Genesisi 14
14
Abrama a ponisa Loti.
1A masikwini ya Amrafeli a hosi ya le Xinari, na Arioka a hosi ya le Elasare, na Kedorlaomeri a hosi ya le Elami, na Tidali a hosi ya le Goime,
2va lolwa na Bera a hosi ya le Sodoma, na Birxa a hosi ya le Gomora, na Xinabi a hosi ya le Adma, na Xemebere a hosi ya le Zeboime, na yona a hosi ya le Bela, va nge hi Zoare.
3Lava vontlhe va lo tlhangana le mikoveni ya le Sidime (kwaleyo Bimbini ga Munyu).
4Khume ni mambiri malembe na va khozela Kedorlaomeri, hi lembe ga wu 13 va lo hluwuka.
5Hi lembe ga wu 14 i lota Kedorlaomeri ni tihosi leti a nga wa hi nato, a ta hlasela Refaime le Axterote-Karanaine, na Zuzima le Hamu, ni vaEmime le Xave-Kiriataime,
6ni maHirote le xitsungeni xabye Seire, ku kala ku chikela Elparani, ku nga le xiwuleni.
7Va lo tlhela va wuya Enmixpate, va nge hi Kedexe, va lo ta hlasela a tiko gontlhe ga maAmaleki, ni maAmori laya ma nga wa akile le Hazezon-Tamari.
8Ku lo huma a hosi ya le Sodoma, ni hosi ya le Gomora, ni hosi ya le Adma, ni hosi ya le Zoboime, ni hosi ya le Bela, ku nga Zoare; va lo hloma valwa navo le livaleni la Sidime;
9va lolwa na Kedorlaomeri a hosi ya le Elame, na Tidale a hosi ya le Goime, na Amrafeli a hosi ya le Xinari, na Arioka a hosi ya le Elasare; mune wa tihosi tilwa ni ntlhanu.
10Makunu a tivala ta le Sidime ti wa hi ni minkele ni marope. A tihosi ta le Sodoma ni Gomora ti lo tsutsuma ti wela lomo; a vanwani va lo tsutsumela xitsungeni.
11Va lo teka yontlhe a tshomba ya Sodoma ni Gomora, ni kuga kabye kontlhe, va famba.
12Va lo teka na Loti a nʼwana wa makabye wa Abrama, loyi a nga wa akile le Sodoma, ni tshomba yakwe, va famba.
13A munwe loyi a nga wa ponile i lo ta bikela Abrama, a muHeberu; hakuva i wa tshama mikuhlwini ya Mamre, a muAmori, makabye wa Exkole na Aneri; lavo va wa zwanana na Abrama.
14Laha Abrama a nga wa zwile ku ngalo a xaka gakwe gi khomilwe, i lo hlomisa a tinhenha takwe leti ti belekelweko ndlwini yakwe, va wa hi 318 wa vavanuna, i lo va lanza kala a chikela le Dani.
15I lo avanyisa a vanhu vakwe, i lolwa navo ni wusiku, i lo va hlula, i lo va hlongolisa kala va chikela le Hoba, gi nga xibhabheni xa Damasku.
16I lo teka a tshomba yontlhe, i lo tlhelisa na Loti xaka gakwe, ni vavasati ni vanhu.
Abrama na Melkizedeki.
17Hi nzhako ka kuwuya kakwe hi le koya hlasela Kedorlaomeri ni tihosi leti a nga wa hi nato, ku lo huma a hosi ya le Sodoma a ku mu khinga le livaleni la le Xeva, li nga Livala la hosi.
18Melkizedeki a hosi ya le Salema, i lo neha a kuga ni vinya, i wa hi mupristi wa Nungungulu wa le Hehlahehla. Tis. 110:4; Maheb. 7:1
19I lo mu katekisa, aku: A katekiswe Abrama hi Nungungulu a nga Hehla-hehla, a nwinyi wa tilo ni misava.
20A khesiwe Nungungulu a nga Hehla-hehla, a nga nyikela valala va wena mandleni ya wena. Na Abrama i lo mu nyika za wukhume ka zontlhe.
21A hosi ya le Sodoma yi te ngalo ka Abrama: Nzi nyike a vanhu, wena u teka a tshomba yontlhe.
22Na Abrama i te ngalo ka hosi ya le Sodoma: Nzi tlakusile a canja ga mina ka Jehova, Nungungulu a nga Hehla-hehla, a nwinyi wa tilo ni misava,
23lezaku nzi nga ta teka hambu ni lihinza, ge hambu ni lingoti la xilato, nzi nga ta teka nchumu ka zontlhe lezi zi nga za wena, ku nga taku u wula uku: Nzi mu fumisile Abrama.
24Saseka zalezi zi gilweko hi majaha, ni za ku nyika a vanhu lava va nga famba zinwe na mina; Aneri, na Exkole, na Mamre; lavo a va teke a xiavelo xabye.
Currently Selected:
Genesisi 14: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.