Jenexi 16
16
Akara, Iximaeu maro
1Morarame Aparã pyty, Sarai emũkuara ro kynexine. Tynamotoke kynexine ynororo, nohpo, Ejitu pono, topehke pyra erohketyme itapyĩ tao, esety Akara. 2Mame ynara tykase Sarai tynio, Aparã a:
— Umũkuru onekaropyra Ritonõpo ya tokurehse. Naeroro ypoetory maro exiko. Otarame mose ae tumũkue exĩko ase, tykase.
Aparã ỹme kynexine Sarai omiry tymoise eya, 3mame typoetory tokarose Sarai a, tynio a ipytyme ehtohme. Morara toehse 10me jeimamyry taropose ahtao Aparã a Kanaã nonory po. 4Akara maro toehse Aparã, poetoẽme toehse nohpo. Mame poetoẽme toexiry waro toehse Akara ahtao, tosẽ Sarai tyhtomapitose eya. 5Naeroro ynara tykase Sarai tynio a:
— Onyrihpyry pokoino jyhtomãko Akara nase. Ywy roro mose ekaroase oya ipoko oehtohme repe; seromaroro poetoẽme toehse toexiryke ymotye kure osekarõko nase, jyhtomãko. Naeroro Ritonõpo a kuapiakary se ase onoky tyyrypyhpyke: ywy, omoro?
6— Kure, tykase Aparã. — Opoetoryme Akara mana, ituisaryme mase. Tyriry se oehtoh tyriko ipoko.
Morara exiryke yronymyryme typoetory tyrohmanohpose Sarai a, ajoajohpã samo. Naeroro tosẽ tapyĩ tae toepase ynororo. 7Yrome Ritonõpo nenyokyhpyry tõsenepose eya, ona po, tuna eutary pũto osema tao Sua po, 8tõturupose ynororo eya:
— Akara, Sarai poetory, ozeino moehno? Aza ytõko mah?
— Jesẽ winoino epãko ase, tykase ynororo.
9Mame ynara tykase Ritonõpo nenyokyhpyry eya:
— Ytoko ropa oesemy a. Aomipona exiko emero poko.
10Ynara tykase roropa Ritonõpo nenyokyhpyry eya:
— Ypoe, apakomotyã tuhke exĩko,
ekuhpỹme tuhke toto exiry exĩko mana.
11Poetoẽme mase.
Emũkuãko mase omũkurume.
Mokyro esehpãko mase Iximaeume,
oxitary, oetuarimary, totase Ritonõpo a exiryke.
12Mokyro omũkuru, jumẽtu tosẽke pyra exikety sã exĩko mana;
etonãko mana imehnõ maro emero porehme,
imehnõ mã emero etonãko roropa imaro.
Morararo esary moe exĩko mana,
ameke exĩko mana tyekyry tomo a.
13Mame tyorõme Ritonõpo tosehpase Akara a: “Mã jeneneme Ritonõpo”. Ynara exiryke imaro tõturuse Ritonõpo nenyokyhpyry, tõturupose roropa ynororo tyya rokene: “Ajohpe pyra nae, Mokyro eneno, Jeneneme?” tykase. 14Morara exiryke moro tuna eutary irãnao Kate poe Perete pona tosehpase “Isene Exikety tuna eutary, Jeneneme” tosehpase eya.
15Mame Akara toemũkuase Aparã mũkurume. Tosehpase ynororo eya Iximaeume. 1686me jeimamyry Aparã nae kynexine, tonuruse Iximaeu ahtao.
Aktuálne označené:
Jenexi 16: apy
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©2017, Wycliffe Bible Translators, Inc.