If you would like to buy a printed Bible please contact Mongolian Union Bible Society. Хэрэв та Ариун Библи худалдан авахыг хүсэж байвал Ариун Бичээс Нийгэмлэгтэй холбоо бариарай. Ариун Бичээс Нийгэмлэг, 2017

Ариун Библи 2013

ЭЗЭН, Мамрегийн царс модны дэргэд Абрахамд үзэгдэв. Өдрийн халуунд Абрахам майхныхаа үүдэнд сууж байгаад нүд өргөн харвал дэргэд нь гурван хүн зогсож байлаа. Тэрээр тэднийг харангуутаа угтан тосохоор майхныхаа үүднээс яаран гүйж хүрээд, газарт доор мэхийн
— Эзэн минь ээ! Хэрэв мэлмийд тань тааллыг олсон бол зарц намайгаа битгий орхин өнгөрөөрэй гэж би гуйж байна. Жаахан ус авчруулж та нар хөлөө угаагаад энэ модны доор амарна уу? Та нар зарцынхаараа нэгэнт дайрч ирсэн тул би жаахан талх авчиръя, та нар тэнхээ ороод явна уу гэж хэлэв. Тэд
—Чиний хэлсэн ёсоор болог гэв. Абрахам сандчин, майхан тийш Сарад
—Бушуулаарай! Гурван сеа дээд зэргийн гурил аваад зуурч, бин хий гээд Абрахам хотондоо гүйн очиж нэгэн тарган сайн бяруу барьж авчраад зарцдаа өгсөнд зарц түүгээр нь хоол бэлтгэх гэж яаравчлав. Абрахам цөцгий, сүү болон зарцынхаа болгосон бярууны махыг тэдний өмнө авчирч тавиад, тэднийг хооллох зуур өөрөө модны доор зогсож байв.
Тэд Абрахамаас
—Чиний эхнэр Сара хаана байна вэ? гэж асуусанд
—Тэнд майхандаа байгаа гэв. Тэр
—Би зохих цагт нь чам дээр заавал эргэж ирнэ. Харагтун, эхнэр Сара чинь хүүтэй болно гэжээ. Сара ард нь, майхны үүдэнд зогсоод сонсож байв. Абрахам, Сара хоёр өндөр наслан өтөлж, Сара хүүхэд гаргах наснаасаа хэдийнэ хэтэрчээ. Сара дотроо инээж
—Хөгшин би, өтөлсөн эзэн бид хоёр яаж ч жаргах юм билээ? гэв. ЭЗЭН, Абрахамд
—Юунд Сара инээгээд “Хөгшин болсон би үнэхээр хүүхэдтэй болж чадна гэж үү?” гэж хэлээд байна вэ? ЭЗЭНд дэндүү хэцүү юм байна уу? Би тогтсон цагт чам дээр эргэж ирнэ. Зохих цагтаа Сара хүүтэй болно гэв. Сара айсандаа
—Би инээгээгүй гэж мэлзсэнд
—Үгүй, чи инээсэн шүү дээ гэж Тэр хэлэв.

Нөгөө хүмүүс тэндээс босоод Содомын зүг харж, Абрахам тэднийг үдэхээр хамт гарчээ. ЭЗЭН
—Би хийх гэж буй юмаа Абрахамаас нууна гэж үү? Абрахам агуу их, хүчирхэг үндэстэн болж, газар дэлхийн бүх үндэстэн түүгээр ерөөгдөх биш үү? Би түүнийг сонгон авсны учир нь түүний хойноос хүүхдүүд нь болон гэрийнхэн нь үнэн зөв ба шударга ёсыг үйлдэж, ЭЗЭНий замыг сахихыг тэрээр тэдэнд тушаахын тулд бөгөөд ингэснээр Абрахамд айлдсанаа ЭЗЭН биелүүлэх болой гэв. Тэгээд ЭЗЭН
—Содом, Гоморра хоёрын хашхираан үлэмж их, гэм нүгэл нь маш их учир Би одоо доош бууж, тэдний хийсэн бүхэн нь надад сонсогдсон хашхираан шигээ байгаа эсэхийг үзэж мэдье гэв.
Тэр хүмүүс тэндээс явж Содомын зүг одоход Абрахам ЭЗЭНий өмнө зогссоор хоцорчээ. Абрахам ойртон ирж
—Та зөвтийг бурууттай хамт устгах уу? Тэр хотод зөвт тавин хүн байж болох биш үү? Та ийм газрыг устгах уу? Тэрхүү тавин зөвт хүний төлөө тэр газрыг өршөөх үү? Зөвтийг бурууттай хамт устгах ийм хэрэг Танаас хол байг! Буруут нь зөвттэй бүү зэрэгцэг! Газар дэлхийн Шүүгч Та шударга шийдвэр эс гаргана гэж үү? гэв. ЭЗЭН
—Хэрэв би Содом хотынхны дотроос зөвт хүн тавийг олбол тэдний төлөө энэ газрыг бүхэлд нь өршөөнө гэсэнд Абрахам
—Харагтун, тоос шороо ба үнс мэт өчүүхэн би Эзэнд үг хэлэхээр зүрхэллээ. Тэнд тавин зөвт хүнээс таван хүн дутаж болох биш үү? Тав дутсаны төлөө хотыг бүхэлд нь устгах уу? гэсэнд ЭЗЭН
—Хэрэв Би тэндээс дөчин таван хүнийг олбол хотыг устгахгүй гэжээ. Абрахам дахин
—Тэнд дөчин хүн олдож болох шүү дээ? гэхэд Тэрээр
—Дөчин хүний төлөө Би түүнийг устгахгүй гэв. Абрахам
—Эзэн минь, Та битгий хилэгнээрэй. Би нэг үг хэлье. Тэндээс гучин хүн олдож болох биш үү? гэсэнд Тэрээр
—Хэрэв Би тэндээс гучин хүнийг олбол устгахгүй гэжээ. Абрахам
—Харагтун, би Эзэнд үг хэлэхээр зүрхэлье. Хэрэв тэндээс хорин хүн олдвол яах вэ? гэсэнд Тэрээр
—Хорин хүний төлөө Би устгахгүй гэжээ. Абрахам дахин
—Эзэн минь, Та битгий уурлаарай. Би бас нэг үг нэмж хэлье. Ингэхэд тэндээс арван хүн олдож болох биш үү? гэсэнд Тэр
—Би арван хүний төлөө түүнийг устгахгүй гэжээ. ЭЗЭН, Абрахамтай ярьж дуусаад одсон бөгөөд Абрахам ч өөрийн газарт буцжээ.

Poslušaj Эхлэл 18