Jenesis-Agafa 8
8
Timo taneno urami'nea ke
1Timo mopa refite'negeno Anumzamo, Noanku'ene mika zgagfanenku ventefi mani'nageno agesa nentahino, zaho atufegeno timo'a taneno urami'ne. 2Anumzamo mopa agusafinti hanati'nea tina renkani nereno, monafinti ko'ma e'nea kora azerigeno ruse'ne. 3150ti'a knamofo agu'afi timo'a akoheno taneno urami'ne. 47ni ikamofona, 17 zupa ana ventemo'a eramino mago Ararati agonarega eme runtrako hu'ne. 5Runtrako huno me'negeno timo akoheno nermigeno 10ni ikamofo ese zupa mago agonamo osi'a hanaku hige'za ke'naze.
640ti'a zge manino Noa'a zahoka anagino, mago osa rumpa huntegeno vu'ne. 7Hareno vano huno hunoteteno timo'ma uramigeno mopamo ho'mu hutegeno umani'ne. 8Omegeno Noa'a mago nma maho huntegeno mopamo ho'mu hu'nesigu, 9hareno vano hiana manisniazana omneno tinke me'negeno ete e'ne. Egeno Noa'a aza antegame teno ventefi avre vazine. 10-11Avrentegeno 7ni'agna manite'no Noa'a ete huntegeno hareno vu'ne. Olivi zafa asina atasino agipi haninkofino ana kinagage ehanati'ne. Ehanatigeno Noa keteno hago timo'a taneno uramie huno agesa antahi'ne. 12Mago'ene 7ni'agna maniteno mago'ene ana maho huntegeno hareno vuteno ete ome'ne. 13Noa'ma 601ni'a kfuma nehigeno'a, 1ni ikamofona ese knarera, mika ama mopafina timo'a ho'mu higeno, Noa'a ana ventemofona amumpafinti anasgeno keana, mopamo'a ho'mu huvgare'negeno ke'ne. 14Anante 2ikamofona 27ni zupa mopamo'a ho'mu huvaregeno Noa ke'ne.
Noa naga ventefinti atirami'naza naneke
15Anumzamo'a Noana amanage huno asmi'ne, 16-17kagrane nagaka'anena ventefintira atreta fegi'a atirmiho. Ventefima mani'naza zgagfane, nmane, mika mopafi vano nehaza zgarmine, zamare atrege'za mopafi vu'za eza nehu'za kse hakare hu'za maniho. 18Anage hige'za Noaki, nenaroki, mofavre naga'ane, anoferhe'zane atiraminaze. 19Hagi ana zgagfane, ne'onse zgarmine, nma zgane mika vono nehaza zgarmina, zamagrare zamagrare erizogi'za ventefinti atirmi'naze.
20Anantera, Noa'a Ra Anumzamofonte kre sramna vu ita trohuteno, mago'a avusese zgagfafinti ene avusese nmafinti enena aheno mika kre sramna vu'ne. 21Kre sramna vu'nea mna'agu Ra Anumzamo muse nehuno amanage Agra hu'ne, vahe'mo'za kumi hanaza zankura mago'anena ama mopa eri haviza osugahue. Hakare'mo'za nehzanteti mani'za menima e'naza knarera havi antahi'zampi mani'naze. Hakare zgarmima zamasimu nentaza zgarmina menima huaza hu'na zamahe refi otegahue.
22Ama ana mopa me'nenkeno maka'za me'nena
hoza negri'za, kafigahaze.
Zasi ko netinkeno amuhoa hugahie.
Ko' aru knane zgere knane,
zgene hanine,
hanigeno maka'zana vga oregahie.
Aktuálne označené:
Jenesis-Agafa 8: kbq
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2014, Wycliffe Bible Translators, Inc. All rights reserved.