Jenɛɛsë 8
8
'Nʋŋlʋkpakua 'nɩ 'ciea' 'wʋ
1Nyɔsʋa nya 'pa Noea ‑gä plɛ nyra bɩa 'klʋɛɛa mlaaa 'fɩɔ, nyra bätëmlaalä kä 'fɩɔ 'ɔ nyra 'üün bä ɩa' bɩa 'mɩɩ 'lɩ. Nyɔsʋa nya ja ‑fʋflʋ ‑tʋtʋ ‑gälɩ, 'nie nya ‑trenyükä. 2'Nielɛ bäa' ‑tʋtʋ ‑wälɩ nyra cɛlɩa ‑pumëmlë nya 'pala, 'nʋŋlʋ nya 'nyüglö. 3Jrüüa ‑glʋɩuunsɔɔ ‑bɛ ‑pʋ (150) 'mä ‑sikalɩ mi nɩ, 'nielɛ nya 'cecie 'wʋ. 4‑Uunsɔɔa nɛ ‑seplea jrüü ‑pʋ jrüü ‑uunsɔɔa ‑srɩlɩ nɩ, 'mɩɩ nya 'nyüglö Alalatëa ‑tʋtʋ ‑gälɩa 'dʋgbë 'wli. 5'Nie 'cie 'wʋ cie ‑söplü ‑pʋ. ‑Pʋa nɛ ‑seplea 'klɩsa jrüü 'lɩ nɩ, 'dëgbëa 'wia nya crɛrɛ 'wʋ.
6‑Jrüüa ‑glʋɩsɔɔ ‑sia' nɩ, Noe nya 'sa 'mɩɩlɛa ‑pumëmlalë 'ɔ nʋa'. 7'Ɔnya 'cɛrɛ ‑kɔkɔpana ‑wälɩ. 'Ä mö 'ä jö, 'asɩ 'ä kä kä 'nie nya mala ‑tʋtʋ ‑gälɩ. 8'Ɔnya 'cɛrɛ bɩa ‑sögö ‑wälɩ 'ämä 'iin 'jä 'nie ma 'bölöklɩ ‑tʋtʋ ‑gälɩ. 9‑Maa ‑sögölä 'nyɩ kʋfa ‑a 'jä 'ämä ‑fʋflʋ 'pa, 'be 'nie ‑ka bä kä ‑tʋtʋa 'fɩɔ ‑gälɩ. 'Ii känyrɩ 'änya 'blöö 'mɩɩlɩ dɛrɩ. 'Ɔnya to 'ään 'darʋ 'klɩ 'ɔnya 'kpla 'ään, 'ɔnya pla 'ään 'mɩɩ 'lɩ. 10'Ɔnya ‑glaa 'sɔɔwʋ jrüü ‑uunsɔɔ, 'ɔnya 'cɛrɛ 'sɔɔwʋ ‑sögölä ‑wälɩ. 11‑Sögölä nya 'blöö 'ɔɔn bei 'wʋ dɛrɩ ‑gbiajrʋ 'lɩ. 'Ämäa' ji, 'ä ja oliivëtuua 'napʋ. Noe nya jresaa 'nie 'a 'klɩbölö ‑tʋtʋ ‑gälɩ. 12'Ɔnya ‑glaa 'sɔɔwʋ jrüü ‑uunsɔɔ, 'ɔnya 'cɛrɛ ‑sögö ‑wälɩ. 'Ä mia' 'ä ‑kanyɩ 'ɔa ‑nyɛɛ dɛrɩ ‑a 'blöö.
13'Taɩnlɩ kä 'mlɩ Noe käa' ‑sɩa ‑duu ‑glʋɩgböö ‑sɩa ‑glʋɩgböö ‑bɛ ‑sʋ 'doo (601) nɩ, 'klɩsa ‑seplea jrüü 'doo 'lɩ, 'a 'ia jrüülüa 'mlɩ 'nieɩɩ mala ‑tʋtʋ ‑gälɩ. Noe nya 'sa 'mɩɩa cɛlɩ. 'Ɔ ‑pʋpɔa' ‑fälɩ nɩ, ‑tʋtʋ ma jie. 14'Sɔɔa në ‑seplea jrüü ‑glʋ ‑bɛ ‑uunsɔɔ 'lɩ nɩ, 'a ‑plɩɩ ‑tʋtʋ ma 'mʋfasa.
15Nyɔsʋa nya ‑gbala Noe: 16«'Cie 'mɩɩ 'lɩ, ‑nyra ‑na 'ŋlʋʋ kɔsɔ, ‑na 'jü nyra ‑na 'jüa 'ŋlëgë; 17nyra mlaa ‑glügbülüa 'fɩɔ 'cie, nyisiea 'fɩɔ, bätëmlaa 'fɩɔ nyra diili kä 'fɩɔ ‑pɛrɛa' ‑tʋtʋ ‑gälɩ! Ü ‑gbaala ‑tʋtʋ ‑gälɩ 'kä; ü ‑gu, 'kä 'ü 'paplagälɩ 'pläa 'mlɩ.» 18Noe nyra 'ɔa 'jü, 'ɔa 'ŋlʋʋ nyra 'ɔa nyɩbɛjüa 'ŋlëgë nya 'cie. 19Mlaa 'fɩɔ, ‑pɛrɛdiia 'fɩɔ, nyisiea 'fɩɔ, nyra diili kä 'fɩɔ ‑pɛrɛa' ‑tʋtʋ ‑gälɩ, 'sɩrɩ 'üa ‑glügbü bäbläa' 'lɩ 'ünya 'cie 'mɩɩ 'lɩ.
Noe 'sa Yawe ‑gbɔ
20Noe nya nʋ ‑gbɔsatöwlö Yawea ‑gʋ; 'ɔnya dɔrɔ mlaa ‑tɔrʋpɩɔa mlaalë 'nyɩa' ‑fre 'lɩ bä 'wʋ, 'ɔnya dɔrɔ nyisiea ‑tɔrʋpɩɔa nyisielü 'nyɩa' ‑fre 'lɩ bä 'wʋ, ‑gbɔsatöwlö ‑gälɩ 'ɔnya 'sa ‑gbɔsadiili fia'. 21Yawe nya 'kʋɛɛ ɩa' 'mʋfa 'nɔnʋ, 'ɔa plɛklɩ 'ɔ ‑nëma: «'N ‑ka ‑nëmä ‑tʋtʋ ‑a busu nyɔɔa ‑gʋ, 'be kolo 'ɔa ‑sëgbadɛɛ 'lɩ 'kä nɩ, wiili 'ɔa plɛ 'bataa' 'i bʋbɔ. 'N ‑ka ‑nëmä diili kä 'fɩɔ bäa' 'lɩ ‑a ‑gblooo, ‑beere 'sɩrɩ 'n nʋa' ‑plɩɩ.
22‑Tʋtʋ ‑ka bäa' 'lɩ nɩ,
paplataɩn ‑bɛ 'sasataɩn,
'sɩɔpataɩn ‑bɛ nyasupataɩn,
'jrʋpʋtaɩn ‑bɛ 'nʋŋlʋdataɩn,
‑srɩa 'taɩn ‑bɛ ‑gbiaa 'taɩn,
'ia 'fɩɔlʋ, ‑nëmä 'nyüglö ‑a 'nyüglö.»
Aktuálne označené:
Jenɛɛsë 8: Bakwé
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Wycliffe Bible Translators, Inc.