Athpariya 2023 WBT (NT) Non-Dramatized

Athpariya 2023 WBT (NT) Dramatized

येसुङा चेलाचि लोडुचे, “खानि चिन्‌तित् लिनेनिन्॥ खानिङा माङ्‌हाङ् बिस्‍वास चोगानुम्, हिट्‌नुङ् आङा चा बिस्‍वास याङ्‌चोगानि॥ आङाना माङ्‌हाङ् पाबाङाना ओपाङ्‌ङि जोम् युङ्‌माना डेन्‌चि उयुङ्‌ग्‍वा॥ हिट्‌नाड्‌डे लिनेट्‌निना बे, आङा खानिलाउङ्‌सा ठोङ् टेयार चोक्‍ङा खाट्‌नागेट्‌नाँ नुङ् लोनाने बे टे? हिट्‌नुङ् आङा खाट्‌नाउङ् खानि लोङ्‌सा ठोङ् टेयार चोगुङ् आङा फेरि नोक्‍ङा उङ्‌ङा, हिट्‌नुङ् खानि आङालोक् खाट्‌नाँनि, हिट्‌डेउङ् आङा खोनि युङ्‌ङा, हिट्‌नि खानि चा आलिसिटि॥ आङा खाट्‌नागेट्‌नाना डेन्‌ङिना लाम्‍बोम्‍टे खानिङा ठाहा आटोगुएसुम्‍मे॥”
थोमाङा लोडुए, “टाङ्‌बा, खान् खोनि आखाट्‌युगेट्‌ना, हिट्‌ना आन्‍याँ ठाहा माले, हिट्‌नुङ् खान् आखाट्‌ना डेन्‌ङिना लाम्‍बो आन्‍याँ खोड्‌डेउङ् ठाहा टोगुम्‍टुम्‍माना टे?”
येसुङा हिट्‌ना लोडुए, “लाम्‍बो, छेम्‍बा हिट्‌नुङ् चोला आङा डोक्॥ आङा माले आरु खोनालोक् चा पाबाङि खाप्‍मा हिनिना॥ हाट्‌ले छेम्‍बा खानिङा आङा मिसेन् आनिसिएसिङे, हिट्‌नुङ् आङाना पाबा चा मिसेन् आनिसुम्‍टुम्॥ हाट्‌ले नुङ्‌ना याम्‍बा उन् खानिङा मिसेन् आनिसुम्‍टुम्, हिट्‌नुङ् उन् आनिसुएसुम्‍मे॥”
फिलिपङा उन् लोडुए, “टाङ्‌बा, आन्‍याँलोङ्‌सा पाबा याप्‌मिनिमेट्‌टा॥ हिट्‌ना टेप्‍माभा आन्‍याँलोङ्‌सा लियुक्॥”
येसुङा हिट्‌ना लोडुए, “फिलिप, नाट्‌टेप् औधि लेम्‍बा सोम्‍मा आङा खानिलोक् वाङेट्‌ङा, हिट्‌नुङ् चा खान्‍ङा आङा मिसेन् याङ्आनिनिङ्‌नै? साङा आङा याङ्‌निसेएसे, हिट्‌नाङा पाबा चा निसुएसुए॥ खान् ‘आन्‍याँलोङ्‌सा पाबा याप्‌मिनिमेट्‌टा’ नुङ् खोड्‌डेउङ् आपिग्‌युक्‍ना? पाक् आङा पाबाङि हिट्‌नुङ् पाबा आङि वाहेट् नुङ् खान्‍ङा बिस्‍वास आचोगुन्‍ना इ? खानि लोनानिगा रिङ् आङाना आप्‍पे आनिङ्‌ग्‍वाङिना रिङ् माट्‌टुङ्‌ना माखाक्, टरो आङि युङ्‌ना पाबाङा उन्‍ङाना ओटोॽवा आङालाम्‍मा चोगुएट्‌टु॥ आङा पाबाङि हिट्‌नुङ् पाबा आङि वाहेट् नुङ् बिस्‍वास चोगानुम्॥ हिट्‌डे माखाक् भोने आङा चोगुङ्‌गा नागा टोॽवा पुयानुमुङ् बिस्‍वास चोगानुम्॥
“छेम्‍बा डोक्, आङा खानि लोनाँनि, जुन्‍ङा आङा बिस्‍वास याङ्‌चोक्‌युक्, हिट्‌नाङा आङा चोगुङ्‌ना टोॽवा चा चोगुटु, हिट्‌नुङ् हिट्‌नागा नुङ्‌ना चा ठेगा टोॽवा चोगुटु, पोङ्‌भोने आङा पाबाङि खाट्‌नागेट्‌नाँ॥ हिट्‌नुङ् खानिङा आनिङ्‌ङि जे सुके आनाक्‌टि चा छालाम्‍मा पाबाङाना माहिमा उलियाक् नुङ् आङा हिट्‌ना चोगुङ्‌टुङ्॥ खानिङा आनिङ्‌ङि जे थोक् आनाक्‌टिए भोने चा आङा हिट्‌ना चोगुङ्‌टुङ्॥

“खानिङा आङा माया आचोगिटिङा भोने, आङा लोनानिगा आग्‍याँ आटेन्‌डिटि॥ हिट्‌नुङ् आङा पाबाङि बिन्‌टि ठाङ्‌सुङ्‌टुङ्, हिट्‌नुङ् उन्‍ङा आरको घुवार काफाबा खानि लाउङ्‌सा मापाङ्‌सिबिडिटि, हिट्‌नुङ् उन् सोरोक् खानिलोक् लियुक्॥ उन् सेङ्‌सेङ्‌ना हाङ्‌सा ए, उन्‍ङा ख्‍वाप्‍पा छेम्‍बाना रिङ्‌ङि लाम्‌टिमा आमेट्‌युक्, टरो उन् नाराङिगा याप्‌मिचिङा लाड्‌मा उहिडुन्‍ना, पोङ्‌भोने नाराङिगा याप्‌मिचिङा उन् पुमा चा उपुयुन्‍ना हिट्‌नुङ् मिसेन् चा उनिसुन्‍ना॥ खानिङा उन् मिसेन् आनिसुम्‍टुम्, पोङ्‌भोने उन् खानिङि बास हेन्‌युक्, हिट्‌नुङ् उन् खानिङि युङ्‌युक्॥ आङा खानि याङ्आछाडिगा गाड्‌डे पोक्‍नेनिन्‍गा, आङा फेरि खानि सोरि टाङा॥ छोप्‍मोङ्‌लाम्‍मा नाराङिगा याप्‌मिचिङा आङा उनिनिङ्‌गा, टरो खानिङाउम्‍बाक् आङा आनिसिटिङा॥ आङा उहिङ्‌ग्‍वाट् लिसाङ्‌नाँ खानि चा उहिङ्‌ग्‍वाट् आलिसिटि॥ हिट्‌ना लेम्‍बा खानिङा आङा आप्‍पाङि हिट्‌नुङ् खानि आङि, हिट्‌नुङ् आङा खानिङि वाङेट्‌ना नुङ् ठाहा आटोगुम्‍टुम्॥ आङा माट्‌टुङ्‌गा रिङ् खेम्‍सुङ् हिड्‌डे गाड्‌डे काचोक्‍बा डोक् आङा माया काचोक्‍बा याप्‌मि ए॥ हिट्‌नुङ् आङा माया काचोक्‌लोङ्‌सा पाबाङा चा माया चोगुटु, हिट्‌नुङ् आङा चा उन् माया चोगुङ्‌टुङ् हिट्‌नुङ् आङा आप्‍पेलाउङ्‌सा हिट्‌ना सोरि पारकाट् चोगुङ्‌टुङ्॥”
याहुदाङा (याहुदा इस्‍कारियोतउम्‍बाक् माखाक्) उन् लोडुए, “टाङ्‌बा, पोङ् खान् आन्‍याँ सोरि एडोक् आप्‍पेलोङ्‌सा आठेट्‌युक्‍ना, टरो नाराङिगा याप्‌मिचिङिम्‍बाक् माखाक्॥”
येसुङा हिट्‌ना लोडुए, “आङा माया काचोक्‍बाचिङा आङा माट्‌टुङ्‌ना रिङ् ओटेन्‌युक्, हिट्‌नुङ् आप्‍पाङा हिट्‌नागा माया चोगुचिचि, हिट्‌नुङ् आन्‍च्‍याँ हिट्‌नागा सोरि टाचिच्‍याँ हिट्‌नुङ् उन्‌चिलोक् युङ्‌चिच्‍याँ॥ आङा माया याङ्ओचोक्‌निगाँ आङा माट्‌टुङ्‌ना रिङ् ओटेन्‌निगा॥ खानिङा आखेम्‍सुम्‍गा ना रिङ् आङालाम्‍मा टायाना माखाक्, टरो आङा कापाङ्‌बा पाबालाम्‍मा टायाना ए॥
“नागा रिङ् खानिलोक् लिङाना बेला डोक् आङा खानि लोनानिगा ए॥ जब घुवार काफाबा, सेङ्‌सेङ्‌ना हाङ्‌सा आङाना पाबाङा आनिङ्‌ङि पाङ्‌सुटु, उन्‍ङा डोक् खानि ख्‍वाप्‍पा रिङ् माहिसिक्‌टिटि हिट्‌नुङ् आङा लोनानिगा सोब्‍बे रिङ् मिप्‍मा मामेट्‌टिटि॥
“आङा खानिलोङ्‌सा हाङ्‌हाङ् पिनाढानाँनि॥ आप्‍पे आङाना हाङ्‌हाङ् खानि पिनाँनि हिट्‌नुङ् नाराङा आपिना गाड्‌डेना हाङ्‌हाङ् माखाक्॥ खानि निङ्‌ग्‍वा टुक्‍नेनुम् हिट्‌नुङ् किट्‌नेनिन्॥ ‘आङा नाहिलाम्‍मा खाट्‌नागेट्‌नाँ हिट्‌नुङ् खानि सोरि फेरि नोक्‍ङा टाङा’ नुङ् आङा माट्‌टुङ्‌ना रिङ् खानिङा आखेम्‍सुम्‍लेट्‌टुम्‍मे॥ खानिङा आङा छेम्‍बा डोक् माया आचोगिङाङ्‌गा भोनेम्‍टे आङा माङ्‌हाङ् पाबा सोरि खाट्‌नानाँ खानि चाप् टायेबे, पोङ्‌भोने आङा नुङ्‌ना पाबा डोक् ठेना ए॥ हाट्‌ले नागा रिङ् लिमा पाइले डोक् आङा खानि लोनेनाने, हिट्‌डेउङ् जब नागा रिङ् लियुक् खानिङा बिस्‍वास आचोगुम्‍टुम्॥ हाट्‌लेम्‍टे आङा खानिलोक् आरु जोम् रिङ् चेक्‍मा टोक्‌निङ्‌ना, पोङ्‌भोने ना नाराङिना सासान् काचोक्‍बा टायुगेट्॥ हिट्‌नाङा आङा पाक्‍चा चोक्‍मा याङ्‌हिनिना॥ टरो नाराङिगा याप्‌मिचिङा आङा पाबा माया चोगुङ्‌ना नुङ् ठाहा ओटोगुवाक् नुङ् पाबाङा आग्‍याँ याङ्‌चोगाना रिङ् गाड्‌डे चोगुङ्‌टुङ्॥ कोबानि, हाट्‌ले आनि नाहिलाम्‍मा खाड्‌याक्॥”

Poslušaj युहान्‍ना 14