Matiyu 4
4
Yesu n Kala̱pa̱nsi
(Marku 1:12-13; Luka 4:1-13)
1Kulu Keri ku tonoi n Yesu ubana a kakamba, kotsu Kala̱pa̱nsi† ka kondo yi. 2Aꞌayin amangare kaara n kayin Yesu lya ilikulya wa. An a kotsoi, aku u panai kambulu. 3Pini nala, Kala̱pa̱nsi ka tuwa̱i ka tonuko yi, “Avu Maku ma Kashila̱† ma baci, gonuko atali a na a woko iburodi.”
4Yesu wushunku yi, “A korongu ta̱ a Tagara̱da u Kashila̱,†
“ ‘N burodi ɗa koshi vuma wa yan uma wa,
she gba̱ n kadyanshi ka ka wuta̱i a una̱ u Kashila̱.’ ” #U.Ml. 8:3.
5Aku Kala̱pa̱nsi ka banka yi a Urishelima ilyuci i uwulukpi,† u zuwa yi a bilibili u Kuwa ku Kashila̱.† 6Aku u danai, “Avu Maku ma Kashila̱ ma baci, raɗugu a ubana a iyamba, kpaci ukorongi u ɗa wa̱ri a Tagara̱da u Kashila̱:
“ ‘Kashila̱ ka yanka ta̱ atsumate a ne kadyanshi adama a vunu,
kpam a ka kiɓatsa vu ta̱ a akere a le,
tsa̱ra̱ vu gbasha kune ku vunu a katali wa.’ ” #Ishp. 91:11-12.
7Yesu wushunku yi, “Tagara̱da u Kashila̱ u dana ta̱ dem, ‘Va kondo Magono ma Zuba Kashila̱ ka vunu wa.’ ” #U.Ml. 6:16.
8Pini nala, Kala̱pa̱nsi ka bidya yi ubana a zuba u masasa ma ugaɗi, u wenike yi gba̱ tsugono tsu likimba kau‑kau n tsupige tsu le. 9Aku u danai, “Va lyaka mu baci kayala, ma na̱ka̱ vu ta̱ iꞌya gba̱.”
10Yesu wushunku yi, “Wala vu ne mu ure Kanangasi,†#4:10 Kanangasi; wata, “Shetan” kala ka dem ka Kala̱pa̱nsi. Tagara̱da u Kashila̱ u dana ta̱,
“ ‘Lyaka Magono ma Zuba kayala, kpam aya koshi va gbashika.’ ” #U.Ml. 6:13.
11Aku Kala̱pa̱nsi ka lazai ka a̱sa̱ka̱ yi, pini nala, atsumate a zuba a tuwa̱i a kiranai n eyi.
Yesu gita̱i manyan ma ne
(Marku 1:14-15; Luka 4:14-15)
12An Yesu panai alabari a ɗa a ukai Yahaya Kalyuɓugi a kuwa ku aꞌali, aku u gonoi a uyamba u Galili. 13Shegai ɗa wa rongo a ilyuci i Nazara, aku u ba u rongoi a Kafarnahum a ikengi i Kushiva̱ ku Galili a kaɓon ka Zebulun n Nafutali. 14Nala gita̱ ta̱ tsa̱ra̱ ili iꞌya Ishaya matsumate u danai i shaɗangu:
15“A kaɓon ka Zebulun n Nafutali,
a ure ubana a kushiva̱, a kapashi ka Aga̱ta̱ a Urudu, a Galili,
a asu u ɗa kakuma̱ ka Awulawa† ka̱ri.
16Ama ɗa a ka rongo a karimbi,
a ka wene ta̱ katyashi ka pige.
Aꞌa̱ri a ka rongo ta̱ a una̱ u ukpa̱,
shegai katyashi ka wantukpa ta̱ ara le.” #Isha. 9:1-2.
17Pini nala, Yesu gita̱i kuɓari, u danai, “Kpatalai i a̱sa̱ka̱ unyushi u cingi u ɗe, i gono a asu u Kashila̱, kpaci tsugono tsu zuba tsu yan ɗe evu.”
Yesu isa̱i aka̱ni a adan ama a nishi
(Marku 1:16-20; Luka 5:1-11)
18Kain ka te, tyoku ɗa Yesu wa̱ri nwalu a ikengi i Kushiva̱ ku Galili, aku u wenei ama a re uza n vangu. Uza u te aya Simo, uza ɗa dem a tsu isa̱ Bituru, n Andurawu. Gba̱ le aka̱ni a adan a ɗa, a ka vuta̱la̱sa̱ ibilili i le a kushiva̱ ki. 19Aku Yesu tonuko le, “Tono numu! Ma wenike ɗa̱ ta̱ tyoku ɗa ya tukuso ama, shegai adan kpam wa.” 20Kute‑kute a a̱sa̱ka̱i ibilili i le, a tono yi.
21An a walai kenu, aku a wenei ama a re, uza n vangu u ne, Yakubu n Yahaya mmuku n Zabidi. Ele pini a kpatsu n tata u le n a lapulusi ibilili, aku Yesu isa̱ le. 22Kute‑kute a a̱sa̱ka̱i kpatsu ki n tata u le a tono yi.
Yesu yankai ama aga̱nda̱
(Luka 6:17-19)
23Yesu kyawain uyamba u Galili gba̱ n u wenishiki a agata a Kashila̱, n u yansi kuɓari ku Kadyanshi ka Shinga† ka tsugono tsu zuba, n u ta̱na̱si aza a mɓa̱la̱. 24Alabari a ne a kyawain gba̱ uyamba u Galili, aku a tukusoi aza a mɓa̱la̱, hal gba̱m n ama ɗa aꞌa̱ri a uyamba u Suriya, n aza ɗa a ka pana ikyamba tsa̱ra̱ a ta̱na̱sa̱ le. Aza roku a asuvu a le aꞌa̱ ta̱ n ityoni i cingi,† aza roku ipori, hal gba̱m n awunu. Shegai Yesu ta̱na̱sa̱ le gba̱. 25Kakuma̱ ka ama ka ka wuta̱i a Galili, n Dikafoli, n Urishelima, n gba̱ uyamba u Yahuda hal n aza ɗa aꞌa̱ri a Aga̱ta̱ a Urudu a kasana ka tono yi.
Aktuálne označené:
Matiyu 4: kdlNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2010, Wycliffe Bible Translators, Inc. All rights reserved.