УблапӀэ 39
39
ЯщэкӀэнэрэ бгъурэ шъхьэр
Юсыфрэ Потыфар игуащэрэ
1Юсыф Мысырым ащагъ; фирхьауным иӀэнэтӀэзехьэмэ ащыщэу, икъэухъумакӀомэ ятхьаматэу, пачъыхьэ унэм щыпсэурэ мысыр цӀыфым Потыфар ар исмахьилэ сатыушӀэхэу къэзыщагъэмэ ащищэфыгъ. 2Зиусхьаныр Юсыф игъусагъэти, ащ иӀофхэр дэгъоу кӀощтыгъэх. Мысырым щыщэу ежь изиусхьан иунэ ар щыпсэущтыгъэ. 3Ащ итхьаматэ Зиусхьаныр Юсыф къызэрэкӀыгъури, зэкӀэ ышӀагъэр Зиусхьаным къызэрэдигъэхъугъэри ылъэгъугъ. 4Юсыф итхьаматэ нэшӀукӀэ къызэригъэплъыгъ, ежь ышъхьэкӀэ иунэӀут хъугъэ, етӀанэ иунэ Ӏофхэр зэрихьанхэу ыгъэуцугъ, зэкӀэ иӀагъэр ащ ыӀэ рилъхьагъ. 5Джащ щегъэжьагъэу Юсыф ихьатыркӀэ мысырылӀым иӀэ пстэуми – унэми, губгъоми, сыд лӀэужыгъоу ащыриӀагъэми Зиусхьаным ынэшӀу къащифэщтыгъэ. 6ЗэкӀэ ащ иӀагъэр Юсыф ӀэкӀилъхьагъ, Юсыф ихьатыркӀэ шхэнымрэ ешъонымрэ ехъурэ гумэкӀ мысырылӀым иӀэжьыгъэп.
Юсыф ыпкъыкӀи ынапэкӀи дэхагъэ. 7Уахътэ тешӀагъэу Юсыф изиусхьан ишъуз ынаӀэ къытыридзи, къыриӀуагъ: «Къызголъ».
8Ау ар фимыдэу джэуап ритыжьыгъ: «Мары сизиусхьан зыфэгумэкӀын гори иунэ щыриӀэжьэп, зэкӀэ имылъку сӀэ къырилъхьагъ. 9Ежь фэдэу мы унэм Ӏофхэр щысэгъэзекӀох. Ощ нэмыкӀэу сэ ащ фит сызфимышӀыгъэ щыӀэп, сыда пӀомэ о ащ уришъуз. Адэ сыдэущтэу ащ фэдэ емыкӀушхо сэ сшӀэна, Тхьэм ыпашъхьэ псэкӀод къыщысхьэу?»
10Аущтэу ащ мафэ къэс Юсыф къыриӀощтыгъэ, ежь ащ голъынэуи кӀыгъунэуи ыдэщтыгъэп. 11Ау зэгорэм иӀофхэр ышӀэнхэу ар унэм зехьэм, унэӀут хъулъфыгъэ гори имысэу къычӀэкӀыгъ. 12Бзылъфыгъэм, ащ ищыгъын къетхъуи, къыриӀуагъ: «Садэжь къэгъолъ».
Ау ищыгъын ащ къыӀэкӀигъани, Юсыф къыкӀитхъуи, унэм къичъыжьыгъ. 13Ищыгъын къыӀэкӀигъани, унэм зэричъыжьыгъэр бзылъфыгъэм зелъэгъум, 14иунэ ис унэӀут хъулъфыгъэмэ къяджи, ахэмэ ариӀуагъ: «Шъуеплъ: тынапэ тырихынэу, силӀ тэ джурт къытфищагъ. ЛӀыгъэкӀэ къызголъынэу ар садэжь къэкӀогъагъ! Сэ сыкъэкууагъ. 15СыкъэкӀыий, куо хьау къызэрэсӀэтыгъэр зызэхехым, ищыгъын къыгъани, кӀитхъужьыгъ».
16Изиусхьан къэкӀожьыфэ Юсыф ищыгъын ащ ыдэжь щыӀагъ. 17Ащи а гущыӀэ дэдэхэр риӀуагъэх: «Джурт унэӀутэу къытфэпщагъэр садэжь сынапэ тырихынэу къихьэгъагъ! 18Сэ куо хьау къэсӀэти, сыкъызэкӀыим, ищыгъын садэжь къырини, кӀитхъужьыгъ». 19«УипщылӀ джары къысишӀэ шӀоигъуагъэр», – ыӀуи, ишъуз къызыреӀом, зиусхьаныр лъэшэу къэгубжыгъ; 20Юсыф аригъэубыти, пачъыхьэм ихьапсчӀэсхэр зычӀэсхэм чӀаригъэдзагъ.
Юсыф джаущтэу хьапсым чӀэс хъугъэ. 21Ау Тхьэр Юсыф игъусагъ, Ежь игукӀэгъукӀэ хьапсым иӀэшъхьэтет ынэшӀу къыщифэнэу ышӀыгъ. 22Хьапсым иӀэшъхьэтет зэкӀэ хьэпсчӀэсхэр Юсыф ыӀэ къырилъхьагъэх, Ӏофэу щашӀэрэ пстэумкӀи ар унэшъошӀ хъугъэ. 23Ащ ыӀэ илъым щыщ горэми хьапсым иӀэшъхьэтет лъыплъэщтыгъэп; сыда пӀомэ Зиусхьаныр Юсыф игъусагъ, сыд ышӀагъэми, Зиусхьаным зэкӀэ ащ къыдигъэхъущтыгъэ.
Aktuálne označené:
УблапӀэ 39: АдыТГ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Институт перевода Библии, 2002-2023