Yohana 3
3
Nikodimus Yu A Ban Yeso
1Ɓo Farisi maan nga ma a ki tungli na Nikodimus,ma yi gha ɓaal ɓaji la ɓoɓa yahuda. 2She ɓoma yu ban Yeso na duk, yina, "Ɓaji, su daal la na, wu ɓoma daal gǝr ra ma Koǝl tumu, nakunla ɓomaan sǝn gam ban pak gǝr sheel ɓa wu pak mi ɓa, she Koǝl la na na yi." 3She Yeso kaɗan ɗina, " Langlang, mi shap puna, ɓomaan sǝn gamban kum ban nwang rangan la Koǝl la, she ana kǝr ɓil mayi." 4She Nikodimus maas Yeso yina, " Wokya na a kar ɓil ɓo gha ki yi gǝ'ǝs ma? Yi kar kad kona bum nggyi kasa ki a ɓili njiri ɓari?" 5Yeso kaɗan ɗina, "Langlang mi shappu na, ana sǝn ɓil ɓo kap ban yam na Wuus sa, yi sǝn gamban ko ɓaal ban nwang rangan la Koǝl la. 6Gǝrma ɓo ɓil ɓona, ama gǝr ma Wuus ɓil, Wuus na. 7Ɓi gin sheelu ɓa, nakunla shabam ɓu na, "she ana kar ɓilǝm wun kasa". 8Yuut ti yaar ki ka ban ma yi yad, wu wa'an ban yaar li, ama wo daal ban ma yi pur ra ɓa, wu sǝn daal ban ma yi kaa ɓa. Wana na ɓoma a ɓili a ɓaal Wuus." 9She Nikodimus kar maas Yeso, yina, wokya na wana ɓi pak ka?" 10She Yeso kaɗan ɗi na, " Wu ngal ɓoma shik ban na ma jiin a nzaal Israila, ama pyang na wana wu sǝn daal kun ɓa mi shap mi ɓara? 11Langlang, mi shappu na, gǝrma su daal yina su shappi wun, su kwat suki shap gǝrɓa su sǝn na mǝs su, ama pyang na wana wun ɓiin ma ban yaktak kun ma su shappi wun. 12Mi shab kun ɗiwun a mud gǝrɓa ɓaal munnza mi, ama wun sǝn yak tiˈe ɓa, wokya na wun yak tiˈe gha ma mina shaɓam kunɗi wun a mud gǝrɓa takkoǝl wu? 13Ɓomaan sǝn ki yab ka takkoǝl la, she Mun Ɓo la Bo nggalang ma pur takkoǝl. 14Woma Musa ya'at ywak ma lyang a ɓaal zum, wana kwad, she a na ya'at ma Mun Ɓo la Ɓo, 15nakunla pyang ɓoma yak tiˈe na yi, ɓi kum ban rǝk ɓǝs ma batbat. 16Koǝl kamam yad ma miin ɓi munnza shangmi, ma yi pa Mun Ɓo li ma yi ɗang na, nakunla pyang ɓoma yaˈam tiˈe na yi, ye ta gǝr nggur ra, ama yi kumun rǝk ɓǝs ma batbat. 17Koǝl sǝn tum na Mun Ɓo li a munnza ɓi kumban kas nzu ɓi munnza ɓa, ama she ɓi munnza kumban yakmud a kab bini. 18Pyang ɓoma na ya'am tiˈe na Mun Ɓo la Koǝl, ya kas nzu muɗi ɓa. Ama pyang ɓoma sǝn yaktiˈe na yi ɓa, a moor kasam nzu ɓi nama, nakunla yi sǝn yaktiˈe na lwak Munɓo ma yi ɗang na ma dik ɓa. 19Woma ban kas nzu ma nami, ban mwaas sa yu ma ɓaal munnza, ama ɓiɓo pa'am sham na ban toon a karkun ban mwaas sa, nakunla ɓiɓǝn gaan ɓalya. 20Ɓoma yi pak ndarak kun ye yad ban mwaas sa ɓa, ye wat ka ban ma mwaas sa ɓa, na kunla ɓe gin tum ɓǝsǝn kun ɓali ɓa. 21Ama ɓoma yi pak miin yi yu na ban mwaas sa, ɓi koyab ɓo sǝn ɓoɗan kun ɓali gha gǝligǝli, nakunla yi pak koman na nyap la Koǝl."
Gurma Yohana Ma Pak Baptisma Shap A Mud Yeso
22Takwad wana she Yeso na muntum ɓali yar ka kab nzaal Yahudiya. Yi ji gan na bana yiki pak baptisma ɓiɓo. 23Amǝs ma ki Yohana ɓi pak baptisma ɓiɓo i Ainon tu na Salim, nakunla ngal shiim nga bana. Ɓiɓo ki yu be pak baptisma ɓiya. 24A pak kun ma mimi kasa na a kaa gǝp Yohana a ɓaal nda ban gǝp ɓo. 25She muntum ɓal Yohana swaptak galak na ɓoma Yahuda maan, amud ban gus ma kyaras yid woma nzu shapka. 26She muntum ɓa la Yohana kaa bini ana, " Ɓaji, ɓoma wun yin na yi a kap dalan sal Urdun, ma wu na nggiɗu wu shab ɓoɗan kun a muɗi, yina maku yi pak baptisma, ɓǝlǝn ɓiɓo ka ki kaa bini." 27She Yohana kaɗan kuni yina, " Ɓoman sǝn gamban kum gǝrmaan ɗa, she ana paam ɓi a kap tak Koǝl. 28Wun na nggid wun, wun kaɗan na kun na nam na, " Ba mina Kristi ma ɓa, ama Koǝl tum nami ɓa ɗe'es njar ban yu li." 29A ban kud nggwam, maam ma, la bid ma na. Lak la ɓoma yak maam ma, ka ban kud nggwam ma, gǝrma ɓoma yak maam ma shappi na yi pak, ɓaali ɓiki pwalan yina wa'am ɓoma yak maam ma shaɓam kun. Mima wana kwad na ɓaal pwalan la ɓi wal. 30Reˈem na langlang ɓomi ɓi lin dum, mi, mi kad na tak.
Yi Ma Suˈul A Kap Tak Koǝl
31Yi ma pur tak koǝl yi taanɗi koyab ɓo. Ɓoma pur ɓaal munnza yi la munnza na, yi ki shap kun li wola ɓoɓa munnza na. Yi ma pur tak koǝl kwat, yi yaˈal la koyab ɓo pyang. 32Yi shapkun a mud gǝrma yi wak na mayi sǝn, pyang na wana, ɓomaan sǝn yaktak kun ɓa i shappa.
33Ama pyang ɓoma na ya'am tiˈe na kun li, kamam na, langlang Koǝl li shaɓan miin. 34Yi ma Koǝl tumi, kunla la Koǝl na yi shap, nakunla Koǝl paam Wuus li ɓi ma liri gha ɓa. 35Tad ma ɓi yaɗan Munɓo ma ma miin, yi ma'an koyap gǝr ɓi rǝk tak ɓu'e. 36Pyang ɓoma na lim dum na ban yak tiˈe na Munɓo ma, ye na ban wuus ma batbat. Ama pyang ɓoma ɓiin ma Munɓo ma, ye kumban rǝk ma ɓatbat ta, she ɓi ɓaas la Koǝl ɓi rǝˈǝn i muɗi."
Aktuálne označené:
Yohana 3: JGK
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©2023 Seed Company in collaboration with Language Developers and Bible Translators Association
