Markus 15
15
Yesuwa bɨɗa Bilatus
(Matiyu 27:1-2, 11-14; Luka 23:1-5; Yuhanna 18:28-38)
1Dagabɨ tsa yu tsɨwaya daraba, Firistoci gyaruni dɨ ɗɨma shawari ɨna Ba kwambal garna, ɨna sɨba sɨna dooka na musa, ɨna ndyam ʻyammajalisu. Je ɗɨhɨna Yesu wai dɨ bayyai, dɨbɨ tsusɨ ha Bilatus.
2Bilatus dɨ tsɨyusɨ du, “Ase Fikɨn faji malvu na Yahudawa?
Yesu dɨ gɨsaya ndu, “Wane fiye ɗɨngau.”
3Je dɨnga bayaka karusɨ a firistoci gyaruni a ghama kutatau cas. 4Bilatus dɨmɨna tsiyusa ndu, “Fa ma wiya ɗɨnga? Naya wiha ɗɨngɨ ena tlɨn da ta ɗɨnga ghama fu.
5Yesu dai har conakɨm a ɗingama wiya ɗingu har Bilatus dɨ nayanaya ghɨri.
6Hamba saba ɗɨmaka Malvu wokaci warka ji, ta bɨta ba tɨda ɗehehen wutɨ badɨ rawa sɨbɨ ka. 7Wi joyi ba ngɨnusa ndu, Barabas ba tɨda ta ɗehehen ewutai ɨna niwi sɨba tawaye sɨba dɨ tiya viyau wokaci tawayeka. 8Sɨbabau dɨ siya tlɨn dɨ dzakwa rawakɨ Bilatus, ta ɗɨn hamba te saba ɗɨmakɨ.
9Je gɨsa tlɨn dɨ ɗɨnga ndu, “Wato hɨnalu mɨn bɨtana Malvu na Yahudawa?” 10Adama a sɨnsai aha gɨrgɨrvu je tsa Yesu wa Firistoci gyaruni. 11Ama Firistoci gyaruni dɨ tsakɨma Sɨbɨka ndu, kwashi dɨ bɨtana Barabas ama dɨma Yesu wu.
12Je ɗɨnga tlɨn mɨnan a Bilatus du, “To mɨna ɗɨma wankwa ji ɨna ba hɨnda zarusa ndu Malvu na Yahudawa?
13Je mɨna ɓa kwararɨ dɨ ɗɨnga ndu, ta gɨnayai!
14Bilatus dɨ ɗɨnga tlɨna ndu, “A ta wena lyapa? Aɗɨn weni kutɨ hamba mbɨrsa?”
Ama tlɨn da tla mayatlɨn da ɗɨnga ndu, “Ta gɨnayai!”
15Bilatus kuwa tɨ da lu ɗɨma hamba dɨ cama sɨbɨ, je te bɨta tlɨn Barabas. Dɨ ɗɨma wiɗi Yesu, dɨ tsusɨ ta gɨnayai.
Sojoji ɗɨma vɨna dem Yesu
(Matiyu 27:27-31; Yuhanna 19:2-3)
16Sojoji dɨ baiya wuhɨ, wato a wuhɨ ta ba gwalfu ka, dɨ zara ndyan sojoji. 17Dɨ lɨmbu sa wiya alkyabba mbiya, dɨ mɨna suwaya wi reweniya veki dɨ zaya ghamusɨ. 18Je tlɨne dzakwa tɨraya hiyusa ndu, “Ghɨnsɨ ta da ɗɨfu, Malvu na Yahudawa!” 19Je tlɨne dɨnga tiyaka ghamusa kwambal, tlɨnda bɨtsaya nyanikɨ, dɨ mɨna ɓɨgatlɨna bɨɗusɨ tlɨn da ɗɨmaya tɨrayakɨ ma vinedem. 20Daga mba ɗɨma hiyaya vinadem, dɨ mbalaya alkyabbakai. Je tlɨne zaya kabɨ tusai, jetlɨne baiyai adama dɨ gɨnusai.
Agɨna Yesuwa ta ngyai
(Matiyu 27:32-44; Luka 23:26-43; Yuhanna 19:17-27)
21Wi sɨn dɨ sukɨn ba ngɨnusa ndu Saminu bakurane, gharaho dzɨhɨ na Iskandari ɨna Rufus, tiya ta busa a dara shina, Je tlɨne zaiya dole dɨ kiya nge na Yesu. 22Je tlɨne bai Yesu ena zara ndu, Golgota (“Wato Eyin Kwangwaliya Gham”). 23Je tlɨne tsaɗayaya bi inabi ba dɨ yagwa fa mur, ama dɨ nja sahiyai. 24A ɗɨka dɨ gɨnusai dɨ tsa aya kabɨ tusa tuwa tlɨn, da fa shinshin a tsafaya tlin, adama dɨ naya hamba dɨ mara kanda wene ki.
25A gɨnaya karfe kuciya na tsuwai. 26Je tlɨne rɨdla lyapɨ nusa ndu, “Malvu na Yahudawa.”
27Sɨba kir tsɨr dɨjeyi sɨba gɨna tlɨn mbatla ti, wutɨ a teʻe, wutɨ da ga aiʻyusɨ. 28[Wana ka ɗɨngɨ ta Ghɨnsɨ jikɨn madɨ ɗɨnga ndu, “Akɨnya ɗe sɨba lyapɨ.”] 29Sɨbana zirau dɨ dɨnga ɗɨnga hiyaya ɗɨngɨ rinya da ngwaɓɨtlai ghama tlɨn da ɗɨnga ndu, “Fi ba fada bi vaza Bali gyarya mana pagham, fa ghana ɗe sɨnau kidi. 30To bɨr ghamahu fadawa fa ta ngye ka.” 31Gan ndɨ wanka Firistoci gyaruni ɨna sɨba sɨna doka da bɨlaya vinadem, da ɗɨnga ndu, A bɨrsu niwi, ama a ima bɨra ghamusu. 32Almasihu nakɨn kɨn, malvu na Israʻila ta do ta ɗɨ kwa ata ngyeka conakɨni, mi nayadza dama mi tsa gaskewatɨ.” Sɨba dɨ gɨna tlɨne wutai ɨna ti tlɨmma dɨ tabɨnusɨ.
Miyau na Yesu
(Matiyu 27:45-56; Luka 23:44-49; Yuhanna 19:28-30)
33Daga tsɨraza muku dɨ shama zaya yu, har bahɨ karfe kidi na rɨdza. 34Ndi karfe kidi je tlaya mayusa Yesu akalpɨ du, “Eloi, Eloi, lema sabaktani?” Wato ji (“Ghɨnsɨ nuwun Ghɨnsɨ nuwun mazai fa shiɗu naya?”)
35Sɨba tlɨnde tsatsɨraroka daga dɨkaya wanka, je tlɨne ɗɨnga ndu, “Na dɨkai suka tata zara Iliya.
36Wutɨ a ɗe tlɨn dɨ kiya mirayai dɨbi raɓa soso ɗe bi inabi tsintsinna, dɨ zata kwambal, dɨ tsaɗaya Yesu adama dɨ sau, tɨda ɗɨnga ndu, “Zuwiya wanka, gaya nayadza ko Iliyaka gabusɨ dawaiya.”
37Yesu dɨ ɓaa kwarari dɨ, dɨ miyusai.
38A ɗika labulai na Bali gyarya mana tiya gil, dɨ mberusɨ tsɨr ɗahai, adina kwapa kwatla. 39Garna na sojoji ba tɨde tsatsir vɨna nge dɨ naye e ɓaa kwarara Yesu miyusa du, “Nakɨn sɨn kɨn katsɨ katsɨ lai na Ghɨnsɨ.”
40Niwi tɨvan dɨ jeyi sɨba tlɨn da ta naya a sar, ɗetlɨnka Maryamu Magadaliya gan ɗahɨ, ɨna Maryamu ma Yakubu gaɓɨna ɨna Yusufu, ɨna Salome. 41Tlɨn ji sɨba di ɗiyusɨ tɨdɨ ɗe mɨdzai ta Galili, tlɨnda ɗɨmaya hidima. Niwi tɨvan dɨ jeyi sɨba dɨ ɗiyusɨ a Urushalima.
Pɨsaka Yesu
(Matiyu 27:57-61; Luka 23:50-56; Yuhanna 19:38-42)
42Daga ɗɨma rɨdzɨ, dashike mukwa dzɨrakɨ ta mukwa sawakɨ. 43Yusuhu sɨn na Arimatiya, wi ɗam majalisa ba mutunci, badu tima tata gaya buwakɨ ta gwalfu ta Ghɨnsɨ, je tɨkwa canwasɨ dɨ zusa tira Bilatus, dɨ rawa ta tsaya tuwa-tuwa Yesu. 44Bilatus dɨ naya-naya ghɨrɨ daga dɨkaya ndu, Yesu cagɨsu dɨ miyusai. Je te zara garna nasojojika dɨ tsɨyusɨ ko gan katsɨ Yesu mitasai. 45Dage tiye dɨkaya tɨkwasam wanka a vina naka garna na sojojika, je samusɨ dɨ zuwusɨ dɨ busɨ kiya tuwa-tuwa Yesu wai. 46Je kɨna kabɨ pyoya pyel a Yusufu. Daga dawai Yesu, dɨ zaiya ɗe kabɨ pyoya pyetleyaka, Je te zai ya ɗe wi yam badɨ tsɨya ɗai, je te dzaɓa yamka wiya garama zɨkɨ. 47Maryamu Magadaliya ɨna Maryamu ma Yakubu ɨna Yusufu dɨ naya e arusɨ.
Currently Selected:
Markus 15: MKF
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association