A Vuhuna 7
7
A Marungulolo
1E BAKOVI DAGI i takia e Noa, “O dili na agarungu turane huriki a kabu vomu, a vuhuna ioe kikeri a bakovi kamumu ne huriki a bakovi lobo. 2O bole turamu na kabu na kanirau kabakaba, a toga ge polorua, a kinana ge polorua. Na kanirau mutomuto, a toga ge polorua, a kinana ge polorua. 3Na kadirovo, a toga ge polorua, a kinana ge polorua, ne vona ni vakabele a hamone ria na malala. 4Muri na parava ge polorua, ga vakaborua na malala a vala. Ge boru na parava ge ravulu va, a rodo ge ravulu va. Iau ga vakalobo a maka maki mahuri a rata rike koea na malala.” 5Lakea e Noa i muri mai a ngava lobo e BAKOVI DAGI i vakuku ia vona.
6Na tahuna a marungulolo i bele koea na malala, e Noa i tahoka a pida i 600. 7#Mat 24:38-39; Luk 17:27Muri e Noa turana e girihina, e tuna mai e kana mai, ri rike na agarungu, ri gi kapiloho vona a marungulolo. 8A maka kanirau ri varihi, a kanirau kabakaba, a kanirau mutomuto, a kadirovo turana a maki lobo ri karaka na robo, 9a kinana, a toga ri valai mai e Noa, ri rike na agarungu, i manga a hini a Vure i vakukua e Noa vona. 10Pali i lobo a parava i polorua, i bele ngane na malala a marungulolo.
11 #
2Pe 3:6
Na parava i ravulu a polona i polorua na ruana keva, e Noa i tahoka pali a pida i 600, i vakatubu na parava iea, a maka naru polotano na bobona malala ri tuka, a maka niroga na naru na hunu ri mapuka. 12A vala dagi i boru ngane na malala na parava i ravulu va, a rodo i ravulu va. 13Na parava iea kunana e Noa turane girihina, e tuna ala tolu: e Sem, e Ham, e Iapet turane girihine tou, ri rike na agarungu. 14Ri rike turana a kabu na kanirau lobo, a kabu na sipsip a bulmakau lobo, a kabu na maki lobo ri laho na malala, a kabu na kadirovo, a maki lobo i tahoka a karapane ria. 15A maka maki legelege ri mahuri, ri bango na ruperene ria, ri valai turana a rihine ria, ri valai mai e Noa, ri rike na agarungu. 16A maka livoa, a toga a kinana, ri rike na agarungu, i muri maia a nitana Vure i vakuku e Noa vona. Muri e BAKOVI DAGI i tukari tahoa e Noa. 17Na parava i ravulu va, a vala i boru mavonga, i vonu a naru i kavitagua a malala, lakea a agarungu i pasi langa na naru polomeli liu na malala. 18A naru i lolo rike hateka, i kavitagua a malala, lakea a agarungu i pasi na bokona dari. 19A naru i bubu rike mavonga, i kavitagu a maka lolo dagi lobo. 20Muri a naru i kavitagu a maka mapana lolo i polomeli na mita i polorua. 21A maki lobo ri laho na malala ri pasiri: e huriki a bakovi lobo turana a sipsip a bulmakau, a livoa, a maka maki ri laho na robo. 22A maki lobo na malala ri bango na ruperene ria, ri mate. 23A maki lobo ri mahuri koea na malala, ri lobo liu. E huriki a bakovi a ngatavine, a maka kanirau, a kadirovo turana a maki lobo ri laho na robo, ri lobo liu na malala. A kabu ne Noa turana a maka maki mahuri pololilo na agarungu kunana ri mahuri. 24A naru i kavitagua a malala na parava i 150.
Aktuálne označené:
A Vuhuna 7: bnp
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2011 Wycliffe Bible Translators, Inc. All rights reserved.