If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ସେତାକ୍ ଯୀଶୁ ଡଙ୍ଗାଇ ଚ୍‌ଗିକ୍‌ରି ଗାଲିଲୀ ସ୍‍ମ୍‍ନ୍ଦୁର୍‌ ପାର୍ ଅଇ ନିଜାର୍ ଗାମ୍ କପର୍‍ନାହୁମ୍‌କେ ଆଇଲା। ଆର୍ ଦ୍‌କା, ଟାଟିଏ ସଇରିଲା ଗଟେକ୍ ନିର୍‍କୁଳୀ ରଗିକେ ଚାରିଲକ୍ ଯୀଶୁର୍ ଲ୍‌ଗେ ଟେକି ଆନ୍‍ଲାଇ, ଆରେକ୍‌ ଯୀଶୁ ସେମ୍‌ନ୍‍କାର୍ ବିଶ୍‌ବାସ୍‌ ଦ୍‍କି ସେ ନିର୍‍କୁଳୀ ରଗିକେ କଇଲା, “ହିଲା, ସାସ୍‌ଦ୍‌ର୍‌, ମୁଇ ତର୍ ସ୍‍ବୁ ପାପ୍ କେମା କ୍‌ଲେ।” ଆରେକ୍‌ ଦ୍‌କା, ମୋଶାର୍ ନିଆଇ ଶିକାଉତା କ୍‍ତେକ୍ ଲକ୍ ମ୍‌ନେ ମ୍‌ନେ ଚିଡ୍‍ହଡ୍ କ୍‍ରି କଇଲାଇ, “ଇଲକ୍ ଇଶ୍ଵର୍‍କେ ଲିନ୍ଦା କ୍‌ରୁଲା।” ଯୀଶୁ ସେମ୍‌ନ୍‍କାର୍ ମ୍‌ନାର୍ ଚିନ୍‍ତା ଜାଣି କଇଲା, “ତୁମିମ୍‍ନ୍ ନିଜାର୍ ନିଜାର୍ ମ୍‌ନେ କାଇତାକ୍ କ୍‍ରାପ୍ ଚିନ୍‍ତା କ୍‍ରୁଲାସ୍? ‘ତର୍ ପାପ୍‌ସ୍‌ବୁ କେମା ଅଇଲି ବ୍‍ଲି କ୍ଉତାର୍’ କି, ‘ଉଟ୍ ଆର୍ ଇଣ୍ତିକ୍‌ରି ଜା’ ବ୍‍ଲି କ୍‍ମା, କାଇରି ସ୍‍ହଜ୍ କ୍‌ତା? ମ୍‍ତର୍ ଜ୍‍ଗତାର୍ ପାପ୍ କେମା କ୍‌ରୁକେ ମୁଇ ମାନାଇ ହିଲାର୍ ଯେ ଅଦିକାର୍ ଆଚେ। ଇରି ଜ୍‌ନ୍‌କ୍‌ରି ତୁମିମ୍‍ନ୍ ଜାଣୁହାରାସ୍, ଇତାର୍‍ଗିନେ ମୁଇ ନିର୍‍କୁଳୀ ରଗିକେ କଇଲେ, ‘ମୁଇ ତକେ କ୍‌ମ୍‌ଲେ, ଉଟ୍, ନିଜାର୍ ଟାଟିଦ୍‍ରି ତର୍ ଗ୍‍ରେ ବାରିଯା।’” ସେଡେବ୍‌ଳ୍ ସେ ନିର୍‍କୁଳୀ ରଗି ଉଟିକ୍‍ରି ନିଜାର୍ ଗ୍‍ରେ ବାରିଗ୍‍ଲା। ସେ କାମ୍ ଦ୍‍କି ଲକ୍‍ମ୍‍ନ୍ କାବାଅଇଲାଇ, ଆରେକ୍‌, ଜୁଇ ଇଶ୍ୱର୍‌ ମାନାଇମ୍‌ନ୍‌କେ ଅନ୍‌କ୍‌ରି ଅଦିକାର୍ ଦିଲାଆଚେ, ସେତାର୍‍ଗିନେ ସେମ୍‌ନ୍ ଇଶ୍ଵରାର୍ ମଇମା କୀର୍‍ତନ୍ କ୍‌ଲାଇ।


ଯୀଶୁ ସେତିହ୍‍ଣି ଜାତାବ୍‍ଳ୍ ମାଥିଉ ନାଉର୍ ଗଟେଲକ୍ ସିସ୍‌ତୁ ଆଦାଇ କ୍‌ର୍‌ତା ଟାଣେ ବ୍‌ସି ରିଲାର୍ ଦ୍‍କି, ଯୀଶୁ ତାକେ କଇଲା, “ମର୍‍ହ୍‌ଚେ ଆଉ।” ସେଡେବ୍‍ଳ୍ ମାଥିଉ ଉଟି ଯୀଶୁର୍ ହ୍‌ଚେ ଗ୍‍ଲା, ଆରେକ୍‌ ଯୀଶୁ ମାଥିଉର୍ ଗ୍‍ରେ କାଦି କାମ୍‌କେ ବ୍‍ସ୍‌ତାବ୍‍ଳ୍, ଦ୍‌କା କ୍‍ତେକ୍ ସିସ୍‌ତୁ ଆଦାଇ କ୍‌ର୍‌ତା ଲକ୍ ଆର୍ କ୍‍ତେକ୍ ପାପିଲକ୍‌ମ୍‍ନ୍ ଯୀଶୁ ଆର୍ ତାର୍ ଚେଲାମ୍‌ନ୍‌କାର୍ ସ୍‍ଙ୍ଗ୍‍ ବ୍‍ସ୍‍ଲାଇ। କ୍‍ତେକ୍ ଫାରୂଶୀମ୍‍ନ୍‍ ସେରି ଦ୍‍କିକ୍‍ରି ଯୀଶୁର୍ ଚେଲାମ୍‍ନ୍‍କେ ହ୍‌ଚାର୍‌ଲାଇ, “ତୁମାର୍ ଗୁରୁ କାଇତାକ୍ ସିସ୍‌ତୁ ଆଦାଇ କ୍‌ର୍‌ତା ଲକ୍ ଆର୍ ପାପିମ୍‍ନ୍‌‍କାର୍ ସ୍‍ଙ୍ଗ୍‍ ମିସିକ୍‌ରି ବ୍‌ସି କାମ୍‍ଲା?” ମ୍‍ତର୍ ଯୀଶୁ ସେରି ଶୁଣି ସେମ୍‌ନ୍‌କେ କଇଲା, “ବ୍‍ଲ୍ ଲକ୍‍ମ୍‍ନ୍‍କାର୍ ଗିନେ ଡାକ୍‍ଟର୍ ଲଡାନାଇ, ମ୍‍ତର୍ ଜୁଇଲକ୍ ରଗେ ହ୍‌ଳିଆଚେ ତାକେ ଡାକ୍‍ଟର୍ ଲଡା। ତୁମିମ୍‍ନ୍ ମକେ ବଳିହୁଜା ଦେତା ବାଦୁଲେ, ମୁଇ ଇଚା କ୍‌ରୁଲେ ତୁମିମ୍‍ନ୍ ଲକ୍‌ମ୍‍ନ୍‌କେ ଦୟା ଦ୍‌କାଉଆ, ଇକ୍‍ତାର୍ ଅର୍‍ତକେ ତୁମିମ୍‍ନ୍ ଯାଇ ଶିକ୍ୟା କ୍‍ରା, କାଇତାକ୍ ମୁଇ ଦ୍‌ର୍‌ମ୍ ଲକ୍‌ମ୍‍ନ୍‌କେ କୁଦୁକ୍ ଆସି ନ୍‌କେରି, ମ୍‍ତର୍ ପାପି ମ୍‌ନ୍‌କେ କୁଦୁକ୍ ଆଇଲେଆଚି।”


ସେଡେବ୍‍ଳ୍ ଡୁବେନ୍ ଯୋହନାର୍ ଚେଲାମ୍‌ନ୍ ଯୀଶୁର୍ ଲ୍‌ଗେ ଆସି କ୍‍ଇଲାଇ, “ଅମିମ୍‍ନ୍ ଆର୍ ଫାରୂଶୀମ୍‍ନ୍‍ ଉପାସ୍ କ୍‌ରୁଲୁ, ମ୍‍ତର୍ କାଇତାକ୍ ତର୍ ଚେଲାମ୍‌ନ୍ ଉପାସ୍ ନ୍‌କେର୍‌ତି?” ଯୀଶୁ ସେମ୍‍ନ୍‍‍କେ କଇଲା, “ବିବାଗ୍‍ରାର୍ ବ୍‍ର୍‌ ବାଟାର୍ ଲକ୍, ସେମ୍‍ନାର୍ ସ୍‍ଙ୍ଗ୍‍ ବ୍‍ର୍‌ ରେତା ହ୍‍ତେକ୍ କ୍‌ବେ ହେଁ ମ୍‌ନ୍‌ଦୁକ୍ କ୍‍ରି ନ୍‍ରେତି। ମ୍‍ତର୍ ଦିନ୍ ଆସେଦ୍, ଜ୍‌ଡେବ୍‌ଳ୍ ବ୍‍ର୍‌ ଗତିଆମ୍‍ନାର୍ ତ୍ଇହ୍‍ଣି ବାରାଇ ଜାଇଦ୍, ସେଡେବ୍‍ଳ୍ ସେମ୍‍ନ୍ ଉପାସ୍ କ୍‌ର୍‌ତି। କେ ନ୍ଉଆ ହ୍‍ଚିଆକେ କାଟିକ୍‍ରି ହ୍‌ର୍‌ନା ହ୍‌ଚିଆର୍ କାଣାଇ ସିଲାଇ ନ୍‌କେର୍‌ତି। କାଇତାକ୍ ସେରି ସିଲାଇଲେକ୍ ନ୍‍ଉଁଆ ହ୍‍ଚିଆ ଆକାଳ୍‍ଲେକ୍ ଜିକିଅଇ ହ୍‌ର୍‌ନା ହ୍‍ଚିଆକେ ଅଦିକ୍ ବ୍‍ଡ୍‍କାଣା କ୍‍ରେଦ୍। ଆରେକ୍‌ ଲକ୍ ନ୍ଉଆ ଅଙ୍ଗୁର୍‌ ର୍‌ସ୍ ହ୍‌ର୍‌ନା ଚାମ୍‍ଳା ମଣାଇ ନ୍‍ସେଙ୍ଗାଉତି। ଯଦି ସ୍‌ଙ୍ଗାଇଲେକ୍ ଚାମ୍‍ଳା ମଣାକେ ନ୍ଉଆ ଅଙ୍ଗୁର୍‌ ର୍‌ସ୍ ହେହୁଲ୍ ଅଇ ହୁଲିକ୍‍ରି ହୁଟାଇଦେ, ଆରେକ୍‌ ଚାମ୍‍ଳା ମଣା ସ୍‍ବୁ ନ୍‍ଷ୍ଟ ଅଇଦ୍। ମ୍‍ତର୍ ଲକ୍‍ମ୍‍ନ୍ ନ୍ଉଆ ଅଙ୍ଗୁର୍‌ ର୍‌ସ୍ ନ୍ଉଆ ଚାମ୍‍ଳା ମଣାଇ ସ୍‍ଙ୍ଗାଉତି, ଆରେକ୍‌ ସେ ଅଙ୍ଗୁର୍‌ ର୍‌ସ୍ ନ୍‌ଷ୍ଟନଇ।”


ଯୀଶୁ ଇ ସ୍‌ବୁ ଶିକ୍ୟା ଦେତାବ୍‍ଳ୍ ଯାଇରସ୍ ନାଉର୍ ଗଟେକ୍ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରାର୍ ଅଦିକାରି ଯୀଶୁର୍ ଲ୍‌ଗେ ଆସି ତାର୍ ହାଦ୍‌ତ୍‌ଳେ ହ୍‍ଳି ମୁଣ୍ତିଆ ମାରି କଇଲା, “ମର୍ ସାନ୍ ଟକି ମ୍‌ଲାହର୍ ଅଇଆଚେ, ମ୍‍ତର୍ ତୁଇ ଆସି ତାର୍ ଉହ୍‍ରେ ଆତ୍ ସ୍‍ଙ୍ଗାଇଲେକ୍‌, ସେ ସ୍‌ତ୍‌କ୍‌ରି ବାଚେଦ୍।” ସେତାକ୍ ସ୍‌ଙ୍ଗେ ସ୍‌ଙ୍ଗେ ଯୀଶୁ ଉଟ୍‍ଲା ଆର୍ ତାର୍ ଚେଲାମ୍‌ନ୍‌କାର୍ ସ୍‍ଙ୍ଗ୍‍ ତାର୍ ହ୍‌ଚେ ହ୍‌ଚେ ଗ୍‍ଲାଇ। ଆର୍ ଦ୍‌କା ବାର ବର୍ଷ ହ୍‍ତେକ୍ ଗଟେକ୍ ମାଇଜିକେ ବ୍‌ନିଜାତା ରଗ୍ ଅଇରିଲି, ସେ ହ୍‍ଚ୍‍ବାଟ୍ ଆସି ଯୀଶୁର୍ ହ୍‌ଚିଆର୍ ଆଚଳେ ଚୁଇଲି, କାଇତାକ୍ ସେ ମାଇଜି “ଚୁଚା ହ୍‍ଚିଆ ଚୁଇଲେକ୍ ମୁଇ ଉଦାର୍‌ ଅଇନ୍ଦେ” ବ୍‍ଲି ମ୍‌ନେ ମ୍‌ନେ କ୍ଉତିରିଲି। ମ୍‍ତର୍ ଯୀଶୁ ବୁଲିକ୍‍ରି ସେ ଟକିକେ ଦ୍‍କ୍‍ଲା ଆର୍ କଇଲା, “ଟକି, ସାସ୍‍ଦ୍‍ର୍, ତର୍ ବିଶ୍‌ବାସ୍‌ ତକେ ଉଦାର୍‌ କ୍‍ରିଆଚେ।” ସେଦିନେ ହ୍‍ଣି ସେ ଟକି ବ୍‍ଲ୍ ଅଇଲି। ହ୍‌ଚେ ଯୀଶୁ ସେ ଯାଇର୍‍ସାର୍‌ ଗ୍‍ରେ ଗ୍‍ଲା, ଆର୍ ତହୁକେ ନେତାର୍ ଗିନେ ମ୍‌ରି ହୁକ୍‍ତା ଲକ୍‌କେ ଆର୍ ବେସି କାନ୍ଦାବାଳ୍ ଅଉତିରିଲା ଲକ୍‌ମ୍‍ନ୍‌କେ ଦ୍‍କି କଇଲା, “ସ୍‌ବୁଲକ୍ ହ୍‍ଦାଇ ବାର୍ ଅଉଆ, ଟକି ତ ମ୍‌ରି ନ୍‌କେରେ, ମ୍‍ତର୍ ସଇଲି ଆଚେ।” ସେତାକ୍ ସେତିରିଲା ସ୍‍ବୁ ଲକ୍‍ମ୍‍ନ୍ ଯୀଶୁର୍ ଇକ୍‍ତାର୍ ଗିନେ ତାକେ ଲାଜ୍ କ୍‌ଲାଇ। ମ୍‍ତର୍ ଲକ୍‌ମ୍‍ନ୍‌କେ ହ୍‍ଦାଇ ବାର୍‌କ୍‌ଲା ଉତାରେ ଯୀଶୁ ଗ୍‍ର୍ ବିତ୍‌ରେ ଜାଇ ଟକିର୍ ଆତେ ଦ୍‍ରି ଉଟାଇଲା, ଆର୍ ସେ ଜୀବନ୍ ଅଇ ଉଟି ବ୍‍ସ୍‍ଲି। ଆରେକ୍‌, ଇ ଗଟ୍‌ଣାର୍ କ୍‌ତା, ସେ ଦେଶାର୍ ସ୍‌ବୁବାଟ୍ ଉର୍‍ଜି ଅଇଲି।


ଯୀଶୁ ସେତିହ୍‍ଣି ଜାତାବ୍‍ଳ୍ ଜଳେକ୍ କାଣା ହ୍‌ଚେ ହ୍‌ଚେ ଜାଇ ବେଲ୍‌କି ଅଇକ୍‍ରି କ୍‍ମ୍‍କେ ଲାଗ୍‍ଲାଇ, “ଏ ଦାଉଦ୍ ର୍‍ଜାର୍ ବ୍‌ଉଁଶାର୍ ହିଲା, ଅମୁକେ ଦ୍‌ର୍‌ମ୍ କ୍‍ର୍।” ଆରେକ୍‌, ଯୀଶୁ ଗଟେକ୍ ଗ୍‍ରେ ହୁର୍‍ଲାକେ ସେ କାଣାମ୍‌ନ୍ ତାର୍ ଲ୍‌ଗେ ଆଇଲାଇ। ଯୀଶୁ ସେମ୍‍ନ୍‍‍କେ କଇଲା, “ମୁଇ ତୁମୁକ୍‌ମ୍‌ନ୍ ବ୍‍ଲ୍ କ୍‍ରିନ୍ ବ୍‍ଲି ତୁମିମ୍‍ନ୍ ବିଶ୍‌ବାସ୍‌ କ୍‍ରୁଲାସ୍ କି?” ସେମ୍‍ନ୍ କଇଲାଇ, “ହେଁ ମାପ୍‌ରୁ।” ତ୍‍ବେ ଯୀଶୁ ସେମ୍‌ନ୍‌କାର୍‌ ଆକିକେ ଚୁଇଲା ଆର୍ କଇଲା, “ତୁମି ବିଶ୍‌ବାସ୍‌ କ୍‌ଲାହର୍ ତୁମାର୍ ଉହ୍‍ରେ ଗ୍‍ଟ।” ସେମାଡେ ସେମ୍‌ନ୍‌ ଦ୍‌କୁ ହାର୍‍ଲାଇ। ଆରେକ୍‌, ଯୀଶୁ ସେମ୍‍ନ୍‍‍କେ ଇକ୍‍ତା କାକେ କ୍ଉଆନାଇ ବ୍‍ଲି ଡାଟ୍‍କ୍‍ରି ଆଦେଶ୍ ଦିଲା। ମ୍‍ତର୍ ସେମ୍‍ନ୍ ସେତିହ୍‍ଣି ଜାଇ ଯୀଶୁ କ୍‌ରିରିଲା କାମ୍‌କେ ସ୍‌ବୁବାଟ୍ କ୍‍ଇଲାଇ।


ସେ ଜଳେକ୍‌ କାଣାଲକ୍ ବାରିଜାତାବ୍‍ଳ୍, ଦ୍‌କା, କ୍‍ତେକ୍ ଲକ୍‍ମ୍‍ନ୍ ଗଟେକ୍ ଗୁଲା ବୁତ୍ ଡ୍‍ସ୍‍ଲା ଲକ୍‌କେ ଯୀଶୁର୍ ଲ୍‌ଗେ ଆନ୍‍ଲାଇ। ଆରେକ୍‌, ଯୀଶୁ ସେ ଲକାର୍‌ ବିତ୍‌ରେହ୍‌ଣି ବୁତ୍‌ଆତ୍ମାକେ ଚାଡାଇଲା, ଆର୍ ସେ କ୍‌ତା କ୍‍ମ୍‍କେ ଆରାମ୍ କ୍‍ଲା। ସେତାକ୍ ଲ୍‌ଗେରିଲା ଲକ୍‍ମ୍‍ନ୍ ଚାନିଆ ଅଇ କଇଲାଇ, “ଇସ୍ରାଏଲ୍ ଲକ୍‍ମ୍‍ନ୍ କ୍‍ବେହେଁ ଅନ୍‌କା କାମ୍ ଦ୍‍କି ନ୍‌କେରୁ।” ମ୍‍ତର୍ ଫାରୂଶୀମ୍‍ନ୍‍ କଇଲାଇ, “ଇଲକ୍ ଶଇତାନ୍ ମ୍‌ନ୍‌କାର୍ ର୍‍ଜା ସାଇଜେ ବୁତ୍‌ଆତ୍ମା ଚାଡାମ୍‍ଲା।” ତାର୍ ହ୍‌ଚେ ଯୀଶୁ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରେ ଶିକ୍ୟା ଦେଇ ଇଶ୍ୱର୍‌ ରାଇଜର୍ ସୁବ୍‌କ୍‌ବର୍ ପର୍‍ଚାର୍ କ୍‍ଲା, ଆର୍ ସ୍‍ବୁ ପର୍‍କାର୍ ରଗ୍ ଆର୍ ବେମାର୍ ଲକ୍‌କେ ବ୍‌ଲ୍‌କ୍‍ରି ସ୍‍ବୁ ସ୍‍ହର୍‍ ଆର୍ ଗାମ୍ ବୁଲୁକେ ଲାଗ୍‍ଲାଇ।


ଯୀଶୁ ବେସି ଲକ୍‌ମ୍‍ନ୍‌କେ ଦ୍‍କି ସେମ୍‍ନ୍‍କାର୍ ଗିନେ ବିସାସ୍ ଅଇ ଜୀବନ୍ ଦୁକାଇଲା, କାଇତାକ୍ ସେମ୍‍ନ୍ ଗ୍‍ଉଡିଆ ନ୍‍ରିଲା ମେଣ୍ଢାମ୍‍ନ୍ ଜ୍‌ନ୍‌କ୍‌ରି ଇବାଟ୍ ସେବାଟ୍ ଅଉତି, ସେନ୍‍କ୍‌ରି ସେମନ୍ ଦୁକ୍‍କ୍‍ଷ୍ଟ ହାଉତିରିଲାଇ। ସେଡେବ୍‍ଳ୍ ଯୀଶୁ ନିଜାର୍ ଚେଲାମ୍‍ନ୍‍କେ କଇଲା, “ତାଷ୍ ସିନା ବେସି ଅଇଲିଆଚେ, ମ୍‍ତର୍ କାଟିକ୍‍ରି ଆଣୁକେ ଉଣାଲକ୍। ସେନ୍‍କାର୍ ଇଶ୍ଵରାର୍ ରାଇଜାର୍ କ୍‌ତା ଶୁଣୁକେ ଆର୍ ବିଶ୍‌ବାସ୍‌ କ୍‌ରୁକେ ବେସି ଲକ୍‍ମ୍‍ନ୍ କ୍‌ର୍‌ତି, ମ୍‍ତର୍ ଇଶ୍ଵରାର୍ ରାଇଜାର୍ କ୍‌ତା ସେମ୍‌ନ୍‌କେ କ୍ଉତାଲକ୍ କମ୍।” ସେତାକ୍ ନିଜାର୍ ତାଷ୍ କ୍‌ର୍‌ତା ହ୍‍ଦାଇ କାମ୍‌କ୍‌ର୍‌ତା ଲକ୍‌ମ୍‍ନ୍‌କେ ହ୍‌ଟାଉତାର୍ ଗିନେ, ହାଚି ହ୍‍ଦାର୍ ମାଲିକ୍‌କେ ଗ୍ଉଆରି କ୍‍ରା।

Poslušaj ମାଥିଉ 9