Génesis 6
6
Piyapiꞌsa nitapicancanpisoꞌ
1Piyapiꞌsa naꞌasahuatonaꞌ, yanquëpi huachi. Itohua itohua ninanoroꞌsa ocoiatona yaꞌhuërapi. Naꞌa huiꞌninapita nanoꞌsa yaꞌhuëtopi. 2Yosë huiꞌninpitari#6.2 Yosë huiꞌninpita topachina, maꞌsona tapon naporinsoꞌ: co insonta nitotërinhuëꞌ. “Yosë imaroꞌsa huiꞌninaꞌ,” topi aꞌnaquën. ina nanoꞌsa niꞌsahuatonaꞌ, paꞌyatopi. Napoaton huayonatona huayonatonaꞌ, costapiso maraꞌpiapi. 3Napoaponahuëꞌ, Siniorori co costatonhuëꞌ tapon: “Co piyapiꞌsa yaꞌhuëmiatápaiso yaꞌhuërinhuëꞌ. Piyapi niꞌton, chiminacaiso yaꞌhuërin. Napoaton pasa cato shonca piꞌipiraꞌ, nanpiponaꞌ,” tënin.
4Yosë huiꞌninpitari ina sanapiroꞌsa macatonaꞌ, huiꞌnahuanpi. Huiꞌnahuanpachinara, panca piyapiroꞌsa yaꞌhuërin huachi. Ina quëran inapitasoꞌ, iráca quëran huarëꞌ huaꞌanoꞌsa nahuinpisopita yaꞌhuëpi. 5Napoaponaraihuëꞌ, paꞌpi co noyahuëꞌ cancantopi. Co noyahuëꞌ nicacaisoráchin yonquipi niꞌton, Yosëri co noyahuëꞌ niꞌnin. 6-7Ina nicaton, sëtërin: “Maꞌmarëcha piyapi acorahuë paya. Ataꞌhuanchi nipachin. Yaꞌipi pëꞌtahuaroꞌsaꞌ, anpiantëhuanoꞌsaꞌ, noꞌpaquë niohuaratërinsopita, inapitarë chachin ataꞌhuantarahuë huachi,” tënin. 8Napoaponahuëꞌ, Noiso nóya niꞌnin.
Noi panca nancha nininsoꞌ
9Noi naporinso shaꞌhuichinquëmaꞌ: Noiso Yosëíchin natëton, nóya ninin. Naporo tahuëriꞌsa inaíchin Yosë nohuantërinso ninin. 10Inasoꞌ, cara huiꞌninpita quëmapisáchin yaꞌhuëtërin: Simo, Camo, Cahuito, inapita.
11-12Naporoꞌ yaꞌipi isoroꞌpaquë yaꞌhuëpisopita nitapicancanpi. Paꞌpi co noyahuëꞌ nicatonaꞌ, ahuëtacaisoráchin cancantopi. Napopiso Yosëri niꞌnin. 13Ina nicaton, Noi itapon:
“Yaꞌipi piyapiroꞌsa ataꞌhuantarahuë. Paꞌpi co noyahuëꞌ nipi niꞌton, piyapiꞌsa co huachi sano cancantopihuëꞌ. Napoaton yaꞌipiroꞌpaquë yaꞌhuëpisopita ataꞌhuantarahuë huachi. 14Quëmaso nipirinhuëꞌ, panca nancha niquëꞌ. Yaquihuan nara quëran nisahuaton, aipi quëran, acopo quëran, toꞌni pochin nininquë toꞌníquëtëquëꞌ. Patoanaroꞌsanta acotëquëꞌ. 15Nancha nipatan, iso pochin acoquëꞌ: Pasa cara shonca aꞌnatërápo mitro naporopitërinsoꞌ. Cato shonca cato mitro miria pancanatërinsoꞌ. Shonca cara mitro miria inaparinsoꞌ. 16Naporahuaton, cara paꞌcotë acotëquëꞌ. Pëirapiranso yaꞌcariꞌ, miria mitro aquërinquë huintana acotëquëꞌ. Yaꞌcoanantaꞌ, aꞌnatëran acotëquëꞌ. 17Aꞌna tahuëri panca pacon aꞌpaarahuë, yaꞌipiroꞌpaꞌ imotarin. Yaꞌipi piyapiroꞌsaꞌ, maꞌsharoꞌsaꞌ, inapita taquiitapi. 18Quëmaroꞌcoso nipirinhuëꞌ, anoyatarahuë niꞌton, nancha tënihuatan, saꞌanëꞌquën chachin yaꞌconaran. Huiꞌnanpitantaꞌ, saꞌinarë chachin yaꞌconapi. 19Naporahuaton, maꞌsharoꞌsanta nisha nisha nipisopita quëran, aꞌnara quëmapi, aꞌnara sanapi yontonquëꞌ. Inapitanta canpita pochin chaꞌëcaiso marëꞌ yontonquëꞌ. 20Anpiantëhuanoꞌsaꞌ, pëꞌtahuaroꞌsaꞌ, noꞌpaquë niohuaratërinsopita, yaꞌipi inapita catoya catoya yaꞌconaponaꞌ. Canpitarë chachin yaꞌhuaantacaiso marëꞌ yaꞌconaponaꞌ. 21Notohuaroꞌ cosharo nisha nisha nininsopita ayontonahuaton nanchaquë poꞌmoquëꞌ. Canpita capacamaso nisahuaton, maꞌsharoꞌsanta capacaiso marëꞌ poꞌmoquëꞌ,” itërin.
22Napotohuachina, Noisoꞌ yaꞌipi Yosëri camairinso chachin ninin huachi.
Aktuálne označené:
Génesis 6: cbt
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2011, Wycliffe Bible Translators, Inc. All rights reserved.