Lucas 17
17
Topẽ vĩ mranh tỹ jagy nĩ
(Mt 18.6-7, 21-22; Mc 9.42)
1Kỹ tóg ti mré mũ tĩ ag mỹ: “ũ tỹ hẽn ri ke ag vỹ ũ tỹ iso há ẽn tỹ isovãnh han sór mũ, ha mẽ,“ he mũ. “Hã ra ag tóg tag to vẽsỹrénh tãvĩ han ke mũ. Topẽ vỹ ag ve kónãn tãvĩ han ke mũ. 2Ũ tỹ ũn sĩ tỹ inh ki rã tovãnh han mũ mỹ tóg há tĩ vẽ, ẽg tỹ pó mág tỹ ag nunh to sa kỹ goj nig mág kuju ki ag vãm jé. Tag vỹ ag mỹ jagy tĩ vẽ. Hã ra ag tóg ti jagy tag kãfór venh ke mũ. 3To jykrén, vẽnh ki rĩr kỹ.
Kejẽn ã régre vỹ Topẽ vĩ mranh mũ. Kỹ ti mỹ tóm nĩ, ti tỹ kygnẽ ti. Ti tỹ tovãnh sór kỹ ti mỹ vẽnh pãte fón nĩ. 4Hẽn ri ke mũn tóg ti tỹ Topẽ vĩ mranh ẽn han mãn', han mãn', he sór mũ. Kurã pir ki tóg mranh tỹ hẽn ri ke han sór mũ, hẽn ri ke mũn. Hã ra tóg tónh kãtĩg mãn', tónh kãtĩg mãn', he mũ gé. Kỹ ti mỹ vẽnh pãte fón to krónh ke tũg nĩ,” he tóg, Jesus ti.
Ẽg tỹ Topẽ ki rã há han ke
5Kỹ Jesus tỹ ũn vin mũ ag tóg ti mỹ: “ẽg tỹ Topẽ ki ge há han há tóg tĩ,” he mũ. “Kỹ to ẽg tar han nĩ,” he ag tóg. 6Kỹ tóg ag mỹ: “ãjag tỹ Topẽ ki ge kỹ tóg há tĩ,” he mũ. “Ka tỹ krén to jykrén nĩ,” he tóg. “Sĩ ti nĩ, ẽg tỹ ti krãn ve ki. Hã ra tóg mog há han tĩ. Tag ri ke han nĩ, Topẽ ki rã kỹ. Kỹ ãjag tóg nén ũ kar to tar nỹtĩnh mũ. Ka tag ve ra ha. Ãjag tỹ ti mỹ: “ã jẽgja ki kã kãkutẽ kỹ goj ki vẽnh krãn,” hen kỹ tóg kenh mũ, ãjag tỹ Topẽ ki rã há han kỹ,” he tóg, Jesus ti.
Tỹ ẽg Topẽ camarada nỹtĩ
7“Ãjag camarada jykre to jykrén nĩ,” he tóg. “Ãjag japỹ ki tóg rĩr tĩ, ke tũ nĩ kỹ ãjag mẽg ki. Rãkãnh kỹ tóg ti rãnhrãj ja tá kãtĩ tĩ. Kỹ ãjag pijé ti mỹ: “kunĩg, jẽn jé,” he tĩ'. 8Ti mỹ ãjag tóg: “inh mỹ vẽjẽn han, ijẽn jé, isỹ kron jé,” he tĩ. “Kar kỹ ã tóg jẽn ke mũ gé, kron ke mũ gé sir, ijẽn kar kỹ,” he ãjag tóg tĩ, ãjag camarada mỹ. 9Kỹ ãjag tóg ti mỹ vĩ há han tũ nĩ gé, ti tỹ ãjag vĩ ki króm mũ ra. Ãjag camarada vẽ mỹr, hã kỹ tóg ãjag vĩ ẽn han ke mũ. 10Kỹ ãjag camarada ag ri ke han nĩ, Topẽ mỹ, ha mẽ. Ãjag tỹ Topẽ tỹ ẽg mỹ nén tó mũ ẽn han kãn kỹ, jagnẽ mỹ: “Topẽ camarada vỹ tỹ ẽg nỹtĩ,” hem nĩ. “Ẽg tỹ ti tỹ ẽg mỹ nén tó mũ ẽn han mũ ra tóg ver tỹ nén ũ tũ nĩ,” hem nĩ, jagnẽ mỹ. “Ti vĩ han kãn tugrĩn ẽg tóg há nỹtĩ,” he tũg nĩ,” he tóg, Jesus ti.
Jesus tỹ ũn kagyga e ag tỹ há' he
11Kỹ tóg Jerusalém ra tĩg sór mũ. Hã kỹ tóg ga tỹ Samaria mré ga tỹ Galiléia fyr mĩ tĩ mũ. 12Tá tóg ẽmã ũ ki rã mũ. Hã ra ũ tỹ 10 (ke) ag tóg ti kato kãmũ nĩ, vẽnh kaga kren vãnh hynhan kỹ nỹtĩ ag. Ag tỹ ti ve kỹ ag tóg kór há tá nỹtĩ nĩ. 13Kỹ ag tóg jamã há ra prẽnprẽr kỹ: “!..Jesus'..!“ he mũ. “!..Senhor'..! !..Ẽg jagãgtãn ra..!“ he ag tóg mũ. 14Kỹ tóg ag mỹ: “Topẽ tũ ki rĩr tĩ ag mỹ vẽnh ven mũjẽg,” he mũ.
Ag mũn kỹ ag tóg hághá' he kãn mũ sir, ag tỹ tá junjun to hã. 15Kỹ ag kã ũn pir tóg kyrã mũ, ti to. Topẽ mỹ tóg vĩ há han mũ, ti tỹ há' hen kỹ. Kỹ vẽnh kar vỹ ti vĩ mẽg mũ. 16Ti tỹ tá jun kỹ tóg ti krẽm mũg ke mũ. Ti mỹ tóg: “inh mỹ tóg há tĩ, ã tỹ isỹ há' hen kỹ,” he mũ. Samaria tá fóg ũ vẽ, ũ tỹ Jesus to kyrã mũ ẽn ti.
17Kỹ tóg: “ũ tỹ 10 (ke) ag vỹ há' he kãn,” he mũ. “Hã ra ũn pir ne kyrã'. Hỹn, ũ ag, ũ tỹ 9 (ke) ẽn ag?” he tóg. 18“Fóg tag hã vỹ ti pir mỹ kyrã, Topẽ to: ũn mág vỹ tỹ ti nĩ, he jé,” he tóg. 19Kỹ tóg fóg ẽn mỹ: “jẽgnẽ ra,” he mũ.“Ha tĩg,” he tóg. “Ã tỹ inh ki rã hã kỹ ã tóg há' he mũ,” he tóg.
Topẽ tỹ tỹ ẽg pã'i nĩ to vẽjykre
(Mt 24.23-28, 37-41)
20Kejẽn Fariseu ag tóg Jesus ki jẽmẽnh kãmũ mũ. “Topẽ tỹ tỹ ẽg pã'i nĩ ẽn mỹ ver kór gy nĩ?“ he ag tóg. Kỹ tóg ag mỹ: “ti vég tũ ẽg tóg nĩ, ẽg kanẽ tỹ,” he mũ. 21“Hã kỹ ẽg tóg ti to: tag kã ti nĩ, tãtá ti nĩ, henh ke tũ nĩ gé. Ha mẽ, ãjag kã mĩ ti hur vẽnh ven, ãjag tỹ ti vég tũ hã ra,” he tóg.
22Kỹ tóg ti mré mũ tĩ ag mỹ: “kejẽn tóg ãjag tỹ Topẽ tỹ tỹ ẽg pã'i nĩ venh hapẽ tĩnh mũ,” he mũ. “Ti tỹ kurã pir ki ãjag mỹ vẽnh ven ra tóg ãjag mỹ há tĩnh mũ vẽ, hã ra ãjag tóg venh ke tũ nĩ ver,” he tóg. 23“Kejẽn ag tóg ãjag mỹ: “tag ki ti jun,” henh ke mũ. “Ẽn tá tóg jẽ,” he jé ag tóg ke mũ gé. Kỹ venh mũ tũg nĩ hã ra. 24Inh kãtĩg mãn ke vỹ tỹ ta tỹ kóm kóm ke ri ke nĩnh mũ. Vẽnh kar vỹ inh ve kãn ke mũ. Tỹ sóg ẽprã ke fi kósin nĩ,” he tóg. 25“Inh kãtĩg mãn ke to hã sóg hã ra vẽsỹrénh mág han ke mũ ver. Ũri ke ag vỹ iso é henh ke mũ ver,” he tóg.
26“Kỹ inh kãtĩg mãn ke kurã ẽn kã ẽprã ke ag tóg han kãn ke mũ, ag tỹ Noé tỹ ga mĩ tĩ mũ kã nén han ja ẽn ti. 27Ta kutẽ to hã ag tóg jẽn ja nĩgtĩ. Kronkron ja ag tóg nĩgtĩ gé. Vẽnh prũg kutẽm ja ag nĩgtĩ gé. Ẽn kã Noé tóg kejẽn canoa tỹ ĩn kã ra rã ja nĩgtĩ. Ti tỹ kã ra rã kar kỹ, ta tóg sir kutẽ ja nĩ, kỹ ag tóg goj var ki kãgter kãn ja nĩ. 28Ló tỹ ga mĩ tĩg ki tóg hã ri ke pẽ ja nĩ gé. Jẽn ja ag tóg nĩgtĩ gé. Kronkron ja ag tóg nĩgtĩ gé. Nén vẽne he ja ag tóg nĩgtĩ gé. Ẽkrãn ja ag tóg nĩgtĩ gé. Ðn hynhan ja ag tóg nĩgtĩ gé. 29Ẽn kã Ló tóg kejẽn ẽmã tỹ Sodoma tá kãkutẽ ja nĩ, kỹ pĩ tóg kanhkã tá kãtére ja nĩ, ẽmã ẽn kri, pó tỹ enxofre nĩja ke gé. Kỹ ẽn tóg ag kãgtén kãn ja nĩ. Topẽ tỹ ag vóg kónãn ke to jykrén ja tũ ag tóg nĩgtĩ. 30Ge ti nĩnh mũ gé, ẽprã ke fi kósin tỹ vẽnh ven mãn ke kurã ẽn kã. To jykrén ke tũ ag tóg nĩ gé, ti to há tũ ag. 31Ũ tỹ kurã ẽn kã ti ĩn to hã tĩn kỹn jé ti tũ mãn rã sór tũg. Ũ tỹ ẽpỹ tá tĩ ẽn jé ti tũ to vỹn ke tũg. 32Ló prũ fi to jykrén nĩ, ãjag tỹ fi tỹ vẽsỹjãm ẽvãnh ẽn ri ke han tũ nĩ jé. 33Ãjag tỹ ãjag jykre hã han sór kỹ ãjag tóg nũgme ki vár ke mũ, ha vem nĩ. Ãjag tỹ isugrĩn ãjag jykre fi mãn kỹ ãjag krenkren ke vẽ, ha vem nĩ,” he tóg.
34“Hã kỹ sóg tag tó mũ, ha mẽ. Kuty ẽn kã, inh kãtĩg mãn ke kã kuty ẽn kã ũn régre ag vỹ jagnẽ mré nũgnũr nỹtĩnh mũ. Kỹ sóg ag kã ũn pir jé prẽr ke mũ, kỹ tóg inh mré tĩg mũ, jãvo ti régre vỹ kã nỹnh mũ, ha vem nĩ. 35Ũn régre fag vỹ ẽgtynyn nỹtĩnh mũ, jagnẽ mré, ẽn kã. Kỹ sóg ũn pir fi jé prẽr ke mũ, kỹ fi tóg inh mré tĩg ke mũ. Jãvo fi régre fi vỹ kã jẽnh ke mũ, ha vem nĩ. 36Ũn régre ag vỹ ẽpỹ tá rãnhrãj mũnh mũ, ẽn kã. Kỹ sóg ũn pir jé prẽr ke mũ, kỹ tóg inh mré tĩg ke mũ. Jãvo ti régre vỹ tá tĩnh ke mũ, ha vem nĩ,” he tóg.
37Kỹ ti mré mũ tĩ ag tóg: “hã ra tag vỹ tỹ hẽ tá ke nĩnh mũ hỹn'?“ he mũ. Kỹ tóg ag mỹ: “kurã ẽn kã ãjag tóg ki kanhró nỹtĩnh mũ,” he mũ. “Nén ũ ter nỹg ja ri ke ti nĩ. Hã tá tóg vẽnh mãn tĩ, jãtã ti. Tag ri ke ti nĩnh mũ, ha vem nĩ,” he tóg, Jesus ti.
Currently Selected:
Lucas 17: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido