Luk 8
8
Otse kwɔ Ɔnang kwɔ nɔ Ɔnyan Atsifog
1Si idɨg nda ki isenga, Jisɔs ubɨna ɔta ifon va ɔttara ki ifon ri ididen ono teg anang ɛkkawa zuwa tsɛ Ɛvaar tsu Ubɨnɔkpaabyi. Abuwinnam mbo zowaffa aba twan abɛ, 2ɔttara ku upanɨng ban pɛ ka abɛ okwenga ka akpakpa pyuwa ɔttara kɨ mmada: Meri (kwa aba jer Magdalin) kwo oreng-ɛ akpakpa pyuwa asenaffa. 3Johana, ukwa kwu Kuza ɔnang kwo ono ker ekpo pyɛ Hɛrɔd, Suzana ɔttara mboga pa asawɔsaw. Uppanɨng mboma aba na tɨma akpog pa abɛma oyen aba ke Jisɔs ɔttara abuwinnam pɛ ɔbɔg.
4Sɔ ɔsaw kɔ ɔgba ɔttara ka anang pa bɨn ki ifon ki ifon aba kwu kwa ase Jisɔs, ɛma ɔtta bɛ otse abɛ: 5“Ɔnang kwu unu si umɨn tɔm ubɨna abɛ ɔtɔ ɔnyan atsifog. Sɨnɔ ɔnyan pyɛ, byan eto ke eden, anang abar byan ku nfog ɔnɔn udwunga utsi, 6byan eto ka atakpa, apyɛ ittitso abɛ emen, apyɛ eppe masɛ idɨridi inide, 7byan eto ka arre, arre mbyo ɛtwan apyupyɛ emen, arre ibuwa pyɛ. 8Byan eto ki iseg ri izuwuzuw, apyɛ emen, apyɛ ɛwɔm nden araw asen ɛyonga otse kwa aba akpon.”
So otse ngwo kɔ ɔra, Jisɔs ɔtɔnga kɛ ɛrang abɛ, “Ɔnang kwɔ ɔkam itɔng abɛ ɔwanga udɨg, ɔwanga.”
9Abuwinnam pa Jisɔs aba bɔw-ɛ ntsɨma ro otse ngwo. 10Oben bɛ abɛ, “Abangama abɛ ka banga ɛwang ananga abɛ abanga asonga idɨg ra aba duwuduw kɛ Ɛvaar tsu Ubɨnɔkpaabyi, ayog mboga mɨn ntta bɛ atse fasɛ,
“ ‘aba akwɔna akker aba iyan masɛ;
abɛ akwɔna awanga abɛ mo ogwonga.’
11“Ker ntsɨma ro otse ngwo. Itsifog nzo ede ɔtɔnga kwu Ubɨnɔkpaabyi. 12Mbyo pyɛ eto ke eden, ede anang pa awang ɔtɔnga ngwo, ɔvaar kwa akpakpa pyiwa oreng bɛ ɔtɔnga kɨ nttem fasɛ aba anang atser attara aba annanga. 13Mbyo pyɛ etto ka atakpa, ede anang mbo pa awang ɔtɔnga ngwo ɔttara ko ottem lew, akwɛ aranga nɔ akama, ko okpe kɨma nwa kwe eyoma ikwu, aba ato innam-innam. 14Atsifog mbyo pye eto ka arre, ede masɛ anang mbo pa awang ɔtɔnga ngwo, idɨg rɛ ni ifur bɛ, otse kwa abɛma akama akpog ɔttara aba tsi akpen, issi bɛ adwug pyɛ abɛ ɛnanɛ ɛttama. 15Atsifog mbyo pye eto ki iseg zuwa, ede anang pa atag ɔtɔnga ngwo ke ettem zuwa ɔttara ke ettem ɔkkatsɛ, aba adɨr ettem aba awɔm adwug.
Ekpon tsɛ Ɛnan kɔ ɔttɔg
16“Ɔnang kode kwɔnɔ oyen otewikang ɔtaga efege ubuwa, pɛrɛ ɔtaga otsog ki iwakpa iseg-iseg. Nɔ nan wɛ kɔ ɔttɔg kɛ ɛrang fasɛ anang pana anwa kɔ ɔtsɔm aba ase iyan. 17Ukwurabɛ ɔttɔg kode fabɛ aduwuduw fɔ ɔnamɔjag ɔttara ɔttɔg kode fa abɛ abuwubuwa fa abɛ anama agwonga. 18Addo akɔm, otsekwɛ abanga na awanga. Ayog pa akam ɔttɔg abɛ nattar bɛ ɔttara, anang pa nana akama, mbyo pya aba atan abɛ pya abɛ byɔ, abɛ na atag bɛ pyɛ ɔtaga.”
Ɔkka ɔttara ku Uvɔkka pɛ Jisɔs
19Ɔkka ɔttara uvɔkka aba kwu fasɛ aba ase Jisɔs, abɛ funa akka for-ɛ ukwur ɔsaw. 20Ɔnang wan oteg-ɛ abɛ, “Akka ɔttara uvakka aba be gi iyan fasɛ aba asɔ.”
21Jisɔs ɔpɔn-ɛ abɛ, “Ɔkka kwam ɔttara uvɔkka pam ade anang pana wanga ɔtɔnga kwu Ubɨnɔkpaabyi aba assi kwɛ.”
Jisɔs ussi ibum idɨr
22Igwu zan Jisɔs oben abuwinnam pɛ abɛ, “Abɨna amana anzega oppekpa ukuw.” Aba bɨna aba ayɨga kɔ ɔkpar aba apfona. 23Sa aba na ayar ɔkpar ngwo Jisɔs ɔttawa, ibum si ididen ittitso iguma ma ko oppekpa nwo, ɔkpar uttitso ugwo assi, aba kwa anɨnga ko ozora fi ititam.
24Abuwinnam abɨna ata shɔw-ɛ, aba ben-ɛ abɛ, “Ɔvaar, Ɔvaar, annama aruw-o.”
Ɛma ubɨna oben ibum nzo ɔttara ko obogidi dɨm abɛ apyɛ idɨr, ibum ɔttara obogidi mbyo idɨr zɨm. 25“Etsera tsa abanga mo?” Ɔbɔw bɛ.
Ko ozora ɔttara ko otse kwo okkon bɛ, aba bɔw ayog abɛ, “Bag ɔnang wɔma kwo oben ibum ɔttara ko obogidi abɛ idɨr, apyɛ etsera idɨr?”
Jisɔs ogweng ɔnang kwɔ ɔkam akpakpa pyuwa
26Aba yar ma ko oppekpa nwo aba apfona ko ofon kwa Garɛsa sa aba abɨn ga Galili. 27Si Jisɔs ɔrag, ɔnang kwu ubɨn mo ofon ngwo kwa akpakpa pyuwa ana yag-ɛ idɨg ubɨna okwo kew-ɛ. Eden ki iwura so ɔnang nwo ono senga irɨnkɨm ɔttara kɔ ɔtsɔm ku yum, unu rɨg kɨ mppekwur. 28Okpe kwo ose Jisɔs, ɔgama kɛ ɛrang oto ma kɛ ɛkwɔ tsɛ Jisɔs, ogwon kɛ ɛrang abɛ, “Bag ɔttɔg vɔ fa ana aben abe assi-m Jisɔs, Unwa kwu Ubɨnɔkpaabyi Ɛma kwo ogor kidam? Nɨntsɨn-ɔ nang mɔ ɔttɔg assi.” 29Ukwurabɛ Jisɔs ka akpakpa pyuwa nbyo obena abɛ itte ɔnang nwo ɔbɔg. Ko okpe sawada, ɔkpakpa pyuwa ngwo wɔ nu utɨm-ɛ, ɔkwɔna abɛ akpag-ɛ ayagba kɨ mbɔg ɔttara kɨ mfog, usse-ɛ ɔkpara pyɛ, ɔtag-ɛ opfona ki iwang ra anang anade.
30Jisɔs ɔbɔw-ɛ abɛ, “Akpen aban?”
“Ɔsaw,” ɛma ɔpɔn-ɛ, ukwurabe akpakpa pyuwa pyɛ sawɔsaw kɛ ɛnwa. 31Abɛma tsɨn-ɛ abɛ ɔnang bɛ ɔtɔm aba pfona ga ke eppe sɛnɛ itɨma ɛkam.
32Akkomba sawada ini tsi ekpo ko okpetso kwɔ ɔbang muma. Akpakpa pyuwa mbyo itsɨn Jisɔs abɛ otte bɛ ɔbɔg aba ta nwa akkomba mbyo. Jisɔs otte pyɛ ɔbɔg. 33Akpakpa pyuwa mbyo iyɨn ɨrɨg udwunɨng nwo ɛtɛ nwa akkomba mbyo, akkomba mbyo ɛraga akorokoro kwo okpetso nwo ɛtɛ tto ko oppekpa apyɛ idɨm.
34Okpe kwa anang pana akker akkomba mbyo ase udɨg kwa kwɛ kuyɨna, aba ta teg go ofon ɔttara ki ifon ri ibang bɛ. 35Anang pi ifon ndo aba bɨna ata se udɨg kwɛ kuyɨna, okpe kwa aba atta wem ga Jisɔs, aba se udwunɨng nwo kwa akpakpa pyuwa kɛ mbɔg itta, unɨng ɛyar ga ɔbanga nfogkpatwag rɛ Jisɔs, ke ekpo uka ɔttara etso kɛ idɨra, abɛma ozor bɛ. 36Anang mbo pa ase udɨg kwu uyin, aba ateg ayog otse kwɔ ɔnang kwa akpakpa pyuwa ɛnwɛ ogweng. 37Anang mbo ibɨng pi ikpa rɨ Garɛsa aba tsɨn Jisɔs abɛ ubɨna urɨg ifon ra abɛ ukwurabɛ ozora ka abɛ ussa. Masɛ ode otsengwo, Jisɔs uyɨga kɔ ɔkpar opfona.
38Ɔnang nwo kwa akpakpa pyuwa kayɨna arɨg-ɛ utsɨn Jisɔs abɛ ɔtwan abɛ, Jisɔs ɔtɔm-ɛ opfona, oben-ɛ abɛ, 39“Manga innam tor anang pɔ attara teg bɛ otse kwu Ubɨnɔkpaabyi kussa ɔnang-ɔ.” Ɔnang nwo ɔmanga oto teg anang po ofon ngwo ibɨng otse kwɛ Jisɔs kussa ɔnang-ɛ.
Jisɔs ɔshɔw unwa kwanɨng ko obo ɔttara ogweng ukwanɨng wan
40Sɛ Jisɔs ɔmang, anang pa sawɔsaw aba alow-ɛ, ukwurabɛ abɛma ibɨng ana anɨnga atɨg-ɛ. 41Udwunɨng wan kwo okpen Jarus, otsonang kwɔ ɔdappa kwa abɛ, ukwu oto kɨ nfokpatwag rɛ Jisɔs, utsɨn-ɛ abɛ ɔta gɔ ɔtsɔm kwɛ, 42ukwurabɛ unwa kwanɨng kwɔ ɔkam mɨntsen, kwɛ ko owema itso zowaffa ono ben abɛ oppe. Sɛ Jisɔs ono pfona, ɔsaw mvo unɨn-ɛ ki iwang ki iwang. 43Ukwanɨng wan unɨng muma kwi isɛ kɛ iyɨna ki itso zowaffa ɔnang kwɛmu ussi-ɛ ogweng kode. 44Ukwanɨng nwo ubɨna gi innam ɔdan-ɛ ka ammakpa pɔ ɔnɔma, muma zizan isɛ ndo ikpara.
45“Anɛwɔ ɔlag-m?” Jisɔs ɔbɔw.
Sa abɛma ibɨng kakona, Pitɛ oben-ɛ abɛ, “Ɔvaar, anang ana abuw-ɔ attara anɨn-ɔ.”
46Jisɔs abɛ, “Ɔnang kam ɔlaga, ɛffa tsam ki iyɨna.”
47Ukwanɨng nwo, so song abɛ Jisɔs ko osonga, ukwu ɔffan-ɔffan ukpuga ndwudwɨng ɔnang Jisɔs. Ma ki ititiga sɔ ɔnang kwidede oteg-ɛ udɨg kwu ussi pɛrɛ ɔlag-ɛ ɔttara otse kwɛ ogweng muma zizan. 48Jisɔs oben-ɛ abɛ, “Unwa, etsera tsɔ kɔ issa agweng. Sɔng pfona ki idɨra.”
49Sɛ Jisɔs ɔnɔ tɔnga ma, ɔnang ubɨna ga kɔ ɔtsɔm kwo otsonang kwɔ ɔdappa kwa abɛ, oben abɛ, “Unwa kwanɨng nwo kuppa, dag okpewnnwɛr udɨg kayag adɛgɛ.”
50Sɛ Jisɔs ɔwang otse ngwo, oben Jarus abɛ, “Ɔnang-ɔ ozor, akama etsera no ogweng-ogweng.”
51Okpe kwɛ Jisɔs oto wem gɔ ɔtsɔm kwɛ Jarus, notsera ɔnang ɔdwag ɔnwa mɔ ɔtsɔm ngwo abubɛ ɔnano oyonga Pitɛ, Jɔn ɔttara Jems ɔttara ko otte ɔttara kɔ ɔkka. 52Anang mbo ibɨng agama attara anɨnga idwadwa. Jisɔs oben bɛ abɛ, “Adag ka gama, funuppa, ɔttaw ɔda.”
53Aba ma-ɛ ara masɛ aba song abɛ kuppa. 54Ɛma ɔvag-ɛ kɔ ɔbɔg, oben-ɛ abɛ, “Unwa kwam bɨna abe.” 55Ɔkpakpa kwu unwa nwo ɔmanga, ubɨna obe. Jisɔs oben bɛ abɛ aba nang-ɛ utsatɔg utsi. 56Otte ɔttara kɔ ɔkka okkon bɛ. Jisɔs oben bɛ abɛ, aba nang ɔnang ateg udɨg kwu uyɨn.
Aktuálne označené:
Luk 8: mfn
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2022 Luke Initiative for Scripture Translation
