Yòwanìrzɛ̀ 15
15
Yerzù ndì a hwèlì gbee wò hwehvùma wò jɔ̀kɛ̀
1“Imba ndi na hwèlì gbèe wò hwehvùma wò jɔ̀kɛ̀, rzìi Tatà wa ami ndi à hwèlì e mògbèèlì hwa hvaya. 2A kɛ tɔ̀ ima ɛkɔkɔ e nò hwèlì ema e rza ŋya hwehvùma a e rzenjòwe hvɛ tɔ̀ ima ɛkɔkɔ ema e ŋyàa hwehvùma, ò lì gbeyà nanù ema e hwɛ gbamù ò lì ŋya hwehvùma. 3Hwèyòkòlelì ema nà mà e òkòlɛ hwe ma e rzaŋgirzɛ. 4È hwɛ ndi nàa imba, imba hvɛ na hwɛ ndi nàa inyɔ. O rza enje tɔ̀ ɛkɔkɔ ema e tànɛyi lì ŋyàa ehvùma ema e rza kukamɛ ò gbee. Mòlemilemi mɛnɛ na inyɔ e rza tànɛyi lì ŋyàa hwehvùma e rza enje tɛ na imba.”
5“Imba ndi na hwèlì gbèe wò hwehvùma, inyɔ ndi e hwèlì hwɛkɔkɔ. Mòtò a hwèlì tɛ na imba nanù mɛnɛ, imba hvɛ rzìi na hwɛ na mɔ̀, a ŋya hwehvùma rzayi-rzayi. È rza enje tɛ na imba, e rza tànɛyi lì gbeyà tɔ̀ eyà. 6Mòtò a rza enje tɛ na imba, a rzenjòwahwa ndi nàa hwa rzenjòwa ɛkɔkɔ. Èŋge ɛkɔkɔ e hwɛ ndi ɛ̀kɔ̀kɔ̀ ema e rzɔ̀nji. Iŋgi tumba ja hwɛkɔkɔ irzaŋgahwa rzi i aŋgbahwa ò mùnya rzìi i rzèeyà. 7È kakùmɛ̀nɛ̀ tɛ nanù mɛnɛ na imba rzìi hwèyòkòlèlì hwe ami hwèyɔ̀hvɛ hwe hwɛ ò tenì e anyu, e ijòwe tɔ̀ mamɛ ema e arza, ye e èlùwà. 8Èluhwe ya ama e Tatɛ̀ ya ami e awuŋmɛ̀lɛ̀ e hwèlì tɛ ema e ŋyàa hwehvùma jɔ̀ɔjɔ̀ɔ, eŋge ndi e gbeyà ema e hwɛ̀ɛ hwànɔ̀ŋgèlì hwa ami. 9Nà òma Tatɛ̀ a nò lìŋgàni, nanù mɛnɛ ndi imba hvɛ na e lìŋgàni. O èŋgànɛ̀lɛ̀ e akakumɛnɛ ndi nanù mɛnɛ na imba aŋga nanù na hwɛni ndi lì e lìŋgàna nanù mɛnɛ. 10È ikayi tɛ imbenda ja ami, aŋga ndi na e lìŋgàna nanù mɛnɛ. Nànù ndi imba hvɛ na hweyàni imbenda ja ama Tatà wa ami ndèŋgàna a nò lìŋgàni nanù mɛnɛ. 11Nà e òhweyà ndi hwene hweyà hwe arzɛ aŋga nanù inyɔ hvɛ e òka e nyayi ya mɔ̀nyɛ̀ŋgì ema imba hvɛ na òka. Ndèŋgànɛ̀lɛ̀ mɔ̀nyɛ̀ŋgì mò anyu mò ònda. 12È mbenda ya ami e hwèlì ndi nanù ema, e alìŋgànɛ mɔ̀kɔ na ɔ̀nɛyi na òma imba hvɛ na e lìŋgàni. 13Mòtò a ŋwelɛlɛ tɛ imbunda i eni nanù òma a uŋmɛ̀lɛ̀yi ndìŋgɛ ema e karzami rzayi-rzayi. 14È hwèlì ndi imbunda ja ami e gbèyi tɛ mamɛ ya arzɛ na arza ema e gbeye. 15Nà rza e ò hwɛlɛ hvɛ ema e hwèlì ndì hwàgbèèlì èhwanja mògbèèlì a rza hwi mamɛ e rzàŋgò wa eni wa èwòlò a gbeyà, na e hwɛlɛ ndi nanù ema imbunda ja ami èhwanja na e òhweyà hweyà ema Tatɛ̀ wà ami à mà nò òhweyà. 16Inyɔ è rzi nò hvɔ̀rzè, ndi imba ndì nà è hvɔ̀rzì rzìi nà è òmi nanù ema è ɛ̀ndɛ è gbèye hweyà ema hwe ŋyàa hwehvùma hwe gbamù. Iŋgi nyàyi jà hweyà ema ì ò indaa. È gbèyi tɛ nanù Tatɛ̀ wà ami à è ŋgbà tɔ̀ ima nyàyi yà yomà ema è mò ijòwi ò lìnà là ami. 17Hwene hweyà hwe arzɛ ema nà è òhweyà nanù hwe hwèlì ndi nanù ema, è alìŋgànɛ mɔ̀kɔ nà ɔ̀nɛyi.”
Hwatò hwa ene rze hwa ò è kɔ̀wu
18Yerzù à mà òhweyà hwà-òkòwèlì hwa eni hvɛ nanù ema, “È rze ye e kɔwu tɛ e ɔ̀ŋgɛ̀lɛ̀ nanù ema e rze e ma lòma lì nò kɔwu imba. 19È mà hwɛ tɛ nàa hwatò hwa ene rze, òma e rze ye e wòwi nàa e hwe eni hwatò. Ndi na e hvɔ̀rzì ò ìtììtènì ja hwatò hwa ene rze. O èŋgànɛ̀lɛ̀ e rza enje hwatò hwa ene rze. Ɔ̀ndeŋgàtɛ̀ e rze ye e kɔwu. 20È ɔ̀ŋgɛ̀lɛ̀ kɔ̀yi-kɔ̀yi mamɛ nà mà è òhweyà nanù ema, ‘Ò rza enje mògbèèlì ema à akayi rzaŋgɛ.’ Hwatò hwa nò tàkìrzɛ̀ tɛ eŋge ŋgàna è hwèlì ndi nanù ema hwa è ò tàkìrzɛ̀ inyɔ hvɛ, hwa mà ika tɛ hwèyòkòlelì hwe ami, nanù òma hwa ò ika hvɛ hwèyòkòlelì hwe anyu. 21Ndi hwa ò è gbèeyà hwenè hweyà hwe arzɛ ò lìnà là ami èhwanja hwa rza hwi e mɔ̀ ema a nò òmi. 22Oma hwa rza tuhwi ò wòhwe wò awu imba na rzi je tɛ lì hwa òhweyà hwene hweyà. O nàŋgɛ nanù, hwa rza òhvi tɔ̀ lìtìŋga ò melàkìrzɛ̀nɛ me wòhwe wò awu. 23Tɔ̀ njɛnɛ ema a nò kɔwu, a kɔwu hvɛ Tatɛ̀ wa ami. 24Imba na rzi gbeeye tɛ lòŋgò la hweyà ò ìtììtènì ja awu ema tɔ̀ mòtò a rzi gbeyi ò ma wòhwe wò awu, me rzi wuluwahwe. Ndi ò nàŋgɛ hwà mà ɛnɛ hweyà hwe arzɛ ema nà mà gbeye ndì tɔ̀ nanù hwa nò kɔwu ndèŋgànɛlɛ hwa kɔwu hvɛ Tatɛ̀ wa ami. 25Ène eyà e ma hwɛnɛ lì gbèyɛ̀nɛ mɛnɛ, ò lì òndìrzɛ̀ mamɛ ema e tìlahwì ò e mbenda ya awu nanù ema, ‘Hwà mà nò kɔwu ŋgundɛ-ŋgundɛ.’” 26È Moòŋgòwànèlì a ò ja ema a uwɛ̀lɛ̀lɛ̀ɛ ò ma e Tatɛ̀ wa ami. Mɔ̀ ndi à hwèlì Èlìŋgɛ̀ ema e gbeyà hwatò hwa rzɔŋgìtɛ̀nɛ̀ e jɔ̀kɛ̀. È hvònda ema na ò hwɛ na Tatɛ̀ na ò e òmeya e mɔ̀, mɔ̀ ndi à hwèlì e mɔ̀ ema a ò e òhweyà hweyà lì nò hvòmɛ̀nɛ̀. 27Rzìi inyɔ hvɛ e ò òhwa hweyà lì nò hvòmɛ̀nɛ̀, èhwanja e ma hwɛ na imba natɛ̀ɛ na ò hwewòtelì.
දැනට තෝරාගෙන ඇත:
Yòwanìrzɛ̀ 15: bri
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2022, CABTAL