Kaba for CAR - ACATBA; 2020  Drama (NT)

Kunn-kutu nɛ̂n tə̂ njaa, Tar ee tə̂ənn mban. Tar le ee mbɔr Lubba tə̂ ngaâ Tar le to Lubba. Kunn-kutu nɛ̂n tə̂ njaa, Tar le ee mbɔr Lubba tə̂. Lubba dda nɛ̂n tɔyn ddəw tə̂ laa. Nɛ̂n kâra kə̂ Lubba inyɛ̂ a dda kə karɛ̂ baa goto. Təbbə to mə Tar tə̂ le ngaâ təbbə le to lo-karɛ lə dəwje. Lo-karɛ le aw ndoko lo ndul tə̂, a lo ndul le tɔɔy dɔɛ̂ ang.
Lubba ula marə dəw kə̂ ria nan Jan. N̂-ddee to nje-tar-naji, ta kɔru naji lə lo-karɛ bba karə dəwje tɔyn ooje məde tə̂ kə lo-karɛ le ddəw tə̂ laa. Jan to lo-karɛ le ang, n̂-to nje-tar-naji lə lo-karɛ le.
Tar le to lo-karɛ kə̂ tɔkɔrɔ. N̂-ddee dɔ nangə tə̂ ngaâ n̂-ndoko dɔ dəwje tə̂ tɔyn.
Tar le to duninya tə̂ nəənn. Ngaâ duninya to ddəw tə̂ laa. A duninya le gəre ang. Tar le ddee bbeê laa njaa, a njê kə̂ bbeê laa le tɛɛ̂je kə rɔde tə̂ ang. A dəwje tɔyn kə̂ tɛɛ̂je kə rɔde tə̂ ngaâ ooje məde tə̂ saa, dede le, narəde singa karə n̂-ddeeje to ngann lə Lubba. Ngaâ n̂-ddeeje to ngann lə Lubba kə̂ dujude ddəw mə-ndiki tə̂ lə Lubba, bbo ddəw kuju tə̂ lə dəwje ang ddəm ddəw mə-ndiki tə̂ lə dəwje ang ddəm.
Tar le təl to dəw ngaâ dda bbe horoje tə̂. Mə-maji laa kə tar kə̂ tɔkɔrɔ laa uta dɔɛ̂. Joo piti laa kə̂ in rɔ Lubba tə̂.
Jan to nje-tar-naji laa. N̂-pa kə ndu kə̂ mɔngu nan: «Ne kə̂ m-pa tar laa le â nəənn: Dəw kə̂ aw ddee gom tə̂ le to dəw kə̂ ngəng utam, mba n̂-to kete narəm.»
Nɛ̂nje kə̂ maji dduse arə jeje tɔyn njaa n̂-bbar tar kə̂ maji dɔje tə̂ kə dɔ naan tə̂, dɔ naan tə̂. Lubba arəje Ndu ləw ddəw tə̂ lə Mɔyijə, a mə-maji kə tar kə̂ tɔkɔrɔ ddeeje ddəw tə̂ lə Jeju-Kristə. Dəw kâra oo Lubba ang. A Ngonn-kâra kə̂ to Lubba kə̂ isi mbɔr Bɔɛ̂je tə̂ le dda arə dəwje gəreje.

Njê-kɔnje dɔ Jiipije kə̂ Jerujalɛm ulaje njê-poloje Lubba kə njê kə̂ gəl Lebi tə̂ rɔ Jan tə̂ ta duje se, ne n̂-to nân wa? Tar-naji kə̂ n̂-pa â nəənn. N̂-kusude tar ang. A n̂-pa kəmde tə̂ tɔyn kə majɛ̂ nan: «M-to Kristə le ang.» N̂-dujeje nan: «Yeenn a, ə-to nan wa? Ə-to Eli wa?» Jan ilade tə̂ nan: «M-to Eli ang.» N̂-təl n̂-dujeje bbay nan: «Ə-to nje-kila mbər tar wa?» Jan ilade tə̂ nan: «M-to nje-kila mbər tar ang.» Yeenn ngaâ n̂-təl n̂-dujeje bbay nan: «Ə-to nân wa? Maji karə n-təl jaw pa tar kə̂ ila tə̂ le jarə dəwje kə̂ ulajeje. A əi njaa, ə-pa nan ə-to nân wa?» Jan ilade tə̂ tokə lə Ejayi kə̂ to Nje-kila mbər tar lə Lubba nan: «M-to dəw kə̂ aw ila mbər mə kɔr tə̂ nan:
‹Ə-ddaje ddəw lə Əbbə-dəwje arəje ndɔju njarara.› »
Parijinyɛje eeje horo dəwje tə̂ kə̂ dulade rɔ Jan tə̂ le. N̂-dujeje nan: «Ə-to Kristə ang ddəm Eli ang ddəm ə-to nje-kila mbər tar lə Lubba ang ddəm. A mba ddi bba aw dda dəwje batɛm wa?» Jan ilade tə̂ nan: «Əman, maw dda dəwje batɛm maann. A marə dəw kə̂ ə-gəreje ang ee horose tə̂ nəənn. Naw ddee gom tə̂, əman, masə ta tutu kula nɛ̂n-gɔl laa ang.» Nɛ̂njeenn tɔyn teeje bbe tə̂ kə̂ Betani, tura Jurdɛn tə̂, lo tə̂ kə̂ Jan aw dda dəwje batɛm tə̂.

Lo-karɛ̂ kə̂ goe tə̂ a, Jan oo Jeju kə̂ aw ddee kə rɔɛ̂ tə̂ ngaâ pa nan: «Ngonn batə lə Lubba kə̂ to nje-kɔru majang lə dəwje kə̂ duninya tə̂ â nəənn. Ne â m-pa tar laa, m-pa nan: ‹Marə dəw kə̂ aw ddee gom tə̂ le ngəng utam, mba n̂-to kete narəm.› Əman, m-gəre kete ang. A m-ddee ta dda dəwje batɛm maann, ta dda karə dəwje kə̂ Ijarayɛl gəreje.»
Jan pa tar-naji lə Jeju le nan: «Moo Ndil kə̂ in darâ ddisi tokə dər ngaâ isi dɔ Jeju tə̂. Əman, m-gəre ang. A Lubba kə̂ ulam karə m-dda dəwje batɛm maann â pa arəm nan: A koo dəw kə̂ Ndil a ddee kisi dɔɛ̂ tə̂. Ne â nâ dda dəwje batɛm Ndil-mə-nda. Əman njaa moo nɛ̂njeenn le ngaâ m-pa tar-naji nəənn m-pa nan: Dəw nəənn to Ngonn lə Lubba.»

Lo-karɛ̂ a, Jan de kə njê-njaje goe tə̂ joo n̂-təl n̂-ddeeje lo tə̂ənn. Jan aa Jeju kə̂ aw nday ngaâ pa nan: «Ooje, Ngonn batə lə Lubba â nəənn.»
Njê-njaje go Jan tə̂ kə̂ joo le ooje tar le ngaâ unnje go Jeju. Jeju turu rɔɛ̂ a, oode daw dunnje goe ngaâ dujude nan: «Ddi â aw sangəje wa?» Dilɛ̂je tə̂ nan: «Rabi, lo kə̂ dda aw to tə̂ wa?» Gəl Rabi le nan: «Nje-nɛ̂n-tɔju.»
Jeju ilade tə̂ nan: «Ə-ddeeje a, â kooje.» Dawje ngaâ dooje lo kə̂ Jeju le to tə̂ ngaâ n̂-naynje saa ndɔɛ̂ tə̂ənn. Kar aw ngɔsi kə gɔl kar sɔ kə̂ lo-kul tə̂.
Andere ngokɔn Simɔn Piyɛr to dəw kə̂ kâra horo dede tə̂ kə̂ joo kə̂ dooje tar lə Jan ngaâ dunnje go Jeju le. Dəw kə̂ dɔngɔr kə̂ Andere le ingɛ̂ to ngokɔɛ̂n Simɔn ngaâ n̂-pa narɛ̂ nan: «Jinga Mesi.» Kandə ri le nan: «Kristə.»
Naw kə Simɔn le rɔ Jeju tə̂. Jeju aa Simɔn le ddekeke ngaâ pa arɛ̂ nan: «Ə-to Simɔn, ngonn lə Jan. Dâ bbari nan Sepas ngaa.» Gəl Sepas le nan: «Piyɛr.»
Lo-karɛ̂ a, Jeju ndiki ta kaw Galile. Ninga Pilipi ngaâ n̂-pa narɛ̂ nan: «Unn gom.» Pilipi to dəw kə̂ Betesayida kə̂ to bbe lə Andere de kə Piyɛr. Goe tə̂ a, Pilipi inga Natanayɛl ngaâ pa arɛ̂ nan: «Jinga marə dəw kə̂ Makəturu-Ndu lə Mɔyijə kə lə njê-kilaje mbər tar lə Lubba paje tar laa le. Dəw le to Jeju kə̂ Najarɛtə, n̂-to ngonn lə Jojɛpə.» Natanayɛl le pa arə Pilipi nan: «Marə nɛ̂n kə̂ maji a kasə ta kin Najarɛtə tə̂ tee tɔ wa?» Pilipi ilɛ̂ tə̂ nan: «Ə-ddee oo.»
Jeju oo Natanayɛl kə̂ aw ddee kə rɔɛ̂ tə̂ ngaâ pa tar dɔɛ̂ tə̂ nan: «Ngonn Ijarayɛl kə̂ tɔkɔrɔ â toonn. To dəw kə̂ ngəm to rɔɛ̂ tɛɛ̂ ang.» Natanayɛl le duju Jeju nan: «Ə-gərəm tokə baânn wa?» Jeju ilɛ̂ tə̂ nan: «Kete bba karə Pilipi bbari, mooi kar tə̂ kə̂ ee nɛ̂n kɔ kakə pigə tə̂.» Yeenn ngaâ Natanayɛl le pa arɛ̂ nan: «Nje-nɛ̂n-tɔju, ə-to Ngonn lə Lubba, ə-to tɔkə mbay kə̂ Ijarayɛl.» Jeju ilɛ̂ tə̂ nan: «Mba pa kə̂ m-pa mari nan mooi kɔ kakə pigə tə̂ le bba oo məi tə̂ wa? A koo tɔkə nɛ̂nje kə̂ a kuta yeenn bbay.»
Jeju təl pa bbay nan: «Tɔkɔrɔ m-pa marəse, a kooje dara kə̂ təəyn ngaâ anjəje lə Lubba a kinje dɔ Ngonn lə dəw tə̂ kaw kə taar ddəm ddisi kə dɔɛ̂ tə̂ ddəm.»

Počúvaj Jan 1