Jona 3
3
Ia Jona e dia i Nineve
1Ia Yawe e valagu vani lakaa ia Jona tana rukanina tahu, me kori vahai de, 2“Tuchau mo ko dia tana vera leho i Nineve, mo ko koria na saurongo tu kori vani nohaho nau.”
3Ma ia Jona e rongo mangana ia Yawe me dia i Nineve, na vera leho solehana te ke hana tahaa ke tolu na dani na lelavia me ke tuhu lalona. 4Ia Jona e sahe lalona na vera leho nia, me diadia tana dani matadu nia, me haila taonia sala me kori vahai de, “!E vati sangavulu pelelee bamu dani te toha me ke luvu i Nineve!” 5Ira kode na vangana i Nineve ara rongomangana nina valagu God te kori lenga vanira ia Jona. Ara sai mara vaikorihi kara toha volo hahani. Ma ira kode, turiha tana tinoni leholeho me chau tana rego ma na rego, kara toha sivo ma kara sahelia na tivi ma na chada tuali, me ke ni tihisi lengaa ira ara leleo basiaa nidira seko mara toha melumelu.
6Tahuna na saurongo nia te chaulia na king ni Nineve, me tatuhuru ia me basiaa nina bela ni tohotuu kae, me chua chonia na tivina talana, me sahelia na tivina tuali, me sivo me tohotuu tana tora. 7Me tu mai na king ni Nineve, me kejalira ira na vangana i Nineve me kori vahai de,
“Ide nina valagu rongoha na king me visa nina tinoni taovia:
Nau u kejalira visa na tinoni, me visa na vanganidira vahai na buluka ma na sipsip, kara toho volo hahani ma na inu. 8Me visa na tinoni kara sahelia na tividira tuali, ma kara kopira visa na vanganidira. Mi ira kode lalaka kara ngangai vania God. Visa na tinoni kara choni basiaa nidira naunau sekoseko ma na vaipiduhi. 9Ia kanau ke vu leleo visu soha na manasana ia God, me ke basiaa nina kore, me ke ni teha luvusihita.”
10Tahuna te haea ia God tara leleo basiaa nidira naunau sekoseko, me sahavi sohara, me teha sau sivo vanira na luvuluvu te vangaraua ia.
Aktuálne označené:
Jona 3: mln
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2024 (active), Wycliffe Bible Translators, Inc. All rights reserved