ಮತ್ತಾಯ 7
7
ದೇವಡ ಮಕ್ಕ ಬೋರೆಯಿಂಗಳ ತೀರ್ಪ್ ಮಾಡ್‌ವಕ್ಕಾಗ
(ಲೂಕ 6.37,38,41,42)
1ನಿಂಗ ದಾರ್‌ನು ತೀರ್ಪ್ ಮಾಡತಿ. ಅಕ್ಕ ನಿಂಗಳ ದೇವ ತೀರ್ಪ್ ಮಾಡುಲೆ.
2ಎನ್ನಂಗೆಣ್ಣ್‌ಚೇಂಗಿ, ನಿಂಗ ಬೋರೆ ಜನತ್‍ನ ಎನ್ನನೆ ತೀರ್ಪ್ ಮಾಡ್‍ವಿರೋ ಅನ್ನನೆ ದೇವ ನಿಂಗಕು ತೀರ್ಪ್ ಮಾಡ್‌ವ. ಏದ್ ಅಳ್‌ತೆಲ್ ನಿಂಗ ತೀರ್ಪ್ ಮಾಡ್‌ವಿರ, ಅದೇ ಅಳ್‌ತೆಲ್ ದೇವ ನಿಂಗಳ ಸಹ ತೀರ್ಪ್ ಮಾಡ್‌ವ. 3ನೀಡ ಕಣ್ಣ್‌ಲ್ ಉಳ್ಳ ಮರ ಪಾರ್‍ನ ನೋಟತೆ, ನೀಡ ಅಣ್ಣತಮ್ಮಣಂಡ ಕಣ್ಣ್‌ಳ್ ಉಳ್ಳ ದೂಳ್‍ನ ಎನ್ನಂಗ್ ನೋಟ್‍ವಿಯ?
4ನೀಡ ಕಣ್ಣ್‌ಲ್ ಮರ ಪಾರ್ ಇಪ್ಪಕ ನೀಡ ಅಣ್ಣತಮ್ಮಣನ ನೋಟಿತ್: ನಾನ್ ನೀಡ ಕಣ್ಣ್‌ಲ್ ಉಳ್ಳ ದೂಳ್‍ನ ಎಡ್‍ಪೀಂದ್ ಎಣ್ಣ್‌ವದ್ ಎನ್ನನೆ? 5ಓ ಕಪಟಿಯಳೇ! ಮಿಂಞ ನೀಡ ಕಣ್ಣ್‌ಲ್ ಉಳ್ಳ ಮರ ಪಾರ್‍ನ ಎಡ್‍ತಿತ್ ಕನ್‍ಚಿರ್. ಅಕ್ಕ ನೀಡ ಅಣ್ಣತಮ್ಮಣಂಡ ಕಣ್ಣ್‌ಲ್ ಉಳ್ಳ ದೂಳ್‍ನ ಎಡ್‍ಪಕ್ ನೀಕ್ ಚಾಯಿ ಕಾಂಬ. 6ಪವಿತ್ರವಾನ ಏದನೂ ನಾಯಿಕ್ ಕೊಡ್‌ಕತಿ. ನಿಂಗಡ ಮಾಣಿಕ್ಯತ್‍ನ ಪಂದಿಯಡ ಎದಿಕೆ ಕನಿಕತಿ. ಅನ್ನನೆ ನಿಂಗ ಮಾಡ್‍ಚೇಂಗಿ ಅಯಿಂಗ ಅದ್‍ನ ಕಾಲ್‌ಲ್ ಚೌಟಿತ್ ಬಯ್ಯ ನಿಂಗಳ ಕಡಿಪಕ್ ಬಪ್ಪ.
ಕ್‍ೕಳಿ, ತ್‍ೕಡಿ, ತಟ್ಟಿ
(ಲೂಕ 11.9–13)
7ಕ್‍ೕಳಿ, ಅಕ್ಕ ನಿಂಗಕ್ ತಪ್ಪ. ತ್‍ೕಡಿ ನಿಂಗಕ್ ಕ್‍ಟ್ಟುವ. ಪಡಿನ ತಟ್ಟಿ, ಅಕ್ಕ ನಿಂಗಕ್ ಪಡಿ ತೊರ್‌ಪ. 8ಎನ್ನಂಗೆಣ್ಣ್‌ಚೇಂಗಿ ದಾರೆಲ್ಲಾ ಕ್‍ೕಪ ಅಯಿಂಗಕ್ ಕ್‍ಟ್ಟುವ; ದಾರೆಲ್ಲ ತ್‍ೕಡ್‌ವ, ಅಯಿಂಗಕ್ ಕಾಂಬ; ದಾರೆಲ್ಲ ತಟ್ಟ್‌ವ, ಅಯಿಂಗಕ್ ಪಡಿ ತೊರ್‌ಪ. 9ನಿಂಗಡಲ್ಲಿ, ಏದ್ ಮನುಷ್ಯ ಅಂವೊಂಡ ಮೋಂವೊ ಒಟ್ಟಿ ಬೋಂಡೂಂದ್ ಕ್‍ೕಪಕ, ಆಂಗ್ ಬದ್‍ಲ್ ಕಲ್ಲ್‌ನ ಕೊಡ್‍ಪಿರ? 10ಅಲ್ಲೇಂಗಿ, ಅಯಿಂಗ ಮೀನ್‌ನ ಕ್‍ೕಪಕ ಪಾಂಬ್‍ನ ಕೊಡ್‍ಪಿರ? 11ಅಕ್ಕ, ಕಪಟಿಯಾನ ನಿಂಗ, ನಿಂಗಡ ಮಕ್ಕಕ್ ನಲ್ಲ ಇನಾಮ್‍ನ ಕೊಡ್‍ಪಕ್ ಗೊತ್ತಿಪ್ಪಕ, ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪ ತಾಂಡ ಪಕ್ಕ ಕ್‍ೕಪಯಿಂಗಕ್ ಎಚ್ಚಕ್ ನಲ್ಲ ವಸ್ತುನ ತಪ್ಪ? 12ಆನಗುಂಡ್, ಬೋರೆಯಿಂಗ ನಿಂಗಕ್ ಎಂತ ಮಾಡಂಡೂಂದ್ ಕುಶಿ ಪಡ್‌ವಿರೋ ಅದ್‍ನ ನಿಂಗ ಬೋರೆಯಿಂಗಕು ಮಾಡಿ. ಇದೇ ನ್ಯಾಯಪ್ರಮಾಣ ಪಿಂಞ ಪ್ರವಾದಿಯಡ ಬೋದನೆಯು ಆಯಿತುಂಡ್.
ಇರ್ಂಗ್‍ನ ಪಿಂಞ ಅಗಲವಾನ ಬಾಯಿಕಂಡಿ
(ಲೂಕ 13.24)
13ಇರ್ಂಗ್‍ನ ಬಾಯಿಕಂಡಿಲ್ ಪೋಪನೆಕೆ ನಿಂಗ ಈ ಲೋಕತ್‍ಲ್ ಬದ್‍ಕ್‍ವಿರ, ಎನ್ನಂಗೆಣ್ಣ್‌ಚೇಂಗಿ, ಪಾಳಾಪಕುಳ್ಳ ಬಾಯಿಕಂಡಿ, ಅಗಲವಾಯಿತ್ ಉಂಡ್. ಅದ್ಂಡ ಬಟ್ಟೆ ಬಲ್ಯದು, ಅಗಲವಾಯಿತು ಉಂಡ್. ಆ ಬಟ್ಟೇಲ್ ಪೋಪಯಿಂಗ ದುಂಬ ಉಂಡ್. 14ಆಚೇಂಗಿ ನಿತ್ಯ ಜೀವಕ್ ಪೋಪ ಬಟ್ಟೇರ ಬಾಯಿಕಂಡಿ, ಇರ್‍ಂಗನದು ದುಂಬ ಕಷ್ಟವಾನದು ಆಯಿತುಂಡ್. ಅದ್‍ನ ಚೆನ್ನ ಜನ ಮಾತ್ರ ಕಂಡ್‍ಪುಡಿಪ.
ಮರ ಪಿಂಞ ಅದ್ಂಡ ಪಣ್ಣ್
(ಲೂಕ 6.43,44)
15ಕಳ್ಳ ಪ್ರವಾದಿಯಂಗಡ ವಿಷಯತ್ ಎಚ್ಚರತ್‍ಲ್ ಇರಿ. ಅಯಿಂಗ ಪೊರಮೆ ಸಾದು ಕೊರಿರನೆಕೆ ವೇಷ ಇಟ್ಟಂಡ್ ಬಪ್ಪ. ಆಚೇಂಗಿ, ಹೃದಯತ್‍ಲ್ ಅಯಿಂಗ, ಕೀತ್‍ವ ತೋಳರನೆಕೆ ಇಪ್ಪ. 16ಒರ್ ಮರತ್‍ರ ಗುಣ ಅದ್ಂಡ ಪಣ್ಣ್‌ಯಿಂಜ ಗೊತ್ತಾಪನೆಕೆ, ಅಯಿಂಗಡ ನಡತೆಯಿಂಜ ನಿಂಗಕ್ ಅಯಿಂಗಳ ಗೊತ್ತಾಪ. ನಿಂಗ ದ್ರಾಕ್ಷಿ ಪಣ್ಣ್‌ನ ಮುಳ್ಳ್ ಗಿಡತ್ಂಜ ಪರಿಪಿರ? ಅಥವ ಅತ್ತಿ ಪಣ್ಣ್‌ನ ಮದ್ದ್ ಗಿಡತ್ಂಜ ಪರಿಪಿರ? 17ಅನ್ನನೆ ನಲ್ಲ ಮರ ನಲ್ಲ ಪಣ್ಣ್‌ನ ತಪ್ಪ, ಆಚೇಂಗಿ ಕೆಟ್ಟ ಮರ ಕೆಟ್ಟ ಪಣ್ಣ್‌ನ ತಪ್ಪ. 18ಒರ್ ನಲ್ಲ ಮರ ಕೆಟ್ಟ ಪಣ್ಣ್‌ನ ತಪ್ಪಕ್ ಕಯ್ಯುಲೆ ಅನ್ನನೆ ಕೆಟ್ಟ ಮರ ನಲ್ಲ ಪಣ್ಣ್‌ನ ತಪ್ಪಕ್ ಕಯ್ಯುಲೆ. 19ಆನಗುಂಡ್ ನಲ್ಲ ಪಣ್ಣ್‌ನ ಕೊಡ್‍ಕತ ಎಲ್ಲಾ ಮರತ್‍ನ ಕೆತ್ತಿತ್ ತಿತ್ತ್‌ಕ್ ಇಡ್‌ವ. 20ಅನ್ನನೆ ಕಳ್ಳ ಪ್ರವಾದಿಯಂಗಡ ನಡತೆಯಿಂಜ ನಿಂಗಕ್ ಅಯಿಂಗಳ ಗೊತ್ತಾಪ.
ನೇರಾನ ಶಿಷ್ಯಂಗ
(ಲೂಕ 13.25–27)
21ನನ್ನ, ಒಡೆಯನೇ, ಒಡೆಯನೇಂದ್ ಕಾಕ್‍ವ ಎಲ್ಲಾರು ಪರಲೋಕಕ್ ಪೋಪುಲೆ, ಆಚೇಂಗಿ ದಾರ್ ಪರಲೋಕ ರಾಜ್ಯತ್‍ಲ್ ಉಳ್ಳ ನಾಡ ಅಪ್ಪಂಡ ಚಿತ್ತತ್‍ನ ನೆರೆವೇರಿಚಿಡ್‍ವ ಅಯಿಂಗ ಮಾತ್ರ ಪರಲೋಕಕ್ ಪೋಪ. 22ನ್ಯಾಯತೀರ್ಪ್ ದಿವಸತ್‍ಲ್ ದುಂಬ ಜನ ನಾಡ ಪಕ್ಕ ಬಂದಿತ್, ಸ್ವಾಮೀ, ಸ್ವಾಮೀ, ನೀಡ ಪೆದತ್‍ಲ್ ನಂಗ ಪ್ರವಾದನೆ ಮಾಡ್‍ಚಲ್ಲಾ? ನೀಡ ಪೆದತ್‍ಲ್ ನಂಗ ಕೂಳಿ ಪುಡ್‌ಚಯಿಂಗಕ್, ಕೂಳಿನ ಬುಡ್‌ತಿತ್‌ಲ್ಲೆಯಾ? ನೀಡ ಪೆದತ್‍ಲ್ ದುಂಬ ಅದ್ಬುತ ಕಾರ್ಯ ಮಾಡಿತ್‌ಲ್ಲೆಯಾಂದ್ ಎಣ್ಣುವ. 23ಅಕ್ಕ ನಾನ್ ಅಯಿಂಗಕ್, ನಿಂಗಳ ನಾಕ್ ಗೊತ್ತಿಲ್ಲೆ, ಪಾಪಿಯಳೇ ಎಲ್ಲಾರು ನನ್ನ ಬುಟ್ಟಿತ್ ಇಲ್ಲಿಂಜ ಪೋಯಿರೀಂದ್ ಎಣ್ಣ್‌ವಿ.
ಗಟ್ಟಿಯಾನ ಅಡಿಪಾಯತ್‍ಲ್ ಕಟ್ಟಡ ಕೆಟ್ಟ್‌ವದ್
(ಲೂಕ 6.47–49)
24ನಾಡ ಬೋದನೆನ ಚಾಯಿತೆ ಕ್‍ೕಟಿತ್, ಅದ್ಂಡ ಪ್ರಕಾರ ನಡ್‍ಪಯಿಂಗ ಬಂಡೆ ಕಲ್ಲ್‌ರ ಮೇಲೆ ಮನೆ ಕೆಟ್ಟ್‌ನ ಬುದ್ದಿವಂತ ಮನುಷ್ಯಂಡನೆಕೆ. 25ದುಂಬ ಮಳೆ ಬಾತೇಂಗಿಯು, ಪೊಳೆ ಉಕ್ಕಿತ್ ಮನೆಕ್ ಪೊಜ್ಜತೇಂಗಿಯು, ಆ ಮನೆಕ್ ಬಿರ್‌ಗಾಳಿ ಬಾತೇಂಗಿಯು ಸಹ ಆ ಮನೆ ನಾಶ ಆಕತೆ ಇಪ್ಪ. ಎನ್ನಂಗೆಣ್ಣ್‌ಚೇಂಗಿ ಆ ಮನೆರ ಅಡಿಪಾಯ ಬಂಡೆ ಕಲ್ಲ್‌ರ ಮೇಲೆ ಇಟ್ಟಿತುಂಡ್. 26ಆಚೇಂಗಿ ದಾರ್ ನಾಡ ಬೋದನೆನ ಕ್‍ೕಟಿತ್ ಅದ್ಂಡ ಪ್ರಕಾರ ನಡ್‍ಕತೆ ಇಪ್ಪ, ಅಂವೊ ಅಡಿಪಾಯ ಇಲ್ಲತೆ ಮಣತ್‌ರ ಮೇಲೆ ಮನೆ ಕೆಟ್ಟ್‌ನ ಮುಠಾಳರನೆಕೆ. 27ದುಂಬ ಮಳೆ ಬಂದಿತ್, ನೀರ್ ಉಕ್ಕಿ ಬಂದಿತ್, ಆ ಮನೆರ ಮೇಲೆ ಗಾಳಿ ಬೀಜ್‌ವಕ, ಆ ಮನೆ ಬುದ್ದಿತ್ ಪೋಪ. ಬುದ್ದಿತ್, ಎಲ್ಲಾ ಪಾಳಾಯಿ ಪೋಪಾಂದ್ ಎಣ್ಣ್‌ಚಿ.
28ಯೇಸು ಇನ್ನನೆಯೆಲ್ಲಾ ಬೋದನೆ ಕೊಡ್‍ತ ಪಿಂಞ ಜನಯೆಲ್ಲಾ ದುಂಬ ಆಶ್ಚರ್ಯ ಪಟ್ಟತ್. 29ಎನ್ನಂಗೆಣ್ಣ್‌ಚೇಂಗಿ ಯೇಸು, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡನೆಕೆ ಬೋದನೆ ಮಾಡತೆ, ಅದಿಕಾರ ಉಳ್ಳಂವೊನನೆಕೆ ಬೋದನೆ ಮಾಡ್‍ಚಿ.
Aktuálne označené:
ಮತ್ತಾಯ 7: ಕೊಡವ
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2017, New Life Literature (NLL)
