توریت شریف: پَیدایش 5
5
1اے حضرت آدم نا شجرہ نسب اے۔
جس دیہاڑے اللّٰہ تعالیٰ اِنسان کی پیدا کِیتا، اُس اُس کی اپݨے ار بݨایا۔ 2اُس اُنہاں کی مرد تے عورت بݨایا، تے اُنہاں کی برکت دِتی. تے اُس اُنہاں نا ناں ”اِنسان“ رخیا.
3جس ویلے حضرت آدم 130 سالاں نے ہوئے، تے اُنہاں نا اِک پُتر جمیا جہیڑا بِلکل اُنہاں نے اَر سی. حضرت آدم اُس نا ناں شِیث رخیا۔ 4شِیث نے جمݨے تُوں بعد حضرت آدم 800 سال ہور جِیݨے رہے، تے اُنہاں نیاں ہور تیہاں تے پتر جمݨے رہے۔ 5حضرت آدم 930 سالاں نے ہوئی کے فوت ہوئی گئے۔
6شِیث 105 سالاں نا سی جس ویلے اُس نا پُتر اَنوش جمیا۔ 7اَنوش نے جمݨے تُوں بعد شِیث 807 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 8فِر او 912 سالاں نا ہوئی کے مری گیا۔
9اَنوش 90 سالاں نا سی جدوں اُس نا پُتر قِینان جمیا۔ 10قِینان نے جمݨے تُوں بعد اَنوش 815 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 11اَنوش 905 سالاں نا ہوئی کے مری گیا۔
12قِینان اُس ویلے 70 سالاں نا سی جدوں اُس نا پتر محلل ایل جمیا۔ 13محلل ایل نے جمݨے تُوں بعد قِینان 840 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 14قِینان 910 سالاں نا ہوئی کے مری گیا۔
15محلل ایل 65 سالاں نا سی جدوں اُس نا پُتر یارَد جمیا۔ 16یارَد نے جمݨے تُوں بعد محلل ایل 830 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 17محلل ایل 895 سالاں نا ہوئی کے مری گیا۔
18یارَد 162 سالاں نا سی جدوں اُس نا پُتر حنُوک جمیا۔ 19حنُوک نے جمݨے تُوں بعد یارَد 800 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 20یارَد 962 سالاں نا ہوئی کے مری گیا۔
21حضرت حنُوک 65 سالاں نے سݨ جدوں اُنہاں نا پُتر مَتُوشالح جمیا۔ 22مَتُوشالح نے جمݨے تُوں بعد حضرت حنُوک 300 سال ہور قُربِ اِلٰہی وِچ گُزارے، تے اُنہاں نے ہور تیہاں تے پتر جمݨے رہے۔ 23حضرت حنُوک 365 سالاں تک جِیݨے رہے۔ 24او قُربِ اِلٰہی وِچ رہے، فِر اللّٰہ تعالیٰ اُنہاں کی چاہی کِہندا، تے او فِر نظر نی آئے۔
25مَتُوشالح 187 سالاں نا سی جدوں اُس نا پتر لمک جمیا۔ 26لمک نے جمݨے تُوں بعد مَتُوشالح 782 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 27او 969 سالاں نا ہوئی کے مری گیا۔
28لمک 182 سالاں نا سی جدوں اُس نا اِک پتر جمیا، 29جِس نا ناں اُس نُوح یعنی “آسانی“ رخیا. اُس آخیا، ”اساں نا کھیتی باڑی نا کم بہُوں ڈاڈھا اے، کِیئانکہ خُدا زمِیں پر لعنت پیہجی وی. پر ہُݨ اساں اِس پُترے نی وجہ نال سوخے ہوئی جاساں.“ 30حضرت نُوحؑ نے جمݨے تُوں بعد لمک 595 سال ہور جِیݨا رہیا، تے اُس نیاں ہور تیہاں تے پتر جمݨے رہے۔ 31فِر او 777 سالاں نا ہوئی کے مری گیا۔
32حضرت نُوح نے 500 سالاں نے ہوݨے تُوں بعد اُنہاں نے ترے پُتر سام، حام تے یافثؑ جمے۔
Aktuálne označené:
توریت شریف: پَیدایش 5: phr
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Text (c) 2021 Noor-e-Kashmir
Audio (p) 2021 Noor-e-Kashmir