Jònə 3
3
Yěsû pobə Nikòdemùsə̀
1Ŋwùə̀ Farìsî ghùtse à lə̀ pə ghu pɨ mə nfuŋə̀ e nɨ Nikòdemùsə̀. À lə̀ pə ŋònə̀ ngẅùunə ambo pɨ̀Jew. 2Nikòdemùsə̀ wə̀ à lə̀ tô ambo Yěsû nɨ ɨ̀twuʼə̀ nshwəŋə̀ ambo ze lo, “Rabbi, pəə zhyə̂ lo ghǒ ɨ̀nèrə̀ nfurə̀ ambo Nẅùə̀ ntiinə mbə̀ʼə ka ŋònə̀ ɨ̀tse a ghɨ̀rə̀ e ɨ̀lènə̀ ɨ̀nwùə̀ pə̀ nɨ wə̀ wə̀ ngɨ̀rə̀ lə tɨghu Nẅùə̀ à wə̀ pobə ze.” 3Yěsû à lə̀ kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo, pɨ tə ghoŋə̀ e tɨ kẅirə̀ mbyə̂ a ŋwùə̀ shwuə̀ shwuə̀, a gha ndzəənə̀ e ànwùə̀ Nɨ̀fò Nẅùə̀ apə̀.”
4La Nikòdemùsə̀ a pyiitə̀ e lo, “Mbə̀ʼə pɨ chi nkẅirə̀ mbyə̂ a ndɨ̀ŋmə̂ lə ɨla? Mbə̀ʼə a kẅirə̀ nkwuunə̀ a nɨ̀pùmə̀ mǎ e pɨ chi mbyə̂ e shwuə̀ shwuə̀?”
5Yěsû a kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo pɨ tə ghoŋə̀ e tɨ pyə̂ a ŋwùə̀ nɨ nchyə pobə Àzhwùə̀, a gha nkwuunə̀ e amwuə ànwùə̀ Nɨ̀fò Nẅùə̀ apə̀. 6Moonə̀ nɨ mbòbə̀ mbɨ̀ŋmə̀ ɨ̀ za mbyə̂ la mbòbə̀ mbɨ̀ŋmə̀, la moonə̀ nɨ Àzhwùə̀ a za mbyə̂ a kɨ mbə Àzhwùə̀. 7Kò a kə̀ʼnə̀ e a ghò lo ǹshwəŋə̀ lo pɨ̌ kẅirə̀ pyə̂ a wɨghə pɨ̀tsùmə̀. 8Fèrə̀ à wa ndàŋə̀ ndèrə̀ la alyiʼə nɨ à kòŋə̀nə; A mə ndàŋə̀ wə̀ zuʼù àzòrə̀, ka mə zhyə̂ o alyiʼə nɨ à furə̀nə, kə̀ alyiʼə nɨ à wə̀ ndèrə̀. Lə̌ tsaʼnə a pənə ambo ŋònə̀ wa nɨ Àzhwùə̀ a pyə̂nə.”
9Nikòdemùsə̀ a pyiitə̀ e lo, “Mbə̀ʼə zèrə zə̀ ànwùə̀ a tyiʼə̀ ndòo alyiʼə lə ɨla?” 10Yěsû a kẅùə̀ ambo ze lo, “Ghǒ ɨ̀nèrə̀ ghu ngẅùunə ambo pànə̀ pɨ Israel ka tyiʼə̀ zhyə̂ o mɨ̀nwùə̀ mèrə mə?” 11Ǹshwəŋə̀ tyìʼə̀ nkǔŋə nkuŋə ambo ghò lo, pəə pa nshwəŋə̀ la ànwùə̀ nɨ pəə zhyə̂nə nkɨ mmə ntiitə̀ la ànwùə̀ nɨ pəə pa ndzəənə̀. La ka ŋònə̀ ɨ̀tse amwuə pɨghə a kòŋə̀ e a nɨ zuʼù ànwùə̀ nɨ pəə pa nshwəŋə̀. 12Ǹtə pəla ntiitə̀ a wɨghə nɨ mɨ̀nwùə̀ nɨ mɨ pənə àtwuə̀ ɨ̀shyə̂ nɨ̀ ka pyiimə̀ a wɨghə, ǹtyiʼə̀ ntiitə̀ a wɨghə nɨ mɨ̀nwùə̀ nɨ mɨ pənə a nɨ̀pwuurə̀ nɨ̀ tyiʼə̀ mbyiimə̀ lə ɨla? 13Ŋònə̀ ɨ̀tse à lə̀ pirə̀ mə e tɨ koʼò ndèrə̀ a nɨ̀pwuurə̀ ndàŋə̀ e Moonə̀ Ŋwùə̀ nɨ à lə̀ furə̀nə a nɨ̀pwuurə̀ nshwuʼə̀ a ɨ̀shyə̂.
14Tsaʼnə Mǔsî à lə̀ ŋaŋə̀nə ɨ̀nyoorə̀ aŋunə àtɨ̀ghə alyiʼə waakə la, la ndwuumə̀ nɨ pɨ ghǎ kɨ ŋaŋə̀ a Moonə̀ Ŋwùə̀ àtɨ̀ghə, 15lo ŋwùə̀ ntsùmə̀ wa nɨ à nùŋə̀nə ntɨŋmə̀ e aŋunə ze à ghǎ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. 16Mbə̀ʼnə Nẅùə̀ à lə̀ kòŋə̀ pànə̀ pɨ àtwuə̀ ɨ̀shyə̂, ŋŋâ ndàʼà moonə̀ e lo ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə ze à ghǎ kwɨghə̀ e apə̀, la pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ la. 17Ka Nẅùə̀ à lə̀ tsàa e a moonə̀ e a àtwuə̀ ɨ̀shyə̂ la lo a tô nsaʼà mɨ̀sàʼa mɨ pànə̀ pɨ àtwuə̀ ɨ̀shyə̂, à lə̀ tsàa e pə lo â tô nchwarə̀ a ghobə. 18Ka Nẅùə̀ a pə ghǎ chyâ e ngəʼə̀ aŋunə ŋònə̀ wa nɨ à nùŋə̀nə ntɨŋmə̀ e aŋunə ze, la à chyâ mə ngəʼə̀ aŋunə ŋònə̀ wa nɨ ka à nùŋə̀ ntɨŋmə̀ e aŋunə ze ntiinə ka a nùŋə̀ e ntɨŋmə̀ e aŋunə ndàʼà Moonə̀ Nẅùə̀.
19Lə̌ tsaʼnə Nẅùə̀ à wa nsaʼà mɨ̀sàʼa mɨ pə̀ənə̀: Nẅùə̀ à tsàa mə nkàʼà a àtwuə̀ ɨ̀shyə̂, la pànə̀ kòŋə̀ a ghobə pə ndzùmə ntsàarə̀ nkàʼà, ntiinə ngɨ̀rə̀ mɨ̀nwùə̀ ɨ̀zobə pɨ̂nə. 20Ŋwùə̀ wa ntsùmə̀ nɨ à wa ngɨ̀rə̀ a tɨ̀pòŋə̀ à wa mbàanə̀ nkàʼà ka kɨ furə̀ e a sàŋə̀, ntiinə a wa mbô lo mbə̀ʼə pànə̀ zəənə̀ ngɨ̀rə̀ ɨ̀nwùə̀ ɨ̀ze. 21Ŋònə̀ nɨ à wa ngɨ̀rə̀ a nkǔŋə nkuŋə à wa nfurə̀ a sàŋə̀ mbə̀ʼə nkàʼà ghu ɨ̂ kyàʼà mɨ̀nwùə̀ ɨ̀me mɨ̀shìʼnə̀ lo pànə̀ zəənə̀ nzhyə̂ lo mèrə furə̀ ambo Nẅùə̀.
Yěsû pobə Jònə
22Zèrə zə̀ ànwùə̀ a lə̀ làŋə̀, Yěsû pobə ɨ̀zùŋə̀ ndzùmə̀ ɨ̀pe lèrə̀ amwuə àlaʼà Judyà nchyə̂ ghu aŋunə mətùmə nkwùə̀ ntyiʼə̀ mmə ŋŋâ àkẅiirə̀ nchyə. 23Jònə à lə̀ kɨ mmə ŋŋâ àze àkẅiirə̀ nchyə a àlaʼà Enònə̀ a nɨ̀pwùnə Salìmə̀, ntiinə nchyə ɨ lə̀ pənə ghu nnoʼò, pànə̀ tyiʼə̀ mmə ntô ghu lo â ŋâ a ghobə nɨ àkẅiirə̀ nchyə. 24A lə̀ kɨ pə nkwùə̀ ghu, pɨ pirə̀ e tɨ chyâ a Jònə a ndâ ɨ̀tsaŋə̀.
25Àtànkə̀ àtse a lə̀ furə̀ a tɨ̀tɨ̀rə̀ ɨ̀zùŋə̀ ndzùmə̀ Jònə pobə ŋwùə̀ pɨ̀Jew mbə̀ʼə ànwùə̀ nɨ̀sùu mbɨ̀ŋmə̀ ɨ̀zobə ɨ̂ laanə̀ a nɨ zùŋə̀ a mbòomə ànwùə̀ Nẅùə̀ pɨ̀Jew. 26Pobə lə̀ myàʼtə̀ a ŋwùə̀ pɨ̀Jew wa ngə̀ ntsirə̀ a Jònə nshwəŋə̀ ambo ze lo, “Ɨ̀nèrə̀, ŋònə̀ wa nɨ pɨghə ze lə̀ pənə a ndzìnə nchyə Jodànə̀, wə̀ kɨ nshwəŋə̀ mbə̀ʼə e a sàŋə̀ sàŋə̀, à ẅùə̀ nkɨ ŋŋâ àkẅiirə̀ nchyə, pànə̀ pɨ̀tsùmə̀ tyiʼə̀ mmə ndèrə̀ ambo ze.”
27Jònə a kẅùə̀ lo, “Mbə̀ʼə ŋwùə̀ a laʼa mbə e nɨ àzwuumə̀ tɨghu zèrə furə̀ a nɨ̀pwuurə̀ apə̀. 28Tyìʼə̀ pɨghə a ɨ̀pâ pɨ̀ndzəənə̀ zəənə̀nə tsaʼnə ndə̀ shwəŋə̀nə lo, ‘Ka mbə mə̀ la Ghù Ndzoʼnə wa, ǹchyə̂ mbə mə̀ la ẅùə̀ nɨ Nẅùə̀ à lə̀ tsàanə lo n̂dzàamə̀ ntô.’ 29Ngɨ̀ɨnə̀ à chyə̂ ambo ndwuumə̀ ngɨ̀ɨnə̀, la ɨ̀swùə ndwuumə̀ ngɨ̀ɨnə̀ wa nɨ à wa ntəəmə̀ a nɨ̀pwùnə ndwuumə̀ ngɨ̀ɨnə̀ mmə nzhwiʼtə̀ ambo ndwuumə̀ ngɨ̀ɨnə̀ la à wa ndẅenə̀ nɨ nɨ̀ghaʼà nkwùə̀ nɨ à zuʼnə ngyə̀ ndwuumə̀ ngɨ̀ɨnə̀ ghu. Lenəla, nɨ̀ghaʼà mə̀ wə̀ à koʼò mbwùumə̀, 30ntiinə ǎ mə faŋə̀ lèrə̀ nɨ mbyə̀, n̂tyiʼə̀ mmə nshwùʼtə̀ nkwə̂ nɨ ndzùmə̀.”
Ŋònə̀ wa nɨ à furə̀nə a nɨ̀pwuurə̀
31Ŋònə̀ wa nɨ à furə̀nə a nɨ̀pwuurə̀ nshwuʼə̀ à tsàarə̀ a ŋwùə̀ ntsùmə̀. Ŋònə̀ nɨ à furə̀nə a àtwuə̀ ɨ̀shyə̂ a ŋwùə̀ àtwuə̀ ɨ̀shyə̂ nkɨ mmə nshwəŋnə̀ àshwəŋnə̀ àtwuə̀ ɨ̀shyə̂. La ŋònə̀ nɨ à furə̀nə a nɨ̀pwuurə̀ nshwuʼə̀, à tsàarə̀ a ŋwùə̀ ntsùmə̀. 32A shwəŋə̀ ɨ̀nwùə̀ nɨ à zəənə̀nə nkɨ ndzuʼù la ka ŋònə̀ ɨ̀tse a kẅiirə̀ ntwuumə̀ e. 33La ŋònə̀ wa ntsùmə̀ nɨ à pyiimə̀nə ànwùə̀ nɨ à shwəŋə̀nə, à tompə̀ la lo Nẅùə̀ a Nẅùə̀ nkǔŋə nkuŋə, 34mbə̀ʼnə ŋònə̀ wa nɨ Nẅùə̀ à twuumə̀nə e, à wa nshwəŋə̀ la àshwəŋnə̀ Nẅùə̀ ntiinə Nẅùə̀ à wə̀ ndẅenə̀ e nɨ Àzhwùə̀ tɨ àndànə̀. 35Tǎ à kòŋə̀ a moonə̀ e ndə̀ kɨ ŋŋâ ɨ̀pwuumə̀ ɨ̀tsùmə̀ ambo ze. 36Ŋònə̀ nɨ à nùŋə̀nə ntɨŋmə̀ e aŋunə ze, à wa nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀, la ŋònə̀ wa nɨ ka à mə ndzuʼnə̀ e a moonə̀ wə̀, ka à pə ghǎ pə e nɨ nɨ̀chyə̂mbyə̂; la àtsə̂ ntɨŋmə̀ Nẅùə̀ â ghoŋə̀ aŋunə ze.
Aktuálne označené:
Jònə 3: pny
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2017, Cameroon Association for Bible Translation and Literacy
