Obľúbené biblické verše z Juwão 3

Zdieľať

– Janejare'e pirujẽ jane kõ wauvay wete. Ajawyi ije, Wa'yry pe'ĩgwerà wyjaveay mã'ẽ rõmõ emuroka ike yvy pè. Ava mõ ojirovija katu ere wereko katuarà rõmõ remẽ, naemavo'ãi ity aa. Areko karuarutà epyri.

Kee e'i Papa eupe emuu: “Ekwa yvy kyty poroereko katuarà rõmõ”, e'i. “Ijaiwererà kõ eitypypyipaoka iwyi kõ. Erojivy kõ mijẽ tojimory mijẽ ere kupa ky'y”, e'i ije. Kee ne'i Papa ije: “Ekwa yvy kyty jane kõ momorijauoka ijaiwererà kõ repykarà mõ”, ne'i ije. Kee e'i tè ije: “Ekwa terereko katu kõ”, e'i tè ije Wa'yry rõmõ emuroka.

Ãmẽ Jesu e'i ijupe: – Aje kee a'e ene. Ava mõ sõ opota Janejare'e omoẽoka o'arà kyty iko remẽ, tisaky mijẽ. Nisakyi mijẽ remẽ, na'evo'ãi kuwa, e'i Jesu ijupe.

– Ajawyi nejirovija katu ere Janejare'e Ra'yry rõmõ remẽ, kee ne'i'ãi neupe: “Nivoi neiko. Oromonotà ajawyi jimomorijau wasua rena kyty!” ne'i'ãi Papa neupe. Kee e'ità kõrijõ tè neupe: “Noromomorijauoka'ãi, Era'yry rè nejirovija nerako'i rõmõ rewarà mõ”, e'ità kõrijõ neupe. Nojirovijai ee mãe kõ pè ãmẽ, “Era'yry wyjaveay mã'ẽ rè nerejirovijai. Ajawyi ‘nivoi mã'ẽ tè ene’, a'e kõrijõtà neupe”, e'ità. Imomorijaua rã omo'ypa a'evo ekoi mãe kõ rè. Ajawyi a'evotà.

– Poroyape mã'ẽ vo 'ejẽ ije aiko. Ãwitõ iky'a mã'ẽ pãtõnusu pè nojikuwai ipi. Jayape esa remẽ tè kuwa iky'akwerà ojikuwa. A'evo mã'ẽ teve ije, e'i Jesu. Janejare'e emuu ike jane kõ pytery pè taiko, e'i. Amojikuwaoka ipe ijaiwererà kõ ijupe kõ ipi. Nojimosĩokai weko aiwerà rè ajamã'ẽ kupa ipi. Noityoka tari waiwererà ije kupa. Ma'e rewarà mõ. Weko aiwerà ywesõ opota ewyi kupa ipi. Nomã'ẽ tari ere ãmẽ kupa ipi.

A'e ywesõ tè e'arà kytywarà rõmõ ekoi. Iwyri'ĩwarà tè ije ãmẽ aiko, e'i Juwão.

Omoane'e jẽ waiwererà ereko kupa wyi nomã'ẽ tari ere kupa ipi. Nonu tari ekoty kupa ipi. “Eaiwererà tojikuwa e'ã”, e'i tite kupa rewarà mõ a'evo ekoi kupa. Ajawyi nonu tari ekoty kupa.

Ajawyi Ta'yry rè ojirovija mãe kõ oiko karuarutà ipyri. Nojirovijai ee mãe kõ ãmẽ noiko'ãi ipyri. Janejare'e remimomorijauarà rã mõ tè ootà kupa.

– Aje Janejare'e rena pe wyi tè ajo, e'i. Ajamã'ẽ nererovijai mãe kõ ejukaokatà, e'i. Emõ'ãtà ejuka kupa, yvyra rè. Ãwitõ tãmõ Moisesi karamoe remẽ tekoe'ãma pè moe rã'ãga omõ'ã yvyra rè. A'evotà erereko kupa, e'i.

Janejare'e wauvay Wa'yry. Ajawyi wayvu omokasioka Wa'yry pè. “Jane kõ Rõvijã rõmõ neikotà”, e'i ijupe.