Matyu 5
5
Jisas nalata anona halaf ilif ea' nape na'ipasa basef bu'wami
1Jisas nati esis amam nematawa hiesi ea' nalata anona halaf nape. Ea' alupumi ananimi mafi'i mandatama etifigin malomana. 2Ea' anan nafela basef amama laumi nawalipamom.
Jisas na'ipasa basefa sandanifel endilisi
(Lu 6:20-23)
3Anan na'i, “Ipe' emi egafipa pegawa ea' ipe' etipa owa' la'ifipama penda' maol bu'unai Godi, dei' ipe' pandanifel pape andeande'. Dei' main, ipe' pawis ea' kingdom heveni.
4Ea' ipe' emi egafipa palef papani, ipe' dei' pandanifel ea'. Dei' main, God nambimb nonda' opalef ipe'imi mope bo'om.
5Ea' ipe' emi egafipa mamaipama pape sa'ombel owina enis epes, dei' ipe' pandanifel ea'. Dei' main, ipe' anona nemaf pefa' amamaga bu'wami God na'i endilisi ma nease'epam.
6Ea' ipe' emi egafipa ukup mehafel ma'ima'i waf bu'unai, si'i nolomahasa gwa'aimi eap pase'asa embel, dei' ipe' pandanifel pape andeande'. Dei' main? Nambimb God nese'epa waf anama bu'unai ukup maimailanai dende'ma ipe' si'ipamana.
7Ea' ipe' emi egafipa pati enis epes uwahipis, dei' ipe' pandanifel ea'. Dei' main, nambimb God niti ipe' uwahipipa.
8Ea' ipe' emi egafipa ukup mape bo'om andeande' ma waf aonai a'epa, dei' ipe' pandanifel ea'. Dei' main, ipe' anona nemaf piti God.
9Ea' ipe' emi egafipa panda' maola pahagofa wandaf patalogamas seanda' waf bu'unai, dei' ipe' pandanifel ea'. Dei' main, God nambimb nofalepa ni'i ipe' awasi ananipei.
10Ea' ipe' emi egafipa paila waf bu'unai ma enis epes sanda'mepa waf aonai sase'epa nimanimi, dei' ipe' pandanifel ea'. Dei' main, dei' ipe' pawis ea' kingdom heveni.
11Ipe' emi egafipa paila ae' pape na'ama. Enis sandaiwa'ma paila ae' sonda' basef mamumami awami baso'maimi ma ipe'. Ea' sese'epa agof awami endilisi si'i ipe' epes aopei ma sase'epa nimanimi. Esis sonda'epa na'ama dei' ipe' pandanifel ea'. 12Opalef ipe'imi mope awanem pepe pendanifel. Dei' main? Amamaga hiami bu'wami ipe'imi ma'oh heven ilif. Esis isima sanda' waf aonai ma ipe' na'ama etin si'i fowa' gani sanda' waf aonai ma profet amama mape fowa'imi.
Enis epes sope si'i soli lam
(Mk 9:50; Lu 14:34-35)
13Ipe' si'i sol ama pigiambama epes hiesi sape etapi. I'i sol amama mumbul usihima a'am, owa'etin. Nambimb ipe' penda'am pi'imama usihim wapoti'? Owa'etin. Sol amama mumbul maol a'ama sonda'am, esis sokwahom mefe' etap sofofo'asom.
14Ipe' si'i lam epes hiesi sape etapi pihi'ambas. Anagon taun lu'wagoma natoma halaf ilif ina nape nandambaho', owa'etin. 15Epes ina sakata lamifah sopalo'am ma'oh balata owin, owa'etin. Esis sawamonam balatagw ilifa howealama epes hiesi sape ipat nomon. 16Ea' na'ama etin, ipe' penda' waf bu'unai si'i lamifah ipe'imi mape alihima howealama naep esis amam nematawai hiesi siti waf bu'unai ipe' panda'anai ma seafela agel Ahalomepa nape ilifi lu'una.
Anona nemaf basef mi'uli Godi nendawalap endilisi
17 # Mt 3:15; Ro 3:31, 10:4 Ipe' ina ukup mondanda' mi'i ae' afi'i ma ili'amona mi'uli Godi neloma basef amam profet fowa' gani mawalipasami, owa'etin. Ae' ina afi'i ma ili'amonam, owa'. Ae' afi'i ma endelam iwapani'am enda'am motaga endilisimi. 18#Lu 16:17, 21:33Ae' a'ipipa endilisi. Basef amama mope mefe'ma amamaga mape ilif etapi moloma otaga etap higililam hi'ilam. Anom basef tu'wanima#5:18 Basef tu'wanim bu'wami ofagema ma'i na'ama. Ma'i anom amef so'umi ma basef mi'uli Godi, si'i diga ape'inai mak anama sa'unai. amef sa'usa'umi moloma anom basef bandami mail nomona buk mi'uli Godi, amama mope la'ela'ef hihif na'ama etin mefe'ma maol hianai Godi netaga nendawalap hi'ilana. 19#Je 2:10Na'ama i'i emi egafis sili'amona anom basef kwawie'ima basef amama mape mi'uli Godi ma esis sihi'amba enis epesa sonda'am na'ama etin, anona nemaf agof epes isima mefe' sa'osa'om ma kingdom heveni.#5:19 Waf esis Judai nape na'ama. Esis sandaiwa'ma sie'i agel Godi, ea' esis ina sa'i ‘kingdom Godi’, owa'. Sa'i ‘kingdom heveni.’ Ea' emi egfis sila mi'uli Godi andeande'ma sihi'amba enisa sielana, anona nemaf esis sefa' agof lu'wami ma kingdom heveni. 20Na'ama dei' ae' a'ipipa a'i, ipe' ukup pepoma amam dambami mawalipasa mi'uli Godi moloma amam dambami Farisi. I'i waf ipe'inai bu'unai owa' nikila' waf amamunai, anona nemaf ipe' ina pefe' piowis kingdom heveni, owa'etin.
Waf okom wandafunai ma epes saha enis saga'
(Lu 12:57-59)
21 # Eks 20:13; Eks 21:12; Lev 24:17; Diu 5:17 Ipe' pame' ea' basef amama fowa' gani amam akupipa mofa'ami ma'iam na'ama ma'i, ‘Ipe' owa' peha enin epen neaga'. I'i enin neha enin epen nega', epen inima nambimb netagama basefa kot.’ 22#1 Jo 3:15Dei' ae' a'ipipa a'i, emi epen okom wandafuna ma enin sahin owan ananisi, enin nambimb netagama basefa kot. Ea' emi epen ni'ipa enin sahin owan ananini ni'i, ‘Ine' epen falafinai’, enis sonda'mana basef amam Juda dambami mumafi koti. Ea' i'i enin epen ni'ipa enin epen lamana ni'i, ‘Ine' okom nahena endilisi’, epen inima nefe' wambel aonai nif fandumi ma'oma.
23I'i ipe' pi'i pindalali ma God penda' ofa felefele' ma balata anama sondolalima Godanai ma i'i ipe' ukup mopoma anona waf aonai ipe' panda'ana enin sahin owan ea' ukup numbutima ipe', penda'am na'ama. 24Ata' pekwaha ofa ipe'inai nonda'oh felefele'ma balata anama, ipe' ata' pitanima pefe' penandona basef peloma sahin owan ipe'isi pali' panda'mas waf aonai. Ama ea', pifi'i pefa' ofa pefe' pindalali peso' Goda ofa.
25I'i enin epen ni'i neanda'mepa basef, nelomepa pefe' ma ata' pitu eaf, ipe' mehip pese'ana okom pewalapa amama pi'iam peloman, ama basef owa'etin. Na'ama epen inima nenda'epa penda' basefa amama ma jas nonda'epa pefe'ma polisman, ea' monda'epa penda' kalabus. 26Ae' a'ipipa endilisi, ipe' ina nambimb pekwaha ipat anama sanda' kalabusanai ulal, owa'. Ama peagwa amamaga lu'wami sa'umi ma wiaf ipe'inai hi'ilana, pefe'.”
Waf aonai nawala waf bu'unai dase'amainai
27Jisas na'ipam wapoti' na'i, “Ipe' pame'am ea' basef amama fowa'imi. Ipe' ina penda' waf aonai ma so'a waola enis amam nematawa deindeias, owa'. 28Dei' ae' a'ipipa na'ama a'i, i'i anona aman nieti ano'w nemata'w, ama okom ananinai nehafema akwa'w, aman anama ea' nanda' waf aonai so'a waulanai ma okom ananinai.”
29Ea' Jisas na'ipam anom basef womun etin na'i, “I'i naep ipe'imi mape lagof da'isimi monda'epa pewa ma waf aonai, pigiam pikwahom. I'i alop tu'wanina ipe'inai nefa' nimanimi, amama aom kwaukwawie'. Ina andeande' ma esis sokwaha alop si'ina ipe'inai hi'ilana neafe' wambel aonai hel nif fandumi mapoma. Amama anona nemaf pefa' nimanimi awami lu'wami endilisi.
30I'i lagof da'isimi monda'epa pewa ma waf aonai, petopa'am pekwahom. I'i alop tu'wanina ipe'inai nefa' nimanimi, amama aom kwaukwawie'. Na'ama esis sokwaha alop si'ina ipe'inai hi'ilana nefe' wambel aonai hel nif fandumi mapoma.
Waf satopa' dase'amainai
(Mt 19:9; Mk 10:11-12; Lu 16:18)
31Basef amama fowa' mataga ma'i, i'i anona aman ni'i nili'amona waulu'mana anani'wi, anan ata' ni'i anom basef nonda'am mil anop okwatip nose'akw ma neatopa' dase'ama. 32Dei' ae' a'ipipa a'i, i'i nemata'w akwama owa' konda' waf aonai so'a waolanai, ma waulunama'w neakwaho'w etin, anan nanda' akwa'w kwanda' waf aonai so'a waola anona aman. Ea' emi aman naso' nemata'w fowa' anona aman nali'amona'wi, aman anama nagi' nase'akwi wapoti' nanda' waf aonai so'a waola nemata'w akwama.
Waf sa'i endilisi etis gani ilif
33Anom basef fowa' gani pame'ami ma'iam na'ama ma'i, ‘Basef amama la'ifimi pa'i endilisi gani ilif, ipe' ina pesambalom, owa'. Basef amama pilam mondahama ipe' pa'iama naep Dembinai.’ 34Dei' ae' a'ipipa, ipe' ina pi'i basef la'ifimi endilisi gani ilif, owa'. Ea' ina pi'i ilif hevena penda' anom basef la'ififi, owa'. Dei' main, gani ilif heven balata bu'unai dembinai Godi napoma. 35Ea' na'ama etin ina pi'i etap anae' etina penda' basef ipe'imi la'ifim, owa'. Etap anae' nandahama si'i anona tebol sa'unai God nahapona bo'wagahanai. Ea' na'ama etin ipe' ina pi'i Jerusalema penda' anom basef ipe'imi la'ifimi, owa'. Jerusalem anama taun wambel lu'wagoma dembinai kingi. 36Ipe' ina penda' basef ipe'imi la'ifim pi'i balagah ipe'imi, owa'. Dei' main, ipe' ina la'ifipama penda' anom auf ama balagah ipe'imi meataga afitimi alimi, owa'. 37Ipe' pi'iam pi'i a'e o owa'. Pi'i amama atom. Basef watanieimi, amama mataga epen aonai Satan atona.
Pegwamasa waf aonai enis epes sanda'mepanai
(Lu 6:29-30)
38Ipe' pame'am ea' basef amama fowa' gani mataga ma'i, ‘I'i ipe' pepa' peloma enisa seahepa naep o seatalamepa nalelef, ipe' pegwamas pehas wapoti' penda'as sondagwama etin.’ 39Dei' ae' a'ipipa, ipe' ina pegwama epes sonda' ipe' aopei, owa'. I'i emi egalin nehepa aomb wa'ol, pendamboma nehepa aomb wa'ol wapoti'. 40I'i anona aman nonda'mepa basef ni'i nefa' siaot ipe'inai, ipe' pese'ana sagwegw ipe'igwi wapoti'. 41I'i anona aman dembinai ma gavman nindinapina ma pefe'mana wiga pelomana anagon fele' si'i nogota atotona, ipe' andeande'ma ata' pefe' pelomanago nehetagw biam laom wapoti'. 42I'i emi epen nefalepa ma anom amamaga, ipe' pese'anam. I'i enin epen ni'i newaolamepa wiaf, ipe' ina pindaiwa'man pesambala basef ananimi, owa'.
Waf ipe' pese'asa opalef esis naumbih
(Lu 6:27-28,32-36)
43Ipe' pame'am ea' basef amama fowa' gani mataga ma'i, ‘Ipe' pese'asa opalef epes isima sape felefele'ma ipe', ea' ipe' ukup wandafuma naumbih ipe'isi.’ 44Ea' dei' ae' a'ipipa anom basef a'i, ipe' ukup mimila naumbih ipe'isi pese'as opalef, penda' betena God niegiambama isima sanda'mepa waf aonai. 45Ipe' penda'am na'ama ma peape awasi Godi si'i Ahalomapa nape heven ilifi. Anan nanda' aon alipunai nape ilifa nigiambama epes bu'wasi saloma epes sanda' waf aonai wapoti'. Anan nanda' asaf nalai ma epes isima sape andeande'i saloma isima sanda' waf aonai wapoti'. 46I'i ipe' ukup mila epes isima ukup maimaila ipe' etipa, anona nemaf pefa' amamaga bu'wami maima waf anama? Owa'etin. Amam amama manda' waf aonai maloma mofa' takisi manda' waf anama atona. 47I'i ipe' pinifela isima alupisi ipe'isi etis, ipe' petaga pikila' enisa maina waf bu'unai? Owa'etin. Esis sololama Godi sanda'am na'ama etin. 48Na'ama ipe' pepe bo'wepa endilisi si'i Ahalomepa ipe'inai God nape heven ilif.
Currently Selected:
Matyu 5: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.