎልቃማ ካታማን እሻታሙ ጽሎቱ ደእንቶካ፥ ኔን ይሳይ? ኔን አን ደእያ እሻታሙ ጽሎቱዋ ድራዉ ሄ ካታማ አሽኪ? ሄዌ ኔፐ ሃኮ፤ ጽሎቱዋ ኢታቱዋና ዎያዌነ ጽሎቱዋነ ኢታቱዋ እት አይፍያን ጼልያዌ ኔፐ ሃኮ። ሀ ሳኣ ኡባ ፕርድያዌ ጽሉዋ ፕርደኔየ?” ያጌዳ።
መና ጎዳይ፥ “ሄ ሶዶማ ካታማን እሻታሙ ጽሎቱ ደኦፐ፥ ሄ ሳኣ ኡባ ኡንቱንቱ ድራዉ ታን አሻና” ያጌዳ።
ሄዋፐ ጉየ አብራሃመ፥ “ታን ቢታነ ብድን ግዳደ ታ ጎዳና ጻላደ ሃሳያናዉ ስም ዶማ ክቻድ፤ እሻታሙ ጽሎቱዋፐ እቼሹ ፓጭንቶ፥ ኔን ሄ እቼሻቱዋ ድራዉ ሄ ካታማ ኡባ ይሳይ?” ያጌዳ።
መና ጎዳይ፥ “ታን ያን ኦይታማነ እቼሹ ጽሎቱዋ ደምንቶ፥ ሄ ካታማ ይስከ” ያጌዳ።
አብራሃመ ዛረደካ፥ “ያን ኦይታሙ ጻላላይ ቤትንቶ ሽን?” ያጌዳ።
እ፥ “ታን ሄ ኦይታማቱዋ ድራዉ፥ ሄ ካታማ ይስከ” ያጌዳ።
ሄዋፐ ጉየ እ፥ “ሀይ ጎዳይ ታዉ ሀንቀቶፖ፤ ታን ጉጃደካ ሃሳያይ። ያን ሀታሙ ጻላላይ ቤትንቶ ሽን?” ያጌዳ።
መና ጎዳይ፥ “ታን ያን ሀታሙዋ ደምንቶ፥ ሄ ካታማ ይስከ” ያጌዳ።
አብራሃመ ቃይካ፥ “ታን ጎዳና ጻላደ ሃሳያናዉ ዶማ ክቻድ፤ ያን ላታሙዋ ጻላላይ ቤትንቶ ሽን?” ያጌዳ።
መና ጎዳይ፥ “ሄ ላታማቱዋ ድራዉ ታን አ ይስከ” ያጌዳ።
ሄዋፐ ጉየ አብራሃመ፥ “ሀይ ጎዳይ ታዉ ሀንቀቶፖ፤ ታን መጽ እት ገደ ሃሳያይ፤ ያን ታሙ ጻላላይ ቤትንቶ ሽን?” ያጌዳ።
መና ጎዳይ፥ “ሄ ታማቱዋ ድራዉ ታን ሄ ካታማ ይስከ” ያጌዳ።
መና ጎዳይ አብራሃመና ሃሳያ ዉርሴዳዋፐ ጉየ ቤዳ፤ አብራሃመካ ባረ ሶ ስሜዳ።

Poslušaj ዶመ 18