Obľúbené biblické verše z Mataio 24

Zdieľať

O le tele o leaga o ia aso e fa‘avaivai ai le alofa o tagata e to‘atele. A o le tagata e tumau se‘ia o‘o i le i‘uga e fa‘aolaina.

E folafolaina fo‘i lenei Tala Lelei o le Mālō le lalolagi ‘atoa e fai ma molimau i tagata uma, ‘ona fa‘ato‘ā o‘o mai ai lea o le aso gata‘aga.”

E fa‘alogo ‘outou i le vevesi o tau‘a i mea lata mai, ma tala o tau‘a i nu‘u e mamao atu, ‘ae ‘aua ne‘i fa‘apopoleina ai ‘outou. E tatau ‘ona tutupu ia mea, ‘ae lē o le aso gata‘aga lea ‘ua o‘o mai.

E tau le isi nu‘u ma le isi nu‘u, e osofa‘ia fo‘i e le isi mālō le isi mālō. E i ai oge ma mafui‘e i nu‘u uma. O nei mea uma o le amataga lea o puapuagā.

E mavae atu le lagi ma le lalolagi, a o a‘u ‘upu e lē mavae lava.

Auā e to‘atele tagata e ō mai i lo‘u igoa ma fai atu, ‘O a‘u o le Keriso.’ E fa‘asesēina fo‘i e i latou tagata e to‘atele.

“ ‘Ona pu‘e fa‘a-pagotā ai lea o ‘outou e tagata, ma tu‘uina atu ‘outou e fa‘asalaina ma fasiotia. E itagia e tagata uma ‘outou ‘ona o a‘u. O aso ia e lafoa‘iina ai e tagata e to‘atele lo latou fa‘atuatua; e fa‘alata e le isi le isi; e feitaga‘i fo‘i. ‘Ona ō mai ai lea o perofeta pepelo ma fa‘asesē tagata e to‘atele.

‘Ona fetalai atu lea o Iesu, “ ‘Ia ‘outou fa‘aeteete ‘ina ne‘i fa‘asesēina ‘outou e se isi.

O le mea fo‘i lea ‘ia ‘outou nonofo sauni ai i taimi uma; auā e sau le Atali‘i o le Tagata i le taimi tou te lē manatu ai o le a sau o ia.

“O lea ‘ia ‘outou mataala ai, auā tou te lē iloa le aso e sau ai lo ‘outou Ali‘i.

“ ‘Ae leai se isi na te iloaina po o afea e o‘o mai ai lea aso ma lea itūlā, e lē iloa e agelu o le lagi, e lē iloa fo‘i e le Atali‘i; na o le Tamā lava ‘ua na silafia.

E ō mai Keriso pepelo ma perofeta pepelo, ma fai fa‘ailoga ofoofogia, ma vāvega, e taumafai e fa‘asesē ai tagata filifilia o le Atua.

O le o‘o mai o le Atali‘i o le Tagata, e pei o le mea na tupu i aso o Noa. A o le‘i o‘o mai le lolo, sa ‘a‘ai ma feinu tagata; sa faiavā ma nofo tane i latou, se‘ia o‘o lava i le taimi na ulu atu ai Noa i le va‘a. E le‘i iloa e i latou le mea o le a tupu, se‘ia o‘o lava ‘ina sau le tafega o le lolo ma fa‘aumatia ai i latou uma. E fa‘apea fo‘i le mea e tupu pe a o‘o mai le Atali‘i o le Tagata.