Juão 10
10
Jesus kua usaruwaa purangawaa
1Supiwa hambeu penye arama:
—Mundawasu kua uyupiriwaa uwike uvelya kurara kiti kua tiwa uwike kurara rukena rupi.
2Maa kua uwikewaa kurara rukena rupi aete kua usaruwaa uvelya.
3Asui kua usaruwaa kurara rukena upirari ixupe asui kuaita uvelyaita aintausendu inyenga, asui usenui kuaita uvelyaita aintarera rupi asui urasu ainta kurara sui.
4Asui urasu irumu panye iuvelyaita kurara sui usu aintarunde asui aintausu sakakuera nyãse aintaukunyeseri inyenga.
5Maa timaa aintausu sakakuera kua tiwa aintaukunyeseri, anyunte aintauyawawa isui nyãse tiaintaukunyeseri aintanyenga kuaita tiwaita aintaukunyeseri.
6Jesus umbeu ainta supe kua umbue aramawaa ipupe ainta maa tiaintaukuawa mayesawataa ae kua umbeuwaa ainta supe.
7Asui Jesus umbeu mukuĩsawa ainta supe, supiwa hambeu penye arama:
—Ixete kua uvelyaita rukena.
8Panye kuaita uriwaita kuera serundere mundawasuita ainta asui kuaita uvelyaita timaa aintausendu ainta supe.
9Ixete kua ukena, awa kuri uwike seirumu uyumukaturu kuri, uwike kuri usemu kuri asui uwasemu kuri umbau aramawaa.
10Kua mundawasu uri umunda arama uyuká arama yuiri umuaiwa arama yuiri, maa ixe hayuiri haxari arama ainta supe sikuesawa turusuwaa.
11Ixete kua usaruwaa purangawaa. Kua usaruwaa purangawaa uxari aintauyuká ae iuvelyaita resewara.
12Kua upurakiwaa timaa usaruwaa uvelya ae timaa iyaraita kuaita uvelyaita, umaa irumu uri kua yawarate asui uyawawa uxari kuaita uvelyaita asui kua yawarate upisika ainta asui umusãi ainta.
13Kua upurakiwaa uyawawa nyãse upurakiwaa ae, timaa arama ixupe kuaita uvelyaita.
14Ixete kua usaruwaa purangawaa, hakunyeseri kuaita seuvelyaita asui aintaukunyeserite ixe.
15Kuaye sepaya ukunyeseriwaa yawe ixe yawete yuiri hakunyeseri sepaya, asui haxari aintauyuká ixe seuvelyaita resewara.
16Hariku amuita uvelyaita tiwaita uiku ike kua kurara upe, harikute harasu aintayuiri asui aintausendu kuri senyenga. Asui kuri yepe bandute ainta yepenyute yuiri kua usaruwaa ainta.
17Sesewara sepaya ugustari ixe, nyãse haxari aintauyuká ixe hapaka aramate yuiri ixe.
18Tiawa uxari hamanu maa serimutara haxari aintauyuká ixe. Hapuderi haxari aintauyuká ixe, hapuderi yuiri hapaka ixe. Kuaye sepaya uxariwaa hamunya.
Mukuĩ aintaumanduarisawa
19Kua umbeuwaa uxari yuiri mukuĩ aintaumanduarisawa kuaita judewita.
20Siya aintasuiwaraita aintaumbeu:
—Uriku demuniu, yakangayawa ae, marantaa pesendu ixupe?
21Amuita unyee:
—Tiumbeu kuaye yepe urikuwaa yawe demuniu, maitaa demuniu upuderi upirari aintaresa kuaita sesaimawaita?
Aintaupurapurandu Jesus
22Asui aintaumunya aintafesta serawaa dedikasão Jeruzalẽ upe.
23Turusu rame parana. Asui Jesus uwata templu upe Salumão ikupiara upe.
24Asui kuaita judewita aintauyumuatiri suaki, aintaunyee ixupe:
—Mairametaa kuri rexari yakuawa awataa inde? Kristu rame maa inde rembeu yande arama satambika.
25Asui Jesus usuaxara ainta, unyee:
—Hambeuwana penye asui tiperuyari kua hambeuwaa, kua hamunyawaa sepaya rera rese aete kua umbeuwaa serese.
26Maa tiperuyari ixe nyãse timaa seuvelyaita penye.
27Seuvelyaita usendu senyenga, hakunyeseri ainta asui aintausu serakakuera.
28Hamee ainta supe arama kua mundu nunkawaa upawa, tikuri mairame aintaukanyemu sesui, tiyuiri awa upuderi uyuka ainta seipu sui.
29Kua sepaya uxariwaa ixe arama ainta kirimbawa piri ae aintasui panye, tiawa upuderi uyuka ainta sepaya ipu sui.
30Yepewasute ixe sepaya irumu.
31Asui kuaita judewita aintaupisika yuiri itaita aintaumburi arama sese.
32Asui Jesus unyee ainta supe:
—Hamukameana pemaa siya sepaya uxariwaita hamunya, mayewaa resewarataa aintasuiwara pemburi ita serese?
33Asui kuaita judewita aintausuaxara ae, aintaunyee:
—Timaa yamburi nerese ita sesewara kua remunyawaita purangawaita maa repurungita resewara puxi, nyãse rembeute Deus inde apigawa pukusawa inde.
34Asui Jesus umbeu ainta supe:
—Maitaa tiserá aintaumpinima kuxima penyenga rupi, hambeu deuste penye?
35Tiyapuderi yamutenyuntu Deus nyenga, umbeu rame deus kuaita umpinimawaa ixupe Deus nyenga,
36Ape marantaa pembeu, repurungita puxi ixupe kua Deus umukaturuwaa kua umunduwaa kua mundu kiti nyãse umbeu ixete Deus raira.
37Tirame hamunya sepaya umunyawaa tepexari pepia serese.
38Maa hamunya rame ae tipukusawa peputari pexari pepia serese pexari pepia sese kua hamunyawaa pekuawa arama sepaya uiku sepia upe haikute yuiri sepaya ipia upe.
39Asui aintauputari yuiri aintaupisika ae maa ueskapari aintaipu sui.
40Asui usu yuiri parana Jurdão ruaxara kiti Juão uyupiruwaa ubatizari ape, asui uiku akiti.
41Asui aintauri siya miraita ipiri, aintaunyee:
—Supiwate, timaa Juão umunya milagri, maa supiwate umbeuwaa panye sese kua.
42Asui siya miraita aintauxari aintapia sese akiti.
Currently Selected:
Juão 10: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO