Taruparea̧ Ma̧ȩ 6
6
Ji̧dë u̧i̧ chjai̧dëpe bagari̧ cjo̧ro̧rëreji̧ri̧dirȩ pumȩ judiro̧, dami̧ti̧ chjai̧dë oa jape cjiaji̧ri̧rȩ
1Ado pumȩ judiro̧ no̧i̧dë tjamo̧pea̧rä, chiriräpȩti̧ oa chjuchjupechä cjo̧ro̧ji̧ri̧pea̧rä, jabechji̧ nö̧ri chjaorëreji̧ri̧diro̧jȩrȩ jibëa̧ bori̧ ji̧ri̧. Ado no̧i̧dë tjamo̧ oa nö̧ri chjaoa̧ oaiä, jabechji̧ ëbarëreji̧ri̧diro̧jȩrȩ jibëa̧ u̧ri̧ ji̧ri̧. Aja̧, jibëa̧ oari ji̧ri̧, jibëa̧ ivi ji̧ri̧ ëbarëreji̧ri̧diro̧jȩrȩ. 2Ado pio jiro japamitërä Ütë tjamo̧ ja̧ u̧ri̧ pio judiro̧ dae ja̧bo dae ja̧bo dae chjaorëreji̧ri̧diro̧jȩrȩ pumȩ ja̧ jojabi pio ji̧ri̧. ‘Aja̧, chjacjiaji̧ri̧ni̧ro̧da, ëbapea̧ni̧ro̧da, goaeri̧ ëba mo̧a̧pea̧ oa ëbapea̧ni̧ro̧da’ quëna̧ jo̧rȩtaji̧ri̧rȩ ëbarëreji̧ri̧diro̧jȩrȩ ivi chjacjiaji̧ri̧ pio ji̧ri̧. Judiro̧ dae ja̧boa̧mi̧ mitërëreji̧ri̧diro̧jȩrȩ.
3Ja̧dëa ji̧ ja̧di ta̧rëri̧ yo̧rëremȩde Jeova judi: ‘Jabo cjäri̧ madiro̧da, ma̧i̧ dari̧ japadiro̧da, ado pio ju̧i̧iä Tjo tjamo̧ judi ji̧dë ma jidatadëpadiji̧ri̧da, ji̧dë ma chi̧dëeatadëpadiji̧ri̧da, jabomo̧ pumȩ tara, echji̧ ja̧borea̧ chiadiro̧da, pio ju̧i̧iä 120 cjo̧ro̧rea̧ ui maea oa yürüpaquiji̧ri̧da, ’quëna̧ jo̧rȩtamȩrȩ yo̧rëremȩde Jeova judi pumȩ pio ji̧ri̧ daea̧ oaiä.
4Ado pio jiro japamitërä pumȩ bori̧dëti̧rȩ cjo̧ro̧rëreji̧ri̧dirȩ chiri oa judiro̧ cjo̧ro̧dërërea̧ ji̧. Jabechji̧ Ütë tjamo̧ ja̧ u̧ri̧ pio judiro̧ pumȩ ja̧ jojabi pio ji̧ri̧ bomai tänȩrërea̧ oaiä, pio ji̧ri̧iä jibëa̧ bori̧ ji̧ri̧ nö̧rirërea̧ oaiä, jabechji̧ pumȩ bori̧dëti̧rȩ cjo̧ro̧rëreji̧ri̧dirȩ. Ado pio judiro̧ a̧dë chjäte ju chiarëreji̧ri̧dirȩ. A̧dë chjäte ütërëreji̧ri̧dirȩ, ju chocodë maearë. Ado judiro̧ goae tarari̧ acji tai̧rea̧ chia̧ oaiä, jabechji̧ pio ji̧ri̧ chjiari ma̧ȩ üdë chjaodëri̧ jachipadärärëremȩde davä chiri oëra̧ti̧ oa, ütëborë goë goë ta̧rërea̧mi̧ dari̧.
5Ado Jeova judi chiri oa cjo̧ro̧ji̧ri̧ pumȩ pio ji̧ri̧ daba dae chjaomȩrȩ darëremȩdejȩrȩ a̧dë chjäte chjai̧dëri̧ jape cjiaji̧ri̧ oa. Ji̧dë ma chjai̧dë maea oa jo̧rȩtaji̧ri̧ oa, a̧dë chjäte chjadëdëti̧ oa jo̧rȩtaji̧ri̧ oa cjacjarë dae chjaorëremȩdejȩrȩ jibëa̧ chji̧ oa, chjai̧dë oa japa ano̧dëri̧ cjiaji̧ri̧ oa. 6Pio ju̧i̧iä gito ana̧ri̧ jo̧rȩtamȩpea̧de Jeova judi. 'Jabo cjäri̧ maquëda, pumȩ ji̧ri̧ pareapadëa̧täremȩquiji̧ri̧da, pio yoa chiri oa cjo̧ro̧pea̧ oa pareapadëa̧täremȩquiji̧ri̧da' quëna̧ jo̧rȩtamȩrȩ gito ana̧ tjamo̧ri̧ jo̧rȩtamȩpea̧de. 7Ado pio ju̧i̧iä Jeova judi: ‘Chja ja̧di pumȩrȩ cjiadiädëri̧ ja̧bo tänȩtäquiji̧ri̧da, cüdë pareapea̧ cjo̧ro̧ji̧ri̧ pumȩ pio ji̧ri̧ goarijä tänȩtäquiji̧ri̧da, puabo, coë jäji̧ri̧bo yuropa tänȩtäquiji̧ri̧da, chirirä cjo̧ro̧ji̧ri̧ pio ji̧ri̧bo yuropa tänȩtäquiji̧ri̧da, to yae oa, böa oa, chjido oa, ariguri oa, chirirä cjo̧ro̧ji̧ri̧ chjö̧na̧i̧därä oa yuropa tänȩtäquiji̧ri̧da’ quëna̧ jo̧rȩtamȩrȩ yo̧rëremȩde Jeova judi, gito ana̧ri̧ jo̧rȩtamȩrȩ.
Noe pio ju̧i̧ chjiari ma̧ȩ
8Jabo Noe pio ju̧i̧ cjäri̧ri̧ cjiamȩrȩ darëremȩdejȩ. 9Ado ja̧di ta̧rëri̧ go̧ȩpea̧ oa cjiade Noe pio ju̧i̧ chjiari ma̧ȩ üdë. Danȩrȩ, Noe judi cjo̧ro̧rä judirä, coëma̧ cjiari̧ cjo̧ro̧dë marëreji̧ri̧dirȩ pumȩ judiro̧. Chjai̧dëri̧ cjo̧ro̧ marëreji̧ri̧dirȩ. Noe pio judimo̧rȩ coëma cjiari̧ cjo̧ro̧rëremȩde. Pio judimo̧rȩ co chjami̧ dari̧ cjo̧ro̧rëremȩde. Jabechji̧ o judiro̧ pio ju̧i̧iäpȩmo̧ poë aechiderea̧mi̧dëri̧ cjo̧ro̧rëremȩde. Jabechji̧ Ütë tjamo̧ pio ju̧i̧ nö̧ta jadü cjiami̧ dari̧ cjo̧ro̧rëremȩde. 10Ado Noe judi jibëa̧ u̧ri̧ oa ëbarëremȩdejȩrȩ tjarari̧ oa, oari maea oa. Chȩ quȩmȩ oa, Ca̧ quȩmȩ oa, ado Japje quȩmȩ oa ëbarëremȩdejȩrȩ.
11Ado Ütë tjamo̧ judi daba dae chjaorëremȩdejȩrȩ pumȩ ji̧ri̧, chiri nö̧ta oa cjo̧ro̧ji̧ri̧ oa. Aja̧, a̧dë chjäte chjai̧dëri̧ jape cjiaji̧ri̧ oa, goe chiari̧ jape chjaoji̧ri̧ oa, a̧dë chjäte ma̧i̧ dari̧ jape cjiaji̧ri̧ oa dae chjaorëremȩdejȩrȩ. 12Ado pio ji̧ri̧ daea̧ oaiä, ‘Jabo cjäri̧ madiro̧da, pumȩ chjö̧na̧i̧däräti̧rȩ chjadëdë maearë cjo̧ro̧diro̧da, chjadëdëpe baga̧ maeadiro̧da’ quëna̧ jo̧rȩtamȩrȩ darëremȩdejȩrȩ. 13Pio ju̧i̧iämȩrȩ yo̧rëremȩdejȩ Noe ju̧i̧:
—Danȩ, pumȩ chjö̧na̧i̧däräti̧ oa cjiadiädëri̧ goarijä tänȩparequedejȩrȩ. Ja̧bo tänȩparequedejȩrȩ. Garüji̧ri̧ oa, goe chiari̧ gu̧na̧ chjaoji̧ri̧ oa, a̧dë chjäte ma̧i̧ dari̧ jape cjiaji̧ri̧ oa ja̧bo tänȩparequedejȩrȩ ütëbodärä oa. 14Jabo pio mȩa, jabechji̧ chjätärea̧ yürüparequedemȩ. Ado pio ju̧i̧iä yo̧requedemȩ. Danȩ, chara ana̧ oa japavä. To chjadë tjamo̧ra̧ ju̧ri̧ra̧ japavä. Ado jo̧ tjo ji̧ra̧ri̧ chiari̧ japatä earequedemȩ chara oa. Ado ui üdë tjoräpȩmo̧ acji choachea oa, jabechji̧ chjadëri̧ joapea̧de. Ërami̧ dara̧ joapea̧de. Tjori joapea̧de dairibo. Aja̧, ja̧di dari̧ japatä earequedemȩ. 15Ado chara ana̧ üdë, 'Aja̧, ja̧di dari̧ japapea̧dida' quëna̧ dabapea̧ oa, jabechji̧ chjadëri̧ ütarë yo̧parequedemȩ. Danȩ, go̧a̧ti̧ tjamo̧ oa japatä earequedemȩ 135 metro go̧a̧ti̧ oa. Ado jujua oa japadëpea̧de jabo ana̧ oa japapea̧de. Danȩ, 22 metros ana̧ oa japapea̧de. Ado uë tjamo̧ oa japapea̧de peaja̧di. Aja̧, 13 metros uë oa japapea̧de. 16Ado danȩ, chara ana̧ oa chjadëri̧ a̧rütä earequedemȩ. Ado a̧rüa̧ cotori pio judiri darea̧ joë ya oa cji̧däpea̧de chara yuroro. Metro tjomo̧ maea oa japapea̧de jujua oa. Ado tjarari̧ cjo̧ro̧rea̧ bë chiari̧ japatä earequedemȩ peaja̧di. Aja̧, ëte ja̧ bë oa, tjoro ja̧ bë oa, ado uë ja̧ bë oa japatä earequedemȩ. Ado chara chiri tjoräpȩ cji̧dätä earequedemȩ yu̧a̧rea̧ joë ya oa, cja̧rȩmȩ oa —yo̧mȩrȩ ütarë yo̧rëremȩdejȩ Noe ju̧i̧iäpȩmo̧ Ütë tjamo̧ judi.
17Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩ Noe ju̧i̧iäpȩmo̧ Ütë tjamo̧ judi:
—Danȩ, ui ana̧ oa chjadüparequede. Ado jȩoaji̧ri̧ ütëbodärä oa ja̧bo tänȩparequedejȩrȩ cjo̧ro̧ji̧ri̧ pio ji̧ri̧. Chiriräpȩ cjo̧ro̧ji̧ri̧ chjö̧na̧i̧däräti̧rȩ ja̧bopadirȩ jȩoaji̧ri̧ pio judiro̧. Pumȩ chjö̧na̧i̧rȩ, pua chjö̧na̧i̧rȩ, chirirä cjo̧ro̧ji̧ri̧ chjö̧na̧i̧rȩ cjiadiärea̧mi̧dëri̧ ja̧bopadirȩ, a̧dë chjätärea̧ decjiari̧. 18Jaboti̧ri̧ japadëparequedemȩ jabo. Danȩ, ano̧ mire jo̧rȩtarea̧ decjiari̧ ma̧ȩ yürü cji̧därequedemȩ tjamo̧i̧ cjiari̧ baämȩ ma̧ȩ oa. Jabechji̧ chjätä tänȩparequedemȩ, na̧ pumȩ pio ji̧ri̧bo. Jabechji̧ chara ana̧rä yu̧a̧parenȩ na̧ iei̧ pio ji̧ nö̧ta, na̧ u̧ri̧ pio ji̧ri̧ nö̧ta, na̧ u̧ri̧ ja̧ ivi pio ji̧ri̧ nö̧ta. 19Ado jȩoaji̧ri̧ pio ji̧ri̧, chiri nö̧ta oa cjo̧ro̧ji̧ri̧ pio ji̧ri̧ yu̧a̧ tänȩparequedejȩrȩ peaja̧di. Tjamo̧ davä. Cja̧rȩmȩ oa iei̧ra̧ jadü yu̧a̧ tänȩparequedejȩrȩ judiro̧ pio mȩa nö̧ta chjadëri̧ chjätäpea̧ oa.#6:19 Jabomo̧ cja̧rȩmȩ oa iei̧ra̧ jadü yu̧a̧ tänȩtä yo̧rëremȩdejȩ Noe ju̧i̧ Ütë tjamo̧ judi. Aja̧, to yae cja̧rȩmȩ oa, jibëa̧ iei̧ra̧ jadü yu̧a̧ tänȩtä earëremȩdejȩrȩ, to yae ütëbo oadë. Jabechji̧ yo̧a̧ri̧mo̧i̧ oa yu̧a̧ tänȩtä earëremȩdejȩ Ütë tjamo̧ judi. Üi̧ cja̧rȩmȩ oa, ado iei̧ cja̧rȩmȩ oa. Ja̧di maeari̧ japatä earëremȩdejȩ Ütë tjamo̧ judi. Ado to yae orë, jabechji̧ yu̧a̧rea̧ dadëa̧ jabo dairäpȩ cjiadiäa̧. 20Aja̧, pua nö̧tarë, chirirä cjo̧ro̧ji̧ri̧ nö̧tarë, coë jäji̧ri̧ nö̧tarë yu̧a̧ tänȩpea̧ maeadirȩ peaja̧di, cja̧rȩmȩrȩ iei̧ra̧ jadü. Judiro̧ ui ana̧ oaiä ja̧bochea oa, jabechji̧ pio mȩa nö̧ta yu̧a̧ tänȩpea̧dirȩ. 21Ado danȩ, mȩnȩro̧ chara ana̧räpȩ chjadëri̧ jurapea̧ oa, jabechji̧ eami̧ jurarea̧ oa boatä earequedemȩ ji̧ra̧ tjamo̧ oa. Tjamo̧ davä. Pio mȩnȩro̧ jurapea̧ oa, puarë jurapea̧ oa, chirirä cjo̧ro̧ji̧ri̧ pio judiro̧ jurapea̧ oa, chjadëri̧ boavä jurarea̧ ji̧ra̧ tjamo̧ oa —yo̧mȩrȩ ma̧ȩ yürürëremȩdejȩ Noe ju̧i̧ Ütë tjamo̧ judi.
22Ado Ütë tjamo̧ judi yo̧a̧mi̧ taruparëremȩde Noe judi chara ana̧ oa japapea̧ ji̧. Jabechji̧ Ütë tjamo̧ judi ütarë yo̧a̧mi̧ japarëremȩdejȩ jiadarea̧ decjiari̧. Ado japamitë ana̧ tjamo̧ chjätä ëte, japadärärëremȩdejȩ.
Aktuálne označené:
Taruparea̧ Ma̧ȩ 6: Pume
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©2021 Global Partners, All Rights Reserved