If you have would like a copy of this version please contact info@davarpartners.org

Text: Otuho New Testament 2003, Bible Society in South Sudan Audio: Otuho New Testament Audio Bible 2023, Davar Partners International

Otuho New Testament

Iliahai nyia oŋitek huno neyom ono nemune onno obeŋ 'to owon iko olobou. Inyi neyom enne ifurani Allaŋan. Ottifiai nyia ehumak elettaha iko ettiyanak ifahita obo ekoi ittohori Yesu, ati abaŋi nyia isi aati.


Attati Sittan ijiŋana jio Yuda alla ahacie Iskariot, olo lejifak hula 'tomon harrihai. Tania, olo nyia Yuda jio ehumak elettaha iko ajafiti oseŋer erririak Haji emojit enne ittokon, ette ikiana jihosi aŋai adi esiarak inyi Yesu jihosi. Omunoi nyia isi bebe, ette icoronia idumari inyi agurusi. Iruk nyia Yuda eram ania, ette itterio attifia obo ekoi onno oyyu 'to jihonyi isiaraniere Yesu jihosi buo aati obeŋi omijani.


Attati oloŋ ono emune onno obeŋ 'to owon iko olobou ilumon. Inyi oloŋ onno oŋocierek akioro huno aŋiyo ono neyom ono Allaŋan. Tania, ifak nyia Yesu Petro iko Yoane buo iramak isi jio, “Ifuatta ihuhumana jihohoi aŋiyo ono neyom ono Allaŋan oŋida efuo ŋiyo.”
Buo isi ette ifiyo inyi jio, “Iwak atiye hohoi efuo ihuhumio inyi jio anani maji?” Itarraŋ nyia inyi isi ojio, “Héjiŋana itai ihuania ibore gala, iruaŋaniete adi itai iko obo latulo elle iwohuno aari ta atobok. Ijifatti inyi jio aaji onno ojiŋaniere inyi. Ijiatta jio Lamonye haji jio, ‘Ojio Ettiyanani jihoi tani aaji tamonok anna alari inyi iŋiyere iko lejifak honyi neyom ono Allaŋan?’ Itahutak adi inyi jihatai atua haji anna alat otto amara, onno owon iko erre 'daŋ hunne ehuhumanie. Ihuhumana jihohoi aŋiyo diya.”
Ofuoi nyia isi ette irumana erre 'daŋ ihuo iramak duo inyi jihosi, ette isi ihuhumana aŋiyo ono neyom ono Allaŋan diya.


Ninyia attuba asaa ono aŋiyo, ette Yesu iko lefahat honyi itoŋo iger 'teremeja iŋiyere aŋiyo, ette inyi jiaran jihosi, “Awak duo atua hoŋ iŋiyo ikatai neyom ono Allaŋan hobeŋ ettigemio hoŋ ottu! Nyio, eramak ni itai, abeŋ adi ni luŋa enyiak iŋiyo inyi many itasirunierek inyi Ilobie Hollum.”
Attati Yesu iduhuna ematit, ette isio ahumo jio Hollum, ette jiaran, “Hibetina ana, amatata 'daŋ ababo. Nyio, eramak ni itai jio, itterio ihuania many ahosiere, abeŋ adi ni enyiak imat afino many ottuniere Olobie Hollum.”
Attati inyi iduhuna emune, ette isio ahumo jio Hollum, ette ibeny inyi, ette isiarana jihosi, ette jiaran, “Ahuan hoŋ ana enne isiori tetai, ihaniete ihuo nyia, igiluttari ani.” Ihuo nyia buo fe iduhu inyi ematit ettehalu ŋiyo, ette isio jihosi, ette jiaran, “Ara ematit ana ecorit aŋejuk enne itasiruni to nooto hoŋ, onno owouno 'to addi tetai.
“Ati, imijinete! Letinyiaŋani hoŋ elle eŋiyo olo ikoŋ itteremeja dini. Nyio oye adi Lonyi Tulo ihuo awak nyia Hollum, ati orroho adi bebe jio atulo elle itinyiaŋak 'to inyi!”
Attati isi itterio ifiyo ahuattek hosi jio ŋai 'tadi tehiji hosi ollo olo 'to ihan ariŋ ania.

Odioto nyia olorisa ihiji hejifak jio, alali tehiji hosi ollo olo 'to igalihina 'daŋ. Buo Yesu ette jiaran jihosi, “Ilohittohi oobuok hulo afauhien waati hullo otimoi 'to Hollum jio aati hosi, buo fe elettaha hosi awahi jio ijiara iloŋoi isi ‘Aluak waati.’ Ati obeŋ ara ihuo nyia jihatai, ijiara alla agalik 'to 'daŋ tehiji hatai hétera ihuo olodiha, buo fe ijiara elettok hétera ihuo egiamani. Ŋai alla agalik 'to, lia elle itoŋo 'to iŋiyere kuyya elle ihuhumak 'to aŋiyo? Hode lia, elle itoŋo 'to iŋiyere, inyi alla agalik 'to. Ati awon ni ihiji hatai ahegiamani.
“Itai hulle idihuna 'to ikoŋ ettigemita hoŋ, esiarak adi ni jihatai Olobie ihuo ninyia isiaraniere Monyoŋ jihoŋ. Ifuatta adi itai iŋiyo buo fe imatati itteremeja hoŋ Ilobie hoŋ. Itoŋoti adi itai isegeri ilohittok huna 'tomon harrihai iŋociere eram waati Israele.


“Simone, Simone! Imijie dini! Aŋatani Sittan okem itai 'daŋ oŋida igige itai ihuo emma. Ati amojo ni teyye jio oŋida eruk hoi odulo, buo elle iyituno iyye jihoŋ, oŋida itagol illarak hoi.”
Ati itarraŋ nyia Petro ojio, “Lamonye! Ifut luŋa itaji hoŋ ifitari ibabus buo fe iyeri iko iyye!”
Buo Yesu ette jiaran, “Eramak ni iyye Petro jio, obeŋ adi ahohoro illok ahana many irisari iyye enyiahita hunihoi jiojio itimo iyye ani.”

Attati Yesu ifiyo ejifak honyi jiojio, “Ninyia efahiniere ni itai ahania, obeŋ lobon, obeŋ edee kuyya obeŋ hamuhe, obiaŋarak nyia soho itai obo ariŋ?”
Itarraŋi nyia isi jiojio, “Obeŋ riŋ.”
Ette inyi jiaran jihosi, “Ihuania ijiara lia, ollo owon 'to iko olobon kuyya edee, iyaru inyi. Buo lia, ollo obeŋ demi erremiti, ijiara itinyiaŋak aboŋo honyi inyiaŋuniere obo. Nyio eramak ni itai jio itasiruni adi toni, ekenita hutto buk Hollum hunno ojiori 'to jio, ‘Ittaŋani adi inyi jio aati arrohojak,’ nyio, arai erre hunyia igioroni toni, ahode.”
Buo lejifak ette jiaran, “Lamonye, imijie ademio erremiti arrihai huna.”
Itarraŋ inyi ojio, “Aremehini hunia!”


Olo nyia Yesu addi totua bore gala, ette leten idoŋe Olifet ihuo ihanatiere inyi toloŋi; buo lejifak ette ijifaru inyi. Ninyia lafany inyi jio amaji nyia, ette inyi jiaran jihosi, “Omojoti jio oŋida ibiaŋata imuahata isusuta.”
Ihut nyia inyi teger hosi alamarai kai onno oremik eruoŋi moruo, ette irigoŋo, ette mojo jio, “Monye, alla ara awahan hoi, iyai addi jihoŋ ematit ono ettigemio ana. Ati obiaŋara ta awahan hoŋ, ijiara ara ihuo iwak iyye.” [ Buo diya, oleyehino nyia obo ajilo tedou jihonyi, ette itagol inyi. Ta amijan taji ninyia owon 'to jihonyi, ette inyi ihum imojo bebe; buo emai honyi ette idotia rat rat ihuo nooto.]
Ninyia adetuno inyi to mojo ette leten jihosi, onyurak nyia inyi isi ajotoroi, nyio ottoho nyia isi ejiriŋa. Ette inyi jiaran jihosi, “Nyio ijototi itai? Ottenna, omojoti jio, ŋadi itai imuahata isusuta.”


Ninyia hékiana Yesu, iduoŋ eluluŋ waati hunyia itadihuno Yuda, obo olo lejifak hula 'tomon harrihai. Ihutok nyia inyi jio Yesu ifonyiere inyi ta ahucio 'yaha. Ati ifiyo nyia Yesu inyi jiojio, “Yuda, itinyiaŋak iyye Lonyi Tulo ta ahucio 'yaha?”
Ninyia igonyuni lejifak hunyia owoni 'to iko Yesu erre hunno ofuoi 'to iduoŋ, ette isi ifiyo ojio, “Lamonye, ijiara hohoi erriomonio ikosi ta ademio hohoi huna?” Ette obo olosi iburanio apit olo ehumani elle ittokon, ette isaluna eyyok honyi etteŋet. Ati ojio nyia Yesu, “Taat! Iriamata!” Ette inyi ittir eyyok apit lia, ette itaŋida inyi.
Attati Yesu jiaran jio ehumak elettaha iko jio ajafiti hulo oseŋer hutto Haji emojit enne ittokon buo lahou hunyia ofuonni 'to iniafaru inyi jio, “Osiru jihatai irumuniere ta ademio erremiti iko elluhi ihuo alla ara ni olohoho? Ninyia awattari ni oŋitek 'daŋ ikatai Ihaji emojit enne ittokon, ibiaŋata nyia itai ani inefuna; ati asaa hatai ana buo agolon ono edumele hegiama.”


Attati isi inefuna Yesu, ette iyaru ihaji ehumani elle ittokon, buo Petro ette ijifaru isi alamarai. Inahini nyia eema ihiji hiloŋoni, buo Petro ette inosonio iko asujak. Attati obo ono aŋoruo egiamak igonyuna inyi itoŋo ifaŋit hima, ette iyohojonia jihonyi 'tok 'tok, ette jiaran, “Owon duo buo fe atulo olo ikonyi!”
Ati orisa nyia Petro, ette jiaran, “Haniyoŋ, abeŋ ni ikoddaŋ amijak inyi.”
Ojio gaa, igonyu nyia obo latulo hama Petro, ette jiaran, “Ira buo fe iyye aholosi!”
Ati ojio Petro, “Olo, abeŋ ni ara aholosi.”
Ninyia allaŋ asaa ihuo abotie, inyiak obo atulo ifarahino inyi, ette jiaran, “Hode hode, owon nyia buo fe atulo olo ikonyi, nyio ara inyi a Galileatanani!”
Ati itarraŋ nyia Petro ojio, “Olo, abeŋ ni amijak anyio enne ikiana iyye!”
Teya teya, ninyia hékiana inyi, ette ahohoro illok. Oyito Lamonye, ette imijio 'tok 'tok jio Petro, attati Petro igiluna ekiana ono Lamonye oduo ojiari inyi jihonyi jio, “Hobeŋ ahohoro illok ahana, irisa adi iyye ani enyiahita hunihoi.” Ania, ette Petro leten, ette iyyoo onno orroho bebe.


Attati aati hinyia irririai 'to Yesu isuhotiere buo fe abahie inyi. Atarani nyia isi aboŋo ihoŋite honyi, ette ifiyo inyi jiojio, “Ottenu, ŋai abak iyye.” Ette isi ikiana erre arriai hunne ittarrohojie 'to afure honyi.


Ninyia afaŋ amotie, ottubanie nyia lahou iko ehumak elettaha buo ettiyanak ifahita, ette isi iyaru Yesu ihosiere Lokikoi hosi; ette jiaran, “Iramak hohoi, elle ira iyye Olonyimoto.” Ati itarraŋ nyia inyi isi ojio, “Elle eramak ni itai, ibiaŋata adi itai iruhoto: Elle efiyo buo fe ni itai, ibiaŋata adi itai itarraŋata. Ati itterio ahana many ahosiere, itoŋo adi Lonyi Tulo totto hani iŋet ono Hollum Laduarani.”
Buo isi 'daŋ ette jiaran, “Ira atiyye Lonyi Hollum?”
Itarraŋ nyia inyi isi ojio, “Ijiatta itai ara ni.”
Ette isi jiaran, “Anyio, suuti hulle héttifia! Etaniŋu ta ahuattek hohoi ekenita honyi!”

Poslušaj Luka 22