Luk 6
6
Rɛsɨn rɛbaŋa reyi Sabad
(Mt 12:1-8; Mk 2:23-28)
1Reyi Sabad dinɛ Jisɔs na banyɛgɛ mɔ bara baciŋɛ na bɔkana wid. Ba nyɛgɛ mɔ babɨnɛ kɔfa basɔbɔrɔ na ramɛgɛ badiŋɛ bomu. 2Bafarisi bajuju basɨna ya, “Bu na anu minsiŋɛ mbu Ibina iyua ikanɛ ya akasi reyi Sabad?”
3Jisɔs ɔfɛlɛ bɛ ramu ya, “Minkigijia mbu Debid na bani bamɔ basi ndi ŋbɔ minruma bɛ-ɛ?#1Sam 21:1-6 4Orua rika ɛtɔ Ɛbrɔkpabi, ɔbɛ ɔyɔ ŋɔ bawu ŋɔnɛ, odi, ɔjɛ mɨnɛ bani bamɔ. Ɛra Ibina iyua ya oni ojuju odiŋɛ ɔyɔ kaŋɔ ekicia bajɔmɔ-kɔya.” 5Mɨnɛ Jisɔs okurɛ ya, “Wɔ Oni ɔra Ɔkɔ-rokuku ŋɔ ɔfɔnɔ Sabad.”
Orumanɛ ŋɔ ɔba-kɔbɔ
(Mt 12:9-14; Mk 3:1-6)
6Na reyi Sabad rejuju Jisɔs orua rika ɔsam-rɔrɛ ɔkakpɛbɛ. Orumanɛ ɔrakafa ŋɔ ɔba-kɔbɔ koruma. 7Bakpɛbɛ Ibina bajuju na Bafarisi bajuju baduga ɛyɔ nji bakorigɛ Jisɔs ratanɛ ya okiyɛ osi, bababɛrɛ mɔ na jɛnɛ na jɛnɛ kɔfɛ ara kuɔgbana reyi Sabad. 8Nsu Jisɔs ɔgbɨri botima bɔbɛ mɨnɛ ɔkanɛ oni ŋɔ ɔba kɔbɔ ya, “Gbɛ bara mɨnɛ ŋuɛ nfa ɛyɛrɔsɔ, bani bafɛ wu.” Ɔgbɛ mɨnɛ ɔkabari ɛyɛrɔsɔ.
9Jisɔs ɔkanɛ bɛ yɛ ya, “Nsɨna nu: Ibina iyua ikanɛ yu ya resi nyan reyi Sabad? Kosi boyi din kosi bobi? Kɔnyaŋɛ rokpin oni din kokubɛ du?”
10Ɔrɔ bɛ fɛb ɔfɛrɛ ɔkanɛ oni ŋɔ ɔba-kɔbɔ ya, “Nabɛ kɔbɔ kɔyɛ.” Ɔnabɛ ku, mɨnɛ kɔbɔ kɔŋbɨnɛnɛ kɔbara cɛrɛrɛ. 11Nsu Bafarisi na bakpɛbɛ Ibina mbɛ botima bɔma bɛ babɨnɛ kokuri na bacɛmɛ mbu bakosi Jisɔs.
Jisɔs ɔra banyɛgɛ mɔ iti jubi na ifa
(Mt 10:1-4; Mk 3:13-19)
12Reyi dinɛ Jisɔs orua birebirɛ rokuku kɔrɔbi njɔm, mɨnɛ osu kaka jɔ ndɨm ɔrɔbɔ njɔm ɔjɛ Ɛbrɔkpabi. 13Ndi reyi rɛcɛ, ojia banyɛgɛ mɔ kwa cɛnɛ, ɔra iti jubi na ifa mbɛ ojia ya apɔsɨl. 14Ŋɔnɛ ɔra Saimɔn ŋɔ Jisɔs otu rirɨna Pita, na ɔma ɔmɔ Andru, mbɛka bara Jems na Jɔn, Filib na Batolomiu, 15Matiu na Tɔmɔs, na Jems ŋɔ wɔ Afeus. Bajuju bara Saimɔn ŋɔ bajia ya Silɔd, 16Judas wɔ Jems, na Judas Iskariɔd ŋɔ okwɛ Jisɔs.
17Ndi Jisɔs oriɛ ntunɛ rokuku na apɔsɨl mbɛ ɔra, ɔbara na kwa ncɛ kara kpɛtɛ. Ɛrɨm bani mbɛ basi irɛ sɛnsɛn nji Judia, na Jɛrusalɛm mɨnɛ na irɛ nji ira na kɔba manja manrɛnɛ rɔrɛ Tai na Sidɔn bara kafa; 18bawu kofugɛ mɔ mɨnɛ kɔgban bɛ ifiɛ. Mbɛ bɔkɔ-bobi bojuŋanɛ mɨnɛ bawu ɔgbana bɛ. 19Oni naŋɔnɛ ojuŋɛnɛ kɔkpɨm mɔ, ndi nsɨm ɔra ɔjaga mɔ na ɛkpaju ɔgbana bɛ fɛb.
Kɔrɔmetima na ɔsɛŋɛ
(Mt 5:1-12)
20Jisɔs ɔrɔ banyɛgɛ mɔ mɨnɛ ɔkanɛ bɛ ya,
“Reŋunɛ retumɛ na anu baram;
Rɔrɛ-rɛkɨm Ɛbrɔkpabi ronua!
21“Reŋunɛ retumɛ na anu mbɛ minra na ŋbɔ kunku;
anu kuminjɔɛ!
“Reŋunɛ retumɛ na anu mbɛ mimbiŋɛ rɔbɔ kunku;
anu kumimmamɛ rasa!
22“Reŋunɛ retumɛ na anu ara bani baban nu,
bakɨn nu, basɛgɛlɛ nu,
mɨnɛ batanɛ bobi babaŋa nu,
fɛb ndi minyɛgɛ Wɔ Oni!
23Kana nu ara bɔjagi mɨnɛ tuba nu na kɔrɔmetima, ndi kuminfɔnɔ ɔkɨmkɨm rɛyarɛ na rɔrɛ Ɛbrɔkpabi. Fɛŋɛ na kɛmanci britɛ babɛ basinkanɛ bakanɛ-rotuma Ɛbrɔkpabi.
24“Nsu rasinkanɛ rarakaka rafumanɛ nu mbɛ minfɔnɔ birɛ kunku;
ndi minfɔn rokpin dɛgɛrɛ!
25“Rasinkanɛ rarakaka rafumanɛ nu mbɛ minwu jɔɛ kunku;
ŋbɔ kuminruma nu!
“Rasinkanɛ rarakaka rafumanɛ nu mbɛ mimmamɛ rasa kunku;
kuminkuna mɨnɛ mimbi!
26“Rasinkanɛ rarakaka rafumanɛ nu mbɛ oni naŋɔnɛ ɔtanɛ boyi ɔbaŋa nu.
Nanyɛnɛ britɛ babɛ basi na bakanɛ-rotuma bawu.
27“Nsu nkanɛ nu mbɛ minfugɛ mi: Fɔnɔ nu rɔraganɛ na bani mbɛ minkpuga bɛ, si nu boyi jɛ bɛ. 28Ŋunɛ nu bani mbɛ batuŋɛ nu, mɨnɛ rɔbɔ nu njɔm jɛ oni naŋɔnɛ ŋɔ osinkanɛ nu. 29Ara oni ɔlɨbi wu na kocigi kunɛ, cimɛ nkuka mɨnɛ kɔgɛ mɔ ɔlɨba. Ara oni ɔna kɔkpa rofia kɔyɛ, jɛ mɔ nku rika mɨnɛ. 30Oni naŋɔnɛ ŋɔ ɔsɨna wu gba, jɛ mɔ, mɨnɛ ara oni ɔna wu gba, kasɨna mɔ ya ɔfɛlɛ wu. 31Si nu jɛ bani mbu minduga ya basi bajɛ nu.
32“Ara minfɔnɔ rɔraganɛ na bani mbɛ bafɔnɔ rɔraganɛ na anu abɛabɛ, Ɛbrɔkpabi kuɛka nu na kambu-ɛ? Tum basi bobi bafɔnɔ rɔraganɛ na bani mbɛ bafɔnɔ rɔraganɛ na abɛ. 33Mɨnɛ ara minsi boyi minjɛ bani mbɛ basi boyi bajɛ nu abɛabɛ, Ɛbrɔkpabi kuɛfɔnɔ kɔrɔmetima na anu na kambu-ɛ? Tum basi-bobi basiŋɛ kanya. 34Mɨnɛ ara mimfɔrɛ bani bagbuga mbɛ minrigɛ etima ya kubaŋbɨnɛnɛ bafɛlɛ nu, Ɛbrɔkpabi kuɛfɔnɔ kɔrɔmetima na anu na kambu-ɛ? Tum basi-bobi bafɔrɛ bacɛmɛ basi-bobi, kɔŋbɨnɛnɛ batama mbu abɛ bafɔrɛ. 35Nsu fɔnɔ nu rɔraganɛ na bani ɛban banua, mɨnɛ si nu boyi jɛ bɛ. Fɔrɛ bɛ mɨnɛ karigɛ nu botima ya baŋbɨnɛnɛ bafɛlɛ nu. Na kwa minkɔfɔn ɔkɨmkɨm nsɔl, mɨnɛ kumintumɛ bɔ Ɛbrɔkpabi nji eciacia. Ndi boyi bɔmɔ bɔyɔmɛ mɨnɛ bɔjɛ bani mbɛ gba bɔbɔ bojuga bɛ na kɛrɔ na bani bakpu. 36Fɔnɔ nu erun na ɔcɛmɛ oni kɛmanci Mintɛ onua ɔfɔnɔ erun na anu.
37Jisɔs ya: “Katiba bani, mɨnɛ Ɛbrɔkpabi etiba nu; kabara nu gaŋ na bani, mɨnɛ Ɛbrɔkpabi ɛbara gaŋ na anu; gbɛ nu sugɛ bani mbɛ basi nu bobi, mɨnɛ Ɛbrɔkpabi kuɛgbɛ esugɛ nu na bobi bonua. 38Ara minjɛ ɔcɛmɛ oni, Ɛbrɔkpabi kuɛjɛ nu, kumintama rɛjɛ ndi recia ndi minjɛ, banyakanɛ di kwacɛnɛ, bagbuga, mɨnɛ rɛbɨnɛ kɔgbari nu na bɛya. Kɛmanci asi ajɛ ɔcɛmɛ oni na kɛmanci bakosi bajɛ nu.
39Mɨnɛ Jisɔs otuba rɛkana ndi ɔjɛ bɛ: “Ɔjaga-jɛnɛ ɔyɛŋɛ kɔkɔgɛ ɔcɛmɛ ɔjaga-jɛnɛ ɛyɔ; ara oyumɛ abɛ iti ifa kubatɔ rika rebira. 40Oni ŋɔ ɔkpɛbɛnɛ gba ɔyɛŋɛ kɔgbɨri ocia oni ŋɔ ɔkpɛbɛ mɔ, nsu ara ɔkpɛbɛnɛ sɛn kuotumɛ aya oni ŋɔ ɔkpɛbɛ mɔ.
41“Bu na miŋarɛ minrɔŋɛ egbigbɨra ifɔl nji ira na jɛnɛ ɔma onua, nsu minrigɛ itɨm na kɛkpɨn ifɔl nci kɛra na jɛnɛ ranua? 42Akosi nyan akanɛ ɔma ɔyɛ ya, botutu, ɔma, yɔgɛ mi nsɛ wu ifɔl kanji na jɛnɛ rayɛ, ‘Nka akiyɛ afɛ kɛkpɨn ifɔl nci kɛra wu na jɛnɛ? Anu bani banaŋ! Bɛrɔsɔ sɛ kɛkpɨn ifɔl nci kɛra wu na jɛnɛ, nabɔ ayɛ afɛ ɛyɔ oyiyi asɛ egbigbɨra ifɔl nji ira na jɛnɛ ɔma ɔyɛ.
Keti na raŋuga ramɔ
(Mt 7:16-20; 12:33-35)
43“Brika keti kɛyɛŋɛ koŋugi reduna rebi, mɨnɛ kekukubi keti kɛyɛŋɛ koŋugi brika reduna. 44Bacɛŋɛ keti nancinɛ na reduna ndi keŋuga; afaŋɛ raduna fig #6:44 Fig Fig na greb Fig na greb bɛra bɛlɨŋa beti bɛfa mbi babaŋɛ mbari Isɨrɛl. Badiŋɛ raduna rabɛ odiŋɛna rɛtɨna greb na rɛtɨna isokud-kɛtɨma. 45Brika bani basiŋɛ boyi ndi boyi bɔra bɛ na botima; nsu bani babi basiŋɛ bobi ndi bobi bu bɔra bɛ na botima. Kama katanɛ mbu bɔrawu na etima.
Bani iti ifa mbɛ bariŋɛ bɔtɔ
(Mt 7:24-27)
46“Bu na minjiŋɛ mi ya, ‘Ɔkɔ-Rokuku, Ɔkɔ-Rokuku,’ nsu minsiŋɛ mbu nkanɛ nu mɔ minsi? 47Oni naŋɔnɛ ŋɔ owu ɔnyɛgɛ mi, oyumɛ ratu na ramu ramia mɨnɛ osi mbu nkanɛ, kunkɔgɛ nu kɛmanci ɛdɔ oni kaŋɔ ɔra. 48Ɔra aya oni ŋɔ okori ɛtɔ, ŋɔ ɔtɔ rɔcɛ rɔdɨmɛ nansɛrɛ bokpuŋ bɔkɔbari bɔtɨranɛ. Ara manja manɔ mantɨnɛ bokpuŋ, tumgba bɔnyɨŋanɛ ji ndi oriji oyiyi na itakpa. 49Nsu oni naŋɔnɛ ŋɔ ofugɛ ramu ramia mɨnɛ okiyɔgɛ dɛ ɔra aya oni ŋɔ ori ɛtɔ ɛmɔ okitɔ rɔcɛ rɔdɨmɛ; ara manja manɔ, mani mantɨnɛ emugɛ sagasaga!”
Aktuálne označené:
Luk 6: Olulumo-Ikom
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2022 Luke Initiative for Scripture Translation
