Mewari 2010-2017 NLCI; Non-Drama (NT)

Mewari 2010-2017 NLCI; Drama (NT)

छे दनाँ का केड़े ईसू, पतरस, याकूब अन वींका भई यहुन्ना ने मंगरा पे लेग्या। वटे वाँका हामे ईसू को रूप बदलग्यो, अन वींका मुण्डो सुरज का जस्यान गाबा उजिता का जस्यान चमकबा लागा। अन वाँने अणाचेत का मूसो अन एलियो वाँका हाते वणीऊँ बात-बच्यार करता तका देकाणा।
ईंपे पतरस ईसुऊँ क्यो, “हो परबू, आपणो अटे रेणो हव हे। यद्याँ थाँकी मरजी वे तो मूँ अटे तीन ओड़्या बणाऊँ एक थाँका वाते, एक मूसा का वाते, अन एलिया का वाते।” वो बोलईस रियो हो के, एक चमकते तके वादळे वाँने ढाक दिदा, अन वीं वादळाऊँ आ वाणी निकळी, “ओ मारो लाड़लो पूत हे, जणीऊँ मूँ राजी हूँ। ईंकी हुणो।” चेला ओ हामळन वींका पगाँ में पड़ग्या अन दरपग्या। ईसू वाँका नके आन वाँके हात अड़ायो अन क्यो, “ऊबा वो, दरपो मत।” तद्याँ वीं नाळ्या तो ईसू ने छोड़न ओरी किंनेई ने देक्या।
जद्याँ वीं मंगराऊँ रेटे उतरिया हाँ तद्याँ ईसू वाँने ओ क्यो, “जद्याँ तई मनक को पूत मरिया तकाऊँ ने जी उटी, तद्याँ तईं ज्यो कई थाँ देक्यो हे किंने भी मती किज्यो।”
ईंपे वाँका चेला वणीऊँ पूँछ्यो, “पच्छे मूसा का नेमा ने हिकाबावाळा अस्यान काँ केवे हे के, एलिया को पेल्याँ आणो जरूरी हे?”
ईसू क्यो, “एलियो जरुर अई, अन हारोई हदारी। पण मूँ थाँकाऊँ केवूँ हूँ के, एलियो आग्यो हे, अन लोग-बागाँ वींने ने ओळ्क्यो। पण जस्यान छाया वस्यान वींका हाते किदो। अणीस तरियाँ मनक को पूत भी वाँका हाताऊँ दुक उटाई।”
तद्याँ चेला हमज्या के, वाँकाणी आपाऊँ यहुन्ना बतिस्मा देबावाळा का बारा में क्यो हे।


जद्याँ वीं लोगाँ की टोळी में पाच्छा आया, तो वटे एक मनक वाँका नके आयो अन पगा पड़न केबा लागो, “हो परबू, मारा पूत पे दया कर! काँके वींने मर्गी को जोलो आवे हे, अन वो घणो दुक भोगरियो हे अन वो नरी दाण वादी में अन नरी दाण पाणी में पड़ जावे हे। में थाँरा चेलाऊँ ईं हुगली आत्माने बारणे निकाळबा के वाते परातना करई। पण, वीं ईंने ने निकाळ सक्या।”
ईसू वींकी बात हुणन क्यो, “अरे बना विस्वास का मनक, मूँ थाँकी लारे कतरा दन तईं रेऊँ? अन कतरा दन थाँकी बाताँ ने सेण करूँ? वीं छोरा ने मारा नके लावो।” तद्याँ ईसू हुगली आत्माने आग्या दिदी अन वाँ वणी छोरा मूँ बारणे निकळगी अन छोरो वणीस दाण हव वेग्यो।
तद्याँ चेला एकला में ईसू का नके आन क्यो, “में हारई जणा ईं हुगली आत्माने काँ ने काड़ सक्या?”
ईसू वाँने क्यो, “थाँका कम विस्वास की वजेऊँ। मूँ थाँकाऊँ हाचेई केवूँ हूँ, यद्याँ थाँको विस्वास हरूँ का दाणा का जतरोक भी वेतो, तो ईं मंगराऊँ केता के, ‘अटूऊँ हरकन वटे जातो रे, तो वो जातो रेई।’ कुई बात थाँका वाते अबकी ने वेई। अस्यी हुगली आत्मा बना एकाणो अन परातना के ने निकळे हे।”


जद्याँ वीं गलील में हाँ, तो ईसू वाँने क्यो, “मनक को पूत मनकाँ का हाताँ में धोकाऊँ पकड़वायो जाई। वीं वींने मार नाकी, अन वो तीजे दन जी उटी।”
ईंऊँ वीं चेला घणा दकी वेग्या।

जद्याँ ईसू अन वींका चेला कफरनूम पूग्या, तो मन्दर का हाँसल लेबावाळा पतरस का नके आन पूँछ्यो, “कई, थाँको गरू मन्दर को हाँसल ने देवे हे?”
पतरस क्यो, “हाँ, देवे हे।”
जद्याँ पतरस घरमें आयो, तो ईसू वाँके पूँछबा का पेल्याई वणीऊँ क्यो, “हे समोन, थूँ कई होच-बच्यार करे हे? धरती का राजा हाँसल किंकाऊँ लेवे हे? आपणाँ पूतऊँ कन परायाऊँ?”
पतरस वाँकाऊँ क्यो “परायाऊँ।”
ईसू वींने क्यो, “तो पछे पूत ने हाँसल देबाऊँ बंचग्या। तद्याँ भी ईं वाते के, आपाँ वाँने नाराज ने करा। ईं वाते थूँ समन्द का कनारे जाळ नाक अन ज्यो माछळी पेल्या निकळे वींने ले, वींको मुण्डो खोलबाऊँ थने एक रिप्यो मेली। वींने लेजान मारा अन खुद का आड़ीऊँ वाँने दे दिज्ये।”

Počúvaj मत्ती 17