Luk 1
1
Itsotta
1Masɛ anang pa sawɔsaw abɛ ka ayɔra akkɛr idɨg nda ri iyɨn inang mana, 2aba kɛr pyɛ otse kwa anang pa ase ka atsen ateg bɛ aba attara asenga ateg anang. 3Masɛ ki idɨg ndo ibɨng nkkera ɔdamɔdam otse kwa arɛ ittitso, kɨmbena mbɛ amma oyen mgba nkkɛr ri itor-otor nnang-ɔ, ɔma Tiyofilɔs#1:3Tiyofilɔs: Anang aba atan abɛ Tiyofilɔs ode ɔnang tama kwɨ Rom kwo oror abɛ osonga otse kwɛ mɔ ɔtwan Jisɔs abɛ. Etse tse iyɨn abɛ, “Ɔnang kwu ɔdag-ɛ Ubɨnɔkpaabyi.” kwi ikpɨkpowa iban-ɔ. 4Fasɛ asonga udɨg ɔkka ku udɨg kwidede kwa abɛ ka akpewa.
Otegekkawa kwu Ubɨnɔkpaabyi OtegOtse kwa Abɛ ma Maan Jɔn Opyeng-Assi
5Okpe kwɛ Hɛrɔd ode ɔvaar kwu Judiya, ɔkam ɔffɔnɛzza kwo okpen Zakariya, ɔyaw ki ikaana ra Abija#1:5Abija: Okpe kwu Devid ode ɔvaar, affɔnɛzza ɛraw ukkuma anebɨng byɔ ene tseden, abɛma ibɨng ibɨn ku uva affa pɛ Erɔn. Ko okpe kwɨ nttɔna ɔwarɛ, affɔnɛzza aba sawɔsaw, aba kew bɛ kɔ ɔkana ɛraw ukkuma anebɨng pyɛ aba akpe ntse ndo dan ra affɔnɛzza mbyo ɛraw ukkuma enebɨng pye etseden. Ikana ndo dan ekpen Abija. Jer nnwer kwu 1 Krɔnikɨl 24:1–20, ukwa kwɛ, Elizabɛt, ubɨn ke effona tsɛ Ɛrɔn. 6Abɛma anang affa ade anang pa awuruwur ki ititiga tsu Ubɨnɔkpaabyi ɔttara abɛ na tsog nnyɨna ɔttara aba assi ibɨng otse kwɔ Ɔvaar oben abɛ aba assi. 7Abɛ uva na akama ukwurabɛ Elizabɛt ode uzidɨm ɔttara abɛ katama.
8Okpe kwɛ ikana rɛ Zakariya inɨng kɔ ɔtɔm, ɛma nussi ɔtɔm pfɛ masɛ ɔffɔnɛzza ɔnang Ubɨnɔkpaabyi. 9Abɛ affo ɔssɛ otse kwɛ ɛmmana tsa affɔnɛzza, ɔssɛ nwo uttɛ ɛma abɛ ɛma ɔta tɔ ɔkkam ekpo pyɛ elew irɨg gɔ ɔtsɔm kwa atɨm kwu Ubɨnɔkpaabyi. 10Sɛ ɔnɔ ɔkkam ekpo mbyo pye elew irɨg, anang pa asawɔsaw anɨng ga ki iyan abɛna zɔm atɨm.
11Ɔtɔmɔtɔm kwu Ubɨnɔkpaabyi kwu ubɨn ga kɛ ɛrang ukwu uyɨn obe ku udɨm bɔg kwɔ ɔwang kwɔ ɔnɔ ɔkkam ekpo mbyo kɔ ɔwang kwa abɛ na fɔn ɛzza. 12Okpe kwu Zakariya usɛ-ɛ, unɨn ɔttara ozora ussɛ-ɛ. 13Ɔtɔmɔtɔm kwu Ubɨnɔkpaabyi nwo oben-ɛ abɛ, “Ozora ɔnang-ɔ ussi, Zakariya, Ubɨnɔkpaabyi ka atɨm pɔ ɔwanga. Ukwa kwɔ, Elizabɛt nutum ifar ru unwa dwunɨng, ma kpɛ etse bɛ Jɔn. 14Ma akama ottem-lew ɔttara anang pa asawɔsaw na low ko okpe kwa abɛ ma maan-ɛ. 15Jɔn no ode ɔnang kwi ididen ki itɨtɨga tsu Ɔvaar. Atwug#1:15Atwug: Anang pi Izɨrɛl aba na atɨma assi pa atsidwug aba assi assi pa lewolew. Odesɛ abɛ ka anɨnga ko okpe kɨma nwa aba awag atwug pa kpɔgɔkpog. mo gwo, atwug pa kpɔg-kpɔg mo gwo, ɔkpakpa kwu Ubɨnɔkpaabyi nu nɨnga abɛ pɛrɛ aba maan-ɛ. 16Nu ussi anang pi Izɨrɛl pa asawɔsaw aba manga ator Ɔvaar Ubɨnɔkpaabyi kwa abɛ. 17Nu utɨm eden pɛrɛ Ɔvaar, kɔ ɔkpakpa ɔttara kɛ ɛffa otsekwɛ Ɛlaija ɔkam,#1:17Ɛlaija: Ɛlaija ode otegɛkkawa kwɔ ɔtɔng idɨg ru Ubɨnɔkpaabyi ɔttara ussi ikkikkona dɨg. Urɨg itso ɛnɔna ukkuma araw tsi pɛrɛ aba maan Jisɔs. Otegɛkkawa kwo okpen Malakai oben abɛ ɔnang masɛ Ɛlaija nukwu pɛrɛ Krais ukwu. Jer nnwer kwu Malakai 4:5–6. nɔ ɔtag abɛ otte ɔttara ku uva otsog ɔwang gwan, ussi emen, nɔ ɔwag anang pa afum ɔtɔnga kwu Ubɨnɔkpaabyi aba akama esonga masɛ anang pa ana assi idɨg ri itorotor; no oddo anang otsog utɨg ikwada tsɔ Ɔvaar.”
18Zakariya oben ɔtɔmɔtɔm kwu Ubɨnɔkpaabyi nwo kwu ubɨn kɛ ɛrang abɛ, “Mɨnssi yan pɛrɛ nsonga ngwa? Ukwurabɛ amma kɨntama, ukwa kwam kɔtama.”
19Ɔtɔmɔtɔm kwu Ubɨnɔkpaabyi ɔpɔn-ɛ abɛ, “Amma wɔ nde Gebɨrɛl, amma wɔ nɨmbe ki inɨnga tsu Ubɨnɔkpaabyi. Ɛma wɔ ɔtɔm-m abɛ ntɔnga abɔ ɔttara nnang-ɔ ɛkkawa zuwa nza. 20Na kpa ɛmma tarr owen ki igwu tsa abɛma amaan unwa nwo masɛ akkar-m ɛmma kɔ ɔtɔnga kwam kwa akwɛ mu uyin odesɛ okpe ko obenga.”
21Ko okpe ngwo, anang na tɨg Zakariya, akwɛ okkon bɛ abɛ bugudɨg gwɔ akwɛ ussi kwu Zakariya unu lɨg okpe ga kɔ ɔtsɔm kwa atɨm. 22Okpe kwu uyɨn ki iyan ɔtɔnga nukka ɔtɔnga anang abɛ. Akwɛ ogwong bɛ abɛ Ubɨnɔkpaabyi kɛ udɨg ɔkɔga ga kɔ ɔtsɔm kwa atɨm ɛtanga, masɛ nu utɨma ɔbɔg ɔnɔ ɔtɔnga masɛ ɔtɔnga ɔna nu yina.
23Okpe kwɛ ngwu rɛ kɨmgba rɛ ussi ɔtɔm ma kɔ ɔtsɔm kwa atɨm, ɔmanga opfona ga kɔ ɔtsɔm kwɛ. 24Si ngwu ndo kɨnsenga, ukwa kwɛ, Elizabɛt, ukwu utɨma ifar, ki iyan nu yɨna ka afe asen. 25Ɛma oben, “Ubɨnɔkpaabyi kam-ɔ kana, kɨ nkpar rɨ nnu unwa nɨmmana ɔtaga.”
Ɔtɔmɔtɔm kwu Ubɨnɔkpaabyi OtegOtse kwa Abɛ ma Maan Jisɔs
26Ko ofe kwo otong asazɨn kwe Elizabɛt utum ifar, Ubɨnɔkpaabyi ɔtɔm ɔtɔmɔtɔm kwɛ, Gebɨrɛl, ɔta Nazarɛt#1:26Nazarɛt: Nazarɛt ode ammal araw attan (60) sa abɨn ga Jɛrusɛlɛm. Unɨng ɛrang ɛrang kwɨ Jɛrusɛlɛm. kwu unɨng ga Galili. 27Opfona ku umuna nwa kwo okpen Meri, umuna kwu Josɛf kwu ubɨn ke effona tsɨ Devid. 28Ɔtɔmɔtɔm ukwu oben abɛ, “Kɔ nsɨma, ɔma kwa abɛ ki izuwa tsi ididen assa ɔnang-ɔ, Ɔvaar unɨng abɔ.” 29Meri ufur-ɛ ukwur isɨma tse sɔ ɔtɔmɔtɔm usɨm-ɛ, akwɛ ɔttara ɔyag-ɛ udɨg otse kwɔ isɨma nza atsɛ iyɨn. 30Ɔtɔmɔtɔm kwu Ubɨnɔkpaabyi nwo oben-ɛ abɛ, “Ɔnang-ɔ ozor Meri, Ubɨnɔkpaabyi ki izuwa ussa ɔnang-ɔ. 31Ɔma natɨm ifar amaan unwa ajer-ɛ Jisɔs. 32Nu yɨn etse, abɛ na jer-ɛ unwa kwɛ Ɛma kwo ogor kidam. Ɔvaar Ubɨnɔkpaabyi mɔ ɔnang-ɛ ɛvaar-tsi tso otte, Devid. 33Ɔttara no ode ɔvaar tse effona tsɨ Jekɔb#1:33Jekɔb: Jekɔb ode unwa ɔtam kwe Ebraham. Ubɨnɔkpaabyi wɔ ɔnang Jekɔb etse tso kpen “Izɨrɛl.” Effona tsi Jekɔb atsɛma zɔ ede anang pi Izɨrɛl tar ippe-imaan-itor, ɛvaar tsɛ mɛra.”
34Meri ɔbɔw ɔtɔmɔtɔm kwu Ubɨnɔkpaabyi nwo abɛ, “Akwɛ musi yan pɛrɛ akwɛ uyɨn sa amma nnɔ owang kwu udwunɨng nnɨtɨg nsonga?”
35Ɔtɔmɔtɔm kwu Ubɨnɔkpaabyi opɔn-ɛ abɛ, “Ɔkpakpa kwu Ubɨnɔkpaabyi mu ukwu ɔnan-ɔ, nsam rɛ Ɛma kwo ogor kidam mi ibuw-ɔ. Unwa nwo kwu uwuruwur abɛ na jer-ɛ Unwa kwu Ubɨnɔkpaabyi. 36Ker, unwɔkka kwɔ, Elizabɛt, ki ifar utɨma ru unwa dwunɨng ka atam mbo, ɛma kwa aba ben abɛ ode uzidɨm, mama wɔ ode afe asazɨn kwu utɨm ifar. 37Ɔttɔg kode fu Ubɨnɔkpaabyi ɔnamoke ussi.”
38Meri oben-ɛ abɛ, “Amma otserɔtɔm kwɔ Ɔvaar wɔ, akwɛ ode otse kwa aben.” Ɔtɔmɔtɔm kwu Ubɨnɔkpaabyi nwo ubɨna urɨg-ɛ.
Meri Uduw Elizabɛt
39Kɨ ngwu ndo, Meri udwuga pfona ga ko okpetso fon kwu Judiya, 40oto owem ko oter kwu Zakariya, usɨma Elizabɛt. 41Masɛ Elizabɛt ɔwang isɨma tsɨ Meri, unwa ubɨn-ɛ ga kɛ ɛfar ɛtanga, Ɔkpakpa kwu Ubɨnɔkpaabyi uye Elizabɛt. 42Ɔtɔnga kɛ ɛrang ɔnang Meri, “Ɛllɛ ede tsɔ ɛyɔnga ukwanɨng kwidede ɔttara ku unwa kwa ma amaan. 43Bugudɨg gwɔ kwi ikpɨkpowa nda kwɔ ɔkka kwɔ Ɔvaar ukwu ka kam? 44Ukwurabɛ okpe kwu nwang isɨma tsɔ, unwa ubɨn-m ga kɛ ɛfar. 45Ɛllɛ etor-ɔ kwa tser ɔtɔnga kwɔ Ɔvaar abɛ akwɛ mɔ uyɨn ɔnang-ɔ.”
Ɛmang tsɨ Meri
46Meri oben abɛ:
“Ettem tsam etsona Ɔvaar,
47Ɔkpakpa kwam no low ku Ubɨnɔkpaabyi Ɔkkana kwam,
48Ki itsen otsoga
ko otserɔtɔm kwɛ kwɔ ɔrag ɛma oyen.
Otto mazɨzan anang ibɨng ma jer-m kam muzuwa.
49Ukwurabɛ Ubɨnɔkpaabyi kwɔ ɔkam nsam kidam ki idɨg ri ibar-ɔbar ussa ɔnang-m,
etse tsɛ iwuruwur.
50Ikwosisi rɛ ini nɨnga ibanga ka anang pa kpow-ɛ,
ko okpe kwidede.
51Ki idɨg ri ididen ussa kɔ ɔbɔg kwɛ;
ɔtsara anang pana adɨra abɛma oyen kɨ nttem ra abɛ.
52Ka avaar ɔranga kɨ nvaar-tsi ra abɛ otsog ki iseg,
udɨra anang pa arag abɛma oyen otsog kɛ ɛrang.
53Ɔnang akpukpora ekpo ɔkkapyɛ tar ɛgba bɛ,
ukuw avaar aba pfona mbɔg-mbɔg.
54Ko otserɔtɔm kwɛ Izɨrɛl ɔkkana,
nu uzɨma ikwosisi rɛ.
55Otse kwɔ ɔttɔn aba adere abɛ,
Ebraham#1:55Ebraham: Ebraham ɛma wɔ ode otte kwa anang pi Izɨrɛl. Anang pi Izɨrɛl ibɨng aba bɨn ka kɛ. ɔttara ku uva, tar ippe-imaan-itor.”
56Meri unɨnga Elizabɛt abɛ kɔ ɔttɔg pfa afe atan pɛrɛ ɔmanga ɔwana ko oter.
Ɔmaan Pfɛ Jɔn Opyeng-Assi
57Okpe kwe Elizabɛt mɔ ɔmaan unwa ukwu kwo owem, ɔmaan unwa dwunɨng. 58Ayog-rɨg-banga ɔttara ka anang pɛ aba awanga abɛ Ɔvaar kɛ ikwosisi ri ididen ɔkɔga, aba alow abubɛ.
59Su unwa nwo owen ngwu ɔsɔttan aba akwu abɛ aba akpara ɛkpatwar#1:59Akpara ɛkpatwar: Kpara ɛkpatwar otse kwɔ ɔmmana dɨg kwa anang pi Izɨrɛl, abɛ na kpara uva dwunɨng ɛkpatwar so tɔng ngwu ɔsɔttan ra abɛ amaan-ɛ, otse kwu Ubɨnɔkpaabyi oben bɛ abɛ assi. Ubɨnɔkpaabyi ke Ebraham obena abɛ muma wo ode ɔttɔg fɔ mɔ ɔkɔga abɛ ɔnang nwo ubɨn Izɨrɛl. (Itsotta 17:9–14). Jer nnwɛr kwɨ Levitikɔs 12:3, abɛ aben abɛ aba akpe-ɛ Zakariya etse tso otte. 60Ɔkka abɛ, “Mma, mo okpena Jɔn.”
61Abɛ aben-ɛ, “Ɔnang kwa abanga kode kwo okpen etse nzo.#1:61 Ɔmmana dɨg ode abɛ aba na kpe unwa etse tsɔ ɔnang kwa abɛ, ɔkpanɔkpana etse tso otte.”
62Aba atɨma mbɔg abɔw otte etse tso oror abɛ aba ajer unwa nwo. 63Zakariya utɨma mbɔg ɔbɔw bɛ ɔttɔg pfɛ mu utɨma ɔkkɛr tsɛ. Ɔkkɛr abɛ, “Okpen Jɔn.” Akwɛ okkona ɔnang kwidede. 64Mazizan, ɛmma egwonga, utitso ɔtɔnga ɔtɔnga, no otsona Ubɨnɔkpaabyi. 65Ozora ussi ayog-rɨg-banga ibɨng. Idɨg ndo ibɨng imaan ko okpetso fon kwɛ Judiya, anang mbo ibɨng aba na tɔnga abanga idɨg ndo. 66Ɔnang kwidede kwɔ ɔwang ɔtan ga ke ettem, ɔbɔw abɛ, “Bɔg ɔnang wɔ kwu unwa nwa mo ode?” Ukwurabɛ ɔbɔg kwɔ Ɔvaar unɨnga abɛ.
Ɛmang tsa Zakariya
67Ɔkpakpa kwu Ubɨnɔkpaabyi uyɛ otte, Zakariya, utitso oteg ɛkkawa tsu Ubɨnɔkpaabyi:
68“Amana anttag Ɔvaar Ubɨnɔkpaabyi kwi Izɨrɛl,
ukwurabɛ kukwa ɔkɔ ɔkkana anang pɛ ɔttara oweg bɛ.
69Ka amana Ɔkkana kwɔ ɔbar-ɔbar ɔnanga,
offona nang kwu Devid, otserɔtɔm kwɛ.
70Otse kwɔ ɔtɔng ɔnang ategnkkawa pu Ubɨnɔkpaabyi pa awuruwur pe etseden.
71Abɛ mussi mana annanga kɨmbɔg ra oyogikwan pamana,
ɔttara anang pa akwan mana.
72Abɛ ɛma mo ose aba adere pe etseden pamana ikwosisi,
ɔttara uzɨma nnwɔngɔ kwɛ kwu uwuruwur.
73Nnwɔngɔ kwo otseg ɔnang otte kwa amana, Ebraham.
74Oreng mana kɨ mbɔg ra ayogikwan pa amana,
ɔttara ussi amana annang ozora antɨm ankpow-ɛ.
75Fasɛ amana anwur-uwur ɔttara ansenga ke eden okkatsɛ tar ka akpen pa amana ma rɨg.
76Ɔma unwa kwam abɛ na jer-ɔ otegɛkkawa kwu Ubɨnɔkpaabyi, Ɛma kwo Ogor kidam;
ukwur abɛ ɔma ma ayɨn pɛrɛ Ɔvaar ata addo eden atsog-ɛ.
77Na ateg anang otse kwa abɛma akama ɛnnanga,
otse kwu Ubɨnɔkpaabyi ubɨna ɔnang bɛ kɨ mpyuwa ra abɛ,
78ukwurabɛ ikwosisi ru Ubɨnɔkpaabyi,
ududon kwe ekpewa kwu ubɨn kɛ ɛrang mo oyen mana.
79Ɛnna ɛnang anang pa anɨng ku ugwutwar
ɔttara ka anang pa anɨng kɔ ɔkpakpa kwo obo,
itɨm mana eden tsa akpen pɛ ɛmɛm.”
80Unwa nwo ɔbar, ɔkpɔg kɔ ɔkpakpa, urɨg gɔ ɔwang kwɔ anang unu urɨg tar okwo owem ko okpe kwu utitso oteg anang ki iyan ɛkkawa tsu Ubɨnɔkpaabyi ki Izɨrɛl.
Aktuálne označené:
Luk 1: mfn
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©️2022 Luke Initiative for Scripture Translation
