Aghul - 2005 IBT (Luke) Drama

Сагелай, Ӏиса Генисарет агъа хӀуьлин къирагъихъ хъаягуна, Гигьди завал хьуная ацӀуна инсанар, Ӏисайи агъа Аллагьдин Гафттил юркӀв алиянас. Ӏисайис агуная къирагъихъ Ӏу лодка. Балугъар фарцанттари, айчӀуна лодкабуриас, Ӏуьрччанди ахьуная чалар. Ӏисайи, учӀуна са лодкайиъ (ге хьуная Симонан лодка), гӀачаях пуная са чӀукь къирагъихъас тич. Экьуна ге лодкайиъ, Аллагьдин Гаф ягӀар аркьай хьуная Ӏисайи инсанарис. Учи пуна ккиркӀугуна, Ӏисайи пуная Симонас:
– ГӀачушуна уьркӀе мукьуйигӀди, гӀихь чве чалар балугъар фацанас.
Симона джуваб йиная:
– Е МегӀелим, чин кӀилин Ӏуьштти аяттаре мисаъ ул алдакьуна, амма фера фацуна адава. Вун лиштти агъахаб, зун гӀихьасе чалар.
ГӀихьуна, фацуная гебури гьеге къайда балугъар, къикъе хьуна, чалар чӀургъай хьуная. Гъилар акьуная гебури сасра лодкайиъ ая илдешарис, кумак акьас гӀаттшаб пуна. Илдешар гӀаттиная. Ӏудар лодкабуриъ ахъуная гебури балугъар. Къакъ ппара хьуна, адивай ахьуная лодкабур. Гебур агугуна, Симон Петтруйи, экьуна кьвакьварилди Ӏисайин удигь, пуная:
– Е зе ХӀаф, ях загьас, зун гунагьар кея инсан э!
Симонна, гихъай аяттара муьхӀтал хьуна ахьуная гидегьен ппара балугъар агуф. Гин илдешарисра, Якьубасна ЯхӀъяйис, Зебедайин шиниккварис, гучӀ хьуна ахьуная. Ӏисайи пуная Симонас:
– ГучӀ мева. Гьалдихъас хаб вун инсанар фарцанф хьасе.
ГӀаттивуна лодкабур къирагъихъди, кӀилди атуна, гебур чаб ушуная Ӏисайихъай.

Ӏиса ахьуная са шагьурдиъ. Багулифас гьаттвей хьуная кӀилди кабкари алацӀуна са инсан. Ӏиса агуф, Гин лекарикк аккерхьуна, миннат акьуная ге инсанди:
– Е зе ХӀаф, Вафас зун мертт акьас хьасе, Вас кканхьехаб!
Ӏисайи дагъуна гъил, кирхӀуна гик, пуная:
– Кканде, мертт ухь.
Гьеге сеӀетти гулуная иттал. Ӏисайи пуная гис:
– Сайисра ахъамаркьа михъас. Ушуна маллайилди, хъуттурфанас акье вахъ, садакьара акье вун сагъ хьебахъас, Мусайин Закуни агъилди, джаллабурис вун сагъ хьунаф ягӀархьас.
Гьер усари унихьай хьуная Ӏисайихъас. Ппара халкь завал вей хьуная Гил юркӀв алиянас, Ги чаб сагъ акьас. Уч Ӏиса ппара сакин мукьуйиди ушуна, дуьгӀебур аркьай хьуная.

Сагелай, Ӏисайи Аллагьдин гаф ягӀар аркьагуна, Гил юркӀв алийинаттаригӀ гӀахьуная экьуна фарисеярна Ӏелимар, адинаттар Галилеяна Ягьудея агъа деребурин хӀурариасна Ерусалимдиас. Ӏисайис Аллагьди кьуват йина ахьуная иттаттар сагъ акьас. Са Ӏу инсанари файдиная гисади ахунил алди, фалиджайи фацуна са инсан, Гебури ачагъас алучӀуная ге хулади, Ӏисайин удигь атас. Инсанар ппара ай, сагъилдира гӀачавес дахьуна, алгъушуная гебур хулагъилди. Алттивуна гъвад, вартталас ахтт аладивуна гебури иттаф, ахунил алди, хулан яӀаниъ атуная Ӏисайин удигь. Гебурин хъугъувел агуна, Ӏисайи пуная иттаттис:
– Ве гунагьарилас гъил гъушуная.
Фарисеярина Ӏелимари чиппикди фикир аркьай хьуная: «Фуш э ме мидегьен Аллагьсуз курар аркьа инсан? Са Аллагьдифас ду вереф гунагьарилас гъил гъушанас?» Ӏисайис, ягӀархьуна фиттихъас ичин гебури фикир аркьаяф, пуная гебурис:
– Фи фикирар э чве юркӀураъ аяф? «Ве гунагьарилас гъил гъушуная», рехӀет ду пас, «Гъайшина ях», пас дала? Магьа чвас ягӀар ухь, Инсандин КӀиркӀав хӀавел фая джилил гунагьарилас гъил гъушанас.
Фалиджайи фацунаттис Ги пуная:
– Зун вас агъая, гъайш, гъушуна ве ахунна ях хулади.
Джаллабурин удигь гьеге сеӀетти гъайшиная ге, гъушуна уч алде уйи ахунна, ушуная хулади Аллагьдис шукур аркьай. Джалла ппара Ӏайи муьхӀтал хьуная. Гебури шукур аркьай Аллагьдис, агъай хьуная гучӀ архьуна:
– Час ягӀа Ӏеламатар агуне.

Гисаас аттушуна ушугуна, Ӏисайис агуная налукар завал аркьа Леви агъа са инсан. Ге экьуна ахьуная учи кар аркьа усан багулив.
– Шаб захъай, – пуная гис Ӏисайи.
Леви гъайшина, фадахъуна джалла, ушуная Ӏисайихъай. Левияйи хъаттфайшуна Ӏиса учихъди, дуьхьуьная Ӏисайис батӀар суфра. Гисаъ ахьуная ацӀуна налукар завал аркьаттара, хъара сасра инсанара. Фарисеярина Ӏелимари хъел кей, агъай хьуная Гин ученикарис:
– Фас чун Ӏелди ухай аяфе налукар завал аркьаттарихъайна гунагьар кеяттарихъай?
Ӏисайи джуваб йиная гебурис:
– Духттур герек идеф сагъди аяттарис дава, иттаттарис э. Зун Аллагьдин рекъуьъ аяттарилди дава адинаяф, зун адинаяфе Аллагьдилди алдарк пас гунагьар кеяттарис.

Хаб гебури пуная Ӏисайис:
ЯхӀъяйин ученикари ппара сивара ухӀа, дуьгӀебура аркьа, фарисеярин ученикарира гьегиштти, Веттар Ӏелди ухай ая!
Ӏисайи гебурис пуная:
– Фиштти э гӀулар хъучикаф цӀакинил сивар ухӀас, наврузбег гебурихъай амедегьен гагьди? Амма хъучадесе, наврузбег гебуригӀас гуджуникестти гӀаттиву вахтт, тагьа гьетегуна сивара ухӀасе, гьете ягъари.
Ӏисайи ахъакьуная гебурис мишттин мисала:
– Сайира цӀае кандикес кьатӀ аркьайдава кьурц, цӀуьре кандил алатӀас. АлатӀухаб, цӀае канна чӀир акьасе, цӀуьре кандис хъудуьхьесра дава цӀае кьумашин кьурц. Сайира агьартайдава цӀае чехир цӀуьре кӀечӀариди, агьатухаб цӀае чехири чурхъвас акьасе кечӀар – чехира адавесе, кӀечӀара бат хьасе. ЦӀае чехир агьатуна кканде цӀае кӀечӀариди! Ерсе чехир ухухаб, цӀаеф сайисра кканхьасттава, ги пасе: «Ерсеф иджеф э».

Poslušaj Лука 5