If you have would like a copy of this version please contact info@davaraudiobibles.org

Limbu Old Testament

यहवे दाङ्‌बाल्‍ले़ अब्राम्‍मिन् मे़त्तु, “खे़ने़ॽ के़लाजेलाम् नु खे़ने़ॽ के़गाॽइहाॽलाम् हे़क्‍क्‍याङ् के़म्‍बारे़ कुहिम्‍मोलाम् लःन्‍दे़ॽआङ् आङ्‌गाॽ उसेःन्‍धाक्‍ने़बा लाजेॽओ पेगे़ॽ॥ आङ्‌गाॽ खे़ने़ॽ लत्‍छा यम्‍बा सुवाङ् चोःक्‍ने़, हे़क्‍क्‍याङ् खे़ने़ॽ हाङ्‌वागे़न् मुॽइसाम् पिने़॥ आङ्‌गाॽ के़मिङ् तिःत्‍ल चोगुङ्‌ॽ, हे़क्‍क्‍याङ् खे़ने़ॽ हाङ्‌वागे़न् मुॽइसाम्‍ले़ कुबुङ् के़बोङ्‌लो॥
“खे़ने़ॽ हाङ्‌वामुॽइ के़बिबाहाॽ
आङ्‌गाॽ हाङ्‌वामुॽइ पिरुङ्‌सिङ्‌लो,
हे़क्‍क्‍याङ् खे़ने़ॽ साङ्‌ग्रा माङ्‌दे के़मे़प्‍पाहाॽ
आङ्‌गाॽ साङ्‌ग्रा मे़त्तुङ्‌सिङ्‌लो॥
खे़ने़ॽ लाम्‍बाए इक्‍सादिङ् खाम्‍बेःक्‍मोबा
के़रे़क् मे़न्‍छाम् याप्‍मिहाॽरे़ हाङ्‌वागे़न् मुॽइसाम् मे़घोसुरो॥”
खे़ल्‍ले़चोगुल्‍ले़ यहवे दाङ्‌बाल्‍ले़ मे़त्तुबा हे़क्‍के अब्राम्‍मिन् थासिङ्, हे़क्‍क्‍याङ् लुते़न्‍नाङ् खुने़ॽनु पे॥ हारान्‍लाम् लःन्‍दे़पेःल्‍ले़ अब्राम्‍मिन् नुबोङ्‌ङाङ् ङासि तङ्‌बे के़रे़आङ् वये़॥ अब्राम्‍मिन्, कुमेत् साराइन् हे़क्‍क्‍याङ् कुन्‍नाक्‍पा लुते़न् हे़क्‍क्‍याङ् खे़ङ्‌हाॽरे़ मे़धगुबा याङ्‌साकुन्‍धेन् हे़क्‍क्‍याङ् हारान्‍नो मे़घोसुसिबा मनाहाॽ मे़याङ्‌सिङ्‌ङाङ् कनान लाजेॽओ पेःक्‍मा फाॽआङ् मे़धासिङ्, हे़क्‍क्‍याङ् खे़ङ्‌हाॽ खे़प्‍मो मे़गे़रे़॥
अब्राम्‍मिन् कनान लाजेॽ पोःक्‍खे़र पेःल्‍ले़ सेकेमबा यहिबासिङ् के़युङ्‌बादे़न् मोरेओ थारिक् के़रे़॥ खे़न् ये़म्‍मो खे़ॽयो कनानि सुवाङ्‌हाॽ मे़युङे़॥ यहवे दाङ्‌बे़न् अब्राम्‍मिन्‍नु थाःम्‍सिङ्, हे़क्‍क्‍याङ् खे़न् मे़त्तु, “आङ्‌गाॽ खे़ने़ॽ के़स्‍सा के़म्‍मे़न्‍छाॽहाॽ कन् लाजेन् पिरुङ्‌सिङ्‌ॽ॥” खे़ल्‍ले़चोगुल्‍ले़ खुने़ॽनु के़धाःम्‍सिङ्‌बा यहवे दाङ्‌बाल्‍ले़ कुलागि खुने़ॽ खे़प्‍मो लत्‍छा ले़त्ति तोःम्‍मादे़न् थिक् चोगु॥
खे़प्‍मोलाम् खुने़ॽ थासिङ्‌ङाङ् बेथेललाम् नाम्‍गे़न् पिसाङ्‌बा कोःक्‍माहाॽओ चत्‍छिङ्‌बे, हे़क्‍क्‍याङ् बेथेलले़न् नाम्‍धा पिसाङ् नु ऐ ये़क्‌यक्‍किन् नाम्‍गे़न् पिसाङ् तक्‍मे़त्तुआङ् कुसाःङ्‌गा हिम्‍मिन् खिङ्‌सु॥ खुने़ॽ यहवे दाङ्‌बाल्‍ले़ कुलागि याम्‍मो ले़त्ति तोःम्‍मादे़न् थिक् चोगुआङ् यहवे दाङ्‌बाल्‍ले़ कुमिङ्‌ङो पेलि फाक्‍तु॥
हे़क्‍क्‍याङ् अब्राम्‍मिन् आल्‍लसाङ् लाम्‍दिक् चोगे़र यो लाङ्‌गे़न् ले़प्‍साङ्‌बा नेगेब मे़प्‍मनाबा लाजेॽओ पेगे़॥

हे़क्‍क्‍याङ् खे़न् लाजेॽओ साक्‌वान् त्‍ये़॥ साक्‌वान् के़साक्‍पा चोगे़बाल्‍ले़ चोगुल्‍ले़ अब्राम्‍मिन् कुभा ये़म्‍ले़ लागि मिस्र लाजेॽओ युङ्‌से़ पे॥ खुने़ॽ मिस्र लाजेॽओ लाःप्‍मा चोगे़ल्‍ले़ अब्राम्‍मिल्‍ले़ कुमेत् साराइन् मे़त्तु, “खे़ने़ॽ नुमासुक्‍मा के़जोक् के़लॽबान् आङ्‌गाॽ निसुङ्॥ मिस्रबा मनाहाॽरे़ खे़ने़ॽ के़म्‍निःल्‍ले़ खे़ङ्‌हाॽरे़ ‘कङ्‌ग खुने़ॽ कुमेःत्‍लो’ मे़बाःत्तु हे़क्‍क्‍याङ् खे़ङ्‌हाॽरे़ आङ्‌गाॽ मे़से़त्ता कर खे़ने़ॽ कुहिङ्‌वे़त् के़म्‍दाङ्‌लो॥ ‘आङ्‌गाॽ खुने़ॽ कुन्‍जेलिमाआ’ मे़त्ते़से़ॽ, हे़क्‍केःल्‍ले़ आङ्‌गाॽ नुरिक् मे़मे़त्ताॽ हे़क्‍क्‍याङ् खे़ने़ॽ के़जोगुल्‍ले़ आङ्‌गाॽ आहिङ्‌मन्‍निन् ताङ्‌लो॥”
अब्राम्‍मिन् मिस्रओ के़रे़ल्‍ले़, मिस्रबा मनाहाॽरे़ साराइन् चाॽरिक् नुमा मे़न्‍छुमा मे़निसु॥ हे़क्‍क्‍याङ् फारो हाङ्‌ङिल्‍ले़ कुसुहाङ् युक्‍पाहाॽरे़ साराइन् मे़निसुआङ् हाङ्‌ङिन् मे़जे़क्‍तु, हे़क्‍क्‍याङ् साराइन् हाङ्‌ङिल्‍ले़ कुहिम्‍मो मे़देॽरु॥ साराइल्‍ले़ चोगुल्‍ले़ हाङ्‌ङिल्‍ले़ अब्राम्‍मिन् नुरिक् मे़त्तु, हे़क्‍क्‍याङ् खुने़ॽ मे़ल्‍लुक्‍हाॽनु, पित्‍हाॽ, कुम्‍बाबा नु कुम्‍मामा अदङ्‌हाॽ, से़वारोबा से़वारोमाहाॽ हे़क्‍क्‍याङ् उमेहाॽ पिरु॥
कर अब्राम्‍मिल्‍ले़ कुमेत् साराइःल्‍ले़ चोगुल्‍ले़ फारोन् नु कुहिम्‍सयङ्‌ङो यहवे दाङ्‌बाल्‍ले़ किप्‍मा के़घुबा माङ्‌दुक्‍मा पाङ्‌घुदासु॥ खे़ल्‍ले़चोगुल्‍ले़ फारोल्‍ले़ अब्राम्‍मिन् उःत्तुआङ् मे़त्तु, “खे़ने़ॽ कन् आङ्‌गाॽनु थे के़जोगुबाबे? साराइन् खे़ने़ॽ के़मेःत् फाॽआङ् थेआङ् के़म्‍मे़त्ताङ्‌ने़न्‍बाबे? ‘खुने़ॽ आन्‍जेलिमा’ लॽरिक् थेआङ् खे़ने़ॽ के़बाःत्तुबाबे, खे़ल्‍ले़चोगुल्‍ले़ खुने़ॽ आहिम्‍मो आहिम्‍सामा चोःक्‍से़ तेॽरुङ्‌ङाङ् वये़॥ आल्‍ल ओमे़त्ते़ॽ, खे़ने़ॽ के़मेःत्ते़न् हाबा कॽयो वाॽ॥ खे़न् तेॽरे़आङ् पेगे़ॽ॥” खे़ब्‍याङ् फारोल्‍ले़ अब्राम्‍मिल्‍ले़ कुयाःम्‍बेओ कुमनाहाॽ इङ्‌जाङ् पिरुसि, हे़क्‍क्‍याङ् खे़ङ्‌हाॽरे़ अब्राम्‍मिन् नु कुहिम्‍सामे़न् हे़क्‍क्‍याङ् खुने़ॽ कत्तुबा के़रे़क् चिगक्‌वाहाॽनु मे़बाङ्‌घुमे़देसु॥

Počúvaj तोलिङ्‌सोमु 12