Zapoteco de San Vicente Coatlan - 2015 Edition (NT) Non-Drama

Zapoteco de San Vicente Coatlan - 2015 Edition (NT)

Zapoteco de San Vicente Coatlan - 2015 WBT (NT) Drama

Ngol dub wizh nchasea Jesús leꞌa xa uniꞌí dub xabgiꞌi zha ngolta xa lá naꞌ xa. Leꞌa be xmen Jesús cha unabdiꞌizh ndab bexa ndoꞌ Jesús:
—Mech, ¿xtaꞌan lbaꞌa lá naꞌ xa baꞌ idub zha ngolta xa zha? ¿Ke ten be usan ten xa‑yá, nati ke tenka xa‑yá?
Leꞌa Jesús cha ndab:
—Leꞌa xa lbaꞌa nak naꞌanpa ke ten xa no ni ke ten be usan ten xa. Parea leꞌa ta lbaꞌa nak xa baꞌ leꞌa be men iniꞌí juers ten Dios. Nattsa bi tezhea leꞌa naꞌ nsabndoꞌ gun tiꞌin ndab Dios, xa mtuꞌub naꞌ. Leꞌa teꞌal sken ilen, gor na naꞌanta ton gun tiꞌin. Leꞌa nat bi nsoꞌ naꞌ ndoꞌ gizhliyo ndee, leꞌa naꞌ nak xeꞌa ten Dios ndoꞌ be men nde ndoꞌ gizhliyo.
Leꞌa tsoꞌo na li ndab Jesús, cha mchuk xa ndoꞌ yo, cha mbindeꞌe xa dub tuzh yalan. Cha udaꞌab xa‑yá ngusndoꞌ xa lá naꞌ wa. Cha ndab Jesús:
—Waꞌdaꞌab ngusndoꞌ lu nits tank sa nsaleaꞌ Siloé —leꞌa ta wa dub diꞌizh gab: xa mtuꞌub.
Weꞌe leꞌa xa wa cha nchaꞌdaꞌab ndoꞌ na sa wa. Leꞌa gor nseaꞌ xa ta lid xa leꞌa xa naꞌla. Leꞌa bexa ncho gax ta lid xa, no iteata bexa na uniꞌí leꞌa xa wa ngok dub xa lá naꞌ, leꞌa bexa wa cha ndab ndoꞌ be ltsaꞌa na:
—¿Naꞌanpa leꞌa xa baꞌ xa nsobnab med wa zha?
Leꞌa ncho bexa wa ndab:
—Leꞌa xa baꞌ leꞌaka ta wa.
Ná ncho bexa ndab:
—Naꞌan, leꞌa xa baꞌ migabtsa xa wa.
Parea leꞌaka xa wa cha ndab:
—Leꞌa naꞌ ndee leꞌaka ta wa.
Leꞌa bexa wa cha unabdiꞌizh ndoꞌ xa ndab bexa:
—¿Xteꞌe uyoꞌo gan naꞌla go nat zhaga?
Leꞌa xa cha ukaꞌab ndab:
—Leꞌa xa nsaleaꞌ Jesús wa mbindeꞌe yalan, cha udaꞌab xa‑yá ngusndoꞌ naꞌ, cha ndab xa gadaꞌab naꞌ ndoꞌ naꞌ nits Siloé. Ta weꞌe ngwaa naꞌ, no udaꞌab naꞌ ndoꞌ naꞌ, cha mnaꞌ naꞌ.
Leꞌa bexa wa cha unabdiꞌizh ndab bexa:
—¿Ma xa wa nat?
Leꞌa xa wa cha ukaꞌab ndab xa:
—Leꞌa naꞌ lá iní.

Weꞌe leꞌa bexa wa cha mbiꞌi xa na li myakna wa ndoꞌ bexa fariseo. Leꞌa ta wa wizh neꞌe bexa judio, zha na li mbindeꞌe Jesús yalan, cha myunyakna Jesús ngusndoꞌ xa wa. Weꞌe leꞌa bexa fariseo no unabdiꞌizh ndoꞌ xa wa ná xteꞌe myakna ngusndoꞌ xa. Leꞌa xa cha ukaꞌab ndab:
—Leꞌa xa wa udaꞌab yalan ngusndoꞌ naꞌ, cha udaꞌab naꞌ ndoꞌ naꞌ, cha mnaꞌ naꞌ.
Weꞌe leꞌa ncho bexa fariseo cha ndabbe:
—Leꞌa xabgiꞌi weꞌe naꞌanpa nak dub xa mtuꞌub Dios, leꞌa xa ndun ta lá nsabndoꞌ wizh neꞌe beuna.
Ná nchoga bexa ndab:
—Dub men ugap lá yoo gan gun be uyon ndun xa wa.
Ta weꞌe naꞌanpa dubtsa ngudiꞌizh bexa ná ton nak Jesús. Cha unabdiꞌizhgal bexa ndoꞌ xa myakna wa, ndab bexa:
—¿Xteꞌe nsak lu? ¿Ton nak xa li myunyakna ngusndoꞌ lu baꞌ zha?
Leꞌa xa wa cha ukaꞌab ndab xa:
—Nsak naꞌ leꞌa xa wa dub profet ten Dios.
Parea leꞌa bexa nibeꞌe ten bexa judio lá ndangea ladna ti ngok xa wa dub xa lá naꞌ, no uyoꞌo gan mnaꞌ xa. Ta weꞌe mtuꞌub bexa dub men ngwaꞌtezh be usan ten xa. Leꞌa gor na ulen bexa wa, leꞌa bexa nibeꞌe wa cha unabdiꞌizh ndoꞌ bexa, ndab bexa:
—¿Xin bega xa ndee, xa ndab bego lá naꞌ zha ngolkata xa wa zha? ¿Xteꞌexá mnaꞌ xa nat zhaga?
Leꞌa be usan ten xa wa cha ukaꞌab ndab bexa:
—Uniꞌíka besa leꞌa ta baꞌ xinka besa, noga lá naꞌka xa zha ngolta xa. Parea leꞌa besa lá iniꞌí xteꞌe mnaꞌ xa nat, no ni lá iniꞌí besa ton myunyakna xa. Unabdiꞌizh bega ndoꞌ leꞌaka xa, leꞌa xa yá goxla, leꞌa xa sabka‑yá.
Li ndab bexa geal leꞌa bexa nzheb ndoꞌ bexa nibeꞌe, leꞌa bexa nibeꞌe wa yá mbidiꞌizh leꞌa guniꞌi ton gab leꞌa Jesús nak Cristo, leꞌa bexa wa kontuꞌub xa len niꞌi sa nzhealbe bexa judio. Ta weꞌe ndab be usan ten xa wa leꞌa xa yá goxla, inabdiꞌizh bexa nibeꞌe wa leꞌaka ndoꞌ xa.
Weꞌe leꞌa bexa nibeꞌe wa cha utezhgal xabgiꞌi li myakna wa, cha ndab bexa:
—Leꞌa Dios nsobwiꞌi gaꞌal gud ná xteꞌe nak xabgiꞌi wa, leꞌa besa uniꞌí leꞌa xa wa dub xa ndap ke.
Leꞌa xa wa cha ndab:
—Leꞌa naꞌ lá iní tal leꞌa xa wa xa ndap ke natal naꞌan. Parea dub ta uní naꞌ: leꞌa naꞌ ngok dub xa lá naꞌ, ná nat leꞌa naꞌ naꞌla.
Cha ndabgal bexa:
—¿Xteꞌe mbinno xa lu zha? ¿Xtaꞌan mbin xa ndontsa lbaꞌa naꞌ lu zha?
Leꞌa xa cha ukaꞌab ndab xa:
—Leꞌa naꞌ yá ndáp‑a ndoꞌ bego, ná leꞌa bega lá kaꞌab isakyoꞌón‑a. ¿Nat xtaꞌan nlad bega gáp naꞌ‑yá stub biaj? ¿Nati no bega nlad gak xmen xa wa zha?
Cha xela uníꞌi bexa ndoꞌ xa, ndab bexa:
—Lu nak xmen xa wa, parea leꞌa besa nak xmen Moisés. Leꞌa besa uniꞌíka leꞌa Dios mbidiꞌizhno Moisés, parea leꞌa xa weꞌe leꞌa besa ni lá iniꞌí pa utoꞌo xa.
Leꞌa xabgiꞌi wa cha ukaꞌab ndab xa:
—¡Leꞌa ta ndab bega wa uzhebpa ndanseana naꞌ! Leꞌa xa wa leꞌa myunyakna ngusndoꞌ naꞌ, parea leꞌa bega lá iniꞌí pa utoꞌo xa. Leꞌa beuna uniꞌíka leꞌa Dios naꞌanpa goꞌón ta inab dub xa ndap ke. Parea leꞌa tal ton yankea Dios no uxobgek xa ndoꞌ Dios, leꞌa Dios soꞌónka ta inab xa wa. Nunk beuna gol goꞌón yoo dub men yunyakna ngusndoꞌ dub xa lá naꞌ zha ngolta xa. Tal leꞌa xa wa naꞌanpa nak dub xa mtuꞌub Dios, leꞌa xa lá yoo gan gun ta wa.
Leꞌa bexa cha ukaꞌab ndab bexa:
—¡Leꞌa zha ngolkata lu leꞌa lu yá ndapka ke, ná lu nlad leꞌa uluu besa!
Cha ulantuꞌub bexa xa sa wa.

Leꞌa Jesús mbiꞌín ta li ulantuꞌub bexa xa wa. Leꞌa ngol gor mzheal Jesús xa, cha ndab Jesús:
—¿Ndangea ladna lu Xin Dios zha?
Leꞌa xa wa cha ukaꞌab ndab xa:
—Señor, gud go ná ton xa wa, ndontsa gungea lad naꞌ xa wa.
Leꞌa Jesús cha ndab:
—Leꞌa lu yá uniꞌíka xa, leꞌa xa wa naꞌ, xa ndadiꞌizhno lu nat.
Leꞌa xa wa cha ndab:
—Ndangea lad naꞌ go, Señor.
Cha usaxib xa ndoꞌ Jesús.
Leꞌa Jesús cha ndab:
—Leꞌa naꞌ ndal ndoꞌ gizhliyo iní naꞌ ná xteꞌe nak be men. Li ndontsa leꞌa bexa lá naꞌ wa inaꞌbe, no bexa na nsak leꞌa xa naꞌka leꞌa bexa wa yaꞌan cuent dub xa lá naꞌ.
Leꞌa gor na mbiꞌín pla bexa fariseo nde sa wa ta li ndab Jesús, cha ndab bexa ndoꞌ Jesús:
—¿Ndab lu zha leꞌa besa ndee naꞌanpa naꞌ?
Leꞌa Jesús cha ndab:
—Tal leꞌa bega lá naꞌ, leꞌa bega naꞌanpa ndap ke ndoꞌ Dios. Parea leꞌa bega ndab leꞌa bega naꞌka, ta weꞌe leꞌa bega ndapka ke ndoꞌ Dios.

Poslušaj San Juan 9