Chituwa 10
10
Chakuziziswa cha chinkhonde ndi chitatu: zombe
1Sono Ambuya anguti kwaku Mosese, “Ruta, ukawere kwaku Farao; pakuti ndanonopeska mtima wake ndi mtima wa ŵaŵanda ŵake, alinga kuti ndirongo visimikizgu vyangu mukati mwawo. 2Ndipo unene mwana wako munthurumi ndi mzuku wako munthurumi, ndi uli mo ndachitiya ndi ŵaEgipiti, ndi visimikizgu vyo ndaŵawoneska alinga kuti muziŵe kuti ndine Ambuya.”
3Viyo Mosese ndi Aroni ŵangwachisere kwaku Farao ndi ŵanguti kwaku iyo, “Viyo atiti Ambuya, Chiuta wa ŵaHebere, ‘Mpaka zuŵanji ukakananga kujiyuyuwa paurongo pangu? Ŵazomerezge ŵarutenge ŵanthu ŵangu, alinga kuti ŵakanditataliyenge. 4Pakuti asani ukana kuŵazomerezga kuruta ŵanthu ŵangu, awona, lamawa ndikazanga ndi ŵazombe mu charu chako, 5ndipo ŵakaburumutizganga charu chose, mwakuti paulengevi yumoza wangawona charu; ndipo ŵakarghanga vyo vingumujariyanipo pavuli pa matalala, ndipo ŵakarghanga muti wako we wose weniwo ngwakume mu munda, 6ndipo ŵakazazanga mu nyumba zako ndi nyumba za ŵaŵanda ŵako wose ndi za ŵaEgipiti wose; ŵeniwo mbausu pamwenga ambuyako ŵengavi kuŵawona, kwamba pa zuŵa lo ŵangwazijariya pa charu chapasi kufika zuŵa lino.’ ” Sono ŵangung'anamuka ndi ŵangutuwamo mwaku Farao.
7Ndipo ŵaŵanda ŵaku Farao wanguti kwaku iyo, “Mpaka zuŵanji uyu munthu wakatiŵiyanga chiŵana ifwe? Muŵazomerezge yaŵa ŵanthu ŵarutenge, alinga ŵakatataliyenge Ambuya Chiuta wawo; kumbi ndasono undaziŵe kuti Egipiti wanangika?” 8Viyo Mosese ndi Aroni ŵanguŵawezge kwaku Farao; ndipo ŵanguti kwaku wo, “Rutaninge katatalyeni Ambuya Chiuta winu; kweni mbayani ŵakarutanga?” 9Ndipo Mosese wanguti, “Tikarutanga ndi ŵana ŵidu ndi makhongwe ghidu: tikarutanga ndi ŵana ŵidu ŵanthurumi ndi ŵanthukazi, ndipo ndi mberere zidu ndi ng'ombe zidu, chifukwa titenere kwachichitiya dghera Ambuya.” 10Ndipo wanguti kwaku wo “Ambuya ŵaŵe namwe, kuti ndikakuzomerezganinge nadi imwe ndi ŵana ŵinu kuruta cha! Nadi, mwendi kafukwa kaheni mu maghanaghanu ghinu. 11Awa! Rutani, mwanthurumi pe mukati mwinu, ndi mukatataliye Ambuya, pakuti cho ndicho mukweŵeka.” Ndipo wanguŵadikiska pa maso paku Farao.
12Sono Ambuya anguti kwaku Mosese, “Tambaruliya janja lako pa charu cha Egipiti chifukwa cha ŵazombe alinga kuti ŵaze pa charu cha Egipiti, ndi kurgha chakume chose mu charu, chose cho chingusiyika ndi matalala.” 13Viyo Mosese wangutambaruliya ndodo yake pa charu cha Egipiti, ndipo Ambuya anguputiska mphepo yaku vuma pa charu zuŵa lose liya ndi usiku wose wuwa; ndipo kunguti kwacha ndi mlenji mphepo yiya yaku vuma yinguza ndi ŵazombe. 14Ndipo ŵazombe ŵanguza pa charu chose chaEgipiti, ndi ŵangubota pa charu chose cha Egipiti, mdima bi wa ŵazombe wo kale kuti ŵanguwonekapo cha, ndipo kuti ŵakawonekangapo so cha pavuli. 15Pakuti ŵanguburumutizga charu chose, ndipo charu chenga cha mdima bi ndipo ŵangurgha vyakume vyose mu charu chiya, ndi vipasi vyose vyamu miti vyeniyo matalala ghangusiya; palivi kaŵisi nanga nkhamoza kangujako, chingana ndi muti pamwenga chakupanda mu munda, mu charu chose cha Egipiti. 16Sono Farao wangudana Mosese ndi Aroni kwaruŵiruŵi, ndi wanguti, “Ndalakwiya Ambuya Chiuta winu, ndi imwe so. 17Iku sono, ndigowokiyeni ulakwi wangu, kenaka kamoza pe, ndipo ŵeyereni ku Ambuya Chiuta winu, kutuzgako nyifwa iyi kwangu.” 18Viyo ŵangutuwako kwaku Farao ndi ŵanguŵeyere Ambuya. 19Ndipo Ambuya angung'anamuwa mphepo ya nthazi ukongwa yaku zambwe, yeniyo yingusoska ŵazombe ndi kuŵaputiskiya mu Nyanja Yiyera, kuti mungusiyika zombe nanga njumoza cha mu charu cha Egipiti. 20Kweni Ambuya angunonopeska mtima waku Farao, ndipo kuti wanguzomerezga ŵana ŵaku Yisraele kuruta cha.
21Sono Ambuya anguti kwaku Mosese, “Tambaruliya janja lako kuchanya kuti kuŵe mdima pa charu cha Egipiti, mdima uzitu.” 22Viyo Mosese wangutambaruliya janja lake kuchanya ndipo kunguŵa mdima uzitu mu charu chose cha Egipiti mazuŵa ghatatu; 23ŵengavi kuwonana yumoza ndi munyake nanga nkhuti yumoza wasokepo pa malo ghake kwa mazuŵa ghatatu; kweni ŵaYisraele wose ŵenga ndi ukweru mo ŵajanga. 24Sono Farao wangudana Mosese, ndi wanguti, “Rutani, katataliyeni Ambuya, ŵana ŵinu nawo ŵarutenge namwe, kweni viŵetu vinu ndi miskambu yinu pe vijariye vuli.” 25Kweni Mosese wanguti, “Utenere kutizomerezga kuto viŵetu vya sembe yakocha, kuti tikapereke ku Ambuya Chiuta widu. 26Titinere kuruta ndi ng'ombe zidu viyo, kujako kanthu cha, nanga nchiŵeto chimoza, chifukwa titenere kwachipereka nge ndi nsembe ku Ambuya Chiuta widu ndipo kuti tiziŵa cha nchine cho titenere kumutataliya nacho mpaka penipo tafika kuwa.” 27Kweni Ambuya angunonopeska mtima waku Farao ndipo kuti wanguzomerezga cha kuti ŵarutenge. 28Sono Farao wanguti kwaku iyo, “Tuwako kwangu, uchenje kuti ungawonanga so chisku changu cha; chifukwa mu zuŵa lo wazamuwone chisku changu wazamkufwa.” 29Mosese wanguti, “Nchamampha kuti ndiwonenge so chisku chinu cha.”
දැනට තෝරාගෙන ඇත:
Chituwa 10: TongaMw
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Bible Society of Malawi