ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤏᤢᤜᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱ ᤁᤧᤖᤧᤰ ᤘᤠᤗᤠᤎᤠᤀᤥ ᤗᤠᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤌᤠ᤺ᤰᤁᤥ ᤀᤠᤱᤃᤠ᤹ ᤀᤠᤔᤡᤰᤛᤠᤀᤥ ᤂᤧᤏᤧ᤹ ᤛᤠᤶᤕᤥᤒᤠ ᤏᤡᤏᤧᤀᤠᤱ ᤘᤠ᤹॥ ᤁᤧᤖᤧᤰ ᤐᤖᤡᤰᤗᤧᤴ ᤛᤢᤳᤌᤥᤒᤠ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤁᤢᤃᤠᤵ ᤏᤢᤛᤡ ᤌᤰᤛᤠᤜᤠ᤹. ᤜᤧᤰᤁᤩᤠᤱ ᤛᤢᤳᤌᤥᤒᤠ ᤔᤣ᤺ᤶᤒᤠ ᤌᤰᤛᤠᤜᤠ᤹ᤗᤠᤶᤒᤠ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤁᤢᤃᤠᤵ ᤌᤡᤰ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤖᤡᤰ ᤐᤖᤡᤰᤐᤠ ᤐᤢᤛᤠᤜᤠ᤹ᤀᤥᤗᤠᤶᤔᤠᤱ ᤁᤢᤃᤠᤵ ᤏᤢᤛᤡ ᤋᤠᤖᤧᤛᤧ᤹॥ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤌᤰᤛᤠᤜᤠ᤹ ᤏᤢ ᤐᤢᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤋᤠᤖᤧᤛᤧ᤹॥ ᤀᤠᤸᤗᤀᤠᤱᤎᤥ ᤏᤢᤛᤡ ᤕᤧᤴ ᤀᤣᤃᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤱᤃᤠ᤹ ᤗᤡᤒᤥᤱ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤐᤠᤱᤃᤧᤴᤍᤡᤱ ᤘᤜᤡᤵᤔᤠᤴ ᤌᤠᤖ ᤕᤠ᤺ᤴᤍᤢᤱ᤹॥ ᤀᤠᤱᤃᤠ᤹ ᤆᤥᤃᤢᤱᤛᤡᤱᤒᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤐᤠᤎᤢᤱᤛᤠᤜᤠ᤹ ᤔᤧᤰᤂᤢᤱᤛᤡᤱ᤹॥”
ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤈᤠ᤺ᤱ ᤆᤥᤃᤢᤒᤠ ᤜᤧᤰᤁᤣᤀᤣ ᤏᤢᤜ᤺ᤸᤗᤧ ᤁᤧᤖᤧᤰ ᤆᤥᤃᤢ॥
ᤏᤢᤜᤴ ᤁᤡᤵ ᤋᤢᤰᤛᤡ ᤋᤱᤒᤣ ᤁᤧᤖᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤍᤵᤔᤠ ᤌᤠᤅᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤏᤢᤜᤴ. ᤁᤢᤔᤣ᤺ᤳᤋᤡᤴ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹. ᤜᤧᤰᤁᤩᤠᤱ ᤁᤢᤶᤒᤠᤱᤗᤡᤜᤠ᤹ ᤘᤍᤵᤔᤠ ᤁᤧᤃᤧᤵᤐᤠ ᤆᤫᤠ᤺ᤳᤋᤥᤏᤢ ᤜᤡᤱᤔᤠᤖᤧ ᤗᤠᤃᤡ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ ᤛᤢᤳᤌᤥ ᤌᤰᤛᤠᤜᤠ᤹ ᤏᤢ ᤛᤢᤳᤌᤥ ᤔᤣ᤺ᤶᤒᤠ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤧᤀᤢ᤺ᤱᤛᤡᤒᤠ ᤁᤧᤖᤧᤰ ᤌᤰᤛᤠᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤀᤡᤱᤈᤠ᤺ᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤁᤢᤃᤠᤵ ᤁᤢᤃᤠᤵ. ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤌᤰᤛᤠᤜᤠ᤹ ᤏᤢᤜ᤺ᤴᤏᤢ ᤘᤠᤗᤠᤎᤠᤀᤥ ᤔᤧᤍᤩᤧ॥ ᤜᤧᤰᤁᤩᤠᤱ ᤏᤢᤛᤡ ᤕᤧᤴ ᤁᤧᤖᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤍᤵᤔᤠ ᤘᤜᤡ᤺ᤳᤋᤡᤴ ᤌᤩᤧ॥
ᤏᤢᤜᤴ ᤁᤡᤵ ᤋᤢᤰᤛᤡ ᤋᤱᤒᤣ ᤁᤧᤖᤧᤒᤠ ᤏᤡᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤏᤢᤛᤡ ᤕᤧᤴ ᤁᤧᤖᤧᤸᤗᤧ ᤕᤶᤒᤕᤶᤒᤠ ᤔᤢᤜᤡ᤺ᤰᤛᤥ ᤂᤠᤜᤡ᤺ᤰᤛᤥᤀᤥ ᤘᤠᤒᤢᤴᤜᤠ᤹ ᤑᤰᤋᤧᤗ᤺ᤴᤍᤧ. ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤘᤍᤵᤔᤠᤸᤗᤧᤴ ᤗᤠᤶᤎᤣ᤺ᤵᤐᤠᤜᤠ᤹ ᤜᤖᤧ॥ ᤜᤧᤰᤁᤩᤠᤱ ᤗᤡᤒᤥᤱ ᤕᤧᤴ ᤌᤠᤖᤡᤰ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤘᤜᤡᤳ ᤌᤩᤧᤀᤠᤱ ᤐᤳᤇᤧ॥
ᤜᤠᤒᤠ ᤂᤧᤴ ᤕᤧᤴᤏᤥ ᤏᤢᤜᤴ. ᤁᤢᤔᤣ᤺ᤳᤋᤡᤴ ᤂᤢᤏᤧ᤹ ᤁᤢᤛ᤻ᤛᤠ ᤛᤣᤔ. ᤜᤠᤔ ᤏᤢ ᤕᤧᤐᤧᤍᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤱᤗᤡᤜᤠ᤹ ᤘᤠᤗᤠᤎᤠ ᤛᤡᤃᤠᤱ ᤔᤧᤗᤠᤛᤧ॥ ᤂᤧᤱᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤋᤠᤶᤓᤢᤱ ᤌᤰᤛᤠᤜᤠ᤹. ᤁᤧᤖᤧᤰ ᤜᤡᤶᤎᤰᤛᤠᤜᤠ᤹. ᤂᤠᤶᤔᤥ ᤁᤧᤀᤢ᤺ᤱᤛᤡᤱᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤐᤢᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ ᤗᤡᤴ ᤁᤢᤀᤡᤛᤡᤰ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤁᤢᤃᤠᤵ ᤁᤢᤃᤠᤵ ᤏᤢᤜᤀᤥ ᤔᤧᤍᤩᤧᤀᤠᤱ ᤘᤠᤗᤠᤎᤠᤀᤥ ᤔᤧᤗᤠᤛᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤀᤡᤱᤈᤠ᤺ᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤘᤠᤗᤠᤎᤠᤀᤥ ᤁᤧᤗᤠ᤺ᤵᤐᤠ ᤌᤰᤛᤠᤐᤢᤛᤠᤜᤠ᤹ ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠᤀᤣ ᤔᤧᤍᤩᤧ॥ ᤂᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤘᤠᤗᤠᤎᤠ᤺ᤸᤗᤧ ᤗᤠᤶᤎᤣᤳᤋᤡᤴ ᤛᤢᤒᤢ॥
ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤡᤒᤥᤱ ᤕᤧᤴ ᤌᤠᤖᤡᤰ ᤆᤰᤔᤧᤸᤗ᤹ᤀᤣ ᤘᤍᤵᤔᤠ ᤁᤧᤖᤧᤀᤠᤱ ᤏᤧᤛ᤻ᤛᤧ॥ ᤆᤫᤠ᤺ᤳᤋᤡᤴ ᤐᤥᤖᤧᤀᤠᤱ ᤘᤠᤗᤠᤎᤠᤴ ᤂᤠᤶᤒᤣ᤺ᤰᤔᤥᤏᤢ ᤌᤠ᤺ᤱᤎᤠ᤺ᤱ ᤐᤱᤔᤠ ᤜᤣ᤺ᤰᤋᤢ॥ ᤆᤫᤠ᤺ᤳᤋᤡᤴ ᤐᤥᤖᤧᤀᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤁᤥ ᤛᤎᤧᤰ ᤋᤡᤶᤛᤧ ᤜᤧᤰᤁᤩᤠᤱ ᤘᤠᤗᤠᤎᤠᤴ ᤆᤫᤠ᤺ᤳ ᤛᤶᤎᤠᤱ ᤌᤠ᤺ᤱᤎᤠ᤺ᤱ ᤐᤥᤃᤧ॥ ᤆᤫᤠ᤺ᤳᤋᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠ᤹ᤖᤡᤰ ᤕᤖᤡᤰ ᤐᤥᤖᤧ ᤜᤧᤰᤁᤩᤠᤱ ᤋᤠᤱᤛᤠᤰᤐᤠᤸᤗᤧ ᤁᤢᤛᤡ᤺ᤰᤋᤥᤒᤠ ᤁᤣ᤺ᤶᤁᤣ᤺ᤶᤒᤠ ᤁᤧᤖᤧᤰ ᤁᤥ᤺ᤰᤔᤠᤜᤠ᤹ ᤆᤫᤠ᤺ᤳᤋᤡᤸᤗᤧ ᤛᤢ᤺ᤵᤋᤢ॥ ᤆᤫᤠ᤺ᤳᤋᤡᤴ ᤐᤥᤖᤧ ᤌᤠᤅᤧ ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ ᤏᤢᤛᤡ ᤔᤡᤋᤖ ᤌᤠᤖᤡᤰ ᤗᤢᤵᤋᤢ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤧᤖᤧᤰ—ᤐᤢᤛᤠᤜᤠ᤹. ᤜᤡᤶᤎᤰᤛᤠᤜᤠ᤹. ᤋᤠᤶᤓᤢᤱ ᤌᤰᤛᤠᤜᤠ᤹. ᤂᤠᤶᤔᤥ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧ॥ ᤛᤧᤱᤛᤧᤱᤒᤠ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ ᤔᤧᤛᤩᤧ॥ ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ—ᤔᤧᤴᤇᤠᤶ ᤕᤠᤵᤔᤡ. ᤌᤰᤛᤠ. ᤁᤢᤳᤇᤡᤱ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤐᤢᤜᤠ᤹ ᤂᤰᤐᤧᤳ ᤔᤧᤛᤩᤧ॥ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤗᤠᤶ ᤔᤧᤔᤧᤃᤧ. ᤏᤢᤜᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤘᤠᤗᤠᤎᤠᤀᤥ ᤁᤧᤕᤠᤰᤐᤠᤜᤠ᤹ᤖᤰ ᤔᤧᤜᤡᤅᤧ॥
ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤡᤵ ᤌᤡᤰᤁᤠᤱ ᤅᤠᤒᤥᤱ ᤕᤧᤴ ᤌᤠᤖᤡᤰ ᤆᤫᤠ᤺ᤳᤋᤡᤴ ᤏᤧᤛ᤻ᤛᤧ॥

Poslušaj ᤋᤥᤗᤡᤱᤛᤥᤔᤢ 7