Mateo 8
8
Yang Pagpamaayen Ni Jesus Tung Sasang Taung May Dispirinsia Tung Ulit Nang Makamamansa (8:1-4)
Marcos 1:40-45; Lucas 5:12-16
1Taa numanyan, tung pandanek ni Jesus tung napabukatud ang atiing pinagtuldukan na, duru-durung mga taung namagpakignunut da tung anya. 2Buay-w̱uay ta gesye, may sasang taung nagpalenget tung anya ang may dispirinsia tung ulit nang makamamansa#8:2 Yang ug̱ali nira atii kanay, kung tinu pay may dispirinsia tung ulit nang maning tiang makamamansa, bawal ang magpakiugpu tung mga masigkatau na ig ya ra ka dayun ay pagsangkelan na ang indi mapagtuu tung Dios duun tung pagtuuan nirang pinakalusu.. Dayun dang nagluud tung pinagtalungaan nirang durua ang nagpakiildaw tung anyang mag̱aning, “Ameey, kung malelyag̱a ilem, nag̱askeanu ang sarangan mung kuaten tung yeen yang dipirinsiaung naang pagpamansa tung pagkatauu,” mag̱aning. 3Numanyan, dayun dang dineenan ni Jesus ang inaning, “Ag̱alelyag̱aw ka, kuatana ra yeen,” mag̱aning. Pagkatapus lag̱i-lag̱ing nakuatan da ka man tung dipirinsia nang atia. 4Numanyan nagkalalangan da ti Jesus tung anyang mag̱aning, “Kuidaw, india ra enged magbaw̱alitaen maskin tung ninu pa natetenged tung binuatung naa tung nuyu. Anday dumang buaten mu, mag̱angaya ra kanay duun tung sasang pari ang magpateleng ang yawa limpiu ra. Pagkatapus magpadasag̱a ra ka dayun tung anya ta sasang ayep ang iprisintar na tung Dios ang katulad ka tung urdinansang ibinutwan ni Moises ang tukaw#8:4 Levitico 14:1-32 ug̱ud asan da nga kumpurmiay yang mga tau ang anda ray dapat ang pamiruan nira tung nuyu,” mag̱aning.
Nag̱adayaw Ni Jesus Yang Pagtaralig̱en Yang Sasang Kapitan Ang Durug Dakul (8:5-13)
Lucas 7:1-10; 13:28-29
5-6Taa numanyan, atiing ti Jesus kuminaw̱ut da duun tung lansangan ang Capernaum, may nagpakigbag̱as tung anyang sasang kapitan tung sang grupung mga sundalung atiang mga tag̱a Roma. Durung pakiildaw na tung ni Jesus ang mag̱aning, “Ameey, yang turuw̱ulunu paglaru. Ya ra ileg lalakday takaa tung balay ang indi ra mapangimi-kimi. Durug liwag yang pagkabetang na.” 7Mag̱aning ti Jesus ang nagtimales, “Angayenu ra kanay ang pamaayenen.” 8Mag̱aning ka yang kapitan ang nagtuw̱al, “Ameey, indi ra. Belag̱anaw bag̱ay tung nuyu ang yawa pay patakwalenu tung balayu. Basta magkalalangana ra ilem, atiang lag̱i magmaayen da yang turuw̱ulunu. 9Kipurki maskin nganing yuu, kabisaduaw ra ka tung pagpalalang tung mas abwat ta katengdanan tung yeen ig kabisaduaw ra ka tung pagkalalangan tung mga sundaluu. Kung lalanganu yang sam bilug ang mangay duun, atiang lag̱i magpanaw ra ka man. Pati yang sam bilug ya ka, kung guuyanung magpalenget tung yeen, atiang lag̱i, magpalenget da ka man. Asta yang sasang kirepenu ya ka, kung lalanganung mag̱ubra ta sasang bag̱ay, atiang lag̱i ubraen na ra ka man,” ag̱aaning. 10Pagkagngel ni Jesus tia, nabereng da ta mupia. Dayun dang nagbitala tung mga taung atiang pamagpakignunut tung anya ang mag̱aning, “Iugtulu tung numyu yang kamatuuran, taa tung banwa tang naang Israel, anda pay taung nag̱apanawanung maning taag dakul yang pagtaralig̱en na tung yeen. 11Iugtulu tung numyu, kung ipabistu ra nganing yang Dios yang paggaraemen na tung baklung kaliw̱utan, durung mga taung tag̱a maskin ay pang banwaay ang belag̱an pa man mga masigkanasyun ta ang ya ray panlugtan yang Dios ang mamagpakisaru ra tung na Abraham, ni Isaac, may ni Jacob#8:11 Atii kanay, durung paglamku yang mga Judio tung mga taung belag̱an mga masigkanasyun nira natetenged belag lug̱ud tung pinangakuan yang Dios tung nasyun nira. Indi nganing magpakisaru tung tag̱a duma-rumang nasyun. Purisu yang inaning ni Jesus ang naa, indi enged risibien nira.. 12Piru yang kadaklan ang mga kanubli nira simanyan ang mabaked yang pagtalig nira ang tanira ray bag̱ay ang mangalg̱ud, ya pa kay pangaskasen yang Dios ang ipamlek duun tung sasang lugar ang makiklep ang alawid ang pisan tung anya. Duun da tanira mamagtarangiten ang mamagkaretket yang mga isi nirang mamagpapinitinsia,” mag̱aning. 13Pagkatapus dayun na sing inaning yang kapitan ang, “Puidia ra kang mulik. Magkamaningan da ka man yang kumpurming itinalig mu tung yeen,” ag̱aaning. Pagkatapus tung uras ang atii, nagmaayen da ka man yang turuw̱ulun yang kapitan.
Duru-durung Mga Tau Ang Nag̱apampamaayen Ni Jesus (8:14-17)
Marcos 1:29-34; Lucas 4:38-41
14Taa numanyan, pagkaw̱ut ni Jesus duun tung balay ni Pedro, ya ray naita na yang punyangan nang baw̱ay ang ya ra ilem aglalakday asan. Ay agkiniten da. 15Numanyan pagdeen ni Jesus tung kalima na, lag̱i-lag̱ing naumpawan yang maepet. Pagkatapus diritsyu rang nagbangun ang nag̱impisa rang nag̱asikasu tung anya.
16Numanyan, atiing pagkasantek da yang kaldaw, durung mga taung agdimunyuen ang ipinampadangep da yang mga aruman nira tung ni Jesus. Numanyan sam pabitala ra ilem ni Jesus, antimanung namaglalayasan da yang mga dimunyu. Pati yang mga taung may mga laru, luw̱us na ra kang pinampamaayen tung uras ang atii. 17Nagkamaningan da ta maning tia ug̱ud asan da magkamatuud yang sasang ipinaula yang Dios tung ni Isaias ang sasang manigpalatay nang tukaw ang mag̱aning,
“Tanya mismu yang magpamaayen tung yaten tung mga kaladuan ta, yay magpanguat tung mga masiit ang nag̱asinti ta,” mag̱aning#8:17 Isaias 53:4.
Yang Nag̱asikad Enged Ni Jesus Tung Sasang Taung Nag̱alelyag Dang Mag̱ing Tauan Na (8:18-22)
Lucas 9:57-62
18Taa numanyan pagkaita ni Jesus ang duru-durung mga tau ang pamagrikudu tung anya, nagkalalangan da tung yamen ang mga tauan na ang mag̱aning, “Ala, magpatindakita ra kanay,” ag̱aaning. 19Numanyan tamang tamang magsaayami ra rin na Jesus, may sasang sag̱ad tung mga urdinansang pinanubli tung mga kinaampu ang ya ray nagpalenget tung anyang mag̱aning, “Ameey, magpakignunutaw ra tung nuyung magpaugyat, maskin aria pa manganing,” ag̱aaning. 20Mag̱aning ti Jesus ang minles, “Maayen pa yang mga dayap tung talun, may mga anas nirang siguradu, pati mga lamlam may mga bayay nirang sadili. Indi ra ilem yuung pag̱aningen ang Maninga Tau ang anday pirmaminting pag̱elkanu,” mag̱aning. 21Pagkatapus may sam bilug pang taung pagpaugyat da tung ni Jesus ang yay nabngang mag̱aning tung anya, “Ameey, bakluaw ra magpadayun tung pagpaugyatu tung nuyu, kung maimu ilem tung nuyu, tugtayaw ra kanay nuyung mulik ang para kung mapatay ra nganing ti tatay, mapalg̱uru ra tung leyang,” ag̱aaning. 22Mag̱aning ti Jesus ang nagtuw̱al, “Bilug̱un mu ra ilem yang isip mung magpaugyat tung yeen. Yang bag̱ay ang atiang nainambit mu, ipatug̱ay mu ra ilem tung duma ang pamanalugpatay pa tung Dios. Bag̱ay ang pisan tung nirang mamanlug̱ud tung mga aruman nirang patay ra,” mag̱aning.
Yang Pagpalinaw Ni Jesus Tung Tampung Durug Ketel (8:23-27)
Marcos 4:35-41; Lucas 8:22-25
23Pagkatapus tia, dayun da ka enged ang nagsaay ti Jesus tung balangay, kasiraanami ra kang nag̱apangugyatan na. 24Numanyan tung pagpalayag yamen tung aw̱uyuk, nainalianami rang binungsaran ta tampung durug ketel ang asta yang balangay gesye ra ilem ang napnukan. Piru ti Jesus tanya sigi ra ilem ang elek. 25Numanyan dayun dang pinalengtan yamen ang pinuaw ang inaning, “Ameey, taw̱ang! Magkaralemesita ra taa,” ag̱aaningami. 26Mag̱aning ka ti Jesus ang nagtimales, “Ayw̱a pinatalaw mi ra yang mga isip mi? Midyu tung nag̱apakulangan mi ra yang pagtaralig̱en mi tung yeen,” mag̱aning. Pagkatapus dayun dang nagbangun ang nagsambeng tung palet may tung lakun. Lag̱i-lag̱ing naglinaw rang pisan. 27Atii, durung pagkabereng yamen ang mga kaarumanan na. Purisu nag̱araning-aninganami ra ilem ang mag̱aning, “Unu ra kayang klasiay ta tau taa? Maskin yang palet pati yang lakun, luw̱us dang pamananged tung anya!” mag̱aning.
Nag̱apalayasan Ni Jesus Ta Mga Dimunyu Yang Durua NGa Tauan (8:28-9:1)
Marcos 5:1-20; Lucas 8:26-39
28Taa numanyan, pagkaw̱ut ni Jesus duun tung tindak yang aw̱uyuk duun tung baw̱anwaan yang mga Gadareno, binag̱as da ta durua nga tauan ang pariung pag̱aekel-ekelan ta mga dimunyu. Duun mamanliit tung may mga leyang ang pinanlug̱uran ta mga patay. Kumus durug karaiseg, anday magpanayang-nayang ang magpanaw duun tung karsadang atia. 29Numanyan pagbag̱as nira tung ni Jesus, dayun dang namaglelpaken yang dimunyung mag̱aning, “Yawang pag̱aningen ang Ana yang Dios, ayw̱a nag̱apasilabtanami pa nuyu? Muya yang inangay mu taa ay parusaanami ra nuyung indi pa nganing agkaw̱utun yang uras ang ipinagtipu yang Dios,” mag̱aning. 30Numanyan duun tung tukaw-tukaw, may sasang kaayepan ang mga baw̱uy ang gaw̱ung ang pamanulyad-tulyad. 31Numanyan yang mga dimunyung atia, namagpakiluuy ra ilem tung ni Jesus ang mag̱aning, “Kung yami talagang palayasenami ra ka enged nuyu tung mga taung naa, maayen pa duunami ra ilem ipasuutay mu tung mga baw̱uy ang atii,” ag̱aaning. 32Mag̱aning ti Jesus ang nagtuw̱al, “Ala, sigi ra,” ag̱aaning. Purisu dayun dang namansilayas tung durua nga tauan ang atiang namansilakted tung mga baw̱uy ang namansisuut. Pagkasuut nira tung mga baw̱uy, dayun dang namansikurbut tanirang tanan ang namagpataladtad ang diritsyu ra ilem tung aw̱uyuk ang namampakpa ang asta nagkaralemes da ilem ang luw̱us. 33Taa numanyan yang mga manig̱asikasu tung mga baw̱uy ang atia, dayun dang namaglalaksuan ang namansiangay duun tung lansangan. Pagkaw̱ut nira duun, namagbaw̱alitaen da natetenged tung tanan ang nagkarainabu. Pati yang nainabu tung durua nga tauan ang atiang dinimunyu ra rin, ya enged ay ipinagbalita nira. 34Purisu anday dumang dinangat na, yang mga taung tag̱a lansangan, alus pa ilem tanirang tanan namansilua rang namansiangay duun tung ni Jesus ang namagpakigbag̱as. Numanyan, pagkabag̱as nira tung anya, dayun dang namag̱intra amu-amu tung anya ang basta magliit da ilem duun tung banwa nira.
Aktuálne označené:
Mateo 8: tbk
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2008, Wycliffe Bible Translators, Inc. All rights reserved.
