Matthew 9
9
Jesu aa jak aja may thamot moq miq tha taqhal aa
(Mark 2:1–12; Luke 5:17–26)
1Jesu waqwan o tong eq Galilee shitim tha jan eq, piq samhaq thináng thuta. 2Eshináng miqtang aa jak ajaa may thamot moq ashey miq tha ráng o tun som eq Jesu relnáng thok som katta. Jesu aa ning kam alam rapney ahan ta khi eq, piq aa jak ajaa may thamot moq miq thima batta, “I sa, tin nak thajung u! Ba ngarey tha utol sey chakta.”
3Thong tataltey tang aa ira tat eq ning jaktung mong thina wanta, “Iri miq rey Shkewa junnam tung aa raaq bat aa.”
4Ning aa chamta tathin aa tha Jesu aa usam eq ta etho piq aa batta, “Nim aa chamma jashit tinthin tathin inn? 5Achol raa chamlang aa: ‘Ba ngarey tha tol eq chakta’ raaq raa tia ‘tunlang eq, qhing u’ raaq raa? 6Etharin Miqna Sa ma tho iri mingkang na ngarey raa tolchak ma authority atha ta nga nim ma takhi eq phanáng.” Etho piq aa eshi jak aja may thamot moq miq thima batta, “Tunshat eq ba ráng ni tunsom eq himnáng wang u.”
7Ethi miq tha tunshat eq himnáng wangta. 8Miqtang tha esha khi eq rapney patja ta etho miq ma itan patja somlot ma authority kota rangma Shkewa tha tasapsey ta.
Jesu aa Mathew tha hal aa
(Mark 2:13–17; Luke 5:27–32)
9Jesu eshi haq shiwang qhing chuwang atho, piq aa ashey phunta qheytey khita. Umiing tha Matthew ta angta, piq jaksom ching na tong chey ta. Jesu aa piq thima batta, “I jiphan phu.”
Mathew tha tunshat eq piq ji phanta.
10Mathew aa uhim thináng Jesu tha phaksat phaksa ma halta. Eshina daqhan phunta qheytey miqtang, etho ngarey tang tho thu eq, Jesu ni jiphantey tang jam tho arum aa phaksat phaksa ta. 11Chamteytey Phorisi tang aa ira siin eq Jesu jiphantey tang ma pitta, “Nim tatalteywa chamma irimal phunta qheytey miqtang etho ngarey tang jamoq tong eq phaksat phakshat aa?”
12Jesu aa ning raaq tat eq, thawel batta, “Miq aqhal tey ma atakasa siintey sha ràa moq, etharin atak miqtang ma atakasa siintey sha ràa aa. 13Nim ka eq, iri raaq ri chamlang ta thawit aa ta Asang likwit na bi inn: ‘Nga ma manchan ràa aa, jatngam pinthong ràa moq.’ Nga asang miqtang halma kaphamong angta phang, etharin ngarey miqtang halma katat taphang.”
Wokcham tong raaq pit aa
(Mark 2:18–22; Luke 5:33–39)
14Ethi jio, saalshey, John jungthalamtey jiphantey tang eq Jesu ma pitta, “Í nia Phorisi tang wokcham tong i, etharin ba jiphantey tang cham ma wokcham tong moq?”
15Jesu aa batta, “Thariktey wa tha ning jamoq ang ajo, winwa tang tin shitmoq angna. Etharin thariktey wa tha winwa tang jam wang sol chuwan ma rangham thupha na etho, ethi rangham tho ning wokcham tong na.”
16 “Utang eq atho anal khat pin sha aking khat o dap moq, irimal ang ajo, khat sha tachu angna. 17Utang eq atho, aking saan o anal sutichi sha sakshing moq; irimal ang ajo saan sha potik angna etho thaji sutichi sha ujan angna etho saan sha shit tina. Anal sutichi sha anal saan o hun shing ching; irimal ang ajo thani sha jaqhal angna.”
Kam khi eq Jesu aa taqhal aa
(Mark 5:21–43; Luke 8:40–56)
18Jesu iri raaq raa bat chey atho, synagogue solwa tha Jesu rel náng thu eq, bon eq batta, “I sa miqnusa thanga ti aa, etharin nang thu eq piq han sho bajak shing ujo piq ulun wey angna.”
19Jesu tunshat eq, piq jamoq kata. Ujiphantey tang tho Jesu jamoq kata.
20Eshi rangham tho, pang asi pang ni tahi jan eq tak ta miqnu they Jesu jio thu eq piq khat bal o lota. 21Piq aa tin o tathin ta, “Nga iri miq khat bal o lo ang jo uqhal ang náng.”
22Jesu aa ngik lang eq batta, “I sa miqnusa, nak cho u! Bakam wang nang uqhal ang tu.” Kalo hun eshi miqnusa tha qhalta.
23Ethi jio, Jesu ethi synagogue solwa jamoq piq himnáng kata. Etho Jesu aa utik tey him na jaam tom chey aa tha khita etho miqtang uqhap ang aa tha khita. 24Piq aa batta, “Thaji miqtang ran náng ka inn, nijang miqnusa ti moq angta, piq ujib ang chey aa!” Etha tat eq thaji miqtang ungit angta. 25Thaji miqtang ran náng takat jio, Jesu ka eq miqnusa jak tha lota etho piq shat ta. 26Ethi tung aa raaq tha thaji mung miqtang aa tatta.
Jesu aa ani miikduk wani taqhal aa
27Jesu eshiwang thalat eq ka atho miikduk wani ang aa they piq jio phan ta etho ring ta, “David Miqwasa, ini ma tinshit phu.”
28Jesu himmong thináng nop atho, ning ni piq relnáng kata. Jesu aa ning ni thima pitta, “Nga nim ni jin taqhal eq pha náng ta nim ni aa kam eq shin i?”
Ning ni aa batta “Teyhungwa, í ni aa han eq i!”
29Etho Jesu aa ning ni miik tha lo eq batta, “Nim ni aa kam shin tin mal, uqhal ang shin nin!” 30Etho ning ni aa ukhi sey ta. Jesu aa ning ni thima aching eq batta, “Iri raaq ri utang ma tho nak bat shin ju!”
31Etha otho, ning ni aa Jesu raaq tha thaji mung miqtang ma tatta ta.
Jesu aa angong tha taqhal aa
32Ning ka chey atho, chamtey tey miqtang aa, thangwa eq lota angong miq tha Jesu relnáng thok solta. 33Jesu aa thangwa tha phanchak atho, ethi miq tha phang raaq sey angta. Etha siin eq miqtang thaji tha rapney patja ti eq batta, “Israel na baluk otho irimal khi wey mi.”
34Etha otho, chamtey tey Phorisi tang aa batta. “Thangwa tang phan rangma, thangwa tang solwa eq Jesu ma tarong ko aa.”
Jaksomtey tang akum
35Jesu urel wang samhaq ni qhim tang thináng lingqhing chey ta etho piq aa synagogue tang na tatal kota etho Rangmungtan tungtang aqhal phanchan ta, etho thaji atakasa tang tha taqhal ta. 36Miqtang tha khi atho, piq ning thima tinshit ta, chammatakoi ning tha rimtey ahung kelwut tang mal, wetwaltey etho nong kap moqtey tang angta. 37Ethi rangma Jesu aa ujiphantey tang thima batta, “Cham ukhan eq ching daqhan ang aa, etharin jaksom lottey tang rapney akum. 38Ahan jaksomlot tey miqtang thok rangma cham taqhantey tangteywa ching wang chu inn.”
Aktuálne označené:
Matthew 9: Mmmm
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
CC BY-NC-ND 4.0
