Jenɛɛsë 11
11
Babɛlëa 'wlitʋŋlɔnyuku kpaku
1‑Tʋtʋ ‑gälɩa nyüüa 'fɩɔ ma 'paa 'papawii 'doo. 2'Ü sɔa' 'jrʋa 'wʋsɔrɔfa 'wʋa 'pɛlɩ nɩ, 'ünya jrä 'käblatʋtʋ ‑gälɩ, 'blɩlɩ 'ü 'daraa' Sinarëa 'a 'mlɩ. 'A 'i 'ü kʋ. 3'Ünya wewrelɩ: «'Ba ji! A nʋ ‑tʋtʋa ‑briikë 'kä a papla 'üün 'seri.» 'A ‑briikëlü 'üü bä 'üa 'täkë, 'kɔlëtaa nya bä 'üa ‑simiti. 4'Ü ‑nëma bɩa: «'Ba ji amä ana bätä 'pa, 'kä a 'paa 'wlitʋŋlɔnyuku, u 'mäa' cɛ ‑gbafɛ. 'Kä a ‑nyɛɛ ana nyufa 'nyrɩ, a ‑pɩ ‑tʋtʋa 'fɩɔ ‑gälɩ 'kä ‑gbaala.» 5Yawe nya 'cie 'ɔnya ji bätälä 'ü 'paaa' 'jä nyra 'wlitʋŋlɔnyukulu 'ü 'paaa' 'jä. 6'Ɔ ‑nëmä: «‑Jää! 'Ü 'a ‑glügbö 'döö bä, ‑bɛ 'ü 'paa 'papawii 'doo. ‑Jää wii 'ü nöa', 'ü 'mrɛɛ ü nʋ wiili kä 'fɩɔ 'üa plɛɛ 'bataa', dɛɛ ‑nëmä 'üün 'klɩ ‑a ka! 7A 'cie! A mi a 'cakla 'üa 'papawii 'lɩ, 'ü ‑ka ‑pɩ 'wlinönrö!»
8Yawe nya ‑gbaala 'üün ‑tʋtʋa 'fɩɔ ‑gälɩ 'kä, 'ünya 'nyüglö bätäläa 'papakʋ. 9'A 'ia ‑gʋ nyüü ‑nyɩ bätälä Babɛlë#11.9 Babɛlë: Ebröönyrɩ bäsaa; 'ii bä Babilɔɔnëbätä. Ebrööwii 'lɩ nɩ Babɛlë nyra «'caklakʋ» bä dɛɛdee. 'nyrɩ, 'be 'a ‑plɩɩ Yawe 'cakla ‑tʋtʋ ‑gälɩa 'papawiia 'fɩɔ 'lɩ, 'ɔnya ‑gbaala nyüülüa 'fɩɔa ‑tʋtʋa 'fɩɔ ‑gälɩ 'kä.
SƐMËA WII
11.10-26
10‑Jäsɩ Sɛmëa 'jüa 'jüa wii nʋa' ‑sisidɛɛ. 'Nʋŋlʋkpaku 'daa', ‑bɛ 'i ‑sia' ‑sɩ 'sɔɔ nɩ, 'a ‑plɩɩ Sɛmë 'jä ‑sɩa ‑glʋɩgböö (100) 'ɔnya ‑gu Arëpasadë. 11Sɛmë ‑gua' Arëpasadë nɩ, 'ɔ ‑si ‑sɩa ‑duu ‑glʋɩgböö (500), 'ɔ ‑gu bɩa nyɩbɛjü nyra 'ŋlëkayerü.
12Arëpasadë kä ‑sɩ ‑glʋ ‑sɩ ‑pʋ ‑sɩ ‑gböö 'ɔnya ‑gu Sala. 13'Ɔ ‑gua' Sala nɩ, 'ɔ ‑si ‑sɩa ‑duu ‑sɩ tää (403), 'ɔ ‑gu nyɩbɛjü nyra 'ŋlëkayerü bɩa.
14Sala kä ‑sɩ ‑glʋ ‑bɛ ‑pʋ 'ɔnya ‑gu Ebɛɛrë. 15'Ɔ ‑gua' Ebɛɛrë nɩ, 'ɔ ‑si ‑sɩa ‑duu ‑sɩ tää (403), 'ɔ ‑gu nyɩbɛjü nyra 'ŋlëkayerü bɩa.
16Ebɛɛrë kä ‑sɩ ‑glʋ ‑sɩ ‑pʋ ‑sɩ mlɔɔ 'ɔnya ‑gu Pɛlɛgë. 17'Ɔ ‑gua' Pɛlɛgë nɩ, 'ɔ ‑si ‑sɩa ‑duu ‑sɩ ‑glʋ ‑bɛ ‑pʋ (430), 'ɔ ‑gu nyɩbɛjü nyra 'ŋlëkayerü bɩa.
18Pɛlɛgë kä ‑sɩ ‑glʋ ‑bɛ ‑pʋ 'ɔnya ‑gu Reu. 19'Ɔ ‑gua' Reu nɩ, 'ɔ ‑si ‑sɩa ‑glʋɩ pʋ ‑sɩ ‑uunmlɔɔ (209). 'Ɔ ‑gu nyɩbɛjü nyra 'ŋlëkayerü bɩa.
20Reu kä ‑sɩ ‑glʋ ‑sɩ ‑pʋ ‑sɩ 'sɔɔ 'ɔnya ‑gu Salukë. 21'Ɔ ‑gua' Salukë nɩ, 'ɔ ‑si ‑sɩa ‑glʋɩpʋ ‑sɩ ‑uunsɔɔ (207). 'Ɔ ‑gu nyɩbɛjü nyra 'ŋlëkayerü bɩa.
22Salukë kä ‑sɩ ‑glʋ ‑sɩ ‑pʋ 'ɔnya ‑gu Nakɔɔrë. 23'Ɔ gua' Nakɔɔrë nɩ, 'ɔ ‑si ‑sɩa ‑glʋɩpʋ (200). 'Ɔ ‑gu nyɩbɛjü nyra 'ŋlëkayerü bɩa.
24Nakɔɔrë kä ‑sɩ ‑glʋ ‑bɛ ‑uunmlɔɔ 'ɔnya ‑gu Tɛra. 25'Ɔ ‑gua' Tɛra nɩ, 'ɔ ‑si ‑sɩa ‑glʋɩgböö ‑sɩ ‑pʋ ‑sɩ ‑uunmlɔɔ (119). 'Ɔ ‑gu nyɩbɛjü nyra 'ŋlëkayerü bɩa.
26Tɛra kä ‑sɩa ‑glʋɩtää ‑bɛ ‑pʋ, 'ɔnya ‑gu Abramë, Nakɔɔrë nyra Araan.
NYƆSƲA NYRA ABRAMË 'PALƖ KUÖ 'ƆMÄ 'ƆƆN KÄLƖ ‑SRÖRÖ 'ƆMÄ ‑GLÜGBÜA 'FƖƆ 'NƖPA
11.27–50.26
TƐRAA 'JÜA 'JÜA WII
11.27–25.11
27‑Jäsɩ Tɛraa 'jüa 'jüa wii nʋa' ‑sisidɛɛ: Tɛra ‑gu Abramë, Nakɔɔrë, nyra Araan. Araan ‑gu Lɔɔtë. 28Araan tɩ 'ɔa tʋ Tɛra, 'ɔnya jä. Urëbätä 'ɔ 'järä, ‑nyɛɛ Kalëdeenyüüa 'bre, ‑tɛlɩ 'ɔ ‑glooroa'. 29Abramë nyra Nakɔɔrë nya kä 'ŋlëgë. Abramëa 'ŋlʋʋa 'nyrɩ bä Sarai, ‑bɛ Nakɔɔrëa nɔa 'nyrɩ bä Milika. Milika bä Araan a 'ŋlëkayria. Araan ‑gu bɩa Isëka. 30Sarailɔ nɩ, 'ɔ ‑gbɔ; 'ɔnyɩ 'jʋ ‑a kä. 31Tɛra nya dɔrɔ 'ɔa 'jʋ Abramë nyra 'ɔa 'ŋlʋʋ Sarai 'wʋ, nyra 'ɔa 'jʋ Araan a 'jʋ Lɔɔtë 'ɔ nyra 'üün sɔ Urëbätälä bäa' Kalëdeenyüüa 'bre, 'ünya mi Kanaanyüüa 'bre. 'Ü 'tɔa' Araabätä, 'a ‑nyɛɛ 'ü kʋ. 32Tɛra kä kä ‑sɩa ‑glʋɩpʋ ‑sɩ ‑gböö (205), 'ɔnya järä Araabätä.
Aktuálne označené:
Jenɛɛsë 11: Bakwé
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Wycliffe Bible Translators, Inc.