Matius 4
4
Biris bi yekwesu meret os wa Yefun Yesus
(Mrk. 1:12-13; Luk. 4:1-13)
1Yohanes ras Yefun Yesus mo syur, orete Yefun Allah Gen gwat Yefun Yesus mu mo pe gato kwe yo kom mo nde, subere mone biris bi yekwesu meret os wa Yefun Yesus subere Yefun Yesus ben suk siri kadit Yefun Allah bi os-i mone. 2Yefun Yesus yo git sugit mo nde sor kom mo kam musyu at rek, sane Yefun Yesus on de ndo nde. 3Sugane biris bi yekwesu ne ma ku Yefun Yesus, ete ki nai do, ”Nan tepsu Yefun Allah bi Gan sangge it yo, Nan syogat jok mwa ré tepsu roti wa Nan git et.”
4Sarewo Yefun Yesus ki do, ”Mo Yefun Allah bi sukdu, ye krom do: Men yetu git sugit sor, bere men yo kem ndo nde, wo men grem Yefun Allah bi sukdu mwa ne sino kem pe mo men mit, sane sa, bere men kem ndo.”
5Orete biris bi yekwesu ne gwat Yefun Yesus mu mo kota gato Yefun Allah fro dor wa An dakai. Kota ne gum do Yerusalem. Biris bi yekwesu ne grem Yefun Yesus ti kok mo Yefun Allah bi nu yu, 6ete an ki nai Yefun Yesus do, ”Nan anato tepsu Yefun Allah bi Gan sangge it yo, Nan bare Nan nggwa mu bur et, we ye krom mo Yefun Allah bi sukdu do,
’Yefun Allah syogat An bi malaikat mewa Nan.
Bere malaikat ne bes án syim wa bur wa Nan,
subere jok yo wai Nan gwes nde.’ ”
7Yefun Yesus ki do, ”Mo Yefun Allah bi sukdu, ye krom o do, ’Men werwa men bi Yekwesu Yefun Allah kadum An bi suktinggi daret nde.’ ”
8Or o biris bi yekwesu ne gwat Yefun Yesus mu mo banbo gato kok wai, ete an kadum pe mwa gato ndo mo bur ré nai Yefun me o re. 9Ete biris bi yekwesu ki nai Yefun Yesus do, ”Nan tu Nan umsu, Nan bes ji gum kok it yo, bere ji syo suk mwa ré nai Nan.”
10Yefun Yesus ki do, ”Biris bi yekwesu, nan mu kadit Ji tom, we mo Yefun Allah bi sukdu, ye krom o do, ’Men bes men bi Yekwesu Yefun Allah ne gum kok et, men ben An bi suk-i sor.’ ”
11Kom mo rut, biris bi yekwesu ne mu kadit Yefun Yesus, ete malaikat bok yo ma mewa An.
Yefun Yesus mu duno nje mo bur Galilea
(Mrk. 1:14-15; Luk. 4:14-15)
12Yefun Yesus jam yé but Yohanes, ete bok an mo sel sa, Yefun Yesus satu mu mo bur Galilea. 13Yefun Yesus mu kadit kota Nazaret, ete An mu kem mo kota Kapernaum mo Em Galilea de mo Zebulon si Naftali bi bur det-i. 14An mu kem mone anato yenabi Yesaya bi sukdu-i bor re. Yesaya ki do,
15”Ye gato kem mo Zebulon si Naftali bi bur det-i,
mo os gato mu mo em, mo Syur Yordan tak deta,
mo bur Galilea, yewis yi bi pe-i,
16ye gato kem mo ndendu mone
bere me sukru sye.
Ye gato kem mone ben sato kwop, we án jam nde Yefun.
Bere sukru ne ma kadum os gato ndo.”
17Kadit kam gato Yefun Yesus mu kem mo kota Kapernaum An duno nje mone do, ”Yefun Allah ma jowa nin tepsu nin bi Yekwesu it anare! Sane nin kwet kadit sukibit gato nin ben ne, ete nin jammo Yefun et.”
Yefun Yesus kendo pa ka at gato sok boge ne ma sisu An
(Mrk. 1:16-20; Luk. 5:1-11)
18Yefun Yesus muket Em Galilea de sa, An sokme yetu ge we gato sok boge. An we yedik. Pa dosye ne gum do Simon (gato ye kendo do Petrus). Pa dowok ne gum do Andreas. An we bare mwi mo em ne. Kamdik-kamdik an we sok boge subere an we ku sugum. 19Yefun Yesus ki nai an we do, ”Nin ka we ma. Nin ka we simo Ji se! Bere Ji duno nin ka we but yetu tepsu nin ka we but boge su mwi ne.” 20Yefun Yesus ki nai an we or sa, sugane it, an we misyar an we bi mwi kem, orete an we si Yefun Yesus mu sino.
21Yefun Yesus mu kadit pe ne, orete An me yetu ge we yo o. An we yedik. An we ne gum do Yakobus si Yohanes. An we ne bi ai gum do Zebedeus. An we si bi ai fro bi mwi mo kwem mit. Yefun Yesus ma sa, Yefun kendo an we ma simo Yefun. 22Sugane it, an we is kadit an we bi kwem, an we mu kadit an we bi ai, ete an we si Yefun Yesus mu sino.
Yefun Yesus duno nje, Yefun ben nje ge kadit bi suki
(Luk. 6:17-19)
23Yefun Yesus mubot bur Galilea. Yefun duno nje mo ye Yahudi bi nu ari mo kampung bok yo mone. Yefun Yesus ki sukdu subot os ndo gato Yefun Allah fro wa nai men yetu gum sok mo An bi rus-i, ete An tepsu men bi Yekwesu mone. Sane dom, Yefun Yesus ben nje gato i ne ge kadit suki wisyo-wisyo. 24Yé ki sukdu subot Yefun frekbot bur Siria sino, sane yé gwat yé mwa gato i ne ma mo An. Yé gwat nje gato i su suki wisyo-wisyo e, nje gato kaim yó wai o re e, nje gato semda bok nggwa mó, nje gato semda ben e, nje gato út e ne, ete Yefun Yesus ben nje mwa ne sino ge re. 25Yé mwa ndo nde simo Yefun Yesus kadit bur Galilea e, kota Musyu dik e, Yerusalem e, bur Yudea si bur mo Syur Yordan tak deta.
Aktuálne označené:
Matius 4: KGR
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
@LAI 2004, 2014
