मत्ती 19
19
तालाक ने बाराम यीशुन हिक
(मरकुस 10:1-12)
1जेवी यीशु ज्यु वातु केय दिनो, एने गेलील माय रेन जात रिनो; एने यरदन नेदीन ती मीरे यहुदियान देसाम आवो। 2तेवी होवटाली गेरदी तान पासाण चाल पोड़नी, एने तो ताह हुदाऱ्यो।
3तेवी थोड़ाक फरिसी यीशुह पारेखणेन केरता, ता फाय आवीन केया, “काय काल्ला कारणान केरता आपणी लाडीह सोड़नेन हाजो हे?”
4यीशु ताह केयो, “तुमू चोखाली पुस्तेक माय नाह वाच्या काय जो ताह बाणायेल, तो पेलुस रेन एदमी एने बायकु बाणायेल हे,#उत्पत्ती 1:27–5:2 5एने बोगवान कियेल, ‘केरीन माणुह तान आईख आबाख रेन आंगे एन, तान लाडी हिऱ्यो रेय, एने ता दुयू एक सेरीर रेती?’#उत्पत्ती 2:24 6ता एवी दुय नाह, पुण एक सेरीर हेते, तानकेरता जाह बोगवान जुड़ेल हे, ताह माणहे आंगे नाय केरी।”
7ता यीशुह केया, “उवतो मुसा ज्य काहा ठेरायेल, काय लेख्यो आपीन तिह सोड़ देय?”#व्यवस्था 24:1-4; मत्ती 5:31
8तो ताह केयो, “मुसा तुमरा मोनान वातड़ाय ने केरता तुमूह तुमरी लाडीह सोड़ देणेन उकुम आपेल हे, पुण पेल ओहलो नाह एतो।” 9#मत्ती 5:32; 1 कुरिंथीयो 7:10,11एने मी तुमूह केथु, “जो कुण बी सिनालाह सोड़ीन, दिहरी वातीन केरता तान लाडीह सोड़ीन दिहरी हिऱ्यो, वाराड़ किरेह, एने जो सोड़ेल ती हिऱ्यो वाराड़ किरेह तो बी सिनालो किरेह।”
10चेला ताह केया, “केदी एदम्याह बायकु हेऱ्यो ओहलो नातो हे, ते हाजो ज्यो हे वाराड़ नाय केरी।”
11तो ताह केयो, “आखा वाराड़ केऱ्या बिगेर नाह रेय सेकते, निस्ता ता ओलास जाह ज्यो वरदान जुड़ेल हे। 12काहाकाय थोड़ाक नपुंसक ओहला हेते, जा आईख ने पेटा माय रेन ओहलाच पायदा ईयेल हेते; एने थोड़ाक नपुंसक ओहला हेते; जाह माणहे बाणायेल; एने थोड़ाक नपुंसक ओहला हेते; जा हेरगान राज ने केरता सोताह नपुंसक बाणायेल हेते, जो ज्याह लेय सिकेह, तो लेय लेय।”
यीशु सोराह बोरकेत आपणे
(मरकुस 10:13-16; लुका 18:15-17)
13तेवी माणहे सोराह यीशुन आहने लावा काय तो ता पोर आथ मेली, एने विन्ता केरी, पुण चेला ताह दोपकाड्या। 14यीशु केयो, “सोराह मार फाय आवणे दिवो, ताह मा रूकहो, काहाकाय हेरगान राज ओहलाच ने हे।”
15तेवी यीशु ता पोर आथ मेलीन बोरकेत आप्यो एने तारेन जात रिनो।
मालदार जुवान एने जेलेमक्यो जीवाय
(मरकुस 10:17-31; लुका 18:18-30)
16एने एक माणुह यीशु फाय आवीन केयो, “एय मालीक, मी काल्लो हाजो काम केरू काय जेलेमक्यो जीवाय सापड़ावु?”
17तो ताह केयो, “तु माहु हाजा कामान बाराम काहा फुसेह? हाजो ते एकुच हे, पुण केदी तु जीवाय माय रिगणे हुदेह, ते उकुम मान्या केर।”
18तो ताह केयो, “काल्लो उकुम मानु?”#निर्गमन 20:13-16; व्यवस्था 5:17-20 यीशु केयो, “ज्यो काय खुन मा किरहे, सिनालो मा किरहे, चोरी मा किरहे, जुठो पुरावो मा दिहे, 19आपणा आबाख एने आपणी आईख ने मान मिलज्यो, एने आपणा आहेंल्या हेऱ्या आपणे बाराबोर मोंग किरज्यो।”#निर्गमन 20:12; व्यवस्था 5:16; लेव्यवस्था 19:18
20तो जुवान ताह केयो, “ज्य आखो, ते मी मानील हे, एवी मार माय काल्ली वातीन कोमी हे?”
21यीशु ताह केयो, “केदी तु खिरो बोणने हुदेह ते जा, तारो मालदेन वेचीन गेरब्याह आपदी, एने तुवाह हेरगाम मालदेन जुड़ी; एने आवीन मार पासाण चाल पोड़।”
22पुण तो जुवान ज्यी वात होमलीन नाराज एन जात रिनो, काहाकाय तो जुलूम मालदार एतो।
23तेवी यीशु तान चेलाह केयो, “मी तुमूह खेरीच केथु, काय मालदाराह हेरगान राज माय जाणेन जुलूम केठीण हे। 24तुमूह पुशो केथु काय बोगवानान राज माय मालदाराह जाणे रेन उटड़ाह हुईन डोसा माय रेन सेरकी जाणे होपो हे।”
25ज्य होमलीन चेला जुलूम बोंगलायीन केया, “ओवतो कुणीन सुटकारो एय सिकेह?”
26यीशु तान उगे देखीन केयो, “ज्यो माणहान केरता केठीण हे, पुण बोगवानान केरता कायच केठीण नाह सोतो।”
27पतरस ताह केयो, “देख आमु, ते आखो काय सोड़ीन तार पासाण आव लागेल हेते, ते आमुह काय जुड़ी?”
28 #
मत्ती 25:31;
लुका 22:30
यीशु ताह केयो, “मी तुमूह खेरीच केथु काय नोवाली केली माय जेवी माणहान बिटोख, तान बोड़ाय ने राजगादि पोर बोही, ते तुमू बी जा मार पासाण आयेल हेते, बारा राजगादि पोर बोहीन इस्राएल ने बारा गेराणान नियाव किरहो। 29एने जो कुण गेराह, बायाख, बोणह्युह, आबाख, आईख, सोरा पोऱ्या, नाहते खेताह मार नावान केरता सोड़ दियेल हे ताह एक होव माप जुड़ी, एने तो जेलेमक्या जीवाय ने आदिकारी रेय। 30#मत्ती 20:16; लुका 13:30पुण जुलूम जाणे जा ओंगाण हेते, पासाण रेती, एने जा पासाण हेते, ओंगाण एती।
Aktuálne označené:
मत्ती 19: NTNii2020
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
