Yemba - 2017 CABTAL (NT) Non Drama

Yemba - 2017 CABTAL (NT) Drama

Á lɛ ánɛ aleʼé mɛ́t, Yɛɛ́so á fhó á ŋgyā ntó ŋgʉ̄ɔ ńnáŋ á akʉŋɛ́ mía ntshi Ŋgaliléa. Alāʼ á shʉʼ ncúʼte á lezēŋ yí, ńzá zāa tɛ́ á kɔ́ʼ nnáŋ á ntē akɛnūʼ. Alāʼ á zɛ́t ntshí á akʉŋɛ́ ntshi.
Á lɔk meshuŋne lepúʼ, éshúŋ á wɔ́p menu tɛ é zá. Ńdé á mbū pɔ́p ŋ́gɛ: «Mmɔʼ ŋiŋ a le gʉ̄ɔ á ŋkāʼ yí á mbhií etsō, ŋ́kó á lephi etsō mɛ́t, emɔ̄ʼ mesa é whʉte á ndo mɛnzhɛ, meséŋ é shʉʼ ntsókte, ḿbú mpfɛ́t. Emɔ̄ʼ mesa é whʉte ánɛ ajʉʼ metɔ́. Ájʉʼ zīi atsáʼ á té tswhi ŋgɔ́ éwú ú. Éshʉʼ ŋgákne ésáʼ, melaʼ mīi, atsáʼ á té ajʉʼ mɛ́t tɛ esɛ̄h ɛ́. Nu á kyá, á gɔ́ páʼ meŋgaŋ é kaá ntswhi ŋgɔ́ éwú lā, á pú ntɔ̄ etsō mɛ́t, tɛ é zó. Emɔ̄ʼ mesa é whʉte, á ajʉʼ mmɔʼ tepɔŋ mvēŋ. Pɔ́ a pɔ́p é púte esáʼ, tepɔŋ mvēŋ mɛ́t, á pú ŋkwɛ́t etsō mɛ́t, tɛ é té júʼ á letswhī ɛ́. Emɔ̄ʼ mesa etsō mɛ́t, é le ké ŋgwhʉte á ajʉʼ atsáʼ mbɔŋ, éshʉʼ nzém á mbɔŋɔ́, tɛ mɛ́ faʼ, é tɔ́k etsi, mɛ́ le phī éwú, ŋ́gʉɔ ŋkhʉ. Emɔ̄ʼ é nɔŋ ntɔ́kɔ, ŋgʉɔ megēm ntokó. Emɔ̄ʼ é kó nnɔ̄ŋ ntɔ́kɔ ŋgʉɔ megēm tɛ́t. Ŋiŋ a wiɛ metuúŋ á lelɔk njúʼ ejʉʼ, á júʼ. »


Nnɔ Yɛɛ́so é tshóte nnɛ̄t mé lezēŋ tsí, ńzɛ́tte á yí ŋ́gɛ: «Melaʼ akɔ̄ o lɔkɔ ashuŋne lepúʼ, tɛ́ eshúŋnɛ á mbū alāʼ ē?» Á pwɛt á mbū pɔ́p ŋ́gɛ: «Mélaʼ mīi, Ndém a ke ghʉ̄ʉ, pɛ pwɔ̄, é zhɛɛ́ ajū mīi, á lʉɔneē ánɛ lefɔ tsí, ḿbiŋ te ghʉ̄ épúp, á mbū pɔ́p ɔ́. Ŋiŋ yīi a wɛɛ̄ azō, Ndém a a shʉʼ etswiʼne, a epiŋ mbú ŋgwɛ̄ tɛ a ezá. Ŋiŋ yīi a te azō wɛ, Ndém a a shʉʼ ekú á méŋ agáʼ yīi, a á nzi ŋgwɛ̄. Ajū mīi á ghʉɛ tɛ́ meŋ ndɔkɔ ashuŋne lepúʼ tɛ́ eshúŋnɛ á mbū alāʼ, é melaʼ mīi, pɔ́ cʉte ejʉʼ, ḿbiŋ te azō jʉ́ɔ, ńzwíʼte ejʉʼ, ḿbiŋ te azō júʼ. Á gɔ́ épúp á mbū pɔ́p, ńdɔk ŋgɔ́ páʼ Ndém a le lɔ̄k nchu ntswi‑ŋke yi Izayi, ńdé ŋ́gɛ:
“Pɛ e shʉʼ echʉ́ nnɛ̄t ezwíʼte ejʉʼ, éké le azō júʼ.
Pɛ e shʉʼ echʉ́ nnɛ̄t ecʉte ejʉʼ, éké le azō jʉ́ɔ.
Púp melaʼ mīi, ntē epuɔ alāʼ puɔ, é kʉʉ̄ŋ nte páʼ metɔ́ lā.
Pɛ kʉʉ̄ŋ nzeŋne metuúŋ mɛ́,
ŋ́kápte menēk mɛ́,
ŋ́gɛ pɛ gɔ le zéŋ ndɔ̄k metuúŋ mɛ́ njúʼ ejʉʼ ɛ́,
ḿbīŋ le zéŋ ndɔ̄k
menēk mɛ́ njʉ́ɔ ejʉʼ ɛ́.
Ńdɔkɔ te ŋkɔ̄ŋɔ
á lelɔk ntē wɛ́,
ńtswí anu zīi
mɛ́ é shúŋ á wɛ́ ɛ́.
Ńdɔkɔ te ŋkɔ̄ŋɔ á lepiŋ nzem á mbū meŋ,
meŋ mbɛ́t melɔ́ʼ muɔ mɛ́t ɛ́.”
«Ŋ́ké ŋgɔ́ mé pɛ, mbɔ pɛ é meshhʉ̄ mbɔŋ, melaʼ mīi, menēk mɛ́ é si njʉ́ɔɔ ejʉʼ, metuúŋ mɛ́ é nɔŋ njúʼɔ ejʉʼ. Meŋ shúŋɔ á wɛ́ á kwaʼ anuúnē ŋ́gɛ, metswi‑ŋke Ndém tɛ nzáne mbɔɔ wɔ júʼ‑nchu Ndém tɛ nzáne, é le tsá á wɔ́p á lejʉ̄ɔ ajū mīi, pɛ é ayáʼa njʉ́ɔ la, ńdáʼ te jʉ́ɔ. Ńtsá á wɔ́p á lejūʼ ajū mīi, pɛ é ayáʼa njúʼɔ, ńdáʼ te júʼ.


«Pɛ eké njúʼ anu zīi, ashuŋne lepúʼ ánɛ mbhi‑etsō, á lɔkɔ ndʉ́ɛ́. Ndo mɛnzhɛ zīi, emɔ̄ʼ mesa etsō é le whʉtē éwú lā, é si ŋgɔ́ epuɔ pīi, é juúʼ anu Lefɔ Ndém, pɔ́ té kúʼte. Sɛ́ta á lɛ eshʉ̄ʼ efhó á ntē pɔ́p, éfók azi pɔ́ nzi njúʼ. Ajʉʼ metɔ́ zīi, mesa etsō é le whʉtē éwú, á si ŋgɔ́ á ŋiŋ yīi, a juúʼ ashuŋne Ndém, ńdɛ ndɔ̄k lekāk ntswí. Ḿbiŋ te cʉ́ʼ tɛ, ashuŋne mɛ́t á kó á ntē yí, tɛ ndɛ̄t meŋgaŋ á. Ńdɛ ŋkúʼte áa ánɛ aleʼé alāʼ. Ŋgʉɔ̄ʼ é lɛ ŋgē eshʉʼ á mbū yí, kɛ mɛ́ lɛ náʼ ŋgē elʉɔ́ʼ á yí melaʼ mīi, a á kúʼte anu Ndém lɛ́, á lɛ mbú ŋgwáʼ anu Ndém mɛ́t. Tepɔŋ mvēŋ yīi, mesa etsō é le whʉtē éwú lā, a á si ŋgɔ́ á ŋiŋ yīi, a juúʼ ashuŋne Ndém, ńdɛ ŋgē etém nzem, menu ŋgɔŋ muɔ, é jhʉ́ ntē yí. Á zi á letshī ntē yí ánɛ lewūʼ esī atsetsáʼ tsīi, é gɔ́ áa mepɔp. Ecʉɔ etsō mɛ́t, é pú ŋkwɛ́t anu Ndém á ntē yí, tɛ á pí, té zém ntá. Ajʉʼ atsáʼ mbɔŋ zīi, mesa é le ké mbiŋ ŋgwhʉ̄te éwú lā, á si ŋgɔ́ á ŋiŋ yīi, a juúʼ ashuŋne Ndém, ŋ́kúʼte. Ŋgaŋ a á páʼ mesa ecū mīi, mɛ́ le phīī, emɔ̄ʼ é shʉʼ nzém mbaŋ ŋkhʉ, emɔ̄ʼ é zém mbaŋ megēm ntokó, emɔ̄ʼ é zém mbaŋ megēm ntɛ́t lā. »

Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é swhií anu mmɔʼ ŋiŋ yīi, a le phī nzwɛt etsō mbɔŋ á ŋkāʼ yí. Epuɔ metsem é ge enɔŋ elíi, ŋgaŋ mbo yi, á shʉʼ á ntē etsō mbɔŋ mɛ́t, ḿbhī á tepɔŋ mvēŋ, ŋ́gʉ̄ɔ. Etsō é shʉʼ esáʼ tɛ ŋgē ezém, mbɔ tepɔŋ mvēŋ a á zéŋ ntswhí azí. Megaŋ afaʼ ŋgaŋ ŋkāʼ, é shʉʼ ndé á mbū yí ŋ́gɛ: “Mɛkwáŋ, nɔ́ŋ ŋ́gɛ, o le phī áa nzwɛt etsō mbɔŋ á ŋkāʼ wu. Tepɔŋ mvēŋ a piŋɛ ŋkɔ́ʼɔ egɔ́ éwú ú?” Á pwɛt á mbū pɔ́p ŋ́gɛ: “Ŋgaŋ mbo mé ke ghʉ̄ épúp.” Megaŋ afaʼ é zɛ́tte á yí ŋ́gɛ: “O ó kɔŋ ŋ́gɛ, pek egʉɔ ntsɔ́ʼ ŋ́gwáʼ lɛ́?” Á pwɛt ŋ́gɛ: “Ŋgáŋ, mbɔ́k á wɛ́ á letē á ntsɔ́ʼ á tepɔŋ mvēŋ, ŋ́kó ntsɔ́ʼ etsō mbɔŋ. Pɛ ecʉ́ʼ pɔ́ epúte ntswhí, tɛ ndáʼ ŋkūʼ á lefaʼ. Ajɔ̄ afʉʼ, meŋ ndé á mbū wɔ faʼ‑etsō ŋ́gɛ, pɛ ezī mvhɔ, ńtsɔ́ʼ á tepɔŋ mvēŋ, ŋ́kwɛ́t mbwɔʼ mbwɔʼ, páʼ mɛ́ gɔ emāaʼ á mmók, ḿbiŋ ŋgɔ́ mé etsō mbɔŋ, pɛ efāʼ, ŋgʉ̄ɔ nnéŋ á ŋkiŋ meŋ.”»


Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é swhií mmɔʼ ntií lesa sésōk tsīi, mmɔʼ ŋiŋ a le pɛ́ mbhī á ŋkāʼ yí. Eziɛ́ ntií lesa sésōk mɛ́t, é pú ŋkʉɔ́k ntsyā nzwɛt etsō tsem, táʼ, é gɔ́ tɛ ntswhí, ḿbú esak ntɔ́k emɔ̄ʼ etsō lejhʉ̄ tsīi, é ŋkāʼ. Ḿbú ncʉ́ʼ á athʉ́, mbū é tó éwú, tɛ meséŋ é shʉʼɛ éwú mbáʼa meŋka mɔ́p. »
Yɛɛ́so á zéŋ eshúŋ alāʼ, á amɔ̄ʼ ashuŋne lepúʼ, ńdé ŋ́gɛ: «Lefɔ Ndém é zeéŋ ŋgɔ́ páʼ levwi yīi, mmɔʼ menzwí, a le kʉɔ́ʼ afalíin memía ekāŋ tsɛ́ tɛ́t, ńnéŋ éwú ndɔk esɛ̄t, ńtshí, ńzwíʼte tɛ levwi á ghʉ, á kɔ́ʼ. »


Yɛɛ́so a le pú ndɔk ashuŋne lepúʼ, tɛ́ eshúŋ menu muɔ ntsem, á mbū alāʼ. A lɛɛ́ te nnéŋɛ té lɔk ashuŋne lepúʼ, éshúŋne á mbū pɔ́p ɔ́. Ŋ́ghʉ̄ épúp, tɛ́ á lɔk mbō páʼ ntswi‑ŋke Ndém a le lé ŋ́gɛ:
«Meŋ a shʉʼ eŋáʼa nchu gá, élɔk eshúŋ
meshuŋne lepúʼ.
Meŋ a shʉʼ esáʼ
eshúŋ ecū mīi,
Ndém a le lʉ̄ɔ tɛ efhó páʼ, a le nɔ̄ŋ ŋgɔŋ. »

Yɛɛ́so á ghʉ ntshī alāʼ néŋ, ŋgʉ̄ɔ mé mba, ŋgɔ́ á ŋgyā. Nnɔ yí é tshóte nnɛ̄t mé lezēŋ tsí, ńzɛ́tte á yí ŋ́gɛ: «Lɛ ŋkɛ́ʼte ashuŋne lepúʼ jɔ̄, ánɛ tepɔŋ mvēŋ á ŋkāʼ, éshúŋ á wék. » Á pwɛt á mbū pɔ́p ŋ́gɛ: «Ŋiŋ yīi a le phī nzwɛt etsō mbɔŋ, a á si ŋgɔ́ á Méŋ‑Ŋiŋnɔŋ. Ŋkāʼ é si ndɔk ŋgɔ́ ndo ŋgia. Nzwɛt etsō mbɔŋ é gɔ́ epuɔ pīi, pɔ́ é véŋ ŋ́gɛ, Ndém mé ecʉ́ʼɛ esáʼa á wɔ́p. Tepɔŋ mvēŋ é gɔ́ epuɔ pīi, Sɛ́ta a á si esáʼa á wɔ́p. Ŋgaŋ mbo yīi, a le phī á tepɔŋ mvēŋ, á gɔ́ á Sɛ́ta. Afʉʼ lefaʼ etsō á si ŋgɔ́ afʉʼ zīi, ŋgɔŋ e gɔ á mmiī. Wɔ faʼ‑etsō, é gɔ́ mecɔʼ Ndém. Ndeŋ ndeŋ páʼ mɛ́ tsɔ́ʼɔ á tepɔŋ mvēŋ mmāʼa á mmók lā, a láʼ ezéŋ egɔ́ ndeŋ ndeŋ épúp, á afʉʼ zīi, ŋgɔŋ e gɔ á mmiī. Méŋ‑Ŋiŋnɔŋ wuɔ, a a láʼ etó mecɔʼ pí, pɔ́ egʉɔ efhó á ntē lefɔ tsí, éfók epuɔ metsem pīi, pɔ́ ghʉɛ, emɔ̄ʼ epuɔ é faa nzhɛ. Éfók epuɔ pīi, pɔ́ fʉʼɛ mele menu. Éfók á wɔ́p épúp, ḿmāʼ á wɔ́p á ntē mía mía mmók, ájʉʼ zīi mɛ́ éwú, ńdaa mpfɛ́tɛ mesɔŋ. Epuɔ pīi, pɔ́ ghʉʉ̄ ajū mīi, Ndém a á si ŋkɔ̄ŋɔ, e eŋwāŋne páʼ lezēk nnu lā, á ntē lefɔ Mɔʼɔ́ wɔp Ndém. Ŋiŋ a wiɛ metuúŋ á lelɔk njúʼ ejʉʼ, á júʼ. »

Yɛɛ́so á zéŋ ndé ŋ́gɛ: «Lefɔ Ndém é zeéŋ ŋgɔ́ páʼ, ajūɔ tee nzwiŋ zīi, mɛ́ le lʉ̄ɔ á ŋkāʼ, ŋiŋ á shʉʼ ŋkēm, ḿbɛ́ nzéŋ ńdʉ̄ɔ leswhī leswhī. Ŋgɔŋ é nɔŋ mbɔŋɔ́ á yí, á gʉɔ mbú eswīŋ ajūɔ tsem zīi, a wɛɛ̄, ńdɔk nzó ŋkāʼ mɛ́t. Lefɔ Ndém é zeéŋ eswhí mmɔʼ ŋgaŋ esaá yīi, a le nɔ̄ŋ efaʼa á mbɔŋ atók tshī, éfaʼ tɛ njʉ́ɔ azi á teē nzwiŋ, ŋ́gʉɔ eswīŋ ŋgɔŋ etsō tsem tsīi, a wɛɛ̄, ńdɔk eshʉ̄ʼ ńzó.


«Lefɔ Ndém é zeéŋ ŋgɔ́ páʼ lekhʉ tsīi, mɛ́ maʼa á ntshi, ńdɔkɔ ŋgɔ̄ɔ á ntií ntiī mesōh lā. É gɔ́ tɛ ndó, mɛ́ shuŋ ŋgyá á ndo ŋgia, ńnáŋ á esī, ŋ́kyɛ́tte emi mbɔŋ, ńnéŋ á túŋ, ḿbiŋ ŋgwáʼ emi mɛ́ gɔ le pfɛ́t. A láʼ ezéŋ egɔ́ ndeŋ ndeŋ épúp, á afʉʼ zīi, ŋgɔŋ e mii. Mecɔʼ Ndém e láʼ eshʉʼe, éfhó á nnɔ epuɔ pīi, é ghʉʉ̄ ajū mīi, Ndém a á si ŋkɔ̄ŋɔ, éfak epuɔ tepɔŋ, émaʼ á wɔ́p á ntē mía mmók, ájʉʼ zīi mɛ́ é éwú, ńdaa mpfɛ́tɛ mesɔŋ. »

Yɛɛ́so á zɛ́tte nnɔ yí ŋ́gɛ: «Tɛ pɛ é júʼ menu ntsem muɔ mīi, meŋ á shúŋ la a?» Pɔ́ pwɛt ŋ́gɛ: «Ŋŋ. » Á lé á mbū pɔ́p ŋ́gɛ: «Á gɔ́ ŋké ŋgɔ́ épúp, pɛ ezhɛ́ á légɛ, ŋkɛʼte‑mbé Ndém tsem yīi, a á júʼ anu zīi, mɛ́ é shúŋ á yí, ánɛ Lefɔ Ndém ŋkúʼte, a á páʼ ŋgaŋ mba yīi, a á fhó á ntaŋ yí, éfók á tsitsi eswhī, ńzéŋ efók eyi nzwiŋ lā. »


Yɛɛ́so á mak á lelɔk meshuŋne lepúʼ eshúŋne, éfhó á ajʉʼ mɛ́t ŋgʉ̄ɔ. Ŋ́kó á alāʼ zīi a le tswhí éwú, ńzī á lezīʼne epuɔ anu Ndém, á ntē ŋgyā aswiŋte pɔ́p. Epuɔ pīi é ŋgɔ́ éwú, é júʼ ashuŋne zí, á pú ŋkʉ̄ʼne á wɔ́p tɛ́ʼ, pɔ́ lé ŋ́gɛ: «Awɔ́ a á páʼa, ŋ́gyáa á yí ejʉɔ ntií azhɛ̄‑anu ū? Ŋ́gyáa á yí mete, tɛ́ á lɔkɔ ŋghʉ̄ɛ meŋkʉʼne menu ū? Yí mé té méŋ ŋkwɛ‑methū ŋgyā kɛ? Mɛ́ wɔp mé té lɛ Malía á lɛ̄? Epɔ̄ memía pí mé té si ŋgɔ́ á Jáak mbɔɔ Yosɛ́p, ŋ́ghʉ̄ á Simɔŋ pɔ́ Zwíde lɛ̄? Epɔ̄ memía pí epi wɔnzwí metsem, é té zéŋ nnáŋte ega, á mbū pímpɛ ɛ́ lɛ̄? A lɔkɔ ejʉɔ ntií menu mɛ́t ntsem, ŋ́kɔ́ʼɔ egɔ́?» Ńdé épúp, pɔ́ té fɛ́ nnɛ̄t ŋgyá á mbū Yɛɛ́so ó. Yɛɛ́so á lé á mbū pɔ́p ŋ́gɛ: «Mɛ́ wuʼteē á ntswi‑ŋke Ndém ejʉʼ tsem, tɛ cʉ́ʼ á alāʼ pɔ́p. Mɛ́ wák á yí wáke á mba pɔ́p. » Á gɔ gɔɔ́, tɛ Yɛɛ́so a te tswhī ŋghʉ̄ meŋkʉʼne anu éwú ú, melaʼ mīi, pɔ́ ka fɛ́ nnɛ̄t ŋgyá á mbū yí í.

Poslušaj Matío 13